སྔོན་གླེང་།
༄༅། །བོད་ཀྱི་རྒྱལ་དར་འདི་བཞིན། མི་ལོ་སྟོང་ཕྲག་བརྒལ་བའི་རྒྱལ་རབས་ལོ་རྒྱུས་ཁུངས་དག་ཅིག་ཡིན་ཏེ། དེ་ཡང་བོད་རྒྱལ་ལོ་བརྒྱད་བརྒྱ་ཉི་ཤུའི་ནང་ངམ། ཡེ་ཤུའི་འདས་ལོ་བརྒྱ་ཕྲག་བདུན་པའི་ནང་བོད་ཀྱི་རྒྱལ་པོ་སྲོང་བཙན་སྒམ་པོའི་སྐུ་དུས་སུ། བོད་རྒྱལ་ཁབ་ཆེན་པའི་ནང་གསེས་ས་ཡུལ་རྒྱ་ཆེ་ཞིག་རྒོད་ཀྱི་སྟོང་སྡེ་དང་། གཡུང་གི་མི་སྡེ་ཞེས་པའི་ཡུལ་ཚོ་ཁག་ཏུ་དབྱེ་བགོས་མཛད། སྡེ་ཁག་དེ་དག་ནས་དམག་གི་དཔུང་ཚོ་ཆེན་པོ་འབུམ་ཕྲག་ཉི་ཤུ་རྩ་བརྒྱད་དང་། ཁྲི་དྲུག་ཙམ་བསྡུས་ཏེ་བོད་ཀྱི་མཐའ་མཚམས་ཁག་ཏུ་མངགས། བོད་རྒྱལ་ཁབ་ཀྱི་མངའ་རིས་ཡོངས་རྫོགས་བདེ་བར་བསྲུངས། བོད་ཀྱི་ཁྱིམ་མཚེས་རྒྱ་ནག་གི་རྒྱལ་སའང་བོད་དམག་གིས་དབང་བ་སོགས་སྔ་རབས་བོད་མིའི་སྙིང་སྟོབས་དཔའ་མཛངས་ཀྱི་ལོ་རྒྱུས་ནི། དུས་ད་ལྟའི་བར་ཡང་འཛམ་གླིང་འདིའི་ནང་ཁྱབ་གདལ་དུ་ཡོད་པ་ལྟར།
སྐབས་དེའི་བོད་ཀྱི་དམག་དཔུང་གི་ནང་ཚན་གཡོན་རུ་སྟོད་ཀྱི་རུ་དར་སེང་གེ་ཁ་སྤྲོད་དང་། གཡས་རུ་སྨད་ཀྱི་རུ་དར་སེང་གེ་གོང་བཀྲ། གཙང་རུ་ལག་གི་རུ་དར་སེང་གེ་གནམ་སྒྲེང་། དབུ་རུ་སྟོད་ཀྱི་རུ་དར་དམར་པོ་ལ། མེ་ལྕེ་དཀར་པོ་གསལ་བ་ཞེས་སོགས་དམག་རུ་སོ་སོའི་རུ་དར་རྣམ་པ་མི་འདྲ་བ་རེ་རེ་ཡོད་པའི་གནའ་སྲོལ་རིམ་བརྒྱུད་ཀྱིས་ལོ་རབས་ཉི་ཤུ་པ་འདིའི་འགོ་སྟོད་བར་བོད་དམག་ཚོའི་རུ་དར་གཞི་དམར་པོའི་ངོས་སུ་སེང་གེ་ཁ་སྤྲོད་དང་། སེང་གེ་གནམ་མཆོངས་ཀྱི་རི་མོས་བརྒྱན་པ་ཅི་རིགས་ཡོད་ཅིང་། ཕྱིས་སུ་གངས་ལྗོངས་ཆོས་སྲིད་ཡོངས་ཀྱི་བདག་པོ་༧གོང་ས་༧སྐྱབས་མགོན་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་དུས་བསྟུན་འཛམ་གླིང་རྒྱལ་ཁབ་སྤྱི་སྲོལ་འགྲོ་ལུགས་ཡར་རྒྱས་ཀྱི་ལེགས་ཆ་བཏུས་པའི་ཆབ་སྲིད་འཛིན་སྐྱོང་བཀའ་དྲིན་ཆེ་སྐབས། ད་ལྟའི་བོད་ཀྱི་རྒྱལ་དར་འདིའི་རིས་བཀོད་ཀྱང་རྩ་བ་སྔར་ཡོད་ལ་གཞི་བཅོལ་གྱིས་རྒྱས་སྤྲོས་མཛད། བོད་ཀྱི་རྒྱལ་སྲུང་དམག་སྒར་ཚང་མས་རྒྱལ་དར་འདི་གཅིག་གྱུར་ཏུ་བསྒྲེང་འཛུགས་དགོས་པའི་གཞུང་འབྲེལ་ཁྱབ་བསྒྲགས་བསྐྱངས། དུས་དེ་ནས་བཟུང་བོད་དམག་རུ་ཤོག་སོ་སོའི་དམག་དར་ཡང་བོད་ཀྱི་རྒྱལ་དར་འདི་ཉིད་བྱེད་པ་ཡིན།
རྒྱལ་དར་འདིའི་ཚོན་རིས་ཀྱིས་གངས་ལྗོངས་བོད་ཆོས་ལྡན་ཞིང་གི་བཀོད་པ་དང་། བོད་མི་རིགས་ཀྱི་སྤྱི་ཚོགས་གོམས་གཤིས། བོད་གཞུང་གི་ཆབ་སྲིད་འཛིན་སྐྱོང་སོགས་གང་ཅིའི་ཁྱད་ཆོས་གསལ་པོར་མཚོན་པ་དང་། བོད་ནི་འཛམ་གླིང་ནང་རྒྱལ་ཁབ་རྙིང་ཁུངས་ཀྱི་གྲས་ཤིག་ཡིན་པའི་རྒྱལ་རབས་ལོ་རྒྱུས་གསལ་པོར་སྟོན་གྱི་ཡོད་པར་བརྟེན། ཆོལ་ཁ་གསུམ་དུ་གྲགས་པའི་བོད་ཡུལ་ཁྱོན་གྱི་སྐྱེ་བོ་རིས་སུ་མ་ཆད་པས་རྒྱལ་དར་འདི་བཞིན་རང་གི་ཕ་མེས་ཀྱིས་བཞག་པའི་བོད་རྒྱལ་ཁབ་ཀྱི་སྤྱི་ནོར་བླ་ན་མེད་པ་ཞིག་ཡིན་པར་གཅིག་གྱུར་ཏུ་ངོས་འཛིན་དང་། གཙིགས་མཐོང་ཤིན་ཏུ་ཆེན་པོ་བྱས་དང་བྱེད་བཞིན་ནོ།།
འགྲེལ་བཤད།
- དབུས་སུ་ལྷུན་སྟུག་གངས་ཀྱི་རི་བོ་བརྗིད་ཆགས་སུ་གནས་པས་གངས་རིས་བསྐོར་བའི་ཞིང་ཞེས་ཡོངས་སུ་གྲགས་པའི་བོད་རྒྱལ་ཁབ་ཆེན་པའི་ཡུལ་གྱི་བཀོད་པ་མཚོན།
- ནམ་མཁའི་ངོས་སུ་འོད་མདངས་དམར་པོ་དྲུག་འཕྲོ་བས། སེ་དང་། རྨུ། ལྡོང་། སྟོང་། འབྲུ། དབྲ་སྟེ་བོད་མི་རིགས་ཀྱི་ཕྱི་མོ་མིའུ་གདུང་དྲུག་མཚོན།
- རིགས་ཀྱི་ཁ་དོག་དམར་པོ་དང་། ནམ་མཁའི་ཁ་དོག་སྔོ་ནག་སྤེལ་བས། ་རིང་ནས་འགོ་བའི་ལྷ་སྲུང་དམར་ནག་གཉིས་ཀྱིས་བསྟན་སྲིད་སྲུང་སྐྱོང་གི་འཕྲིན་ལས་གཡེལ་མེད་དུ་སྒྲུབ་པར་མཚོན།
- གངས་རིའི་རྩེ་ནས་ཉི་མ་ཤར་བའི་འོད་ཟེར་རྒྱ་ཁྱབ་ཏུ་འཕྲོ་བས། བོད་ལྗོངས་སྐྱེ་འགྲོ་ཡོངས་ཀྱི་རང་དབང་ཆོས་འབྱོར་བདེ་སྐྱིད་ཀྱི་སྣང་བར་ཀུན་སྙོམས་སུ་ལོངས་སྤྱོད་པ་མཚོན།
- གངས་རིའི་ངོགས་སུ་མི་འཇིགས་གདོང་ལྔ་འབར་བའི་སེང་གེ་ཟུང་རྣམ་པར་འགྱིངས་བས། ་ཆོས་སྲིད་ཟུང་དུ་འབྲེལ་བའི་རྒྱལ་ཐབས་ཆབ་སྲིད་ཀྱི་འཕྲིན་ལས་ཀུན་ལས་རྣམ་པར་རྒྱལ་བ་མཚོན།
- གོང་ན་ནོར་བུ་ཁ་དོག་གསུམ་ལྡན་འདོ་འབར་བ་མཛེས་པས། བོད་མི་ཡོངས་ཀྱིས་རྟག་ཏུ་སྐྱབས་གནས་དཀོན་མཆོག་རིན་ཆེན་རྣམ་གསུམ་གཙུག་ཏུ་བཀུར་བ་མཚོན།།
- སེང་གེ་གཉིས་ཀྱི་ལག་ཏུ་ནོར་བུ་དགའ་འཁྱིལ་ཁ་དོག་གཉིས་ལྡན་ཞིག་བཟུང་བས། ལྷ་ཆོས་དགེ་བ་བཅུ་དང་། མི་ཆོས་གཙང་མ་བཅུ་དྲུག་སྙིང་པོར་གྱུར་པའི་ལུགས་ཟུང་བླང་དོར་གྱི་རང་ཁྲིམས་གཅེས་སྲུང་བྱེད་པ་མཚོན།
- མཐའ་ལྕགས་ཁ་དོག་སེར་པོས་བརྒྱན་པས། གསེར་སྦྱང་བཙོ་མ་ལྟ་བུའི་སངས་རྒྱས་ཀྱི་བསྟན་པ་ཕྱོགས་དུས་མུ་མེད་དུ་དར་ཞིང་རྒྱས་པ་མཚོན་པ་བཅས་སོ།།