༢༠༡༠ ཟླ་ ༡༡ ཚེས་ ༡༥ རེས་གཟའ་ཟླ་བ།

༄༅། །འདི་གར་བོད་མིའི་རང་དབང་རྩོམ་སྒྲིག་པས་ཧི་རོ་ཤི་མ་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༡༡ ཚེས་ ༡༣ ཉིན་གྱི་སྔ་དྲོ་༸གོང་ས་མཆོག་གིས་ཉི་ཧོང་གི་གྲོང་ཁྱེར་ཧི་རོ་ཤི་མའི་གྷ་རནཌ་པེ་ལེ་སིའི་མགྲོན་ཁང་དུ་ཨ་རིའི་གསར་འགྱུར་དུས་དེབ་དུས་བབ་ཀྱི་གསར་འགོད་པ་དང་ཉི་ཧོང་གི་གསར་འགྱུར་དུས་དེབ་ཁ་ཏེ་གྷ་ཧོ་ཞེས་པའི་གསར་འགོད་པ་ཁག་གཅིག་གི་དྲི་བར་བཀའ་ལན་སྩལ་ཡོད། དེ་ཡང་བོད་རང་བཙན་དང་རང་སྲིད་རང་སྐྱོང་གི་གནས་བབ་སྐོར་གྱི་དྲི་བ་ཕུལ་བར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། ང་ཚོའི་ལངས་ཕྱོགས་དེ་ཕྱི་ལོ་ ༡༩༧༠ ཙམ་ནས་གསལ་པོ་ཞེ་དྲག་ཡོད། ངོས་རང་པེ་ཅིང་དུ་མའོ་ཙེ་ཏུང་དང་མཇལ་འཕྲད་བྱུང་ནས་བོད་དུ་ཕྱིར་ལོག་སྐབས་སེམས་ནང་རེ་བ་དང་སེམས་ཤུགས་ཆེན་པོ་ཞིག་ཡོད་པ་མ་ཟད། སྐབས་དེར་ངོས་རང་གུང་ཁྲན་གྱི་ཚོགས་མི་བྱེད་འདོད་ཡོད་སྐོར་བརྗོད་པ་ཡིན། དོན་ཚན་བཅུ་བདུན་དེ་ཡང་རྒྱལ་ཁབ་གཅིག་ལ་ལམ་ལུགས་གཉིས་གཞི་བཅོལ་ནས་བཞག་པ་ཞིག་རེད། འོན་ཀྱང་རྒྱ་ནག་གཞུང་གིས་ཁས་ལེན་དེ་དག་ལག་ལེན་བསྟར་མེད། ཕྱི་ལོ་ ༡༩༥༩ ལོར་གནས་སྟངས་ཧ་ཅང་དཀའ་ངལ་ཅན་ཞིག་ཆགས་ཏེ་མཐར་ང་ཚོ་བཙན་བྱོལ་དུ་ཡོང་དགོས་བྱུང་བ་རེད། ཕྱི་ལོ་ ༡༩༧༠ ཙམ་ནས་བོད་དུ་དམ་བསྒྲགས་ཅུང་ལྷོད་ཏུ་སོང་སྐབས་ང་ཚོས་ལངས་ཕྱོགས་གསལ་པོ་ཞིག་བཟུང་དགོས་པ་མཐོང་སྟེ་བཙན་བྱོལ་བོད་མི་ཚོས་བགྲོ་གླེང་ལྷུག་པོ་བྱས་མཐར་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་དེ་ང་ཚོའི་ལངས་ཕྱོགས་བཟུང་རྒྱུའི་མོས་མཐུན་བྱུང་ཡོད། སྐབས་དེ་ནས་ང་ཚོའི་ལངས་ཕྱོགས་དེ་ཧ་ཅང་ཁ་གསལ་ཐོག་རྒྱ་ནག་གཞུང་དང་ལྷན་ཐེངས་འགའ་ཤས་འབྲེལ་མོལ་བྱས་ཡོད་ཀྱང་ད་བར་བཟང་ཕྱོགས་ཀྱི་འགྱུར་བ་གང་ཡང་བྱུང་མེད། ཕྱི་ལོ་ ༢༠༠༨ ལོར་དམིགས་བསལ་ཚོགས་ཆེན་ཞིག་ཚོགས་ཏེ་མ་འོངས་ང་ཚོའི་ལངས་ཕྱོགས་ཇི་འདྲ་བཟུང་དགོས་མིན་སྐོར་བགྲོ་གླེང་བྱེད་སྐབས་བོད་མི་ཉུང་ཤས་ནས་རང་བཙན་གཙང་མའི་ལངས་ཕྱོགས་ལ་མོས་མཐུན་བྱས་ཡོད་ཀྱང་བོད་མི་མང་ཆེ་བས་མིང་དོན་མཚུངས་པའི་རང་སྲིད་རང་སྐྱོང་གི་ལངས་ཕྱོགས་བཟུང་ཡོད། དེར་བརྟེན་ང་ཚོས་རང་བཙན་རྩོད་ཀྱི་མེད། ང་ཚོས་སོ་སོའི་རིག་གཞུང་དང་ལེགས་བྱང་སྲུང་སྐྱོབ་ཀྱི་ཐོབ་ཐང་དང་རང་དབང་རྩོད་བཞིན་ཡོད། སྲིད་འཛིན་ཧུའུ་ཅིན་ཐའོ་རྒྱ་ནག་གི་སྲིད་འཛིན་དུ་བསྐོ་བཞག་བྱུང་རྗེས་ངོས་ལ་རེ་བ་ཏོག་ཙམ་བྱུང་ཡོད་ཀྱང་འགྱུར་བ་གང་ཡང་ཕྱིན་མེད། ཕྱི་ལོ་ ༢༠༠༨ ལོར་ངོས་ཀྱིས་རྒྱ་ནག་གཞུང་ལ་ཡིད་ཆེས་ཆུང་དུ་འགྲོ་བཞིན་ཡོད་ནའང་རྒྱ་ནག་མི་མང་ལ་ཡིད་ཆེས་སྔར་བས་ཤུགས་ཆེ་བ་ཡོད། ལྷག་པར་རྒྱ་རིགས་ཤེས་ཡོན་ཅན་གྱི་ཁྲོད་ནས་ང་ཚོར་རྒྱབ་སྐྱོར་ཧ་ཅང་ཤུགས་ཆེ་བྱེད་བཞིན་ཡོད་པ་དེ་ངོས་རང་ངོ་མཚར་སྐྱེས་བྱུང་། སྲིད་འཛིན་ཧུའུ་ཅིན་ཐའོས་འཆམ་མཐུན་གྱི་སྤྱི་ཚོགས་བསྐྲུན་རྒྱུའི་འཆར་གཞི་དེར་ངོས་རང་གིས་མཐའ་གཅིག་ཏུ་རྒྱབ་སྐྱོར་ཞུ་བཞིན་ཡོད་ཀྱང་། འཆམ་མཐུན་གྱི་སྤྱི་ཚོགས་ཟེར་བ་དེ་ཡིད་ཆེས་དང་གུས་བརྩིར་རག་ལུས་ཡོད། འཚེ་བ་དང་ཞེ་སྣང་འོག་འཆམ་མཐུན་སྤྱི་ཚོགས་ཡོང་མི་ཐུབ། སྲིད་འཛིན་ཧུའུ་ཅིན་ཐའོ་ཡི་དམིགས་ཡུལ་འགྲིག་ཀྱང་ཐབས་ལམ་ནོར་བ་རེད་ཅེས་བཀའ་ལན་སྩལ།
དེ་བཞིན་སྐབས་དེར་རྒྱ་མི་རིགས་ནོ་བེལ་ཞི་བདེའི་གཟེངས་རྟགས་ཐོབ་མཁན་སྐུ་ཞབས་ལིའུ་ཞའོ་པོ་སྐོར་གྱི་དྲི་བར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། ངོས་ཀྱིས་སྐུ་ཞབས་ལིའུ་ཞའོ་པོས་རྒྱ་ནག་ནང་མང་གཙོ་དང་ཕྱི་གསལ་ནང་གསལ་དགོས་པའི་བསམ་ཚུལ་དེར་རྒྱབ་སྐྱོར་ཤུགས་ཆེ་བྱེད་ཀྱི་ཡོད། ཁོང་གི་མངོན་འདོད་དེས་ཕུགས་སུ་རྒྱ་ནག་མི་མང་ཚོར་ཕན་ཐོགས་ཡོད། སྐུ་ཞབས་ལིའུ་ཞའོ་པོས་བཏོན་པའི་ ༢༠༠༨ ལོའི་རྩ་འཛིན་ཡིག་ཆ་དེར་ངོས་ཀྱིས་རྒྱབ་སྐྱོར་ཞུ་རྒྱུ་བྱུང་། ཁོང་ལ་ནོ་བེལ་ཞི་བདེའི་གཟེངས་རྟགས་གནང་བ་དེ་ཁོང་གི་བྱས་རྗེས་ལ་ངོས་འཛིན་ཐོབ་པ་ཞིག་ཡིན་པ་ལས་ཁོང་གིས་རྒྱ་ནག་སྲིད་གཞུང་མགོ་རྟིང་སློག་ཐབས་བྱས་པ་ལས་གནང་བ་ཞིག་མིན། རྒྱ་ནག་གི་སྲིད་བློན་སྐུ་ཞབས་ཝུན་ཅ་པོས་ཀྱང་དམངས་གཙོ་དང་རང་དབང་སྐོར་གཏམ་བཤད་བྱས་ཡོད། དེ་ནི་བཟང་ཕྱོགས་ཀྱི་རྣམ་པ་ཞིག་རེད་ཅེས་བཀའ་ལན་སྩལ།
གཞན་ཡང་བོད་མི་ཚོའི་སེམས་ནང་དངངས་འཚབ་དང་བོད་མི་འགའ་ཤས་ཀྱིས་རང་བཙན་གཙང་མ་འདོད་ཀྱི་ཡོད་པའི་གནས་སྟངས་སྐོར་ལ་དྲི་བ་ཕུལ་བར་༸གོང་ས་མཆོག་གིས་བཀའ་ལན་སྩལ་དོན། རྒྱ་ནག་གཞུང་འཛིན་པ་ཚོས་ཏཱ་ལའི་བླ་མ་མེད་པ་ཆགས་རྗེས་བོད་ཀྱི་གནད་དོན་རང་བཞིན་གྱི་ཡལ་འགྲོ་རྒྱུ་ཡིན་པར་ཡིད་ཆེས་བྱེད་ཀྱི་ཡོད། དེ་ནོར་འཁྲུལ་རེད། བོད་ཀྱི་ཆོས་དང་རིག་གཞུང་། ལྷག་པར་སྐད་ཡིག་ཧ་ཅང་ཕྱུག་པོ་ཡོད་པ་དང་ཆབ་སྲིད་ཀྱི་ལོ་རྒྱུས་གཏིང་ཟབ་ཡོད་པ་དེ་དག་གིས་ད་ཆ་བོད་མི་ཚོའི་ངོ་བོ་མཚོན་པའི་ངོས་འཛིན་དེ་ཤུགས་ཆེ་རུ་འགྲོ་བཞིན་ཡོད། ཏཱ་ལའི་བླ་མའི་མཚན་གནས་དེ་ལོ་ ༥༠༠ ཙམ་ལས་ཕྱིན་མེད། བོད་པའི་ལོ་རྒྱུས་དེ་ལོ་ངོ་ ༣༠༠༠ ཙམ་ཕྱིན་ཡོད། ད་ཆ་བཙན་བྱོལ་བོད་མི་ཚོར་མང་གཙོའི་ལམ་ལུགས་འོག་ཐད་ཀར་མི་མང་གིས་འོས་འདེམས་བྱས་པའི་བཀའ་བློན་ཁྲི་པ་ཞིག་ཀྱང་ཡོད་ཅེས་བཀའ་ལན་སྩལ།།