༢༠༡༧ ཟླ་ ༨ ཚེས་ ༡༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༧ ཟླ་ ༨ ཚེས་ ༡༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་གྲོང་ཁྱེར་མུམ་བྷེ་ནང་དུ་ཆོས་ལུགས་མཐུན་སྒྲིལ་གྱི་ལམ་ནས་འཛམ་གླིང་ཞི་བདེ་སྐྲུན་ཐབས་སྐོར་བཀའ་སློབ་སྩལ་ཡོད།
དེ་ཡང་རྒྱལ་ཡོངས་རྩེད་འགྲན་ཚོགས་ཁང་ཆེན་མོའི་ནང་དུ་ཚོགས་བཅར་བ་མི་གྲངས་ ༤༠༠༠ བརྒལ་བ་འདུ་འཛོམས་ཐོག་གཅེར་བུ་བའི་བླ་ཆེན་ཨཱ་ཅཱརྱ་ལོ་ཀེཤམུ་ནི་ Acharya Dr. Lokesh Muni མཆོག་གིས་ཕེབས་བསུའི་སྣེ་ལེན་གཟབ་རྒྱས་ཞུས། མཛད་སྒོའི་ཐོག་མར་༸གོང་ས་མཆོག་དང་ཨཱ་ཅཱརྱ་ལོ་ཀེཤམུ་ནི་མཆོག སྭ་མི་རཱམ་དེབ་ Swami Ramdev མཆོག་བཅས་ཀྱིས་སྣང་གསལ་ཞལ་ཕྱེ་མཛད་པ་དང་སྦྲགས། བླ་ཆེན་རྣམ་པར་འཚམས་ཞུའི་གོས་གཟན་དང་ཕྱག་རྟགས་འབུལ་ལམ་ཞུས།
དེ་ནས་ཐོག་མར་རྒྱ་གར་ནུས་ཤུགས་བློན་ཆེན་སྐུ་ཞབས་པི་ཡུཤི་གོ་ཡལ་མཆོག་གིས་༸གོང་ས་མཆོག་གིས་དབུས་བླ་ཆེན་རྣམ་པར་བསྔགས་བརྗོད་རྒྱ་ཆེ་ཞུས་པ་དང་སྦྲགས། དེང་སྐབས་འཛམ་གླིང་ནང་གདོང་ལེན་བྱེད་དགོས་པའི་ཛ་དྲག་གི་དཀའ་ངལ་ཆེ་ཤོས་ནི། འཇིགས་སྐུལ་དྲག་སྤྱོད་པ་དང་གོ་ལའི་ཁོར་ཡུག་གི་ཚ་དྲོད་ཧ་ཅང་མྱུར་པོའི་ཐོག་ནས་རྒྱས་བཞིན་པ་བཅས་ཡིན་སྐོར་དང་། རྒྱ་གར་ལ་མཚོན་ན་ཁོར་ཡུག་འབགས་བཙོག་ལ་གདོང་ལེན་བྱེད་བཞིན་ཡོད་ཀྱང་བསམ་བློའི་རང་དབང་སྲུང་སྐྱོབ་བྱ་རྒྱུ་གལ་ཆེཡིན་སྟབས། བསམ་བློའི་རང་དབང་ལ་བརྩི་མེད་བཏང་བ་དེས་སྤྱི་ཚོགས་ནང་ཡར་རྒྱས་འགྲོ་རྒྱུར་འགོག་རྐྱེན་བཟོ་བཞིན་ཡོད་སོགས་གསུངས།
དེ་ནས་རྒྱ་གར་གློག་བརྙན་འཁྲབ་སྟོན་པ་ཝི་ཝེཀ་ཨོ་བྷོ་རོའི་ Vivek Oberoi ལགས་ཀྱིས་གསུང་བཤད་གནང་རྗེས་ཐོག་མར་ཁ་ཆེའི་བླ་ཆེན་ཀལ་བྷེ་སི་དིག་མཆོག་ Dr. Kalbe Sadiq མཆོག་གིས་གསུང་བཤད་གནང་། དེ་རྗེས་སིག་གི་བླ་ཆེན་གྱ་ནི་གུར་བྷ་ཅན་སིངྒ་ Giani Gurbachan Singh མཆོག་དང་། ཡེ་ཤུའི་བླ་ཆེན་ཕེ་ལིག་སི་ཨེན་ཐོ་ནི་མ་ཆ་ཌོ་ Archbishop Felix Anthony Machado མཆོག་སོགས་ཀྱིས་གསུང་བཤད་གནང་རྗེས་ཧིན་དུའི་བླ་ཆེན་སྭ་མི་རཱམ་དེབ་མཆོག་གིས་གསུང་བཤད་གནང་།
དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། ངོ་མཚར་ཅན་གྱི་ལྷན་ཚོགས་འདི་ལྟ་བུར་བཅར་རྒྱུ་བྱུང་བ་ངོས་རང་ཧ་ཅང་དགའ་པོ་བྱུང་། འདིར་འཛོམས་པའི་བླ་ཆེན་རྣམ་པ་ཚོར་མཚོན་ན། རྒྱུན་དུ་ཆོས་ཕྱོགས་ཀྱི་བྱེད་སྒོ་ཙམ་ལ་དབུ་འཁོར་ནས་མ་བཞུགས་པར་སྤྱི་ཚོགས་ནང་གི་དཀའ་ངལ་མང་པོ་ཞིག་ཁ་ཡོད་ལག་ཡོད་འཚེ་བ་མེད་པའི་ལམ་ནས་སེལ་ཐབས་གནང་དང་གནང་མུས་རེད། ནམ་རྒྱུན་ནས་ངོས་ཀྱིས་བརྗོད་བཞིན་ཡོད། ངོས་རང་ད་ལྟ་འཚོ་བཞིན་པའི་འཛམ་གླིང་མི་འབོར་ཐེར་འབུམ་བདུན་ཡོད་ཁོངས་ནས་གཅིག་ཡིན། ལུས་སེམས་དང་སེམས་ཚོར་གང་གི་ཆ་ནས་ང་ཚོ་ཚང་མ་འགྲོ་བ་མི་ཡིན་པ་གཅིག་གྱུར་རེད། འདིར་མཚོན་ན་ང་ཚོའི་གྲོགས་པོ་འགའ་ཤས་གདོང་ལ་སྤུ་ཧ་ཅང་མང་པོ་ཡོད། ངོས་ལ་མཚོན་ན་གདོང་ལ་སྤུ་མེད། འོན་ཀྱང་གཞི་རྩའི་ཆ་ནས་ང་ཚོ་ཚང་མ་འགྲོ་བ་མི་ཡིན་པ་གཅིག་གྱུར་རེད། འཛམ་གླིང་མི་འབོར་དུང་ཕྱུར་ ༡༣ ཡོད་པ་ཚང་མས་བདེ་བ་འདོད་ཅིང་སྡུག་བསྔལ་མི་འདོད་མཁན་གཅིག་པ་རེད། སྡུག་བསྔལ་མི་འདོད་ཀྱང་ང་ཚོར་དཀའ་ངལ་མང་པོ་ཞིག་འཕྲད་བཞིན་ཡོད། དཀའ་ངལ་དེ་དག་ཕལ་ཆེ་བ་མིས་བཟོས་པ་ཆགས་ཡོད། དེར་བརྟེན་རང་བཞིན་གྱིས་དེར་འགལ་ཟླ་ཞིག་འདུག སུ་གཅིག་ལའང་དཀའ་ངལ་མི་འདོད་ཀྱང་དང་དུ་བླངས་ནས་དཀའ་ངལ་བཟོ་བཞིན་ཡོད། འོ་ན་འདི་གང་འདྲ་ཆགས་པ་རེད་བརྗོད་ན། ང་ཚོའི་ཉོན་མོངས་ལ་བརྟེན་ནས་བྱུང་བ་རེད། ཞེ་སྡང་ང་རྒྱལ་དང་ཕྲག་དོག་གི་བསམ་བློ་དེ་དག་གཙོ་བོ་རང་གཅེས་འཛིན་གྱི་བློ་དེར་བརྟེན་ནས་ཡོང་བཞིན་ཡོད། རང་གཅེས་འཛིན་གྱི་བློ་དེས་གཞན་ཡལ་བར་དོར་བཞིན་ཡོད་པ་མ་ཟད། དེ་ལ་བརྟེན་ནས་འཇིགས་སྣང་དང་། དེས་བསམ་བློའི་ནང་ལྷིང་འཇགས་མེད་པ་དང་། བསམ་བློ་ལྷིང་འཇགས་མེད་སྟབས་ཏོག་ཙམ་མ་འགྲིག་པ་བྱུང་ན་ལམ་སེང་རླུང་ལངས་ནས་འཚེ་བའི་ལས་བརྩམ་རྒྱུའི་ཉེན་ཁ་ཧ་ཅང་ཡོད། དེར་བརྟེན་ད་ཆ་ང་ཚོས་འཛམ་གླིང་ཞི་བདེ་དགོས་ན་དང་ཐོག་རང་རྒྱུད་ཞི་ཞིང་དུལ་བ་དགོས། དངོས་ཡོད་གནས་ཚུལ་འདི་ལྟར་ཡིན་པ་དེ་ད་ཆ་ང་ཚོས་ཁ་ཡོད་ལག་ཡོད་ཐོག་ངོས་འཛིན་བྱ་དགོས་པའི་དུས་ལ་བབ་འདུག
རྒྱ་གར་ལྟ་བུར་མཚོན་ན་ལོ་ངོ་སྟོང་གི་རིང་ནས་འཚི་མེད་ཞི་བའི་ལྟ་གྲུབ་གཞིིར་བཟུང་ལག་བསྟར་བྱ་རྒྱུའི་གོམས་གཤིས་ཤིག་ཡོད། འཚེ་མེད་ཞི་བའི་ལྟ་གྲུབ་དེ་ཡང་གཙོ་བོ་བྱམས་སྙིང་རྗེའི་བསམ་པས་ཀུན་ནས་བླངས་པ་ཞིག་དགོས། དཔེར་ན་ཁ་ནས་སྐད་ཆ་སྙན་པོ་དང་འདྲ་ཆགས་པོ། རྣམ་འགྱུར་ཡང་འཛུམ་མདངས་དང་བཅས་དོན་དུ། བསམ་བློའི་ཞེ་ཕུགས་དེར་རང་འདོད་ཁོག་བཅུག་བྱེད་ན་འཚེ་བའི་ལས་ཆགས་བཞིན་ཡོད། དེ་ལས་ལྡོག་སྟེ་ཕ་མ་དང་དགེ་རྒན་ཚོས་ཕྲུ་གུར་ཚིག་རྩུབ་པོ་དང་ངོ་གནག་པོ་བསྟན་ཡང་གཙོ་བོ་ཕྲུ་གུའི་མདུན་ལམ་ཡག་པོ་ཞིག་བྱུང་ན་བསམ་པའི་ཀུན་སློང་ཞིག་ཡོད་སྟབས་འཚེ་བ་ཆགས་ཀྱི་མེད། འཚེ་བའི་ལས་ཡིན་མིན་ནི་གཙོ་བོ་ལུས་པོའི་རྣམ་འགྱུར་གྱིས་ཐག་གཅོད་མི་བྱས་པར་ཀུན་སློང་ལ་རག་ལུས་ཡོད། དེར་བརྟེན་ང་ཚོས་བྱམས་སྙིང་རྗེའི་བསམ་བློར་དོ་སྣང་མང་ཙམ་སྤྲད་དགོས། ཚན་རིག་པ་ཚོས་ཀྱང་བརྟག་དཔྱད་ཀྱི་ལམ་ནས་མིའི་ལྷན་སྐྱེས་ཀྱི་རང་བཞིན་དེ་བྱམས་བརྩེ་ལྡན་པ་ཞིག་ཡིན་པ་ར་སྤྲོད་ཐུབ་ཡོད། ལྷག་པར་རྟག་ཏུ་འཇིགས་སྣང་དང་དོོགས་པ་བྱེད་ནས་བསྡད་ཚེ་ལུས་ཀྱི་ཟུངས་ཉམས་བཞིན་ཡོད་པ་དང་། བྱམས་བརྩེའི་བློ་དེས་ལུས་པོའི་འཕྲོད་བསྟེན་ལའང་ཕན་བཞིན་ཡོད་པ་ཚན་རིག་པས་ར་སྤྲོད་བྱས་ཡོད། ཅེས་སོགས་ཀྱི་བཀའ་སློབ་སྩལ་རྗེས་དྲི་བ་རྣམས་ལ་བཀའ་ལན་སྩལ།།
