༢༠༡༠ ཟླ་ ༡༡ ཚེས་ ༡༢ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༡༡ ཚེས་ ༡༢ ཉིན་བོད་གཞུང་ཕྱི་དྲིལ་ལས་ཁུངས་ཀྱི་ལྷག་པ་ཚེ་རིང་དྲན་རྟེན་ཚོགས་ཁང་དུ་སྔ་དྲོ་ཆུ་ཚོད་ ༡༠ ཐོག་དབུས་འོས་བསྡུ་ལྷན་ཁང་གི་འགན་འཛིན་འཇམ་དཔལ་ཆོས་བཟང་མཆོག་གིས་གཙོས་འོས་བསྡུ་འགན་འཛིན་ལས་འཕར་གཉིས་ནས་བཀའ་ཁྲི་སྐབས་གསུམ་པ་དང་སྤྱི་འཐུས་སྐབས་བཅོ་ལྔ་པའི་སྔོན་འགྲོའི་འོས་བསྡུའི་གྲུབ་འབྲས་རྣམས་གསར་འགོད་གསལ་བསྒྲགས་གནང་ཡོད། དེ་ཡང་ཐོག་མར་
འོས་བསྡུའི་འགན་འཛིན་མཆོག་གིས་འགྲེལ་བརྗོད་གནང་དོན། འོས་བསྡུའི་ལམ་རིམ་གཏན་འབེབ་བྱས་ཏེ་སྔོན་འགྲོའི་འོས་གཞི་ཚར་བ་རེད། སྔོན་འགྲོའི་འོས་བསྡུའི་གྲུབ་འབྲས་གསལ་བསྒྲགས་མ་བྱས་གོང་འོས་བསྡུ་དང་འབྲེལ་བའི་དོན་ཚན་ཁ་ཤས་འགྲེལ་བཤད་ཞུ་གི་ཡིན།
དང་པོ། འོས་ཤོག་འཕེན་རྒྱུའི་ཆ་རྐྱེན་ཆ་ཚང་ཡོད་ཀྱང་། སྔོན་འགྲོའི་འོས་བསྡུ་བྱ་རྒྱུར་ང་ཚོས་དེབ་སྐྱེལ་བྱེད་རྒྱུའི་དུས་ཚོད་གཏན་འབེབ་བཟོས་པ་དེའི་ནང་དེབ་སྐྱེལ་བྱེད་མ་ཐུབ་པར་བརྟེན། སྔོན་འགྲོའི་འོས་འཕེན་རྒྱུ་རག་གི་མེད། དེ་རིགས་ས་ཕྱོགས་གང་སར་ཡོད་པ་ང་ཚོར་འབྲེལ་བ་བྱེད་མཁན་གང་ཙམ་ཡོང་གི་འདུག རྒྱ་གར་གྱི་གྲོང་ཁྱེར་ཆེ་ཁག་ནང་བཙན་བྱོལ་བོད་གཞུང་གི་ལས་ཁུངས་མེད་པའི་མཐོ་སློབ་ཁག་ནང་འོས་ཤོག་འཕེན་རྒྱུའི་ཆ་རྐྱེན་ཚང་བ་དེ་འདྲ་འདུག དཔེར་ན། མེང་ལོར་གྲོང་ཁྱེར་ལྟ་བུར་བོད་པའི་ཕྲུ་གུ་ ༣༠༠ མ་ཟིན་ཙམ་ཡོད་པ་དེ་དག་ནང་ནས་མང་པོ་ཞིག་ལ་འོས་ཤོག་འཕེན་རྒྱུའི་ཆ་རྐྱེན་ཚང་ཡོད་ཀྱང་དེབ་སྐྱེལ་བྱས་མི་འདུག དེར་བརྟེན་སྔོན་འགྲོའི་འོས་བསྡུའི་སྐབས་བོད་པའི་མཐོ་སློབ་ཀྱི་ཕྲུ་གུ་དེ་དག་ལ་འོས་ཤོག་བླུག་རྒྱུའི་གོ་སྐབས་རག་གི་མེད། རྒྱུ་མཚན་དེ་ལྟ་བུར་བརྟེན་འདི་ནས་གྲོས་བསྡུར་བྱས་པ་བརྒྱུད་དེབ་སྐྱེལ་བྱེད་རྒྱུའི་དུས་ཚོད་གཉིས་པ་ཞིག་བཟོ་དགོས་པའི་ཐག་གཅོད་བྱུང་སྟེ་དུས་ཚོད་གཏན་འབེབས་བྱུང་བ་ནི་ཕྱི་ ༢༠༡༠ ཟླ་ ༡༡ ཚེས་ ༣༠ ནས་ལོ་རྗེས་མའི་ཕྱི་ཟླ་ ༡ ཚེས་ ༡༧ བར་དེབ་སྐྱེལ་བྱེད་རྒྱུའི་དུས་ཚོད་ཡིན་པས། ས་གནས་འོས་བསྡུའི་འགན་འཛིན་ཚོས་དེབ་སྐྱེལ་བྱས་མེད་པ་འོས་ཤོག་བླུག་རྒྱུའི་ཆ་རྐྱེན་ཚང་བ་དེ་རྣམས་ལ་དུས་ཚོད་དེའི་ནང་དེབ་སྐྱེལ་གནང་དགོས་ཀྱི་ཡོད། དེབ་སྐྱེལ་བྱས་རྗེས་ང་ཚོར་སྔོན་འགྲོའི་འོས་བསྡུའི་སྐབས་ལ་ས་གནས་སོ་སོ་ནས་དེབ་སྐྱེལ་བྱས་པའི་མིང་གཞུང་འབྱོར་ཡོད་པ་ལས་དེབ་སྐྱེལ་མ་བྱས་པའི་མིང་གཞུང་འབྱོར་མེད། ད་རེས་དེབ་སྐྱེལ་གཉིས་པ་བྱས་ཏེ་མིང་གཞུང་གསར་པ་དེ་དག་ང་ཚོར་དུས་ཚོད་དེ་ཕྱི་ཟླ་ ༡ ཚེས་ ༢༤ འགྱངས་མེད་འབྱོར་དགོས་པ་ཡིན། སྤྱིར་བཏང་འདིའི་ཐོག་བསམ་ཚུལ་མང་པོ་ཡོང་གི་ཡོད་ཀྱང་འོས་བསྡུ་ལས་ཁང་ནས་སྒྲིག་གཞི་གཞིར་བཞག་ང་ཚོས་བྱེད་ཆོག་པ་འདི་ཡིན།
གཉིས་པ། བལ་ཡུལ་ནང་གི་གནས་ཚུལ་དེ་ཡིན། སྤྱིར་བཏང་བལ་ཡུལ་ནང་བོད་མི་གནས་སྡོད་བྱེད་མཁན་མང་པོ་ཞིག་ཡོད། འོས་བསྡུ་ལས་ཁང་དང་ཐད་ཀར་འབྲེལ་བ་ཡོད་པ་ས་གནས་འོས་བསྡུའི་འགན་འཛིན་བལ་ཡུལ་ནང་ཁག་དྲུག་ཡོད་པའི་ནང་བལ་ཡུལ་རྒྱལ་སའི་ནང་ཡོད་འཕགས་ཤིང་དང་མཆོད་རྟེན་ས་གནས་གཉིས་ནས་ཁྱོན་བསྡོམས་འོས་སྒམ་བཅོ་བརྒྱད་ཉེན་རྟོག་པས་འཁྱེར་ཡོད། ཕྱི་ཟླ་ ༡༠ ཚེས་ ༣ ནས་ད་ལྟ་བར་རག་ཐབས་འབད་བརྩོན་བྱས་ཀྱང་མ་རག་པ་བརྟེན་ས་གནས་གཉིས་ནས་ ༡༠༠༠ ལྷག་འཕྲོ་བརླག་ཕྱིན་ཡོད།
གསུམ་པ། བལ་ཡུལ་དང་གནས་སྟངས་གཅིག་མཚུངས་ཤིག་འབྲུག་གི་ནང་གྲངས་ཆགས་ཡོད། འབྲུག་ནང་བོད་པའི་གཞིས་ཆགས་ཁག་བདུན་ནས་དེབ་སྐྱེལ་བྱས་པའི་མི་གྲངས་ ༡༠༩༧ ནང་ནས་འོས་འཕེན་མཁན་མི་གྲངས་ ༦༡༣ བྱུང་ཡོད་ཀྱང་འབྲུག་གཞུང་ནས་འོས་བསྡུ་དང་འབྲེལ་བའི་ཡིག་ཆ་དེ་དག་རྒྱ་གར་ནང་བཏང་མི་ཆོག་པ་བརྗོད་རྐྱེན་འབྲུག་ནས་འོས་ཤོག ༦༡༣ རྩིས་མེད་ཕྱིན་ཡོད་ཅེས་འགྲེལ་བརྗོད་གནང་ཡོད།
དེ་རྗེས་སྔོན་འགྲོའི་འོས་བསྡུའི་ནང་འོས་གྲངས་རྩེ་བཏོག་གིས་བཀའ་བློན་ཁྲི་པའི་འོས་མི་ ༦ དང་ཆོལ་ཁ་རེ་རེ་ནས་སྤྱི་འཐུས་འོས་མི་༥༠ དང་། ཆོས་བརྒྱུད་ཁག་ལྔ་དང་བྱང་ཨ་རི། ཡུ་རོབ་ཁུལ་ནས་འོས་མི་ ༡༠ རེ་འདེམས་སྒྲུག་བྱུང་བའི་གྲུབ་འབྲས་རྣམས་གསར་འགོད་གསལ་བསྒྲགས་གནང་ཡོད་པ་གཤམ་གསལ།
