༢༠༡༧ ཟླ་ ༨ ཚེས་ ༦ རེས་གཟའ་ཉི་མ།
༄༅། །ཕྱི་ལོ་ ༢༠༡༧ ཟླ་ ༨ ཚེས་ ༥ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཨོ་སི་ཊོ་ལི་ཡའི་ Australia གྲོང་ཁྱེར་སི་ཌི་ནི་ Sydney གནམ་ཐང་དུ་ཕེབས་འབྱོར་སྐབས་སྐུ་ཚབ་དོན་གཅོད་ལྷག་པ་མཚོ་སྒོ་ལགས་ཀྱིས་གཙོས་བོད་མི་ ༣༠༠ ཙམ་དང་། གཞན་ཡང་རྒྱ་རིགས་དང་བོད་དོན་རྒྱབ་སྐྱོར་བ་བཅས་ཀྱིས་ལག་ཏུ་དཀར་གཙང་མཇལ་དར་སོགས་ཐོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་འདུག
ཐེངས་འདིར་དཔལ་ལྡན་སྲིད་སྐྱོང་མཆོག་གིས་ཨོ་སི་ཊོ་ལི་ཡའི་གྲོང་ཁྱེར་ཆེ་གྲས་གསུམ་སྟེ་སི་ཌི་ནི་ Sydney དང་མེལ་བྷོན། Melbourne ཀེན་བྷེ་ར་ Canberra བཅས་སུ་གཞུང་འབྲེལ་ལས་དོན་གལ་ཆེ་ཁག་གཅིག་སྤེལ་གནང་རྒྱུ་ཡིན་འདུག
དེ་ཡང་གནམ་ཐང་ནས་སྐུ་ངལ་འཁྱུག་ཙམ་གསོས་རྗེས་ཐོག་མར་རྒྱལ་སྤྱིའི་ཁྲིམས་རྩོད་ལྷན་ཚོགས་ International commission of Jurists ཀྱི་ཁྱབ་ཁོངས་ཨོ་སི་ཊོ་ལི་ཡའི་རྒྱལ་སྤྱིའི་ཁྲིམས་རྩོད་ལྷན་ཚོགས་ཀྱི་ཚོགས་མི་རྣམས་དང་མཇལ་འཕྲད་གནང་ནས་གྷི་རེ་སི་གསོལ་མགྲོན་ཁང་དུ་ Grace Hotel ཉིན་གུང་གསོལ་ཚིགས་ལྷན་བཞེས་གནང་། དེ་ཡང་ལྷན་ཚོགས་ཀྱི་ཚོགས་གཙོ་སྐུ་ཞབས་ཇོན་ཌོ་ John Dowd མཆོག་གིས་ཚོགས་འདུ་དབུ་བཞུགས་གནང་འདུག
སྐབས་དེར་དཔལ་ལྡན་སྲིད་སྐྱོང་མཆོག་གིས་ཁྲིམས་རྩོད་པ་ ༣༠ ལྷན་འཛོམས་ཁྲོད་བོད་ཀྱི་འདས་པའི་བྱུང་རབས་ལོ་རྒྱུས་དང་ད་ལྟའི་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་འོག་ཛ་དྲག་གི་གནས་སྟངས་ཇི་འདྲ་ཡིན་པ། དེ་བཞིན་འབྱུང་འགྱུར་བོད་ཀྱི་གནད་དོན་གསལ་བའི་ཐབས་ལམ་བཟང་ཤོས་གཉིས་སྨན་དབུ་མའི་ལམ་གྱི་སྲིད་བྱུས་བོད་མིའི་སྒྲིག་འཛུགས་ཀྱིས་རྒྱུན་སྐྱོང་ཇི་ལྟར་གནང་བཞིན་པའི་རྒྱུད་རིམ་རྣམས་གསལ་བཤད་མཐིལ་ཕྱིན་པ་གནང་བ་མ་ཟད།
རྒྱལ་སྤྱིའི་ཁྲིམས་རྩོད་པ་རྣམས་ལ་བོད་དོན་སྐོར་གསུང་བཤད་གནང་སྐབས།
རང་དབང་ལུང་པའི་ནང་བཞུགས་མཁན་ཚོར་བོད་དོན་ལ་རྒྱབ་སྐྱོར་གནང་རྒྱུའི་བཟང་ཕྱོགས་ཀྱི་འགན་ཞིག་ཡོད། དེར་བརྟེན་དེ་རིང་འདིར་ཁྲིམས་རྩོད་པ་ཁྱེད་རྣམས་ལ་ངས་བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་གནང་རོགས་ཞེས་འབོད་སྐུལ་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་བ་མ་ཟད། ཚོགས་བཅར་བའི་དྲི་བ་རྣམས་ལ་ལན་འདེབས་གསལ་བཤད་ཀྱང་གནང་འདུག
ལྷན་ཚོགས་གྲོལ་རྗེས་དཔལ་ལྡན་སྲིད་སྐྱོང་མཆོག་གིས་བྲོས་བྱོལ་བསྟི་གནས་ཁང་ Exodus foundation དུ་ཕེབས་ནས་བསྟི་གནས་ཁང་དེའི་ཚོགས་གཙོ་སྐུ་ཞབས་རེབ་བྷིལ་ཁི་རིའུ་ Rev Bill Crews མཆོག་དང་མཇལ་འཕྲད་གནང་འདུག ཁོང་ནི་ཡུན་རིང་ནས་བོད་དོན་ཐོག་སེམས་ཁུར་ཆེན་པོས་རྒྱབ་སྐྱོར་གནང་མཁན་ཞིག་ཡིན་པ་མ་ཟད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཐུགས་འདྲིས་ཧ་ཅང་ཉེ་པོ་ཡོད་པའི་གྲོགས་པོ་རྙིང་གྲས་ཤིག་ཀྱང་ཡིན་འདུག
བྲོས་བྱོལ་བསྟི་གནས་ཁང་གི་ཚོགས་གཙོ་སྐུ་ཞབས་རེབ་བྷིལ་ཁི་རིའུ་ Rev Bill Crews མཆོག་དང་ལྷན།
མཇལ་འཕྲད་ཡོངས་སུ་ལེགས་གྲུབ་རྗེས་དཔལ་ལྡན་སྲིད་སྐྱོང་མཆོག་སི་ཌི་ནི་གྲོང་ཁྱེར་གྱི་ཟློས་གར་འཁྲབ་སྟོན་ཁང་གྲགས་ཅན་ Sydney Opera House ཞེས་པའི་ནང་ཕེབས་ནས་དུས་རབས་ ༢༡ ནང་བོད་ཀྱི་ཆོས་དང་རིག་གཞུང་། ཆབ་སྲིད་དང་ཁོར་ཡུག དཔལ་འབྱོར་སོགས་ཀྱི་གནས་སྟངས་ལ་འཕྲད་བཞིན་པའི་དཀའ་ངལ་དང་དེར་གདོང་ལེན་བྱེད་ཕྱོགས་ཀྱི་བརྗོད་གཞིའི་ཐོག་གསུང་བཤད་གནང་།
ཟློས་གར་འཁྲབ་སྟོན་ཁང་གྲགས་ཅན་སི་ཌི་ནི་ཨོ་པེ་ར་ཚོགས་ཁང་ Sydney Opera House ཞེས་པའི་ནང་།
སྐབས་དེར་བོད་མིའི་རང་ལུས་མེར་སྲེག་གཏོང་བཞིན་པའི་ཛ་དྲག་གནས་སྟངས་སྐོར་སྲིད་སྐྱོང་མཆོག་གིས་འགྲེལ་བརྗོད་གནང་སྐབས། བོད་ནང་ཐོག་མར་རང་ལུས་མེར་སྲེག་གི་གནས་སྟངས་ཇི་ལྟར་བྱུང་མིན་དང་། ད་ལྟའི་ཆར་བོད་ནང་དུ་བོད་མི་ ༡༥༠ མ་ཟིན་ཙམ་གྱིས་རང་ལུས་མེར་སྲེག་བཏང་བ། རང་ལུས་མེར་སྲེག་བཏང་དགོས་པའི་རྒྱུ་མཚན་གཙོ་བོ་ནི་རྒྱ་ནག་གཞུང་གི་གདུག་རྩུབ་ཆེ་བའི་དམ་བསྒྲགས་ཅན་གྱི་སྲིད་བྱུས་འོག་བོད་མི་རྣམས་རང་ཡུལ་དུ་གྲལ་རིམ་གཉིས་པའི་གནས་སྟངས་འོག་གནས་བཞིན་པ་མ་ཟད། བོད་ཀྱི་ཆོས་དང་རིག་གཞུང་ལ་རྒྱ་ནག་གཞུང་གིས་ཆེད་མངགས་སྡང་ཟུག་ཆེན་པོས་མཐོང་ཆུང་ཁྱད་གསོད་འོག་དངོས་ཤུགས་བརྒྱུད་གསུམ་ནས་རྩ་མེད་བཟོ་ཐབས་བྱེད་བཞིན་པ་མ་ཟད།
ཟློས་གར་འཁྲབ་སྟོན་ཁང་གྲགས་ཅན་སི་ཌི་ནི་ཨོ་པེ་ར་ཚོགས་ཁང་ Sydney Opera House ཞེས་པའི་ནང་།
བོད་ཀྱི་མཛེས་སྡུག་ལྡན་པའི་རང་བྱུང་ཁོར་ཡུག་ལ་མཚོན་ནའང་རྒྱ་ནག་གཞུང་གིས་ཡར་རྒྱས་ལ་སྙད་ནས་གཏེར་ཁ་གང་བྱུང་སྔོག་འདོན་བྱེད་བཞིན་པ་དང་། གཙང་པོ་དང་རྒྱུག་ཆུ་རྣམས་འབག་བཙོག་བཟོ་བ། དེ་བཞིན་བོད་མི་རྣམས་ལ་དཔལ་འབྱོར་ཟུར་ཕུད་དང་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་བྱེད་བཞིན་པ་སོགས་ལ་བརྟེན། བོད་མི་རྣམས་ཀྱི་སེམས་ནང་རྒྱ་ནག་གཞུང་གི་བྱེད་བབ་ལ་མི་འདོད་པའི་སེམས་ཚོར་བྱུང་བ་རྣམས་ཕྱིར་ཞི་རྒོལ་རྔམ་སྟོན་སོགས་ནས་མངོན་པར་གསལ་བར་བྱེད་སྐབས་རྒྱ་ནག་གཞུང་གིས་བོད་མི་དེ་དག་ལ་ཁྲིམས་འགལ་བ་དང་རྒྱལ་ཁབ་ཁ་བྲལ་བ་སོགས་ཀྱི་ཉེས་མིང་སྣ་ཚོགས་འོག་འཛིན་བཟུང་བཀག་ཉར་བྱས་ནས་རྡུང་བརྡེགས་ཚ་ནན་བཏང་བ་ཙམ་དུ་མ་ཟད།
ཡུན་རིང་བཙོན་འཇུག་འོག་མནར་གཅོད་བཟོད་ཐབས་བྲལ་བ་གཏོང་བཞིན་ཡོད། དེར་བརྟེན་བོད་མི་རྣམས་ཀྱིས་རྒྱ་ནག་གཞུང་གི་མནར་གཅོད་འོག་འཆི་བ་ལས་རང་ལུས་མེར་སྲེག་བཏང་ནས་འཆི་རྒྱུ་དེ་འདམ་ཁ་བཟང་བ་ཞིག་ལ་བརྩི་ནས་དེ་ལྟར་ཚབས་ཆེའི་ལས་འགུལ་དེ་རིགས་མ་སྤེལ་ཐབས་མེད་ཀྱི་གནས་སྟངས་ལྟ་བུ་ཆགས་པའི་སྐོར་གསུངས། ཆུ་ཚོད་ཕྱེད་ཀ་ཙམ་གྱི་གཏམ་བཤད་མཇུག་སྒྲིལ་རྗེས་དྲི་བ་རྣམས་ལ་ལན་འདེབས་གནང་ཡོད། གཞན་ཡང་ཐེངས་འདིར་དཔལ་ལྡན་སྲིད་སྐྱོང་མཆོག་ཨོ་གླིང་དུ་རྒྱ་རིགས་མཁས་དབང་དང་གསར་འགོད་པ་སོགས་དང་ཐུག་འཕྲད་གནང་རྒྱུ་ཡིན་འདུག ད་ཐེངས་ཨོ་གླིང་ནང་གཞུང་འབྲེལ་ཕྱོགས་ཕེབས་ཐེངས་གཉིས་པ་ཆགས་ཡོད་པ་བཅས།།
