ཕྱི་ལོ་ ༢༠༡༧ ཟླ་ ༨ ཚེས་ ༡ རེས་གཟའ་མིག་མར།
༄༅། །སྦར་སིལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཕ་རན་སིའི་ནུབ་བྱང་དུ་ཡོད་པའི་པུ་ལོ་རེ་ཁུལ་འབྲུག་པ་ཆོས་ཚོགས་ཀྱི་ཆོས་དཔོན་འབྲུག་དཔོན་ངག་དབང་ལགས་ཀྱིས་ཇི་ལྟར་མགྲོན་འབོད་ལྟར་ཆེད་ཕེབས་གནང་ཡོད་པ་དང་། འབྲུག་དཔོན་ངག་དབང་ལགས་ནི་རྒྱལ་དབང་འབྲུག་པ་མཆོག་གི་ཡུ་རོབ་སྐུ་ཚབ་ཡང་ཡིན་འདུག
དེ་ཡང་སྐུ་ཚབ་དོན་གཅོད་ཆོས་ཚོགས་དེར་ཕེབས་དགོས་དོན་གཙོ་བོ་ནི་དེ་སྔ་ནས་ཚོས་ཚོགས་དང་འབྲུག་དཔོན་ངག་དབང་མཉམ་མཛའ་བརྩེའི་འབྲེལ་བ་དམ་ཟབ་ཡོད་པ་དེ་བསྐྱར་གསོ་དང་བསྐྱར་མཐུད་གནང་ཆེད་ཡིན་ཞིང་། དེ་སྔ་སྐུ་ཚབ་དོན་གཅོད་པེ་རི་སི་དོན་གཅོད་གནང་སྐབས་ཆོས་ཚོགས་འདིར་ཐེངས་གཉིས་ཙམ་ཕེབས་ཡོད་འདུག་པ་མ་ཟད། ཕྱི་ལོ་ ༢༠༠༥ ལོར་ཆོས་ཚོགས་ཀྱི་ཚོགས་ཁང་དབུ་འབྱེད་མཛད་སྒོའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཆིབས་སྒྱུར་གྲ་སྒྲིག་ཆེད་དུའང་ཕེབས་འདུག
གཞི་རྩའི་ཕྱི་ལོ་ ༢༠༠༨ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཚོགས་ཁང་དེར་དབུ་འབྱེད་རབ་གནས་བཀའ་དྲིན་བསྐྱངས་པ་མ་ཟད། གཞན་ཡང་བྷེལ་ཇེམ་ནང་ཡོད་པའི་ཡོན་ཏན་གླིང་དང་། ལོ་དྷེབ་ Lodev ནང་རྟེན་གཞི་བྱས་པའི་ལས་རབ་གླིང་། དེ་བཞིན་ཕ་རན་སི་ནང་གི་དྭགས་ཤངས་བཀའ་བརྒྱུད་ཚོགས་ཁང་བཅས་ཀྱང་སྐབས་དེར་དབུ་འབྱེད་རབ་གནས་བཀའ་དྲིན་བསྐྱངས་ཡོད།
དེ་ཡང་ཐོག་མར་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་མེ་འཁོར་འབབ་ཚུགས་སུ་འབྱོར་སྐབས་འབྲུག་དཔོན་ངག་དབང་ལགས་དང་། ཚོགས་གཙོ་ཇོ་ཡེལ་ Joel དང་དངུལ་གཉེར་རི་ནི་ Rene བཅས་ནས་སྣེ་ལེན་གཟབ་རྒྱས་ཞུས་འདུག ཆོས་ཚོགས་སུ་བཞུགས་མཁན་རྣམས་དང་ཐུག་འཕྲད་གནང་སྐབས་འབྲུག་དཔོན་ངག་དབང་མཆོག་ནས་ཆོས་ཚོགས་དོན་དུ་ཚེ་གང་སྐུ་ལས་བསྐྱོན་ཡོད་པ་དང་། ཞི་བདེ་དང་ཆོས་ཀྱི་རང་བཞིན་ལྡན་ཞིང་སྙན་གྲགས་ཡོད་པའི་ཆོས་ཚོགས་བཟོས་ཐབས་སུ་ངལ་རྩོལ་ཚད་མེད་གནང་ཡོད་པ་བཅས་སྐུ་ཚབ་དོན་གཅོད་ནས་ཡི་རངས་བསྔགས་བརྗོད་ཞུས་འདུག
ཕ་རན་སིའི་གྲོང་སྡེ་ལས་ཁུངས་ཁག་ནས་བོད་དོན་རྒྱབ་སྐྱོར་དང་རྒྱབ་རྟེན་མཚོན་བྱེད་བོད་ཀྱི་གྲོང་སྡེ་མཐུན་སྒྲིལ་གྱི་ལས་འགུལ་བརྩམས་ཡོད་པ་དེར་ཆོས་ཚོགས་ནས་ཀྱང་ལས་འགུལ་དེར་མཉམ་ཞུགས་གནང་ཡོད། དེ་ཡང་པུ་ལོ་རེའི་གྲོང་སྡེ་ནས་བོད་ཀྱི་ལྷོ་བྱང་དུ་ཡོད་པའི་གནས་མཆོག་ཙ་རི་མཐུན་སྒྲིལ་གནང་ཡོད།
ཕྱོགས་མཚུངས་སྐུ་ཚབ་དོན་གཅོད་ནས་བྷེལ་ཇམ་དང་ཕ་རན་སི་ནང་ཡོད་པའི་ནང་པའི་ཆོས་ཚོགས་གཞན་ཁག་ནང་ཕེབས་མྱོང་ཡོད་འདུག འདས་ལོའི་ནང་མཚོན་ན་ཕ་རན་སི་ནང་གི་དྭགས་པོ་རིན་པོ་ཆེའི་ཆོས་ཚོགས་དགེ་འཕེལ་གླིང་དང་། བཀའ་བརྒྱུད་རྫོང་གི་ཚོགས་གཙོ་ཀར་ལོ་ལུ་ཨེས་ Carlo Luyckx དང་མཇལ་འཕྲད་གནང་ཡོད་པ་མ་ཟད། དེ་མཚུངས་བྷར་སེལ་ Brussels དང་ཨེན་ཝབ་ Antwerp བཅས་སུ་བླ་མ་བཟོད་པ་དང་བླ་མ་བཀྲ་ཤིས་ཉི་མ་གཉིས་དང་མཇལ་འཕྲད་གནང་འདུག
ཐེངས་འདིའི་ཆོས་ཚོགས་ཁག་ནང་ཕེབས་པ་དེ་ནི་སྐབས་བསྟུན་ཕ་རན་སིའི་གྲོས་ཚོགས་གོང་མའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༢ པའི་འཁྲུངས་སྐར་དུས་སྟོན་སྲུང་བརྩི་དང་འབྲེལ་བ་ཞིག་ཡིན་འདུག་པ་བཅས།།
