༢༠༡༧ ཟླ་ ༧ ཚེས་ ༣༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༧ ཟླ་ ༧ ཚེས་ ༢༨ ཉིན་བོད་མིའི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་རྒྱལ་ས་སླེ་རུ་དད་ལྡན་སེར་སྐྱ་མང་ཚོགས་ ༤༠༠༠༠ ཙམ་ལ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོའི་བཀའ་ཆོས་དབུ་འཛུགས་མཛད།
དེ་ཡང་མགོན་པོ་གང་ཉིད་མཆོག་མི་འཇིགས་གདོང་ལྔས་བསྟེགས་པའི་གསེར་གྱི་ཁྲི་འཕང་ཐོན་པོར་༸ཞབས་སོར་མངོན་པར་འཁོད་བསྟུན། ཐོག་མར་སློབ་ཕྲུག་ཁག་གཅིག་གིས་རྟགས་གསལ་སྤྱན་བསྟར་ཞུས། དེ་རྗེས་༸གོང་ས་མཆོག་གིས་སྔ་ལོའི་སྤྱོད་འཇུག་ཆེན་མོའི་ཆོས་འབྲེལ་འཕྲོ་སྐྱོང་མཛད།
ཕྱི་ཚེས་ ༢༩ ཉིན་ལིའུ་བཞི་པ་བག་ཡོད་བསྟན་པའི་ལིའུ་ཆོས་འབྲེལ་འཕྲོ་སྐྱོང་མཛད། དེ་ཡང་ཆོས་འབྲེལ་ཉིན་གསུམ་གྱི་མཐའ་མར་༸གོང་ས་མཆོག་གིས་ཚེ་དབང་བཀའ་དྲིན་སྩལ་རྗེས་མགོན་པོ་གང་ཉིད་མཆོག་ལ་བརྟན་བཞུགས་བསྟར་འབུལ་ཞུས་པ་མ་ཟད། དགེ་བསྙེན་དང་བྱང་སེམས་ཀྱི་སྡོམ་པ་སོགས་འབོག་ཆོག་མཛད། དེ་ཡང་བཀའ་ཆོས་གོ་སྒྲིག་ཚོགས་ཆུང་ལ་དྭགས་ནང་པའི་ཚོགས་པ་ལྟར་ན་ཆོས་འབྲེལ་ཉིན་མཐའ་མའི་སྐབས་ཆོས་ཞུ་བ་མི་གྲངས་ ༦༠ ༠༠༠ ཙམ་བཅར་ཡོད་པའི་ཚོད་དཔག་གནང་ཡོད།
དེ་ཡང་བཀའ་ཆོས་ཉིན་མཐའ་མའི་སྐབས་ཇམ་མུ་ཀ་ཤི་མིར་ Jammu & Kashmir མངའ་སྡེའི་སྤྱི་ཁྱབ་བློན་ཆེན་ལྕམ་སྐུ་མེ་བྷུ་བྷ་མུབ་ཏི་ Smt. Mehbooba Mufti Sayeed མཆོག་ཆེད་མངགས་གསུང་ཆོས་ར་བར་༸གོང་ས་༸སྐྱབས་མགོན་ཆེན་པོ་མཆོག་མཇལ་བཅར་ཞུས་འདུག སྐབས་དེར་སྤྱི་ཁྱབ་བློན་ཆེན་མཆོག་གིས་༸གོང་ས་མཆོག་ལ་སྲོལ་རྒྱུན་ན་བཟའ་ Shawl འབུལ་ལམ་ཞུས་པར་ཐུགས་དགྱེས་ཚོར་མཛད་པ་མ་ཟད། མགོན་པོ་གང་ཉིད་མཆོག་གིས་ཀྱང་བློན་ཆེན་མཆོག་ལ་འཚམས་འདྲིའི་མཇལ་དར་སྩལ་གནང་མཛད།
དེ་རྗེས་མཛད་སྒོ་ཚོགས་སྐབས་ཐོག་མར་ལ་དྭགས་ནང་པ་ཚོགས་པའི་ཚོགས་གཙོ་ཚེ་དབང་འཕྲིན་ལས་ལགས་ཀྱིས་༸གོང་ས་མཆོག་དང་། ཁྲིག་སེ་རིན་པོ་ཆེ་མཆོག ཐུགས་སྲས་རིན་པོ་ཆེ་མཆོག དེ་བཞིན་མངའ་སྡེའི་སྤྱི་ཁྱབ་བློན་ཆེན་མཆོག་ལ་འཚམས་འདྲི་ཞུ་དོན། དེང་སྐབས་འཛམ་གླིང་ནང་མཐར་ལྷུང་བའི་ཆོས་ལུགས་ཀྱི་ལྟ་བར་གཞི་བཅོལ་ནས་འཇིགས་སྐུལ་དྲག་སྤྱོད་ཀྱི་ལས་འགུལ་ཁྱབ་བརྡལ་ཤུགས་ཆེ་རུ་འགྲོ་བཞིན་པའི་དུས་སྐབས་འདིར་ང་ཚོས་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་འདི་གར་ལོ་ནས་ལོ་བསྟུད་གདན་ཞུ་ཐུབ་པ་ནི་ཧ་ཅང་སྐལ་བ་བཟང་པོ་ཞིག་ཡིན། ང་ཚོས་༸གོང་ས་མཆོག་སླར་ཡང་འཆར་ལོའི་ནང་འདི་ག་ལ་དྭགས་ཁུལ་དུ་ཆིབས་སྒྱུར་བསྐྱང་གནང་ཡོང་བའི་གསོལ་འདེབས་ཞུ་རྒྱུ་ཡིན། ཞེས་ལྷ་སྙན་སྒྲོན་འབུལ་ཞུས།
དེ་ནས་མངའ་སྡེའི་སྤྱི་ཁྱབ་བློན་ཆེན་མཆོག་གིས་ཐོག་མར་ཡུལ་སྐད་ནང་འཚམས་འདྲི་ཞུས་བསྟུན་གསུང་དོན། དེ་རིང་ང་རང་འདིར་བཅར་རྒྱུ་བྱུང་བར་ཆེ་མཐོང་ཐོབ་པ་ཞིག་བྱུང་། སྐུ་ཉིད་མཆོག་འདིར་ཆིབས་སྒྱུར་བསྐྱངས་པར་བརྟེན་ཇམ་མུ་ཀ་ཤི་མིར་མངའ་སྡེ་སྤྱི་དང་། ལྷག་པར་ལ་དྭགས་ཡུལ་མི་ཚོའི་སེམས་ནང་དགའ་སྤྲོ་ཧ་ཅང་འཕེལ་ཡོད། ངས་སྐུ་ཉིད་མཆོག་གི་༸སྐུའི་འཕྲོད་བཞེས་མུ་མཐུད་གསལ་ཐང་ཡོང་བ་དང་འདི་གར་ཡང་ཡང་ཆིབས་སྒྱུར་བསྐྱང་རོགས་ཞེས་སྨོན་ལམ་གསོལ་འདེབས་ཞུ་རྒྱུ་ཡིན། སྐུ་ཉིད་མཆོག་ས་གནས་གང་དུ་༸ཞབས་ཀྱིས་བཅག་ཀྱང་དེར་ཞི་བདེ་བག་ཕེབས་ཡོང་བཞིན་ཡོད།
ལྷག་པར་སྐུ་ཉིད་མཆོག་གིས་ཁ་ཆེའི་ཆོས་པ་དང་འཇིགས་སྐུལ་རིང་ལུགས་གཉིས་དབར་དབྱེ་འབྱེད་མཛད་ནས་ཁ་ཆེའི་ཆོས་དེ་འཚེ་མེད་ཞི་བའི་ཆོས་ལུགས་ཤིག་ཡིན་པ་ནན་གཏན་མཛད་པ་དེར་ང་རང་སྒེར་ལ་སེམས་འཚོར་ཧ་ཅང་སྐྱེས་བྱུང་། གལ་ཏེ་ཀ་ཤི་མིར་ནང་གནས་སྟངས་ཇེ་བཟང་དུ་ཕྱིན་ནས་དུས་ཚོད་རན་པ་ཞིག་འཆར་བ་ཡིན་ན། ངས་སྐུ་ཉིད་མཆོག་ལ་ཀ་ཤི་མིར་མི་མང་རྣམས་ལའང་བྱམས་བརྩེ་དང་འཚེ་མེད་ཞི་བའི་ལམ་སྟོན་བཀའ་སློབ་སྩོལ་ཆེད་གདན་འདྲེན་ཞུ་རྒྱུ་ཡིན། ཐུགས་རྗེ་ཆེ། ཞེས་གསུངས།
དེ་ནས་༸གོང་ས་མཆོག་གིས་བཀའ་སློབ་སྩལ་དོན། དཀའ་ངལ་དང་རྙོག་གྲ་མང་པོ་ཞིག་མི་རང་ཉིད་ཀྱིས་བཟོས་པ་རེད། དེར་བརྟེན་ང་ཚོས་བསམ་བློ་རྒྱ་ཆེ་ས་ནས་བཏང་དགོས་པ་མ་གཏོགས་བསམ་བློ་གུ་དོག་བྱ་རྒྱུ་མེད། ང་ཚོས་འགྲོ་བ་མི་རིགས་གཅིག་གྱུར་གྱི་འདུ་ཤེས་འཛིན་ནས་ཕྱིན་པ་ཡིན་ན་དཀའ་ངལ་མང་པོ་ཞིག་རང་བཞིན་གྱིས་ཞི་རྒྱུ་རེད།
རྒྱ་གར་ལ་མཚོན་ན་ཆོས་ལུགས་མཐུན་སྒྲིལ་གྱི་ལམ་ལུགས་དེ་ལོ་ངོ་བརྒྱ་ཕྲག་མང་པོའི་རིང་ནས་ཧ་ཅང་དར་སྲོལ་ཡོད། དེར་བརྟེན་ད་ལྟའི་དུས་སྐབས་འདིར་རྒྱ་གར་གྱིས་འཛམ་གླིང་གཞན་ལ་ཆོས་ལུགས་མཐུན་སྒྲིལ་གྱི་མིག་དཔེ་སྟོན་ཐུབ་པ་བྱེད་དགོས། སྤྱིར་ངོས་རང་འཛམ་གླིང་ས་གནས་གང་དུ་ཕྱིན་ཡང་ཆོས་ལུགས་མཐུན་སྒྲིལ་གལ་ཆེའི་སྐོར་བརྗོད་བཞིན་ཡོད། ཐེངས་འདིར་མཚོན་ནའང་ངོས་ཀྱིས་ལྡུམ་ར་དང་ཟངས་དཀར་སོགས་ནང་ཆོས་ལུགས་མཐུན་སྒྲིལ་དགོས་གལ་ཆེ་བའི་སྐོར་བརྗོད་རྒྱུ་བྱུང་། ཞེས་བཀའ་སློབ་སྩལ།།
