༢༠༡༧ ཟླ་ ༧ ཚེས་ ༢༠ རེས་གཟའ་ཕུར་བུ།
༄༅། །རྒྱ་ནག་གཞུང་གིས་སྔ་ལོའི་ཕྱི་ཟླ་ ༧ ཚེས་ ༢༠ ཉིན་གསེར་རྟ་བླ་རུང་སྒར་གཏོར་བཤིག་བཏང་འགོ་བཙུགས་ནས་འདི་ལོའི་ཕྱི་ཟླ་ ༧ ཚེས་ ༢༠ ཉིན་ལོ་གཅིག་ཧྲིལ་པོ་འཁོར་བཞིན་ཡོད་སྟབས། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་གསེར་རྟ་བླ་རུང་སྒར་ནས་ཕྱིར་འབུད་བཏང་བའི་བཙུན་མའི་སྐོར་ལ་སྐར་མ་ ༢ ཅན་གྱི་བརྙན་ཐུང་ཕྱོགས་སྒྲིག་ཞུས་པ་དབུ་འབྱེད་གནང་ཡོད། དེ་ཡང་བརྙན་ཐུང་དེའི་ནང་གཙོ་བོ་རྒྱ་ནག་གཞུང་གིས་འཛམ་གླིང་ནང་བོད་བརྒྱུད་ནང་བསྟན་སློབ་གཉེར་བྱ་ཡུལ་བསྟི་གནས་ཁང་ཆེ་ཤོས་སུ་གྲགས་པའི་གསེར་རྟ་བླ་རུང་སྒར་གྱི་བཙུན་མ་རྣམས་དགོན་པ་ནས་བཙན་དབང་འོག་ཕྱིར་འབུད་བཏང་བ་མ་ཟད། རྒྱལ་གཅེས་ཆོས་གཅེས་ཀྱི་སློབ་གསོའི་ལས་འགུལ་ཟེར་བ་སྤེལ་ནས་ལུས་ལ་ཆོས་གོས་རྣམ་གསུམ་གྱི་ཚབ་ཏུ་རྒྱ་ཆས་སྤྲས་ནས་རྒྱ་གཞས་སོགས་བཏང་བཅུག་ཡོད།
དེ་ཡང་སྲིད་སྐྱོང་བློ་བཟང་སེངྒེ་མཆོག་གིས། བོད་ནང་རིག་གནས་གསར་བརྗེ་བསྐྱར་ལོག་བྱེད་བཞིན་པའི་གནས་སྟངས་མཐོང་སྐབས་ང་ཚོའི་སེམས་ནང་དངངས་སྐྲག་ཧ་ཅང་སྐྱེ་བཞིན་འདུག ཅེས་གསུངས།
ཕྱོགས་མཚུངས་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་གསུང་དོན། བོད་བརྒྱུད་ནང་བསྟན་སློབ་གཉེར་ཁང་ཆེ་ཤོས་སུ་གྲགས་པ་གསེར་རྟ་བླ་རུང་སྒར་གཏོར་བཤིག་བཏང་བ་དེར་རྒྱལ་སྤྱིའི་སྤྱི་ཚོགས་ཀྱིས་ངོ་རྒོལ་ཤུགས་ཆེ་གནང་ཡོད། འདས་ལོའི་ཕྱི་ཟླ་ ༡༢ ནང་ཡུ་རོབ་གྲོས་ཚོགས་ནང་བོད་དོན་རྒྱབ་སྐྱོར་ཆེད་གྲོས་ཆོད་བཞག་པ་བརྒྱུད་བོད་ནང་གི་ཛ་དྲག་གནས་སྟངས་མགྱོགས་མྱུར་གསལ་ཐབས་དགོས་པའི་རེ་འདུན་ཤུགས་ཆེ་བཏོན་པ་དང་སྦྲགས། གསེར་རྟ་བླ་རུང་སྒར་གཏོར་བཤིག་བཏང་དང་གཏོང་བཞིན་པའི་གནས་སྟངས་ཐད་སེམས་འཚབ་ཤུགས་ཆེ་གནང་ཡོད། འདི་ལོའི་ཕྱི་ཟླ་ ༢ ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༣༤ འཚོག་ལ་ཉེ་སྐབས་འགྲོ་བ་མིའི་ཐོབ་ཐང་གི་གནས་སྟངས་ཐོག་རྒྱལ་སྤྱིའི་ཆེད་ལས་མཁས་པ་དྲུག་གིས་གསེར་རྟ་བླ་རུང་སྒར་གཏོར་བཤིག་གཏོང་བཞིན་པའི་གནས་སྟངས་ཐད་རྒྱ་ནག་གཞུང་ལ་ཛ་དྲག་འབོད་སྐུལ་གནང་ཡོད།
དེ་ཡང་མཁས་པ་དྲུག་གིས་རྒྱ་ནག་གཞུང་ལ་ཞུ་ཡིག་གཅིག་ཕུལ་བ་དེའི་ནང་གསེར་རྟ་བླ་རུང་སྒར་ནི་རྒྱ་ནག་རྒྱལ་ཡོངས་ཙམ་མ་ཟད། འཛམ་གླིང་ཡོངས་སུ་བོད་བརྒྱུད་ནང་བསྟན་སློབ་གཉེར་གནང་ཡུལ་གྱི་བསྟི་གནས་ཁང་ཧ་ཅང་གལ་གནད་ཅན་ཞིག་ཆགས་ཡོད་པ་དང་། ལྷག་པར་བོད་ཀྱི་སྐད་ཡིག་དང་རིག་གཞུང་། ཆོས་སོགས་འཛིན་སྐྱོང་སྤེལ་གསུམ་བྱ་སའི་བསྟི་གནས་ཁང་གྲགས་ཆེ་ཤོས་ཤིག་ཡིན་ཁར་རྒྱ་རིགས་ནང་ཆོས་དོན་གཉེར་བ་དང་གནས་སྐོར་བ་སོགས་ལ་བསྟི་གནས་ཁང་དེ་ཧ་ཅང་གནད་འགག་ཆེན་པོ་ཞིག་ཆགས་ཡོད། ཅེས་འཁོད་ཡོད་སྐོར་དྲུང་ཆེས་གསུངས།
དེ་བཞིན་དྲིལ་བསྒྲགས་དྲུང་ཆེ་ཤར་གླིང་བསྟན་འཛིན་ཟླ་སྒྲོན་ལགས་ཀྱིས་གསུང་དོན། རྒྱ་ནག་གཞུང་གིས་གསེར་རྟ་བླ་རུང་སྒར་ནས་གྲྭ་བཙུན་ཧ་ཅང་ཕོན་ཆེ་ཞིག་བཙན་དབང་ཐོག་ནས་ཕྱིར་འབུད་བཏང་བ་དེས་ཆོས་དད་རང་དབང་ལ་བརྩི་མེད་རྡོག་རོལ་བཏང་བ་ཞིག་ཆགས་ཡོད།
རྒྱ་ནག་ལྟ་བུ་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་རྟོག་ཞིབ་ཚོགས་ཆུང་གི་ཚོགས་མི་ཡིན་བཞིན་པའི་རྒྱལ་ཁབ་གཅིག་གིས་དེ་ལྟ་བུའི་བཙན་དབང་དང་གདུག་རྩུབ་ཅན་གྱི་སྲིད་བྱུས་ལག་བསྟར་བྱེད་སྐབས། ཟུར་གནས་བློ་ལྡན་སུས་ཀྱང་རྒྱལ་ཚོགས་ཀྱི་ཆེས་མཐོའི་ཚོགས་ཆུང་དེའི་བཟང་སྤྱོད་དང་ཆོད་སེམས་ལ་ཐེ་ཚོམ་སྐྱེ་གཞི་ཞིག་ཏུ་འགྱུར་ཉེན་ཡོད། དེ་ལྟར་བྱུང་ན་བློ་ཕམ་གྱི་གནས་ཡིན། གང་ཡིན་བརྗོད་ན་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་རྟོག་ཞིབ་ཚོགས་ཆུང་དེ་ནི་འཛམ་གླིང་ནང་འགྲོ་བ་མིའི་ཐོབ་ཐང་སྲུང་སྐྱོབ་བྱེད་མཁན་གྱི་ཚོགས་པ་ཆེ་ཤོས་ཆགས་ཡོད། དེར་བརྟེན་འཛམ་གླིང་རྒྱལ་ཁབ་ཚོས་རྒྱ་ནག་གཞུང་གི་བྱེད་བབ་དེར་ངེས་པར་དུ་སྟངས་འཛིན་གནང་དགོས། ཞེས་གསུངས།།
