༢༠༡༠ ཟླ་ ༡༡ ཚེས་ ༩ རེས་གཟའ་མིག་དམར།

༄༅། །ཕྱི་ལོ་ ༢༠༡༠ ཟླ་ ༡༡ ཚེས་ ༨ ཉིན་རྒྱབ་ཆུ་ཚོད་ ༡༢།༡༠ ཙམ་ལ་༸གོང་ས་མཆོག་གིས་ཉི་ཧོང་གི་གྲོང་ཁྱེར་སྣ་རའི་ཐོའོ་རྡོའ་ཇེའི་(Todaiji)ལྷ་ཁང་ནང་ཕྱི་ལོ་ ༧༤༣ ཙམ་དང་དུས་རབས་བརྒྱད་པའི་ནང་རག་ལས་བཞེངས་པའི་སངས་རྒྱས་རྣམ་པར་སྣང་མཛད་ཀྱི་རྟེན་གཙོའི་མདུན་དུ་ཉི་ཧོང་ནང་པའི་བླ་ཆེན་ཁག་གཅིག་དང་ལྷན་ཐུགས་སྨོན་མཛད་གྲུབ་བསྟུན། མགོན་པོ་གང་ཉིད་མཆོག་གིས་ཐོའོ་རྡོའ་ཇེའི་ལྷ་ཁང་གི་ཚོགས་ཁང་ཆེན་མོའི་ནང་ཉི་ཧོང་གི་ནང་པའི་དགེ་བཙུན་ཁག་གཅིག་དང་ཤིན་ཊོའི་ཆོས་པ་བཅས་ཁྱོན་མི་གྲངས་ ༣༥༠ ཙམ་ལ་དེང་དུས་ནང་པ་ཚོས་ནང་ཆོས་ཉམས་ལེན་བྱེད་ཕྱོགས་སྐོར་བླང་དོར་བཀའ་སློབ་སྩལ་དོན། བཅོམ་ལྡན་འདས་ཀྱི་རྗེས་འབྲང་པ་སོ་སོའི་ཁམས་དང་མོས་པ་མི་འདྲ་བ་ཡོད་དུས་ཉམས་ལེན་བྱེད་སྟངས་མི་འདྲ་བ་ཡོང་གི་ཡོད། ང་ཚོའི་བྱ་བ་གང་དང་གང་ཡིན་ནའང་ཕན་པའི་རང་བཞིན་དང་གནོད་པའི་རང་བཞིན་གང་འདྲ་ཆགས་མིན་དེ་ཀུན་སློང་ལ་རག་ལུས་ཡོད་པ་གསུངས་ཡོད། སངས་རྒྱས་བཅོམ་ལྡན་འདས་ཀྱིས་ཆོས་ཀྱི་རྩ་བ་དེ་བདེན་པ་བཞི་ཡིན་པ་དང་བདེན་པ་བཞི་དེའི་གོ་བ་ཡག་པོ་རྟོགས་པར་བདེན་པ་གཉིས་ལ་ཐུག་ཡོད། ནང་ཆོས་ཉམས་ལེན་གང་འདྲ་བྱེད་དགོས་ཞུས་ན་སློབ་དཔོན་ཨ་རྱ་ཌེ་ཝས། །བསོད་ནམས་མིན་པ་དང་པོར་ཟློག །བར་དུ་བདག་ནི་ཟློག་པར་བྱེད། །མཐའ་མར་ལྟ་ཞིག་ཀུན་ཟློག་པ། །གང་གིས་ཤེས་ཏེ་མཁས་པ་ཡིན། ཞེས་གསུངས་ཡོད། བསོད་ནམས་མིན་པའི་ལས་ལྡོག་རྒྱུ་དེ་དང་པོར་བྱེད་དགོས། བསོད་ནམས་མིན་པའི་ལས་ལྡོག་ནས་བསོད་ནམས་ཀྱི་ལས་བསག་པ་ཡིན་ན་མངོན་མཐོ་ལྷའི་ལུས་རྟེན་ཐོབ་རྒྱུ་རེད། མངོན་མཐོའི་ལུས་རྟེན་ཐོབ་པའི་ཐོག་ནས་དངོས་གཞི་ཉམས་ལེན་བྱེད་རྒྱུ་གཙོ་བོ་དེ་གང་ཡིན་བརྗོད་ན་བདག་ཏུ་འཛིན་པ་དེ་ལྡོག་དགོས། བདག་ཏུ་འཛིན་པ་རང་གཅིག་པུའི་རྒྱུད་ཀྱི་བདག་འཛིན་ལྡོག་པ་ཙམ་མིན་པར་མཐའ་ཡས་པའི་སེམས་ཅན་ཐམས་ཅད་ཀྱི་རྒྱུད་ཀྱི་བདག་འཛིན་ལྡོག་རྒྱུའི་བློ་སྐྱེས་ནས་ཉམས་ལེན་བྱེད་དགོས་པ་གསུངས་ཡོད། དགེ་སློང་ལ་ཆ་བཞག་ན། ང་ཚོ་གཞི་ཐམས་ཅད་ཡོད་པར་སྨྲ་བའི་སྡེ་པ་ཟེར་བ་དེ་རེད། སྡེ་པ་དེའི་ལུགས་ཀྱི་དགེ་སློང་གི་བསླབ་བྱ་དེ་ཁྲིམས་ ༢༥༣ ཡོད་པ་དེ་དག་གཙོ་བོ་ལུས་ངག་གི་ཉེས་སྤྱོད་སྡོམ་རྒྱུ་དེ་རེད། དེས་བསོད་ནམས་མིན་པ་དང་པོར་ལྡོག་ཟེར་བ་དེ་ཆགས་ཡོད། དེའི་ཐོག་ལ་བྱང་སེམས་ཀྱི་སྡོམ་པ་ཞུས་ཡོད། བྱང་སྡོམ་གྱི་བསླབ་བྱ་དེ་གཙོ་བོ་སེམས་ནང་གཞན་ལ་རྣག་སེམས་གནོད་སེམས་སྡོམ་རྒྱུ་དེ་གཙོ་བོ་རེད། གཞན་ལ་རྣག་སེམས་གནོད་སེམས་མི་བྱེད་པ་ཙམ་མིན་པར་གཞན་ལ་ཕན་བདེ་བསྒྲུབ་རྒྱུའི་བློ་སྐྱེས་དགོས་རྒྱུ་དེ་གཙོ་བོ་ཆགས་ཡོད། བསླབ་བྱ་གཙོ་བོ་དེ་རེད། དེ་ནས་སྔགས་ཀྱི་སྡོམ་པ་རེད། སྔགས་ཀྱི་རྒྱུད་སྡེ་བཞིའི་ནང་གི་བྱ་རྒྱུད་སྤྱོད་རྒྱུད་གཉིས་ལ་བྱང་ཆུབ་སེམས་པའི་སྡོམ་པ་གཅིག་པུ་རེད། རྣལ་འབྱོར་རྒྱུད་དང་རྣལ་འབྱོར་བླ་མེད་རྒྱུད་ལ་སྔགས་ཀྱི་སྡོམ་པ་ཡོད། ངོས་ཀྱིས་སྔགས་ཀྱི་སྡོམ་པ་དེ་ཞུས་ཡོད། དེ་ལ་ང་ཚོ་ནམ་རྒྱུན་གསུམ་ལྡན་རིག་པ་འཛིན་པ་ཞེས་པའི་ཐ་སྙད་དེ་ཟེར་ནས་སྡོམ་པ་གསུམ་དང་ལྡན་པའི་རིག་པ་འཛིན་པ་བརྗོད་ཀྱི་ཡོད། སོ་ཐར་གྱི་སྡོམ་པ་དང་འབྲེལ་ནས་ཡར་ངོ་མར་ངོའི་གསོ་སྦྱོང་གི་ཐོག་ནས་སོ་ཐར་གྱི་སྡོམ་པའི་ཉམས་ལེན་དེ་འདྲ་བྱེད་ཀྱི་ཡོད། བྱང་ཆུབ་སེམས་པའི་སྡོམ་པ་དང་སྔགས་ཀྱི་སྡོམ་པ་དེ་ཉིན་ལྟར་ལེན་གྱི་ཡོད། ཉིན་ཞག་ཕྲུག་གཅིག་གི་ནང་ལ་ཞོགས་པ་ཡར་ལངས་པ་དང་སྔོན་ལ་སྟོན་པ་ཐུབ་པའི་དབང་པོའི་བསྟོད་པ་གཅིག་བཏོན་ནས་སངས་རྒྱས་བཅོམ་ལྡན་འདས་ཡིད་ལ་དྲན་པ་བྱས་ཏེ་བཅོམ་ལྡན་འདས་ཀྱི་རྗེས་འབྲང་རྣལ་མ་ཞིག་བྱེད་ཀྱི་ཡིན་བསམ་དགོས། བཅོམ་ལྡན་འདས་ཀྱི་རྗེས་འབྲང་རྣལ་མ་ཡོང་བ་གང་འདྲ་བྱེད་དགོས་ཟེར་ན་ཉིན་ཞག་ཕྲུག་གཅིག་གི་རིང་ལ་ཉམས་ལེན་གཙོ་བོ་དེ། སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་ཉམས་ལེན་བྱེད་རྒྱུ་དེ་སྔ་དྲོ་གཉིད་བསད་པ་དང་བསམ་བློ་གཏོང་དགོས། དེ་ནས་སྨོན་ལམ་འདོན་རྒྱུ་དང་ལྷའི་རྣལ་འབྱོར་དེ་འདྲ་མང་པོ་འདོན་དགོས། སྨོན་ལམ་དང་ལྷའི་རྣལ་འབྱོར་འདོན་རྒྱུ་དེར་ཆུ་ཚོད་བཞི་ཙམ་འགོར་གྱི་རེད། ལྷའི་རྣལ་འབྱོར་སྒོམ་པའི་སྐབས་ལ་སྔོན་ལ་སྟོང་ཉིད་སྒོམ་དགོས། སྟོང་ཉིད་སྒོམ་པའི་སྐབས་ལ་རང་བཞིན་གྱིས་སྔོན་ལ་དཔྱད་པ་བྱེད་དགོས། རང་བཞིན་མེད་པའི་ཚུལ་དེར་བསམ་བློ་ཡག་པོ་བཏང་། སེམས་ནང་ལ་རང་བཞིན་མེད་པ་ཡིན་ཐག་ཆོད་རེད བསམ་པའི་ངེས་པ་དེ་ཐོབ་རྗེས་གཞི་ནས་སྟོང་ཉིད་རྟོགས་པའི་གཟུངས་རྣམ་ལྷར་ཤར་བ་ཞིག་དགོས། ལྷའི་རྣལ་འབྱོར་གྱི་གཞུང་གི་ནང་ལ་བྱང་སེམས་དང་སྔགས་ཀྱི་སྡོམ་པ་ལེན་རྒྱུ་དེ་དག་བསླེབ་ཀྱི་ཡོད། དེ་བཞིན་དུ་ལྷའི་རྣལ་འབྱོར་ནང་ལ་ཞི་གནས་སྒྲུབ་སྐབས་སེམས་རྩེ་གཅིག་པ་དེ་སླེབ་ཀྱི་ཡོད། དེ་ནས་སྒོམ་པས་སྐྱོ་ན་བཟླས་པ་བྱ་བ་ཞེས་སྔགས་བགྲང་རྒྱུ་དེ་རེད། སྒོམ་བརྒྱབ་སྟེ་ཐང་ཆད་ན་སྔགས་བགྲང་རྒྱུ་རེད། ཕྱི་དྲོ་ཉིན་ཞག་ཕྲུག་གཅིག་གི་རིང་བག་ཡོད་ཀྱི་ཐོག་ནས་ངོས་རང་དགེ་སློང་ཞིག་ཡིན་བསམ་པ་དང་ངོས་ཀྱིས་བྱང་ཆུབ་སེམས་དང་སྔགས་ཀྱི་སྡོམ་པ་བཟུང་ཡོད་བསམ་པ་དེའི་ཐོག་ནས་སྡོམ་པ་གསུམ་དང་འགལ་བའི་ཉེས་པ་ཡོང་མིན་དྲན་ཤེས་ཀྱིས་ཟིན་པ་བྱས་ནས་འགྲོ་གི་ཡོད། དགོང་མོ་ཉལ་ཁར་བསམ་བློ་ཏོག་ཙམ་བཏང་ནས་བསྔོ་བ་བྱས་ཏེ་ཉིན་མོར་དགེ་བའི་རྩ་བ་བསགས་པ་དེ་ལ་རྗེས་སུ་ཡི་རང་བྱ་རྒྱུ་དང་། བཅས་པའི་ཁ་ན་མ་ཐོ་བ་དང་རང་བཞིན་གྱི་ཁ་ན་མ་ཐོ་བ་དེ་འདྲ་བྱུང་བ་དེ་དག་བཤགས་སྡོམ་བྱས་ནས་ཉལ་གྱི་ཡོད། སྡོམ་པ་གསུམ་ལེན་མཁན་གྱིས་ཉིན་ཞག་ཕྲུག་གཅིག་རིང་ཉམས་ལེན་དེ་འདྲ་བྱས་ནས་འགྲོ་གི་ཡོད། ནམ་རྒྱུན་ངོས་ཀྱིས་ཐེག་པ་ཆེ་ཆུང་སྔགས་དང་བཅས་པ་ཆ་ཚང་བ་རྟེན་ཐོག་གཅིག་ལ་ཉམས་ལེན་བྱ་རྒྱུ་དེ་རེད་ཅེས་སོགས་ཀྱི་བཀའ་སློབ་སྩལ་གྲུབ་བསྟུན། ཚོགས་བཅར་བ་ཚོས་དྲི་བ་ཕུལ་བར་བཀའ་ལན་སྩལ་བ་བཅས།།