༢༠༡༧ ཟླ་ ༧ ཚེས་ ༦ རེས་གཟའ་ཕུར་བུ།
༄༅། །འདི་གའི་ཆེད་གཉེར་གསར་འགོད་པ་ཡེ་ཤེས་ཀུན་གྲགས་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༧ ཟླ་ ༧ ཚེས་ ༤ ཉིན་གྱི་སྔ་དྲོར་དཔལ་ལྡན་སྲིད་སྐྱོང་མཆོག་ལ་དྭགས་ཞི་བ་ཚལ་ཕོ་བྲང་དུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་མཇལ་ཁ་ཞུས་ཏེ་ཆུ་ཚོད་ ༩།༣༠ ཐོག་ལ་དྭགས་རྒྱལ་ས་སླེ་ནས་རྒྱང་ཐག་སྤྱི་ལེ་ ༡༦༠ ཙམ་སར་ཆགས་པའི་བོད་དང་ས་ཐག་ཧ་ཅང་ཉེ་བའི་སྤང་གོང་མཚོར་ཕེབས་ཐོན་གྱིས་ཆུ་ཚོད་ ༤།༣༠ ཙམ་ལ་སྤང་གོང་མཚོར་ཕེབས་འབྱོར་གྱིས་དར་ཆེན་དང་རླུང་རྟ་སྒྲེང་འཛུགས་གནང་གྲུབ་མཚམས།
སྤང་གོང་མཚོར་གནས་མཇལ་དུ་ཕེབས་ཏེ་དཔལ་ལྡན་སྲིད་སྐྱོང་མཆོག་གིས་གསུང་དོན། དེ་རིང་ང་ཚོ་སྤང་གོང་མཚོར་འབྱོར་ཡོད། རི་རྒྱབ་ལ་བོད་དབུས་ཀྱི་ནུབ་རྒྱུད་རུ་ཐོག་ས་ཆ་འཁེལ་གྱི་ཡོད་རེད་ཟེར་གྱི་འདུག ད་རེས་ང་ཚོ་སྤང་གོང་མཚོར་བཅར་དགོས་དོན་ནི། གཙོ་བོ་དར་རླུང་བཙུགས་རྒྱུ་དེ་དག་བསྒྲུབས་སོང་། སང་སྔ་དྲོ་བསང་གསོལ་ཞུ་རྒྱུ་རེད། བསང་གསོལ་ཆེད་རྣམ་རྒྱལ་གྲྭ་ཚང་ནས་དགེ་འདུན་པ་ཕེབས་ཡོད། དེ་བཞིན་ལ་དྭགས་བསོད་ནམས་གླིང་བོད་མིའི་གཞིས་ཆགས་ཀྱི་མི་མང་སྐུ་ཚབ་རྣམ་པ་ཕེབས་ཡོད། ཕྱི་ཚེས་ ༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དུས་ཆེན་ཡིན་སྟབས། ང་ཚོ་སྤང་གོང་མཚོར་བཅར་ཏེ་བོད་ནང་གི་བོད་མིའི་མངོན་འདོད་འགྲུབ་པར་ཤོག་ཅེས་སྨོན་ལམ་རྒྱག་རྒྱུ་ཡིན།
བོད་ནང་གི་བོད་མིའི་མངོན་འདོད་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བོད་ནང་གདན་འདྲེན་ཞུ་ཐུབ་པ་དང་། བོད་ནང་རང་དབང་སླར་གསོ་བྱེད་རྒྱུ་གཙོ་བོ་རེད། དེ་བཞིན་ང་རང་ཡིན་ནའང་བོད་མཐོང་མྱོང་མེད། འོན་ཀྱང་ད་རེས་བོད་ཕྱོགས་སུ་བལྟས་ནས་སྨོན་ལམ་རྒྱག་རྒྱུ་གཙོ་བོ་ནི། བོད་མི་ས་ཡ་དྲུག་རྡོག་རྩ་གཅིག་སྒྲིལ་དང་ཕྱར་གྲུ་མཉམ་འདེགས་ཐོག་ནས་སྐུ་ལས་སྐྱོན་ནས་བོད་ཀྱི་རྩ་དོན་འགྲུབ་པར་ཤོག ཅེས་སྨོན་ལམ་རྒྱག་རྒྱུ་ཡིན།
དེ་རིང་སྔ་དྲོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆེད་མངགས་བྱིན་རླབས་ཤིག་སྩལ་གནང་མཛད་བྱུང་། གལ་ཏེ་མཚོའི་དཀྱིལ་དུ་འགྲོ་ཐུབ་ན་བྱིན་རླབས་འདི་ཉིད་སྤང་གོང་མཚོའི་དཀྱིལ་དུ་འབུལ་རྒྱུ་ཡིན། ང་ཚོའི་རེ་བར་བྱིན་རླབས་འདི་ཉིད་སྤང་གོང་མཚོ་བརྒྱུད་བོད་དུ་འབྱོར་ནས་བོད་ནང་གི་བོད་མི་ཚོ་ཡིན་ནའང་བྱིན་རླབས་འདི་ཐོབ་པར་ཤོག་ཅེས་སྨོན་ལམ་རྒྱག་རྒྱུ་ཡིན།
དེར་བརྟེན་ད་རེས་སྤང་གོང་མཚོར་བཅར་རྒྱུ་བྱུང་བ་དང་དར་རླུང་འཛུགས་རྒྱུ་བྱུང་བ། བསང་གསོལ་གཏང་རྒྱུའི་གོ་སྐབས་བྱུང་བ་ཧ་ལས་པའི་བསྐལ་པ་བཟང་པོ་རེད། དགེ་འདུན་པ་དང་མི་མང་ཚང་མས་སྨོན་ལམ་རྒྱག་སྟེ་བོད་ནང་གི་བོད་མིའི་མངོན་འདོད་འགྲུབ་པར་ཤོག སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གང་མགྱོགས་བོད་ནང་ཆིབས་སྒྱུར་གནང་ཐུབ་པར་ཤོག ཅེས་སྨོན་ལམ་རྒྱག་རྒྱུ་གཙོ་བོ་ཡིན།
ཕྱི་ཚེས་ ༦ ཉིན་༧གོང་ས་མཆོག་དགུང་གྲངས་ ༨༢ ལ་ཕེབས་པའི་སྐུའི་འཁྲུངས་སྐར་ཡིན་སྟབས། ༸གོང་ས་མཆོག་སྐུ་ཚེ་ཡུན་རིང་གནས་པར་ཤོག་ཅེས་སྨོན་ལམ་གཙོ་བོ་རྒྱག་རྒྱུ་ཡིན། ང་རང་བོད་ལ་འགྲོ་མྱོང་མེད་སྟབས། ད་རེས་བོད་ཀྱི་ཡུལ་ལྗོངས་མཇལ་ཡོང་དུས་སེམས་གཏིང་ནས་སྐྱིད་བྱུང་ཞེས་པ་ལྟར་སེམས་གཏིང་ནས་སྤྲོ་སྣང་སྐྱེ་ཡོང་གི་འདུག
འདི་ནས་བོད་ཕྱོགས་སུ་ལྟ་ཡོང་དུས་ཐག་ཧ་ཅང་ཉེ་བོ་ཡིན་ནའང་ད་ལྟའི་ཆར་ཆབ་སྲིད་ཀྱི་གནས་སྟངས་ཐོག་ནས་ཐག་རིང་པོ་ཆགས་ཡོད། དེར་བརྟེན་སྔ་ཕྱི་མ་གཏོགས་ང་ཚོ་བོད་ལ་ཡོང་རྒྱུ་ཡིན། ཞེས་སྨོན་ལམ་དང་རེ་བ་རྒྱག་གི་ཡོད། བོད་ཕྱོགས་སུ་ཧ་ཅང་ཐག་ཉེ་བོ་སླེབ་ཡོད་ནའང་ཐག་རིང་པོ་ཆགས་ཡོད། ང་ཚོ་ཚང་མས་དཀའ་ལས་རྒྱག་སྟེ་བོད་མི་ཡོངས་ཀྱི་མངོན་འདོད་བསྒྲུབ་ཐུབ་ཀྱི་རེད་དྲན་གྱི་འདུག ཐུགས་རྗེ་ཆེ། བོད་རྒྱལ་ལོ། ལྷ་རྒྱལ་ལོ། ཞེས་གསུང་། ཕྱི་ཚེས་ ༥ ཉིན་གྱི་སྔ་དྲོ་བསང་གསོལ་གནང་གྲུབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆེད་མངགས་སྩལ་བའི་མཚོ་རྫས་སྤང་གོང་མཚོའི་ནང་འབུལ་ནས་སྨོན་ལམ་སྐྱོན་ཡོད་པ་བཅས།།
