༢༠༡༧ ཟླ་ ༦ ཚེས་ ༢༨ རེས་གཟའ་ལྷག་པ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་ནང་གི་མཛད་འཕྲིན་ཁག་རེ་ཞིག་ལེགས་གྲུབ་རྗེས་རྒྱ་གར་རྒྱལ་ས་ལྡི་ལིའི་གནམ་ཐང་ནས་ཕྱི་ལོ་ ༢༠༡༧ ཟླ་ ༦ ཚེས་ ༢༨ རེས་གཟའ་ལྷག་པའི་ཉིན་དགུང་ཆུ་ཚོད་ ༡༠ ཐོག་ལ་དྭགས་རྒྱལ་ས་སླེ་བ་ཀུ་ལ་གནམ་ཐང་དུ་༸ཞབས་སོར་བདེ་བར་འཁོད་གནང་མཛད་འདུག སྐབས་དེར་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་དང་། ཁྲིག་སེ་དགོན་པའི་མཁན་པོ་མཆོག འབྲི་གུང་ཐུགས་སྲས་རིན་པོ་ཆེ་མཆོག གྲོས་ཚོགས་འཐུས་མི་ཐུབ་བསྟན་ཚེ་དབང་ལགས། ལ་དྭགས་རང་སྐྱོང་རི་ལྗོངས་ཡར་རྒྱས་ཚོགས་པའི་འགོ་དཔོན། ལ་དྭགས་ནང་པའི་ཚོགས་པ་དང་གཞོན་ནུ་ཚོགས་པའི་ཚོགས་གཙོ། རི་རྫོང་དགོན་པའི་དགེ་འདུན་པ་བཅས་ཀྱིས་དུང་རྒྱ་སྤོས་སྣེས་སྔོན་བསུས་ཏེ་ཕེབས་བསུའི་སྣེ་ལེན་གཟབ་རྒྱས་ཞུས། དེ་རྗེས་མགོན་པོ་གང་ཉིད་མཆོག་ཞི་བའི་ཚལ་ཕོ་བྲང་དུ་ཆིབས་སྒྱུར་བསྐྱངས་སྐབས་ཕེབས་ལམ་དུ་དད་ལྡན་སེར་སྐྱ་སྟོང་ཕྲག་བརྒལ་བས་ལག་ཏུ་མེ་ཏོག་དང་བདུག་སྤོས་སོགས་ཐོགས་ནས་དགའ་དད་སྤྲོ་གསུམ་གྱི་སྒོ་ནས་ཕེབས་བསུའི་སྣེ་ལེན་གཟབ་རྒྱས་ཞུས་འདུག
དེ་ཡང་མཛད་འཆར་ལྟར་ན་ཕྱི་ལོ་ ༢༠༡༧ ཟླ་ ༦ ཚེས་ ༢༩ ནས་ཕྱི་ཟླ་ ༧ ཚེས་ ༥ བར་༸གོང་ས་མཆོག་ཞི་བའི་ཚལ་ཕོ་བྲང་ནང་སྐུ་ངལ་གསོ་གནང་མཛད་རྒྱུ་དང་། ཕྱི་ཟླ་ ༧ ཚེས་ ༦ ཉིན་མགོན་པོ་གང་ཉིད་མཆོག་ཕྱི་ལུགས་ལྟར་དགུངས་གྲངས་ ༨༢ བཞེས་པའི་སྐུའི་འཁྲུངས་སྐར་དགའ་སྟོན་རྟེན་འབྲེལ་མཛད་སྒོ་སྲུང་བརྩི་དང་སྦྲགས་བསྟན་འགྲོའི་ཕན་བདེའི་སླད་༸སྐུ་ཚེ་མི་འཇིག་རྡོ་རྗེའི་ཁམས་སུ་བརྟན་ཕྱིར་བརྟན་བཞུགས་བསྟར་འབུལ་ཞུ་རྒྱུ་མ་ཟད།
ཏཱ་ལའི་བླ་མའི་དྲ་རྒྱ་བརྒྱུད་ཐེ་ཝན་དང་སིངྒ་པུར་ནང་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུ་རྒྱུའི་མཛད་རིམ་རྣམས་ཐད་ཀར་འཛམ་གླིང་ཡོངས་ལ་རྒྱང་སྲིང་གནང་རྒྱུ་ཡིན་འདུག
དེ་རྗེས་༸གོང་ས་མཆོག་ཕྱི་ཟླ་ ༧ ཚེས་ ༡༠ ཉིན་རྒྱལ་ས་སླེ་ནས་ཐད་འཕུར་གནམ་གྲུ་བརྒྱུད་ནུབ་རར་ཆིབས་སྒྱུར་བསྐྱངས་རྗེས་ཁུལ་དེར་བརྟེན་གཞི་བྱས་པའི་བདེ་སྐྱིད་དགོན་པར་ཆིབས་སྒྱུར་བསྐྱངས་ནས་དབྱར་ཆོས་ཆེན་མོའི་མཇུག་སྡོམ་མཛད་སྒོར་བཀའ་སློབ་སྩལ་གནང་མཛད་རྒྱུ་མ་ཟད། ཀ་མ་ལ་ཤི་ལས་མཛད་པའི་སྒོམ་རིམ་བར་པ་དང་། རྒྱལ་སྲས་ཐོགས་མེད་བཟང་པོས་མཛད་པའི་བློ་སྦྱོང་ཚིགས་བརྒྱད་མའི་བཀའ་ཆོས་སྩལ་གནང་མཛད་རྒྱུ་ཡིན་འདུག་པ་བཅས།།
