༢༠༡༧ ཟླ་ ༦ ཚེས་ ༢༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༧ ཟླ་ ༦ ཚེས་ ༡༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་ཁེལ་ལི་ཕོར་ནི་ཡ་མངའ་སྡེའི་ལྷོ་ཁུལ་གྱི་གྲོང་ཁྱེར་ནིའུ་པོཌ་བྷི་ཆི་ Newport Beach ཞེས་པ་དེར་ཆིབས་སྒྱུར་བཀའ་དྲིན་བསྐྱངས། སྐབས་དེར་ཨེ་ན་ཧེམ་ Anaheim གྲོང་སྡེའི་སྤྱི་ཁྱབ་པ་སྐུ་ཞབས་ཊོམ་ཊེཌ་ Tom Tait མཆོག་གིས་གཙོས་བོད་མི་དང་ཝི་ཏི་ནམ། རྒྱ་རིགས་སོགས་ཁྱོན་མི་གྲངས་ ༡༢༠ བརྒལ་བས་གྲོ་སོ་ཕྱེ་མར་དང་ཆང་ཕུད་བཅས་འདེགས་འབུལ་ཞུས་པ་བརྒྱུད་སྲོལ་རྒྱུན་གྱི་ལམ་ནས་ཕེབས་བསུའི་སྣེ་ལེན་གཟབ་རྒྱས་ཞུས།
དེ་རྗེས་ཚོགས་ཁང་དུ་གཞོན་སྐྱེས་འགོ་ཁྲིད་ Young Presidents’ Organization རྣམས་ལ་བཀའ་སློབ་ཀྱི་ཐོག་མར་གྲོང་སྡེའི་སྤྱི་ཁྱབ་པ་སྐུ་ཞབས་ཊོམ་ཊེ་ཌི་མཆོག་གིས་ངོ་སྤྲོད་གནང་རྗེས་༸གོང་ས་མཆོག་གིས་བཀའ་སློབ་སྩལ་དོན། ངོས་ཀྱིས་རྒྱུན་དུ་གཏམ་བཤད་ཀྱི་ཐོག་མར་བརྩེ་བའི་སྤུན་མཆེད་ཕོ་མོ་རྣམ་པ་ཞེས་འཚམས་འདྲི་ཞུ་བཞིན་ཡོད། གང་ཡིན་བརྗོད་ན། ངོས་ཀྱིས་འཛམ་གླིང་མི་འབོར་ཐེར་འབུམ་བདུན་ཡོད་པ་རྣམས་ཚང་མ་སྤུན་མཆེད་ལྟ་བུར་ངོས་འཛིན་བྱེད་བཞིན་ཡོད། ཐོག་མར་མའི་མངལ་ནས་བཙའ་སྐབས་དང་། དེ་ནས་རིམ་བཞིན་ཕ་མའི་བྱམས་སྐྱོང་འོག་འཚར་ལོངས་བྱེད་སྟངས། ལྷག་པར་མའི་བྱམས་བརྩེས་སྐྱོང་སྟངས་སོགས་གཅིག་མཚུངས་རེད། སྐབས་འདིར་ཆོས་ཀྱི་སྐད་ཆ་གང་ཡང་མེད། ཚན་རིག་པས་བརྗོད་པ་ལྟར་གཞི་རྩའི་མིའི་ལྷན་སྐྱེས་རང་བཞིན་བྱམས་བརྩེ་ལྡན་པ་ཡིན་སྐོར་ཚོད་ལྟའི་ལམ་ནས་ར་སྤྲོད་བྱས་ཡོད། དེར་བརྟེན་གལ་ཏེ་ང་ཚོས་ཕུལ་དུ་བྱུང་བའི་འགྲོ་བ་མིའི་རིགས་ལ་ཡོད་པའི་རྣམ་དཔྱོད་དེ་བེད་སྤྱོད་ཚུལ་དང་མཐུན་པ་ཞིག་བཏང་ཐུབ་ན་བཟང་ཕྱོགས་ཀྱི་རེ་བ་རྒྱག་ས་ཞིག་ཏན་ཏན་ཡོད།
བློ་ཕམ་པ་ཞིག་ལ་དེང་དུས་ཤེས་ཡོན་ལམ་ལུགས་ཀྱི་དམིགས་ཡུལ་གཙོ་བོ་དེ་ཕྱི་དངོས་པོའི་མཐུན་རྐྱེན་ཁོ་ནར་དམིགས་ནས་ནང་གི་གཤིས་རྒྱུད་དང་འབྲེལ་བའི་ཐོག་ལ་དོ་སྣང་སྤྲོད་རྒྱུའི་ཐོག་འདང་ངེས་མེད། སྔ་མོའི་སྐབས་བཟང་སྤྱོད་གོང་སྤེལ་གཏོང་རྒྱུའི་འགན་གཙོ་བོ་དེ་ཡེ་ཤུའི་ལྷ་ཁང་སོགས་ཀྱིས་འཁྱེར་སྲོལ་ཡོད། འོན་ཀྱང་ད་ཆ་བཟང་སྤྱོད་གོང་མཐོར་གཏོང་རྒྱུའི་འགན་དེ་སློབ་གྲྭས་འཁྱེར་དགོས། དེ་རིང་འདིར་ཁྱེད་ཚོ་དང་ཐུག་ནས་འགྲོགས་འདྲིས་བྱ་རྒྱུའི་གོ་སྐབས་བྱུང་བ་ཧ་ཅང་དགའ་པོ་བྱུང་། ལྷག་པར་འདིར་ངོས་ཀྱི་གྲོགས་པོ་རྙིང་པ་སྐུ་ཞབས་ཊོམ་མཆོག་གིས་ངོས་རང་ངོ་སྤྲོད་གནང་བར་བཀའ་དྲིན་ཆེ་ཞུ་རྒྱུ་ཡིན། ཁོང་གིས་གྲོང་ཁྱེར་འདིའི་ནང་བྱམས་བརྩེ་གོང་འཕེལ་གཏོང་ཆེད་ལས་གཞི་འདྲ་མིན་སྤེལ་བར་བརྟེན་ངོས་ཀྱི་ཁོང་དང་ཁོང་གི་སྐུ་ཟླར་བཀའ་དྲིན་ཆེ་ཞུ་རྒྱུ་ཡིན།
ང་ཚོ་ཕན་ཚུན་གླེང་མོལ་བྱེད་ན་དགའ་རྒྱུ་རེད། དང་ཐོག་ངོས་ཀྱིས་སེམས་འཚབ་བྱེད་བཞིན་པའི་གནད་དོན་ཁག་གཅིག་གསལ་བཤད་བྱ་རྒྱུ་ཡིན། འགྲོ་བ་མི་སྤྱི་ལ་བདེ་ཞིང་སྐྱིད་པ་ཞིག་བྱུང་ན་མི་སྒེར་ལའང་སྐྱིད་པ་ཡོང་གི་རེད། གང་ཡིན་བརྗོད་ན་འགྲོ་བ་མི་ནི་སྤྱི་ཚོགས་ལ་ཧ་ཅང་ཤུགས་ཆེན་པོ་བརྟེན་ནས་འཚོ་དགོས་པའི་སེམས་ཅན་ཞིག་ཡིན། དེར་བརྟེན་མི་སྒེར་གྱི་བདེ་སྡུག་དེ་སྤྱི་ཚོགས་ལ་རག་ལུས་ཡོད། ལྷག་པར་དེང་སྐབས་ལ་མཚོན་ན་གོ་ལའི་དཔལ་འབྱོར་ལམ་ལུགས་ཀྱི་གནས་སྟངས་དང་གོ་ལའི་གནམ་གཤིས་འགྱུར་ལྡོག་གི་དཀའ་ངལ་སོགས་ལ་ང་ཚོ་ཚང་མས་མཉམ་རུབ་ཀྱི་ནུས་པའི་ཐོག་ནས་དཀའ་ངལ་དེ་དག་ལ་གདོང་ལེན་བྱེད་དགོས། ཕན་ཚུན་མི་མཐུན་པའི་གནས་ཚུལ་རིགས་ཡོང་རྒྱུ་ཡིན་པ་ཆོས་ཉིད་རེད། འོན་ཀྱང་ང་ཚོས་ཕྱོགས་ཡོངས་ཀྱི་གནས་སྟངས་ལ་བསམ་བློ་བཏང་ནས་ཕྲན་བུ་མི་མཐུན་པའི་གནས་ཚུལ་དེ་དག་ལ་ཆེ་བཞག་ཆུང་བཤོལ་བྱ་ནས་གདོང་ལེན་བྱེད་དགོས།
ཁ་སང་ངོས་རང་མ་ཡོ་སྨན་ཁང་དུ་ཡོད་སྐབས་སྨན་པས་ནད་པ་ཚོར་ནད་པ་ཞིག་གི་འདུ་ཤེས་འཛིན་ནས་སྨན་བཅོས་སོགས་བྱས་པ་མ་གཏོགས་ནད་པའི་རིགས་རུས་དང་ཆོས་དད་ཡོད་མེད་སོགས་སྐད་ཆ་གང་ཡང་མེད། ང་ཚོའི་རྙོག་གྲ་ཕལ་མོ་ཆེ་ཕན་ཚུན་ཆོས་དད་ཡོད་མེད། རྒྱལ་ཁབ་དང་རིགས་རུས་མི་མཐུན་པ། དབུལ་ཕྱུག་སོགས་ཕྲན་བུ་མི་མཐུན་པའི་རིམ་པ་གཉིས་པའི་གནས་སྟངས་ལ་ཧ་ཅང་གཙིགས་ཆེན་པོ་འཛིན་པའི་ཉེར་ལེན་ལ་བརྟེན་ནས་འབྱུང་བཞིན་ཡོད། དེར་བརྟེན་གཞི་རྩའི་ང་ཚོ་ཚང་མ་འགྲོ་བ་མིའི་རིགས་གཅིག་གྱུར་ཡིན་བསམ་པའི་འདུ་ཤེས་དེའི་ཐོག་ནས་དཀའ་ངལ་དེ་དག་སེལ་ཐུབ་རྒྱུ་ཡིན། ཞེས་སོགས་༸སྐུའི་རླབས་ཆེན་གྱི་མཛད་ཁུར་གཙོ་བོ་གསུམ་གྱི་སྐོར་བཀའ་སློབ་སྩལ་རྗེས་གཞོན་སྐྱེས་ཚོའི་དྲི་བ་རྣམས་ལ་བཀའ་ལན་སྩལ་ཡོད་པ་བཅས།།
