༢༠༡༠ ཟླ་ ༡༠ ཚེས་ ༢ རེས་གཟའ་མིག་དམར།
༄༅། །འདི་གར་ཤེས་རིག་ལས་ཁུངས་ནས་བཏང་གནས་ནང་འཁོད་དོན། ཤེས་རིག་ལས་ཁུངས་ནས་ཕྱི་ལོ་ ༢༠༡༠ ཟླ་ ༡༠ ཚེས་ ༢༩ སྔ་དྲོ་ཆུ་ཚོད་ ༨།༣༠ ཐོག་སམ་བྷོ་ཊའི་ཁྱབ་ཁོངས་གཞི་རིམ་བར་མའི་སློབ་དགེ་རྣམས་ལ་གཞི་རིམ་བར་མའི་སློབ་ཚན་རྩིས་དང་ཚན་རིག་གཉིས་དང་སྤྱི་ཚོགས་ཚན་རིག་བཅས་བོད་སྐད་ཐོག་སློབ་འཁྲིད་གནང་ཐབས་ཀྱི་ཉིན་བཅོ་ལྔའི་ཟབ་སྦྱོང་ཞིག་སྤོན་ཊ་གཏན་སློབ་ཏུ་གོ་སྒྲིག་ཞུས་ཡོད་པ་རེད། ཟབ་སྦྱོང་དབུ་འབྱེད་ཀྱི་མཛད་སྒོར་པུར་ཝ་ལ་ས་གནས་འགོ་འཛིན་སྐུ་ངོ་ཚེ་རིང་དབང་འདུས་ལགས་སྐུ་མགྲོན་གཙོ་བོ་གདན་ཞུ་གནང་ཡོད། དེ་ཡང་ཐོག་མར་ཤེས་ཡོན་འགན་འཛིན་ཚེ་རིང་བསམ་གྲུབ་ལགས་ཀྱིས་ཟབ་སྦྱོང་དེ་བཞིན་ཕྱི་ཟླ་ ༡༠ ཚེས་ ༢༩ ནས་ཟླ་ ༡༡ ཚེས་ ༡༢ བར་ཉིན་བཅོ་ལྔའི་རིང་འཚོགས་རྒྱུ་ཡིན་སྐོར་དང་། དེ་བཞིན་ཟབ་སྦྱོང་ནང་སམ་བྷོ་ཊའི་ཁྱབ་ཁོངས་ཀྱི་གཞི་རིམ་བར་མའི་དགེ་རྒན་གྲངས་ ༡༥ མཉམ་ཞུགས་གནང་ཡོད་པ་མ་ཟད། ཟབ་སྦྱོང་རིང་ཌོ་ལན་ཇི་སློབ་གྲྭའི་ཚན་རིག་སློབ་དགེ་པད་མ་རྒྱལ་མཚན་ལགས་དང་ཤེས་རིག་ཤེས་ཡོན་འགན་འཛིན་རྒྱལ་མཚན་ལགས་ནས་ཚན་རིག་སློབ་ཚན་འའཁྲིད་ཐབས་དང་། སྤོན་ཊ་གཏན་སློབ་ཨང་རྩིས་སློབ་དཔོན་བསྟན་འཛིན་རྡོ་རྗེ་ལགས་ནས་ཨང་རྩིས། ཤེས་རིག་སློབ་དེབ་རྩོམ་སྒྲིག་པ་བསོད་ནམས་བཟང་པོ་དང་བུ་དྷ་སྐྱབས་གཉིས་ནས་སྤྱི་ཚོགས་ཚན་རིག ཤེས་རིག་དྲུང་འཕར་བཀྲ་ཤིས་དོན་གྲུབ་ལགས་ནས་ཨང་རྩིས་དང་ཚན་རིག  སྤོན་ཊ་གཏན་སློབ་ཀྱི་ཆོས་དགེ་བསོད་ནམས་དོན་གྲུབ་ལགས་ནས་སློབ་ཚན་གཞན་ལ་རིགས་ལམ་གྱི་ཐབས་ལམ་བཀོད་སྤྱོད་གནང་ཐབས། ཉིན་གཉིས་རིང་ཨོ་སི་ཊོ་ལི་ཡ་ཤེས་ཡོན་རིག་པའི་ཐོག་མཁས་མྱོང་ཅན་ཨེ་རིག་དང་མར་གྷེ་རེག  ཀེ་རི་རྣམ་གསུམ་ནས་གསར་གཏོད་ཀྱི་སློབ་འཁྲིད་ཐབས་ལམ་སྐོར་ཟབ་སྦྱོང་སྤྲོད་གཏན་འཁེལ་ཡོད།  དེ་བཞིན་ཟབ་སྦྱོང་སྐབས་སེ་ལ་ཀུ་ཡེ་སློབ་སྤྱི་འབྲུག་ཚེ་རིང་དང་དགེ་ཆེ་ཀརྨ་ཤེས་རབ་ནས་ཚན་རིག་དང་སྤྱི་ཚོགས་ཚན་རིག་འའཁྲིད་ཐབས་ཚོགས་ཐེངས་གཉིས་བཅས་སློབ་འཁྲིད་ནང་འཆར་འགོད་ཞུས་ཡོད་པ་དང་།     ཐེངས་འདིའི་ཟབ་སྦྱོང་དེ་བཞིན་ཤེས་ཡོན་སྲིད་བྱུས་ལག་བསྟར་བརྒྱུད་རིམ་ནང་གལ་འགངས་ཆེ་ཤོས་ཆགས་ཡོད་པ་མ་ཟད། བོད་ནང་དེང་སང་བོད་ཕྲུག་དཔའ་བོ་དཔའ་མོ་ཚོས་རང་གི་མི་རིགས་དང་རྒྱལ་ཁབ་ཀྱི་དོན་དུ་བོད་ཀྱི་སྐད་ཡིག་ཐོག་སློབ་འཁྲིད་མུ་མཐུད་གནས་ཐབས་སླད་སྐད་འབོད་ལས་འགུལ་སྤེལ་བཞིན་པར་མིག་དཔེ་བལྟས་ནས་རང་དབང་ལུང་པའི་ནང་ཡོད་པའི་དགེ་ལས་རྣམས་ནས་སོ་སོའི་སྐད་ཡིག་ཐོག་སློབ་ཚན་ཆ་ཚང་སློབ་འའཁྲིད་གནང་རྒྱུའི་ཐད་ཤུགས་སྣོན་བསྐྱོན་དགོས་པ་ནི་ལས་འགན་གལ་ཆེ་ཤོས་ཆགས་ཡོད་པ་མ་ཟད། བོད་ནང་གི་སློབ་ཕྲུག་རྣམས་ཀྱི་ལས་འགུལ་ལ་དོན་དམ་པའི་རྒྱབ་སྐྱོར་ལེགས་ཤོས་ཆགས་ཐུབ་ངེས་ཡིན་པ་བཅས་ཀྱི་ངོ་སྤྲོད་གནང་།  དེའི་རྗེས་སྤོན་ཊ་གཏན་སློབ་ཀྱི་སློབ་སྤྱི་མིག་དམར་ཚེ་རིང་ལགས་ནས་ད་ལན་གྱི་ཟབ་སྦྱོང་དེ་བཞིན་བཙན་བྱོལ་ནང་གི་ཤེས་ཡོན་སློབ་གསོ་བརྒྱུད་རིམ་ནང་གོམ་སྤོས་ཆེན་པོ་ཞིག་ཡིན་པ་དང་། བོད་ནང་བོད་ཕྲུག་རྣམས་ནས་རྒྱ་མིས་འཆར་གཞི་ལྡན་པའི་བོད་ཀྱི་སྐད་ཡིག་རྩ་མེད་བཟོ་རྒྱུའི་སྲིད་བྱུས་ལ་ངོ་རྒོལ་སྐད་འབོད་གནང་བཞིན་པ་ལྟར། རང་རེ་རང་དབང་ལུང་པའི་ནང་ཡོད་བཞིན་པ་རྣམས་ནས་ལག་ལེན་མིག་དཔེ་སྟོན་ཐུབ་པ་དགོས་རྒྱུ་ནི་གནད་འགག་ཆེ་ཤོས་ཆགས་ཡོད། བོད་སྐད་བརྒྱུད་ལམ་ནས་གཞི་རིམ་བར་མའི་སློབ་ཚན་ཁག་སློབ་འཁྲིད་གནང་ཐབས་ཀྱི་ཟབ་སྦྱོང་གང་ཐོབ་པ་རྣམས་སློབ་གྲྭ་ཁག་ནང་ལག་ལེན་དོན་འཁྱོལ་ཡོང་ཐབས་གནང་དགོས་པ་སོགས་ཟབ་སྦྱོང་དང་འབྲེལ་བའི་གསུང་བཤད་གནང་། དེ་ནས་སྐུ་མགྲོན་གཙོ་བོ་མཆོག་ནས་ཟབ་སྦྱོང་དབུ་འབྱེད་གསུང་བཤད་དུ་རང་གཞུང་གི་དགོངས་བཞེད་ལྟར་སོ་སོའི་སྐད་ཡིག་བརྒྱུད་ལམ་ནས་སློབ་ཚན་མཐའ་དག་སློབ་འཁྲིད་གནང་ཐུབ་རྒྱུ་ཡིན་མི་རིགས་ཀྱི་སྐད་ཡིག་གསོན་པོར་གནས་ཐུབ་པའི་ཆ་རྐྱེན་བཟང་ཤོས་ཆགས་ཡོད་པ་དང་། བོད་ཀྱི་སྐད་ཡིག་ནི་ཟབ་ཅིང་རྒྱ་ཆེ་བ་ཡིན་པ་མ་ཟད་ང་ཚོ་མི་རབས་ཀྱི་འཇོན་ཐུབ་ན་སྐད་ཡིག་གི་ནུས་པས་མ་འདང་བ་མེད་ཚུལ་སོགས་ཀྱི་ལམ་སྟོན་དང་། གཞན་ཡང་བཙན་བྱོལ་སྤྱི་ཚོགས་ཀྱི་ལས་རིམ་མཐའ་དག་ནང་ཤེས་ཡོན་སློབ་གསོའི་ལས་དོན་ལས་ལྷག་པ་ཞིག་མེད་པས་དགེ་རྒན་གྱི་ཕྱག་ལས་ནི་རླབས་ཆེན་ཞིག་ཡིན་སྐོར་དང་། དེ་བཞིན་སོ་སོའི་སྐད་ཡིག་གཙིགས་ཆེར་འཛིན་དགོས་པ་ནི་མཐའ་ན་རྒྱ་གར་མངའ་སྡེའི་སོ་སོའི་སྐད་ཡིག་ལ་གཙིགས་ཆེར་འཛིན་བཞིན་པ་དང་སློབ་འཁྲིད་བརྒྱུད་ལམ་བཀོལ་སྤྱོད་གནང་བཞིན་པར་མཐོང་ཆོས་ལྟར། སོ་སོའི་རྒྱལ་ཁབ་དང་མི་རིགས་ཀྱི་སྐད་ཡིག་གསོན་པོར་གནས་ཐུབ་ཐབས་སུ་འཛིན་རིམ་ལྔ་བར་བོད་སྐད་བརྒྱུད་ལམ་སློབ་འཁྲིད་གནང་བ་ཙམ་མིན་པར་འཛིན་རིམ་དྲུག་པ་ནས་གོམ་པ་རིམ་སྤོས་གནང་རྒྱུ་ནི་ཚང་མའི་ལས་འགན་གལ་ཆེ་ཤོས་ཆགས་ཡོད་པ་སོགས་ཀྱི་ལམ་སྟོན་གསུང་བཤད་ཟབ་རྒྱས་གནང་།དེ་ནས་སྤོན་ཊ་གཏན་སློབ་ཀྱི་དགེ་ཆེ་སྐལ་བཟང་ཆོས་སྒྲོན་ནས་སྐུ་མགྲོན་གཙོ་བོ་མཆོག་དང་ཟབ་སྦྱོང་སློབ་འཁྲིད་གནང་མཁན། ཟབ་སྦྱོང་པ་རྣམས་ལ་ཐུགས་རྗེ་ཆེ་ཞུའི་གསུང་བཤད་གནང་ནས་མཛད་སྒོ་ལེགས་གྲུབ་བྱུང་བ་ཡོད་པ་རེད།ཟབ་སྦྱོང་ཉིན་མཐའ་མར་སམ་བྷོ་ཊའི་སྤྱི་ཁྱབ་འགན་འཛིན་ཀརྨ་ཆུང་བདག་ལགས་ནས་ཟབ་སྦྱོང་པ་རྣམས་དང་བོད་སྐད་བརྒྱུད་ལམ་སློབ་འཁྲིད་ལག་བསྟར་གནང་ཕྱོགས་གོ་བསྡུར་སྦྱང་བཤད་ཞུས་ཏེ། སམ་བྷོ་ཊའི་ཁྱབ་ཁོངས་སློབ་ཁག་ནང་ལག་བསྟར་གནང་ཕྱོགས་ཀྱི་ལམ་སྟོན་གནང་རྒྱུ་དང་། ཕྱི་ཚེས་ ༡༢ ཕྱེད་ཡོལ་ཆུ་ཚོད་ ༣།༣༠ མཇུག་བསྡོམས་གནང་འཆར་ཡོད་པ་བཅས།།