ཕྱི་ལོ་ ༢༠༡༧ ཟླ་ ༥ ཚེས་ ༣༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༧ ཟླ་ ༥ ཚེས་ ༣༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་༧རྒྱལ་བའི་ཕོ་བྲང་མཇལ་འཕྲད་ཁང་དུ་ཝི་ཏི་ནམ་གྱི་ CEO ཚོགས་པའི་གསོལ་འདེབས་གོ་སྒྲིག་ཞུས་དོན་ལྟར་ཝི་ཏི་ནམ་གྱི་དགེ་འདུན་པ་དང་། ཚོང་པ། སྒྱུ་རྩལ་བ། ཤེས་ཡོན་མི་སྣ་སོགས་མི་གྲངས་ ༡༡༥ ཙམ་ལ་བཀའ་སློབ་དང་བཀའ་འདྲི་ཁག་གཅིག་ལ་བཀའ་ལན་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༧རྒྱལ་བའི་གཟིམ་ཆུང་ནས་དགའ་ལྡན་ཕོ་བྲང་མཇལ་འཕྲད་ཁང་དུ་ཕེབས་ཏེ་ཐོག་མར་འཚམས་འདྲི་སྩལ་རྗེས་མགོན་པོ་གང་ཉིདམཆོག་གི་༸སྐུའི་རླབས་ཆེན་གྱི་མཛད་ཁུར་གཙོ་བོ་གསུམ་གྱི་སྐོར་དང་། དཔལ་ནཱ་ལེནྡྲའི་ཆོས་བརྒྱུད་ཀྱིས་རྒྱུ་མཚན་ལ་བརྟེན་ནས་བླང་དོར་བརྟག་དཔྱད་མཛད་བཞིན་པའི་སྐོར་ངོ་སྤྲོད་མཛད་རྗེས་ཆོས་དང་མ་འབྲེལ་བའི་བཟང་སྤྱོད་སྐོར་ལ་བཀའ་སློབ་སྩལ་དོན། སེམས་ལ་ཞི་བདེ་ཡོད་ཚེ་ལུས་ལ་ན་ཚའི་ཚོར་བ་མི་ཡོང་བ་ལྟ་བུ་འདུག སྔོན་མ་ངོས་རང་རྡོ་རྗེ་གདན་ནས་གནས་སྐོར་ཞིག་ལ་ཕྱིན་སྐབས་ཚ་གྲང་འཐབ་པའམ་ལྟོ་ཆས་ཀྱི་རྐྱེན་ཡིན་ནམ། གང་ལྟར་ངོས་རང་རྒྱུ་མ་ན་ནས་ན་ཚ་ཛ་དྲག་པོ་ཞིག་བྱུང་། སྐབས་དེར་ངོས་རང་རྡོ་རྗེ་གདན་ནས་པཌ་ཎ་བརྒྱུད་བྷམ་བྷེ་ལ་སྨན་བཅོས་ཆེད་ཕྱིན་པ་རེད། པཌ་ཎ་རུ་འབྱོར་ནས་དགོང་མོ་འདུག་སྐབས་ལུས་པོའི་ན་ཟུག་ཧ་ཅང་ཤུགས་ཆེན་པོ་འདུག་ཀྱང་། བསམ་བློའི་ནང་ཉིན་དེར་རྒྱ་གར་གྲོང་གསེབ་ཀྱི་བྱིས་པ་སྐྱོ་པོ་ལྷམ་མེད་པ་དང་། ཤིང་སྒྲུག་མཁན། སློབ་གྲྭ་འགྲོ་ཡུལ་ཙམ་ཡང་མེད་པ་ཧ་ཅང་སྐྱོ་པོ་དེ་ལྟ་བུ་འདུག་པ་མཐོང་ཞིང་། ལྷག་པར་པཌ་ཎ་ལ་འབྱོར་བའི་སྐབས་སུ་གྲོང་ཁྱེར་གྱི་མཐའ་རུ་ཉལ་ཆས་ཤིག་གི་ནང་དུ་སྤོ་ལགས་ཤིག་ཉལ་འདུག ནད་པ་ཡིན་པ་ཧ་ཅང་གསལ་པོ་རེད། ལྟ་མཁན་སུ་གང་མི་འདུག ངོས་རང་སེམས་ཧ་ཅང་སྐྱོ་བྱུང་། དགོང་མོ་ཉལ་བའི་སྐབས་སུ་བདག་མེད་སྐྱབས་མེད་དུ་ལུས་པའི་བྱིས་པ་དང་། སྤོ་ལགས་ནད་པ་དེ་དག་བསམ་བློར་འཁོར་དུས་སྙིང་རྗེ་ཤུགས་ཆེན་པོ་ཞིག་སྐྱེས་པའི་སྐབས་སུ་ལུས་ཀྱི་ན་ཚ་དེ་ཚོར་བ་མེད་པ་ལྟ་བུ་ཞིག་འདུག དེར་བརྟེན་བསམ་བློའི་ཁྱད་ཆེན་པོ་འདུག སེམས་ཁྲལ་དང་ཁོང་ཁྲོ ང་རྒྱལ་ཕྲག་དོག་བཅས་ཀྱིས་མ་སྐྱིད་པ་བྱས་ཏེ་བསྡད་པ་ཡིན་ན། མཐུན་རྐྱེན་འཛོམས་ནས་ཉལ་བསྡད་ཡོད་ནའང་གཉིད་མ་ཁུགས་པ་དང་། གང་ལྟར་ལུས་ཀྱི་ཚོར་བ་བདེ་བ་དེས་སེམས་ཀྱི་སྡུག་བསྔལ་ཟིལ་གྱིས་གནོན་མི་ཐུབ་པ་ཧ་ཅང་གསལ་པོ་རེད། སེམས་ལ་ཞི་བདེ་ཡོད་ཚེ་ལུས་ཀྱི་བདེ་ཐང་ལ་ཧ་ཅང་ཕན་ཐོགས་ཆེན་པོ་ཡོད་སྐོར་དང་།
གཞན་ཡང་ཚན་རིག་པ་ཚོས་སེམས་ལ་ཞི་བདེ་ཡོད་ཚེ་ལུས་པོའི་འབྱུང་བ་སྙོམས་ནས་བདེ་ཐང་ལ་ཧ་ཅང་ཕན་གྱི་ཡོད་སྐོར་རྗོད་བཞིན་པ་ལུང་འདྲེན་དང་འབྲེལ་མུ་མཐུད་བཀའ་སློབ་སྩལ་དོན། ང་རང་ཚོའི་མཐོང་ཆོས་ལ་ཁྱིམ་ཚང་ནང་ལ་ཆ་བཞག་ནའང་། ཇི་ཙམ་ཁྱིམ་མི་ཚོར་སེམས་ནང་བརྩེ་བ་ཡོད་པ་དང་། མཛའ་བརྩེ་ཡོད་པ་ཡིན་ན་ཁྱིམ་ཚང་དེ་སྐྱིད་པ་དང་། འབྱོར་ལྡན་ཡིན་ཀྱང་ཁྱིམ་མི་རྣམས་ཕན་ཚུན་མཛའ་བརྩེ་མེད་ན་སེམས་མ་སྐྱིད་པར་སྡོད་པ་ཧ་ཅང་གསལ་པོ་རེད། གང་ལྟར་སེམས་ཀྱི་ཞི་བདེ་ཞེས་པ་ནི་ཆོས་ཀྱི་སྐད་ཆ་མ་རེད། དངོས་ཡོད་གནས་ཚུལ་ལ་མི་ལ་བདེ་སྐྱིད་དགོས་ཚེ་སེམས་ཀྱི་བདེ་སྐྱིད་དགོས་པ་གལ་ཆེན་པོ་ཆགས་འདུག དེར་བརྟེན་ད་ལྟ་འཛམ་གླིང་འདིར་ཡོད་པའི་ཤེས་ཡོན་སྤྲོད་སྟངས་དེས་འདང་གི་མི་འདུག དེང་དུས་ཤེས་ཡོན་ལམ་ལུགས་ནི་ཕྱི་དངོས་པོའི་ཡར་རྒྱས་ཁོ་ན་ལ་དམིགས་པ་ཞིག་ཆགས་འདུག དེར་ཁག་མི་འདུག དེང་རབས་ཤེས་ཡོན་ལམ་ལུགས་ཕལ་ཆེར་ཡུ་རོབ་ནས་བྱུང་བ་རེད། ཡུ་རོབ་ཚན་རིག་དང་རིམ་པས་འཕྲུལ་ཆས་ཡར་རྒྱས་ཕྱིན་ནས་ལོ་ཉིས་བརྒྱ་ལྷག་ཕྱིན་ཡོད། སྔོན་མ་ཡིན་ན་ཤེས་ཡོན་གྱི་བསྟི་གནས་དགོན་པ་ཁག་མ་གཏོགས་མེད། རིམ་པས་འཕྲུལ་ཆས་ཀྱི་བཟོ་ལས་ཡར་རྒྱས་ཕྱིན་སྟབས་དགོན་པས་འགན་ཆ་ཚང་འཁྱེར་ཐུབ་ཐབས་མེད་པར་བརྟེན་ཟུར་དུ་ཤེས་ཡོན་བསྟི་གནས་ཤིག་གཞི་ནས་ཚུགས་པ་ངོས་རང་དེ་ལྟར་མཐོང་གི་ཡོད།
དེ་དུས་ཡུ་རོབ་ལ་འཕྲུལ་ཆས་ཡར་རྒྱས་དང་ཚན་རིག་ཡར་རྒྱས་ཕྱིན་པའི་དགོས་མཁོ་དང་བསྟུན་ནས་ཤེས་ཡོན་གྱི་སྡེ་ཚན་ཟུར་དུ་ཚུགས་ཡོང་སྐབས། དེ་ནི་དངོས་པོ་ཡར་རྒྱས་ཁོ་ནའི་ཐོག་ཕྱིན་པ་མ་གཏོགས་ནང་སེམས་རྒྱུད་དུལ་བ་དང་། བྱམས་བརྩེ་བཅས་ནི་ཆོས་ཕྱོགས་ཀྱི་དགོན་པ་ཁག་གིས་འགན་འཁུར་ནས་འགྲོ་བཞིན་ཡོད་པས་དེ་ཏག་ཏག་འགྲིག་པ་ལྟ་བུ་ཞིག་རེད། རིམ་པས་དངོས་པོ་ཡར་རྒྱས་ཁོ་ནར་འབྲེལ་བའི་ཤེས་ཡོན་ཐོག་ནས་ཐོན་པའི་མི་དེ་ཡར་སླེབས་ཡོང་སྐབས་མི་ཚེ་གང་བོར་ཕྱི་དངོས་པོ་གཙོ་བོར་བྱེད་མཁན་ materialistic lifestyle དང་། དེ་བཞིན་སྒྱུ་རྩལ་གྱི་རིགས་ཀྱང་ཕྱི་དངོས་པོ་ཁོ་ན་དང་འབྲེལ་བའི་རིག་གཞུང་ materialistic culture རེད། ཅེས་སོགས་ཀྱི་བཀའ་སློབ་སྩལ་རྗེས་བཞུགས་སྒར་རྡ་སར་བཅར་མཁན་དང་། ཝི་ཏི་ནམ་གྱི་ HANOI དང་། HO CHI MINH CIIY གཞན་ཡང་། HAI PHONG བཅས་ས་ཁུལ་གསུམ་དུ་དྲ་ཐོག་བརྒྱུད་བཀའ་སློབ་ལ་གསན་གཟིགས་ཞུ་མཁན་ཁྲོད་ནས་ཁག་གཅིག་གིས་ཚོང་བརྒྱབ་པ་དང་མཉམ་དུ་ནང་པའི་ཆོས་ཉམས་ལེན་ཇི་ལྟར་བྱ་དགོས་པ་དང་། ཚོང་པས་འདོད་རྔམ་བྱེད་དགོས་པ་དང་ནང་ཆོས་ནང་དུ་འདོད་ཆུང་ཆོག་ཤེས་གསུང་བཞིན་པའི་འགལ་ཟླ་ཇི་ལྟར་སེལ་ཐབས། དེ་བཞིན་རྡུལ་ཕྲན་གྱི་སྐོར་དང་། སྤྱི་ཚོགས་ནང་བླ་མ་རྫུན་མ་དང་རྨོངས་དད་ཤུགས་ཆེན་པོ་ཡོད་པའི་སྐོར་ལ་དགོངས་ཚུལ་སོགས་ཀྱི་དྲི་བར་བཀའ་ལན་སྩལ་རྗེས་ཉིན་འདིའི་མཛད་རིམ་མཇུག་ལེགས་པར་སྒྲིལ་ཡོད་པ་བཅས།།
