༢༠༡༧ ཟླ་ ༥ ཚེས་ ༢༥ རེས་གཟའ་ཕུར་བུ།

༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཨ་རིར་གཞུང་དོན་ཕྱོགས་ཕེབས་གནང་བ་ལྟར།   ཉིན་གཉིས་པའི་སྔ་དྲོར་ཨ་རིའི་བོད་སྐད་རླུང་འཕྲིན་ཁང་དུ་གསར་འགོད་པའི་བཅར་འདྲི་དང་ལེན་གནང་བ་མ་ཟད། ཕྱེད་ཡོལ་འགྲོ་བ་མིའི་ཆེ་མཐོང་སྲུང་སྐྱོབ་དང་གོང་མཐོར་འདེགས་མཁན་མང་ཚོགས་བདེ་དོན་ཇུས་འགོད་སློབ་སྟོན་ཚོགས་ཆུང་ American Enterprise Institute ཞེས་པའི་མཁས་དབང་རྣམས་དང་ལྷན་གསུང་བཤད་སྤེལ་བ་དང་བགྲོ་གླེང་གནང་བ་སོགས་ལས་རིམ་ཁག་གཅིག་ནང་མཉམ་ཞུགས་གནང་ཡོད།

དེ་རྗེས་དཔལ་ལྡན་སྲིད་སྐྱོང་མཆོག་གིས་ཨ་རིའི་གྲོས་ཚོགས་ཀྱི་མང་གཙོ་ཚོགས་པའི་ཚོགས་གཙོ་ལྕམ་སྐུ་ནེན་སི་པི་ལོ་སི་ Nancy Pelosi མཆོག་གིས་དབུས་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ལྦན་ Jim McGovern མཆོག་དང་།  ཨེ་ལོ་ཊི་ཨན་གེལ་ Eliot Engel མཆོག   ཇོ་སི་བྷི་ཊི་ Joyce Beatty  མཆོག་བཅས་དང་ལྷན་མཇལ་འཕྲད་གནང་སྟེ་བོད་དོན་སྐོར་གྱི་གནད་དོན་བརྒྱད་གཙོ་འདོན་ཞུས་ནས་རྒྱབ་སྐྱོར་ཡོང་བའི་འབོད་སྐུལ་ཞུས་པར།  དབུ་ཁྲིད་རྣམས་ནས་སྐབས་དེར་ཐུགས་ལྷོད་ལྷོད་ངང་གསན་འཇོག་གནང་བ་མ་ཟད།  མཐར་གནད་དོན་བརྒྱད་པོའི་ཐོག་གང་ཐུབ་རོགས་རམ་ཞུ་ཐབས་གནང་རྒྱུ་ཡིན་སྐོར་གསུངས།

དེ་རྗེས་ཨ་རིའི་སྲིད་གཞུང་གསར་པའི་སློབ་སྟོན་ཚོགས་ཆུང་ Heritage Foundation ཡོད་སར་ཕེབས་ནས་རྒྱ་ནག་གཅིག་གི་སྲིད་བྱུས་དང་། བོད་མིའི་དབུ་མའི་ལམ་གྱི་སྲིད་བྱུས།  ཞེས་པའི་བརྗོད་གཞིའི་ཐོག་གསུང་བཤད་གནང་། སྐབས་དེར་མཁས་དབང་དང་ཤེས་ལྡན་མི་སྣ་ལྔ་བཅུ་ལྷག་མཉམ་ཞུགས་གནང་ཡོད།  དེ་ཉིན་གྱི་དགོང་དྲོ་ས་གནས་བོད་རིགས་རྣམས་ཀྱིས་དཔལ་ལྡན་སྲིད་སྐྱོང་མཆོག་ལ་གསོལ་སྟོན་བཤམས་ཡོད་པ་བཅས།།