༄༅། །ཕྱི་ལོ་ ༢༠༡༧ ཟླ་ ༥ ཚེས་ ༡༩ ཉིན་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ལ་དྭགས་སུ་ཞིང་གཤེགས་དམ་པ་སྐུ་ཞབས་བ་ཀུ་ལ་རིན་པོ་ཆེ་སྐུ་འཁྲུངས་ནས་མི་ལོ་ ༡༠༠ ཐམ་པ་འཁོར་བའི་རྒྱལ་སྤྱིའི་དུས་དྲན་མཛད་སྒོར་མཉམ་ཞུགས་གནང་ཡོད།

དེ་ཡང་མཛད་སྒོའི་སྐུ་མགྲོན་གཙོ་བོ་རྒྱ་གར་བྱང་ཕྱོགས་ཇ་མུ་དང་ཀ་ཤི་མིར་མངའ་སྡེའི་སྲིད་སྐྱོང་གཞོན་པ་སྐུ་ཞབས་ནིར་མལ་སིངྒ་མཆོག་དང་།   ཆེ་བསྟོད་སྐུ་མགྲོན་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་སོགས་ས་གནས་ཀྱི་གནད་ཡོད་མི་སྣ་ཁག་གཅིག  དགའ་ལྡན་ཁྲི་ཟུར་སྐྱབས་རྗེ་རི་རྫོང་སྲས་སྤྲུལ་ཐུབ་བསྟན་ཉི་མ་ལུང་རྟོགས་བསྟན་འཛིན་ནོར་བུ་རིན་པོ་ཆེ། བཀའ་ཟུར་སློབ་དཔོན་ཟམ་གདོང་རིན་པོ་ཆེ་སོགས་ཕེབས་ཡོད།

མཛད་སྒོའི་ཐོག་བཀའ་བློན་མཆོག་གིས་ཞིང་གཤེགས་དམ་པ་སྐུ་ཞབས་བ་ཀུ་ལ་རིན་པོ་ཆེའི་མཛད་རྗེས་ལ་གུས་འདུད་དང་རིན་པོ་ཆེ་དམ་པ་མཆོག་གིས་ལ་དྭགས་ཁུལ་གྱི་བཙན་བྱོལ་བོད་མི་རྣམས་ལ་ཐུགས་བརྩེ་བ་ཆེན་པོའི་མཐུན་འགྱུར་རོགས་རམ་གནང་བར་བཀའ་དྲིན་ཆེ་ཞུས་ཡོད་པ་མ་ཟད།   ལ་སྤྱིས་གཙོས་མི་མང་རྣམས་ནས་དགོན་སྡེ་ཁག་གི་ནང་གྲྭ་རྒྱུན་ཇེ་ཉུང་དུ་འགྲོ་བཞིན་པར་སེམས་འཚབ་དང་སྦྲགས་ནང་པའི་ལྟ་གྲུབ་རྒྱུན་འཛིན་གནང་མཁན་ཉམས་མེད་རྒྱུན་གནས་ཐུབ་སླད་མུ་མཐུད་འབད་བརྩོན་གནང་དགོས་སྐོར་སོགས་གསུངས།

གཞན་ཡང་ལ་སྤྱིས་རེ་སྐུལ་བཞིན་ཕྱི་ཚེས་ ༡༨ ཉིན་གྱི་ཕྱི་དྲོར་ལ་དྭགས་ཁུལ་གྱི་བོད་མི་རྣམས་ལ་གསུང་བཤད་དང་ས་གནས་ཀྱི་གཞུང་དང་གཞུང་འབྲེལ་མིན་པའི་ཚོགས་སྡེ་ཁག་གི་འཐུས་མི་དང་ལས་བྱེད་མཉམ་བཞུགས་མོལ་ཚོགས་འདུ་ཚོགས་ཡོད།   ཕྱི་ཚེས་ ༢༡ ཉིན་བསོད་ནམས་གླིང་བོད་མིའི་གཞིས་ཆགས་སུ་ཡོད་པའི་དགོན་སྡེ་ཁག་ཏུ་འཚམས་གཟིགས་གནང་ཡོད་པ་བཅས།།