༢༠༡༧ ཟླ་ ༥ ཚེས་ ༢༢ རེས་གཟའ་ཟླ་བ།
དེ་སྔའི་མཇལ་འཕྲད་སྐབས།
༄༅། །ཕྱི་ལོ་ ༢༠༡༧ ཟླ་ ༥ ཚེས་ ༢༡ རེས་གཟའ་ཉི་མའི་ཉིན་ཡུ་རོབ་གྲོས་ཚོགས་ European Parliament འཐུས་མི་རྣམས་ཀྱི་ཡིག་ཚང་དུ་ཕྱག་རོགས་ཞུ་མཁན་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་བཞུགས་སྒར་དུ་ཕེབས་སྐབས་གྷ་གལ་གནམ་ཐང་དུ་༸གོང་ས་མཆོག་མཇལ་བཅར་ཞུས་འདུག ཐེངས་འདིར་ཁོང་རྣམས་དང་ལྷན་སྦར་སེལ་སྐུ་ཚབ་དོན་ཁང་གི་ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚན་པའི་འབྲེལ་ཡོད་ལས་བྱེད་རིག་འཛིན་ཆོས་སྒྲོན་ལགས་ལྷན་བཅར་ཞུས་འདུག
གྷ་གལ་གནམ་ཐང་དུ།
སྤྱིར་བོད་དོན་རྒྱབ་སྐྱོར་ཚོགས་མི་ཁོང་རྣམ་པས་དེ་སྔ་༸གོང་ས་མཆོག་སྦར་སེལ་ཁུལ་དུ་ཆིབས་སྒྱུར་བསྐྱངས་སྐབས་མཇལ་ཁ་ཞུས་མྱོང་ཡོད་འདུག དེ་ཡང་ཕྱག་འབྲེལ་ཁོང་རྣམས་ནི་ཡུ་རོབ་གྲོས་ཚོགས་ནང་གི་ཆབ་སྲིད་ཚོགས་པ་ཡུ་རོབ་མི་མང་ཚོགས་པ་ European Peoples Party དང་།
གྷ་གལ་གནམ་ཐང་དུ།
སྤྱི་ཚོགས་རིང་ལུགས་དང་མང་གཙོའི་རིང་ལུགས་ཀྱི་ཡར་ཐོན་སྣ་འབྲེལ་ཚོགས་པ། Group of the Progressive Alliance of Socialists and Democrats དེ་བཞིན་ཡུ་རོབ་རྙིང་ཞེན་དང་གསར་བརྗེ་ཚོགས་པ་European Conservatives and Reformists ཡུ་རོབ་གུ་ཡངས་མང་གཙོ་སྣ་འབྲེལ་ཚོགས་པ་ Alliance of Liberals and Democrats for Europe ལྗང་ཁུ་ཚོགས་པ་དང་། ཡུ་རོབ་རང་དབང་དང་ཐད་བསྐོས་མང་གཙོ་ཚོགས་པ་ Europe of Freedom and Direct Democracy བཅས་ཀྱིས་གྲོས་ཚོགས་འཐུས་མི་རྣམས་ལ་ཉིན་རེའི་ཕྱག་ལས་གནང་སྐབས་ཕྱག་རོགས་ཞུ་མཁན་ཤ་སྟག་ཡིན་འདུག
གྷ་གལ་གནམ་ཐང་དུ།
གྷ་གལ་གནམ་ཐང་དུ།
དེ་ཡང་ལྗང་ཁུ་ཚོགས་པའི་གྲོས་ཚོགས་འཐུས་མི་ལྕམ་སྐུ་མོལ་ལི་སི་ཀོཊ་ཀེ་ཊོ་ Mrs Molly SCOTT CATO མཆོག་ལ་ཕྱག་རོགས་ཞུ་མཁན་བོད་དོན་རྒྱབ་སྐྱོར་ཚོགས་མི་ལྕམ་སྐུ་ཧེ་རི་ཏི་ཀེ་ལེ་ཊོན་ Ms Harriet Clayton ལགས་ཀྱིས་གསུང་དོན། ང་ཚོ་འདིར་ལས་དོན་འགོ་མ་བརྩམ་པའི་སྔོན་དུ་༸གོང་ས་ཏཱ་ལའི་བླ་མ་མཆོག་གི་མཇལ་ཁ་བྱིན་ཅན་ཐོབ་པར་དགའ་ཚོར་ཧ་ཅང་བྱུང་། ང་ཚོ་འགའ་ཤས་དེ་སྔ་མཇལ་ཁ་ཐོབ་མྱོང་ཡོད། འོན་ཀྱང་༸གོང་ས་མཆོག་ནམ་མཇལ་སྐབས་སེམས་ནང་སྙིང་སྟོབས་ངང་གིས་འཕེལ་བཞིན་འདུག དེར་བརྟེན་ང་ཚོ་ཕྱིར་རང་ཡུལ་དུ་ལོག་སྐབས་མགོན་པོ་གང་ཉིད་མཆོག་གི་བཀའ་སློབ་དང་བསམ་བློའི་ནང་ཞི་བདེའི་ཚོར་བ་གཞན་དང་མི་འདྲ་བ་ཞིག་འཁྱེར་ནས་འགྲོ་རྒྱུ་ཡིན། ཞེས་ཕྱི་དྲིལ་བརྙན་འཕྲིན་ཚན་པའི་ TTV གསར་འགོད་པར་གསུངས།
ཕྱོགས་མཚུངས་སྐུ་ཞབས་ཕ་རན་སི་སི་ཀོ་ཇོར་ཇི་ Mr Francesco Giorgi མཆོག་གིས་གསུང་དོན། ཡུ་རོབ་གྲོས་ཚོགས་ལ་མཚོན་ན་དུས་རྟག་ཏུ་བོད་དོན་ཐོག་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན། འདིར་ང་ཚོས་བོད་མི་བཙན་བྱོལ་བ་རྣམས་ཀྱི་གནས་སྟངས་རྟོག་ཞིབ་བྱེད་རྒྱུ་ཙམ་གྱི་ཆེད་དུ་ཡོང་བ་ཞིག་མ་རེད། ང་ཚོ་འདིར་ཡོང་དགོས་པའི་རྒྱུ་མཚན་གཙོ་བོ་ནི་བོད་མིར་དོན་དམ་གྱི་རྒྱབ་སྐྱོར་དང་གདུང་སེམས་མཉམ་སྐྱེ་ཞུ་རྒྱུ་མ་ཟད། འཛམ་གླིང་ས་ཕྱོགས་གང་སར་གནས་བཞིན་པའི་བོད་མི་རྣམས་ཀྱི་མདུན་ལམ་བཟང་པོ་ཞིག་ཡོང་བའི་བཟང་ཕྱོགས་ཀྱི་རེ་བ་དང་སྦྲགས་བཅར་བ་ཡིན། ཞེས་གསུངས།
ཕྱི་ཚེས་ ༢༢ ནས་བོད་དོན་རྒྱབ་སྐྱོར་ཚོགས་མི་རྣམས་རྡ་སར་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་དང་། བོད་ཀྱི་སྲིད་བྱུས་ཉམས་ཞིབ་ཁང་། ཤེས་རབ་དགའ་འཚལ་སློབ་གླིང་། བོད་ཀྱི་སྨན་རྩིས་ཁང་། ཕྱི་དྲིལ་བོད་ཀྱི་འགྲེམས་སྟོན་ཁང་། བོད་ཁྱིམ་སློབ་གྲྭ དེ་བཞིན་གཞུང་འབྲེལ་མིན་པའི་ཚོགས་པ་འདྲ་མིན་གྱི་ལས་ཁུངས་སོགས་ནང་ཕེབས་མཐར་ཕྱི་ཚེས་ ༢༦ ཉིན་རྡ་ས་ནས་ཕེབས་འཐོན་གནང་རྒྱུ་ཡིན་འདུག
དེ་ཡང་བོད་དོན་རྒྱབ་སྐྱོར་བ་ཁོང་རྣམ་པའི་མཚན་གཞུང་ནི།
Mr. Francesco Giorgi
Ms. Dalila Bernard
Ms. Zsuzsana Ferenczy
Mr. Flavien Deltort
Ms. Harriet Clayton
Ms. Gyongyver Forro
Ms. Margareta Kovacova བཅས་ཡིན།།
