༢༠༡༠ ཟླ་ ༡༠ ཚེས་ ༢༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༢༣ རེས་གཟའ་སྤེན་པའི་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱ་མི་རིགས་ལྷན་ཚོགས་སུ།   བྱམས་བརྩེ་དང་བརྩི་བཀུར་བརྩི།  ཞེས་པའི་བརྗོད་གཞིའི་ཐོག་བཀའ་སློབ་སྩོལ་སྐབས་ཐོག་མར་མགོན་པོ་གང་ཉིད་མཆོག་གིས༌སྐུའི་རླབས་ཆེན་མཛད་ཁུར་གསུམ་གྱི་ཐོག་མ་སྟེ། འགྲོ་བ་མིའི་རིན་ཐང་གོང་མཐོར་གཏོང་རྒྱུ་དང་། དེ་ནས་གཉིས་པ་ཆོས་ལུགས་མཐུན་སྒྲིལ།  གསུམ་པ་བོད་ཀྱི་གནད་དོན་སེལ་རྒྱུ་བཅས་ཀྱི་ཐོག་ཐུགས་བརྩོན་མཛད་བཞིན་ཡོད་སྐོར་དང་། རྒྱ་ནག་གི་སྲིད་འཛིན་ཧུ་ཅིན་ཐའོ་ཡིས་འཆམ་མཐུན་གྱི་སྤྱི་ཚོགས་སྐྲུན་ཐབས་གནང་བ་དེར་རྒྱབ་སྐྱོར་མཛད་ཀྱི་ཡོད་ཀྱང་འཆམ་མཐུན་གྱི་སྤྱི་ཚོགས་ཤིག་ཡོང་བར་འདྲ་མཉམ་དང་ཕན་ཚུན་ཡིད་ཆེས་ཐོག་ནས་བསླེབ་དགོས་པ་ཞིག་ཡིན་པ་དང།  ༸གོང་ས་མཆོག་གིས་ལོ་ངོ་ ༣༠། ༤༠ གོང་ནས་རྒྱ་མི་རིགས་ཚོ་དང་ལྷན་འབྲེལ་བ་མཛད་རྒྱུའི་ཐུགས་བརྩོན་མཛད་ཡོད་ཀྱང་རྒྱ་ནག་ནང་གནམ་བདེ་སྒོ་མོའི་དོན་རྐྱེན་མ་བྱུང་བར་རྒྱ་མི་རིགས་ཚོས་ཚུར་ཡར་ལན་དེ་ཙམ་སྤྲད་མེད་པ་དང།  ལྷག་པར་ཕྱི་ལོ་ ༢༠༠༨ ལོར་བོད་ནང་ས་བྱི་གཞི་རྒོལ་ཆེན་མོ་བྱུང་རྗེས་རྒྱ་མི་རིགས་ཚོས་བོད་ཀྱི་གནད་དོན་ཐོག་དོ་སྣང་ཆེ་རུ་ཕྱིན་ཡོད་པ་མ་ཟད། རྒྱ་རིགས་རྩོམ་པ་པོ་མང་པོ་ཞིག་གི་བོད་ཀྱི་འཐབ་རྩོད་ལ་རྒྱབ་སྐྱོར་གྱི་རྩོམ་ཡིག་གྲངས་ ༡༠༠༠ ཙམ་བྲིས་ཡོད་སྐོར་བཀའ་སློབ་སྩལ།  དེ་བཞིན་མགོན་པོ་གང་ཉིད་མཆོག་གིས་དབུ་མའི་ལམ་གྱི་ཞེངས་ཕྱོགས་སྐོར་དང་སྐུའི་གཅེན་པོ་སྟག་འཚེར་རིན་པོ་ཆེས་གཙོས་པའི་བོད་མི་འགའ་རེས་༸གོང་ས་མཆོག་གི་དབུ་མའི་ལམ་གྱི་ཞེངས་ཕྱོགས་དེར་རྒྱབ་སྐྱོར་གནང་གི་མེད་སྐོར་དང་། རྒྱ་ནག་དང་ཁ་བྲལ་མ་རྩོད་པར་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་གནས་ཐུབ་ཚེ་བོད་མི་ཚོར་ཁེ་ཕན་ཡོད་སྐོར། བཙན་བྱོལ་བོད་མིའི་མང་གཙོའི་འཕེལ་རིམ་སྐོར་བཀའ་སློབ་སྩལ་བ་མ་ཟད། ཕྱི་ལོ་ ༢༠༠༡ ལོར་བཙན་བྱོལ་བོད་མི་ཚོས་ཚབ་སྲིད་ཀྱི་དབུ་ཁྲིད་བཀའ་བློན་ཁྲི་པ་ཐད་ཀར་འོས་བསྡུའི་ལམ་ནས་བསྐོ་བཞག་བྱུང་རྗེས་༸གོང་ས་མཆོག་གི་གནས་སྟངས་དེ་ཕྱེད་རྒས་ཡོལ་དུ་གྱུར་ཏེ་ད་ཆ་རྒས་ཡོལ་ཆ་ཚང་ཞུ་རྒྱུའི་གྲ་སྒྲིག་ཡོད་སྐོར་སོགས་བཀའ་སློབ་སྩལ་གྲུབ་བསྟུན།  མགོན་པོ་གང་ཉིད་མཆོག་གིས་ཚོགས་བཅར་བ་རྣམས་ལ་དྲི་བ་ཞུ་རྒྱུའི་གོ་སྐབས་སྩལ་བར་ཚོགས་བཅར་བ་ཞིག་གིས་༸གོང་ས་མཆོག་རྒས་ཡོལ་ཆ་ཚང་ནམ་ཞུ་འཆར་ཡོད་སྐོར་དྲི་བ་ཕུལ་བར་མགོན་པོ་གང་ཉིད་མཆོག་གིས་ཟླ་བ་འགའ་ཤས་རྗེས་སུ་ཁྱེད་ཚོར་གསལ་རྟོགས་ཡོང་རྒྱུ་ཡིན་སྐོར་དང་། ༸གོང་ས་མཆོག་རྒས་ཡོལ་ཆ་ཚང་ཞུས་པའི་རྗེས་སུ་འགྲོ་བ་མིའི་རིན་ཐང་གོང་མཐོར་གཏོང་རྒྱུ་དང་ཆོས་ལུགས་མཐུན་སྒྲིལ་གྱི་མཛད་ཁུར་གཉིས་མུ་མཐུད་ཐུགས་བརྩོན་མཛད་རྒྱུ་ཡིན་སྐོར་བཀའ་ལན་སྩལ། དེ་བཞིན་ཚོགས་བཅར་བ་གཞན་ཞིག་གིས་༸གོང་ས་མཆོག་བོད་དུ་ནམ་ཞིག་ཆིབས་སྒྱུར་སྐྱོང་རྒྱུ་ཡིན་སྐོར་གྱི་དྲི་བ་ཕུལ་བར་མགོན་པོ་གང་ཉིད་མཆོག་གིས་ཕྱི་ལོ་ ༡༩༨༣ ཙམ་ནས་བོད་དང་དེ་བཞིན་རྒྱ་ནག་ནང་གནས་གཟིགས་སུ་ཆིབས་སྒྱུར་བསྐྱང་རྒྱུའི་ཐུགས་བརྩོན་མཛད་ཡོད་ཀྱང་རྒྱ་ནག་གཞུང་ཕྱོགས་ཀྱིས་དེར་ཡར་ལེན་གང་ཡང་སྤྲད་མེད་སྐོར་དང། ༸གོང་ས་མཆོག་གིས་རང་བཙན་འཐབ་རྩོད་མཛད་ཀྱི་མེད་པ་དེ་འཛམ་གླིང་ནང་ཡོངས་གྲགས་ཆགས་ཡོད་ཀྱང་ཐབས་ཕྱོགས་གཅིག་འགྱུར་གྱི་རྒྱ་ནག་དཔོན་རིགས་ཚོས་བྱེད་ཕྱོགས་ལ་གཞིགས་ཚེ་༸གོང་ས་མཆོག་རང་བཙན་རྩོད་ལེན་མཛད་མཁན་ཞིག་ཡིན་པའི་རྒྱུ་མཚན་དུ་བྱས་ཏེ་རྒྱ་ནག་ཏུ་ཆིབས་སྒྱུར་བསྐྱང་རྒྱུའི་ཆོག་མཆན་སྤྲོད་ཀྱི་མེད་པ་དང། མགོན་པོ་གང་ཉིད་མཆོག་བོད་དུ་ནམ་ཆིབས་སྒྱུར་བསྐྱང་མིན་དེ་རྒྱ་ནག་གཞུང་ལ་རག་ལུས་ཡོད་སྐོར་བཀའ་ལན་སྩལ། ཕྱོགས་མཚུངས་ཚོགས་བཅར་བ་ཞིག་གིས་༸གོང་ས་མཆོག་དང་བཙན་བྱོལ་བོད་གཞུང་དབར་འབྲེལ་བ་ཇི་ཡོད་ཀྱི་དྲི་བ་ཕུལ་བར་མགོན་པོ་གང་ཉིད་མཆོག་གིས་ཕྱི་ལོ་ ༢༠༠༡ ལོར་བོད་མི་ཚོས་ཆབ་སྲིད་ཀྱི་དབུ་ཁྲིད་ཐད་ཀར་འོས་བསྡུའི་ལམ་ནས་བསྐོ་གཞག་བྱས་པ་ནས་ཟུང་ཏཱ་ལའི་བླ་མས་ཆབ་སྲིད་ཀྱི་དབུ་ཁྲིད་མཛད་རྒྱུའི་དུས་ཚོད་ཡོལ་ཟིན་པ་དང་། ༸གོང་ས་མཆོག་གིས་ཆོས་སྲིད་ཐ་དད་ལ་རྒྱབ་སྐྱོར་མཛད་ཀྱི་ཡོད་པ་དང་། གུང་ཁྲན་ཏང་དང་རྒྱ་ནག་སྲིད་གཞུང་གཉིས་ཀྱང་ཐ་དད་འབྱེད་དགོས་པ་གཟིགས་སྐོར་དང།  ༸གོང་ས་མཆོག་གིས་རྒྱ་ནག་གུན་ཁྲན་ཏང་ལ་འགྱུར་བ་དགོས་སྐོར་བརྗོད་སྐབས་འགྱུར་བ་དེ་ཉིན་གཅིག་ལ་འགྱུར་བ་དགོས་པའི་གོ་དོན་མིན།  གང་ཡིན་ཟེར་ན་རྒྱ་ནག་རྒྱལ་ཁབ་ཆེན་པོ་ཡིན་རྐྱེན་དཔལ་འབྱོར་གྱི་གནས་སྟངས་དང་སློབ་སྦྱོང་མེད་མཁན་དང་དཔལ་འབྱོར་མེད་མཁན་མི་མང་པོ་ཞིག་ཡོད་པར་བརྟེན་ལམ་སེང་མང་གཙོར་འགྱུར་མི་ཐུབ་ཚུལ་དང། མགོན་པོ་གང་ཉིད་མཆོག་གིས་ག་ལེར་རྒས་ཡོལ་དུ་འཕེབས་པ་ལྟར་རྒྱ་ནག་གུང་ཁྲན་ཏང་གི་ཚོགས་པ་ཡང་རིམ་པས་འགྱུར་བ་འགྲོ་ཐུབ་པའི་དགོངས་ཚུལ་ཡོད་སྐོར་སོགས་ཀྱི་བཀའ་སློབ་སྩལ།