ཕྱི་ལོ་ ༢༠༡༧ ཟླ་ ༥ ཚེས་ ༡༧ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་ཀྱི་ལོ་རྒྱུས་འབྲི་རྩོམ་དང་བར་བརྒལ་ལས་བཀོད་ཚན་པའི་འགན་འཛིན་དྲུང་འཕར་མཛོད་ཚང་ཚེ་རིང་རྡོ་རྗེ་ལགས་ཉེ་ཆར་གློ་བུར་ནད་མནར་རྐྱེན་གྱིས་ཕྱི་ལོ་ ༢༠༡༧ ཟླ་ ༥ ཚེས་ ༡༦ རེས་གཟའ་མིག་དམར་ཉིན་གྱི་སྔ་དྲོ་ཆུ་ཚོད་ ༡༠།༤༨ ཐོག་ཀང་ར་ཧྥོ་ཀྲིསི་ Fortis Hospital སྨན་ཁང་དུ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་བཀའ་ཤག་ཏུ་སྙན་སེང་དང་སྦྲགས་གསན་ཐོས་བྱུང་བར་ཐུགས་ཕམ་དང་བཅས་དམ་པ་དེ་ཉིད་ཀྱིས་ད་བར་མི་ལོ་ ༤༥ རིང་བོད་སྤྱི་པའི་རྩ་དོན་ཐོག་ཞབས་འདེགས་བསྒྲུབས་པར་རྗེས་དྲན་ཞུ་ཆེད། ཕྱི་ཚེས་ ༡༧ ཉིན་གྱི་ཕྱེད་ཡོལ་ཆུ་ཚོད་ ༣ ཐོག་གངས་སྐྱིད་སྤྱི་ཐབ་ཡང་སྟེང་གཉའ་ཁྲི་ཚོགས་ཁང་དུ་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུའི་ལས་བྱེད་བཅས་ཚང་འཛོམས་ཐོག་བཀའ་དྲུང་རྫོང་ཁ་སྟོབས་རྒྱལ་ཚེ་རིང་ལགས་ཀྱིས་དམ་པ་ཁོང་གི་ལོ་རྒྱུས་སྙིང་བསྡུས་ཤིག་སྒྲོགས་སྦྱང་གནང་རྗེས་སྨོན་ལམ་གསུང་འདོན་གནང་། དམ་པ་ཁོང་ལ་མྱ་ངན་གུས་འདུད་དང་གདུང་སེམས་མཉམ་སྐྱེ་མཚོན་ཆེད་ཕྱེད་ཡོལ་ཆུ་ཚོད་ ༤ ནས་དབུས་ལས་ཁུངས་ཁག་ལས་མཚམས་བཞག་ཡོད།
དམ་པ་ཁོང་ནི། ཕྱི་ལོ་ ༡༩༨༣ ཟླ་ ༡ ཚེས་ ༡ ནས་ཚོད་བལྟའི་ཐོག་སིམ་ལ་བདེ་དོན་ལས་དྲུང་དུ་བསྐོ་གཞག་དང་། ཕྱི་ལོ་ ༡༩༨༤ ཟླ་ ༥ ཚེས་ ༢༠ ནས་ལས་འཁུར་རང་འཇགས་ཐོག་གནས་དགུ་པ་ལས་ངོར་བསྐོ་གཞག ཕྱི་ལོ་ ༡༩༨༥ ཟླ་ ༢ ཚེས་ ༡ ནས་གནས་རང་འཇགས་ཐོག་ལས་བྱེད་བདག་གཉེར་ཁང་གི་དངུལ་རྩིས་དོ་དམ་པར་བསྐོ་གཞག ཕྱི་ལོ་ ༡༩༨༦ ཟླ་ ༡༡ ཚེས་ ༡ ནས་གནས་བརྒྱད་པར་གནས་སྤར་གྱིས་མན་སྤར་རུམ་བཟོའི་འགན་འཛིན་དུ་གནས་སྤོས། ཕྱི་ལོ་ ༡༩༩༡ ཟླ་ ༨ ཚེས་ ༡ ནས་གནས་རང་འཇགས་ཐོག་སྦིར་བོད་ཚོགས་ལས་དྲུང་དུ་གནས་སྤོས། ཕྱི་ལོ་ ༡༩༩༢ ཟླ་ ༤ ཚེས་ ༡༥ ནས་བཀའ་ཡིག་རྒན་དྲུང་དུ་གནས་སྤོས། ཕྱི་ལོ་ ༩༩༩༢ ཟླ་ ༨ ཚེས་ ༡ ནས་དྲུང་གཞོན་ལས་རོགས་སུ་གནས་སྤར་གྱིས་བཀའ་ཡིག་ཏུ་ལས་འགན་རང་འཇགས་བཀོད་སྒྲིག ཕྱི་ལོ་ ༡༩༩༣ ཟླ་ ༦ ཚེས་ ༡༤ ནས་དྲུང་ཆེ་གཞོན་པར་གནས་སྤར། ཕྱི་ལོ་ ༡༩༩༣ ཟླ་ ༨ ཚེས་ ༢༣ ནས་བཀའ་ཡིག་དྲུང་གཞོན་དུ་ལས་འགན་བཀོད་སྒྲིག ཕྱི་ལོ་ ༡༩༩༩ ཟླ་ ༡ ཚེས་ ༣༠ ནས་ཟུང་འབྲེལ་དྲུང་ཆེར་གནས་སྤར་གྱིས་བཀའ་ཡིག་ཟུང་དྲུང་དུ་བསྐོ་གཞག ཕྱི་ལོ་ ༢༠༠༧ ཟླ་ ༦ ཚེས་ ༥ ནས་དྲུང་འཕར་གནས་རིམ་ཐོག་གནས་སྤར། ཕྱི་ལོ་ ༢༠༠༧ ཟླ་ ༡༢ ཚེས་ ༢༦ ནས་བཀའ་ཡིག་ངེས་མེད་ལས་གཞིའི་སྡེ་ཚན་གྱི་དྲུང་འཕར་ས་མིག་ཐོག་བཀའ་དྲུང་ཡིག་ཚང་གི་དྲུང་ཆེ་ལས་འཕར་གྱི་ལས་འགན་ཐོག་བསྐོ་གཞག ཕྱི་ལོ་ ༢༠༡༡ ཟླ་ ༧ ཚེས་ ༡ ནས་ལོ་གཅིག་རིང་བགྲེས་ཡོལ་ཕྱིར་འགྱངས། ཕྱི་ལོ་ ༢༠༡༢ ཟླ་ ༧ ཚེས་ ༡ ནས་ལོ་གཅིག་རིང་བགྲེས་ཡོལ་ཕྱིར་འགྱངས། ཕྱི་ལོ་ ༢༠༡༣ ཟླ་ ༦ ཚེས་ ༡༩ ནས་བཀའ་ཡིག་ཁྱབ་འོག་ལོ་རྒྱུས་འབྲི་རྩོམ་ཚན་པའི་འགན་འཛིན་གྱི་ལས་འགན་དུ་བསྐོ་གཞག ཕྱི་ལོ་ ༢༠༡༣ ཟླ་ ༧ ཚེས་ ༡ ནས་སླར་ཡང་ལོ་གཅིག་རིང་བགྲེས་ཡོལ་ཕྱིར་འགྱངས། ཕྱི་ལོ་ ༢༠༡༤ ཟླ་ ༤ ཚེས་ ༤ ནས་ལོ་རྒྱུས་འབྲི་རྩོམ་ཚན་པའི་འགན་འཛིན་ལས་འགན་ཐོག་སྔ་འཕྲོས་བར་བརྒལ་ལས་བཀོད་ཚན་པའི་འགན་འཁུར་གཅིག་ལྕོགས་སུ་བསྐོ་གཞག ཕྱི་ལོ་ ༢༠༡༤ ཟླ་ ༧ ཚེས་ ༡ ནས་མཐའ་མའི་ལོ་གཅིག་རིང་བགྲེས་ཡོལ་ཕྱིར་འགྱངས། ཕྱི་ལོ་ ༢༠༡༥ ཟླ་ ༧ ཚེས་ ༡ ནས་ལོ་གཉིས་རིང་བསྐྱར་བསྐོ་གནང་ཡོད་པ་བཅས། །