༢༠༡༧ ཟླ་ ༥ ཚེས་ ༦ རེས་གཟའ་སྤེན་པ།

སྐུ་ཞབས་ཊེ་རི་མཆོག་དང་རྒྱ་ནག་སྲིད་འཛིན།

༄༅། །རྒྱ་ནག་ནང་གི་ཨ་རིའི་གཞུང་ཚབ་གསར་པར་མཚན་འདོན་གནང་བ་ཨ་རིའི་ཨ་ཡོ་ཝ་ Iowa  མངའ་སྡེའི་སྲིད་སྐྱོང་ Governor སྐུ་ཞབས་ཊེ་རི་བྷ་རན་སི་ཊ་ཌི་ Terry Branstad མཆོག་ལ་གྲོས་ཚོགས་གོང་མའི་ཉན་ཞིབ་ཚོགས་ཆུང་གི་ཚོགས་མི་དབུ་བཞུགས་ཐོག་གྲོས་ཚོགས་གོང་མའི་འཐུས་མི་རྣམས་ཀྱིས་བོད་ཀྱི་གནད་དོན་སོགས་ཀྱི་སྐོར་ལ་འདྲི་རྩད་ཤུགས་ཆེ་གནང་འདུག

དེ་ཡང་ཨ་རིའི་གྲོས་ཚོགས་གོང་མའི་ནང་དུ་ཉན་ཞིབ་སྐབས་གྲོས་ཚོགས་གོང་མའི་འཐུས་མི་སྐུ་ཞབས་བྷོབ་ཀོར་ཀར་  Bob Corker མཆོག་གིས་ཐོག་མར་ལས་རིམ་དབུ་འཛུགས་ཀྱི་གཏམ་བཤད་གནང་སྐབས་ཨ་རི་དང་རྒྱ་ནག་གཉིས་དབར་གྱི་འབྲེལ་ལམ་དེ་ཇི་ཙམ་གལ་ཆེན་པོ་ཡིན་སྐོར་དང་།  ལྷག་པར་རྒྱ་ནག་གཞུང་གི་ཆབ་སྲིད་ཀྱི་ཕུགས་འདུན་དེ་ཨ་རིའི་རྒྱལ་ཁབ་ཀྱི་དམིགས་ཡུལ་ལ་ཕན་པ་ཞིག་ཡིན་དགོས་པའི་ངེས་པ་གང་ཡང་མེད་སྐོར་སོགས་གསུངས།

དེ་རྗེས་ཉན་ཞིབ་ཀྱི་ཚོགས་མི་གྲོས་ཚོགས་གོང་མའི་འཐུས་མི་སྐུ་ཞབས་བྷེན་ཀར་ཌིན་ Ben Cardin མཆོག་གིས་རྒྱ་ནག་གི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པར་སེམས་འཚབ་ཀྱི་རྣམ་པ་ཤུགས་ཆེ་བསྟན་པ་མ་ཟད།   ༸གོང་ས་ཏཱ་ལའི་བླ་མ་མཆོག་བོད་དུ་ཕྱིར་གདན་འདྲེན་ཞུ་ཐུབ་མིན་དང་།  གར་སོང་ཆ་མེད་དུ་གྱུར་བའི་ཀུན་གཟིགས་པཎ་ཆེན་ཆུང་སྲིད་རིན་པོ་ཆེ་མཆོག་ད་ལྟ་གང་དུ་ཡོད་མེད་ཀྱི་གནས་སྟངས།  དེ་བཞིན་རྒྱ་རིགས་ནོ་བེལ་ཞི་བདེའི་གཟེངས་རྟགས་ཐོབ་མྱོང་མཁན་སྐུ་ཞབས་ལིའུ་ཞའོ་པོ་ Liu Xiaobo མཆོག་ཕྱི་ལོ་ ༢༠༢༠ ནང་གློད་བཀྲོལ་གཏང་རྒྱུ་ཡིན་མིན། དེ་བཞིན་ཧོང་ཀོང་མི་མང་རྣམས་ཀྱི་དོན་དམ་རང་སྐྱོང་གི་ཐོབ་ཐང་ལ་རྒྱ་ནག་གཞུང་གིས་བརྩི་བཀུར་ཞུ་ཡི་ཡོད་མེད་སོགས་ཀྱི་འདྲི་རྩད་གནང་སྐབས།

སྐུ་ཞབས་ཊེ་རི་མཆོག་གིས་ལན་འདེབས་གནང་དོན།  གལ་ཏེ་ང་རང་རྒྱ་ནག་ནང་གི་ཨ་རིའི་གཞུང་ཚབ་ཏུ་བསྐོ་རྒྱུའི་ཐག་གཅོད་བྱུང་ཚེ་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་གནད་དོན་དང་།  ཚོང་གི་ཐོག་ནས་བརྗོད་ན་གུ་ཡངས་དང་རང་དབང་ལྡན་པའི་ཁྲོམ་ར་དགོས་པ།  ལྷོ་རྒྱ་ནག་རྒྱ་མཚོའི་ཁོར་ཡུག་ཏུ་བརྟན་ལྷིང་སྲུང་སྐྱོབ། དེ་བཞིན་གསར་འགོད་རང་དབང་གི་གལ་གནད་སོགས་ཨ་རིའི་ཡུལ་གྱིས་ཧ་ཅང་རྩ་ཆེར་འཛིན་བཞིན་པའི་རིན་ཐང་དེ་དག་རྒྱ་ནག་འགོ་ཁྲིད་དང་མང་ཚོགས་རྣམས་ལ་ར་སྤྲོད་ཡོང་སླད་ཉིན་ལྟར་འབད་བརྩོན་ཞུ་རྒྱུ་ཡིན།  ཞེས་གསུང་སྐབས་སྐུ་ཞབས་བྷེན་ཀར་ཌིན་མཆོག་གིས།   གལ་ཏེ་ཁྱེད་གཞུང་ཚབ་གསར་པར་བསྐོ་གཞག་བྱུང་ན་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་ཇི་ལྟར་གཏོང་རྒྱུ་ཡིན། ཞེས་དྲིས་པར་གཞུང་ཚབ་གསར་པ་མཆོག་ནས་ལན་འདེབས་གནང་དོན།

འགྲོ་བ་མིའི་ཐོབ་ཐང་ནི་ཧ་ཅང་གལ་ཆེན་པོ་རེད།  རིན་ཐང་དེ་ཨ་རིའི་རྒྱལ་ཁབ་ཀྱིས་རྨང་གཞིར་བཟུང་ནས་ཆོད་སེམས་བརྟན་པོས་རྒྱུན་སྐྱོང་གནང་བཞིན་ཡོད།  གནད་དོན་དེ་དག་ཧ་ཅང་གལ་གནད་ཅན་ཞིག་ཡིན་སྟབས་རྒྱ་ནག་གི་འགོ་ཁྲིད་ཚོས་འདོད་རུང་མ་འདོད་རུང་། ང་རང་གཞུང་ཚབ་པ་ཞིག་ཡིན་པའི་ཆ་ནས་གནད་དོན་དེ་དག་སྐོར་གླེང་སློང་བྱ་རྒྱུའི་འདུན་པ་ངར་ཡོད།   གནད་དོན་དེའི་སྐོར་གླེང་སློང་བྱ་རྒྱུར་ངས་འཇིགས་སྣང་བྱེད་དགོས་པ་གང་ཡང་མེད།  ས་གནས་གཞན་དུ་ཨ་རིའི་མི་སེར་གྱིས་གཙོས་མི་མང་གཞན་སུ་འདྲ་ཞིག་ལ་དྲང་བདེན་གྱི་ཐག་གཅོད་མ་བྱེད་ཚེ་ང་རང་གཞུང་ཚབ་པ་ཞིག་ཡིན་པའི་ངོས་ནས་པེ་ཅིང་གི་འགོ་ཁྲིད་ཚོ་ལ་གནས་ཚུལ་གང་ལྷག་པ་དེའི་སྐོར་གླེང་སློང་བྱ་རྒྱུ་ཡིན།   ཞེས་ལན་འདེབས་གནང་འདུག

དེ་བཞིན་གྲོས་ཚོགས་གོང་མའི་འཐུས་མི་སྐུ་ཞབས་ཇོན་ཨེ་བྷ་ར་སོ་ John A. Barrasso མཆོག་གིས་གསུང་དོན།  རྒྱ་ནག་གཞུང་གིས་ཆབ་སྲིད་དང་ཆོས་དད་རང་དབང་སོགས་ལ་དམ་བསྒྲགས་ཤུགས་ཆེ་བྱེད་བཞིན་ཡོད་སྟབས།  ཚོང་ཁེ་སྲུང་སྐྱོབ་དང་དུས་མཚུངས་རྒྱ་ནག་གཞུང་གི་འགྲོ་བ་མིའི་ཐོབ་ཐང་ལ་དམ་བསྒྲགས་བྱེད་བཞིན་པར་སྐྱོན་བརྗོད་བྱ་རྒྱུའི་ལངས་ཕྱོགས་དེ་གཉིས་དོ་མཉམ་པ་ཞིག་ཇི་ལྟར་འཛིན་ཐུབ། ཅེས་འདྲི་རྩད་གནང་བར་ཁོང་གིས་ལན་འདེབས་གནང་དོན།

ཨ་རི་ཡུལ་གིས་དུས་རྟག་ཏུ་འཛམ་གླིང་མི་མང་གི་འགྲོ་བ་མིའི་ཐོབ་ཐང་སྲུང་སྐྱོབ་ལ་རྒྱབ་སྐྱོར་གནང་ཡོད། དེར་བརྟེན་ང་རང་གཞུང་ཚབ་པ་ཞིག་ཡིན་པའི་ངོས་ནས་གནད་དོན་དེ་གསལ་འདོན་བྱ་རྒྱུ་དང་དུས་མཚུངས་གནད་དོན་དེ་ལས་བརྒལ་ནས་བལྟ་དགོས་པ་ཧ་ཅང་གལ་ཆེན་པོ་ཆགས་ཡོད།  ངའི་བསམ་པར་ཆོས་པ་རྣམས་ལ་སྡུག་སྦྱོང་གཏོང་དགོས་པ་གང་ཡང་མ་མཐོང་།  དེར་བརྟེན་ང་ཚོས་སྨྲ་བརྗོད་དང་ཆོས་དད་རང་དབང་སོགས་འགྲོ་བ་མིའི་ཐོབ་ཐང་དེ་དག་སྲུང་སྐྱོབ་བྱ་དགོས་པ་ཧ་ཅང་གལ་ཆེན་པོ་རེད། ཅེས་ལན་འདེབས་གནང་འདུག

ཉན་ཞིབ་མཇུག་སྒྲིལ་ལ་ཉེ་སྐབས་གྲོས་ཚོགས་གོང་མའི་འཐུས་མི་སྐུ་ཞབས་མར་ཁོ་རུ་བྷིའོ་ Marco Rubio མཆོག་གིས།  ཁྱེད་ཀྱིས་རྒྱ་ནག་གཞུང་དང་ལྷན་འགྲོ་བ་མིའི་ཐོབ་ཐང་སྐོར་གླེང་རྒྱུའི་ཁས་ལེན་ཞུ་དགོས།  ཞེས་རེ་འདུན་བཏོན་པ་ཙམ་དུ་མ་ཟད།  གནད་དོན་དེ་རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཚན་པ་སོགས་ལ་ཧ་ཅང་གནད་འགག་ཆེན་པོ་ཆགས་ཡོད་སྐོར་གསུང་པར།  ངས་དེ་ལྟར་ལག་བསྟར་དོན་འཁྱོལ་ཞུ་ཆོག ཅེས་སོགས་ལན་འདེབས་གནང་འདུག

སྐུ་ཞབས་ཊེ་རི་མཆོག་རྒྱ་ནག་ནང་གི་ཨ་རིའི་གཞུང་ཚབ་གསར་པར་བསྐོ་གཞག་གནང་མིན་རིང་མིན་གྲོས་ཚོགས་གོང་མས་ཐག་གཅོད་གཏན་འབེབས་གནང་རྒྱུ་ཡིན་འདུག་པ་བཅས།།