༢༠༡༧ ཟླ་ ༥ ཚེས་ ༥ རེས་གཟའ་པ་སངས།
༄༅། །ཨ་རིའི་གྲོས་ཚོགས་ཀྱི་མང་གཙོ་ཚོགས་པའི་ཚོགས་གཙོ་ལྕམ་སྐུ་ནེན་སི་པེ་ལོ་སི་ Nancy Pelosi མཆོག་གིས་སྣེ་ཁྲིད་པའི་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ཞིག་ཕྱི་ལོ་ ༢༠༡༧ ཟླ་ ༥ ཚེས་ ༩ ནས་ ༡༠ བར་བཞུགས་སྒར་རྡ་རམ་ས་ལར་འཚམས་གཟིགས་སུ་ཕེབས་གཏན་འཁེལ་ཡོད།
དེ་ཡང་ཨ་རིའི་གྲོས་ཚོགས་འཐུས་མི་བརྒྱད་པོ་རྣམས་ནི། གྲོས་ཚོགས་འོག་མའི་ཚོགས་གཙོ་ཟུར་པ་དང་མང་གཙོ་ཚོགས་པའི་ཚོགས་གཙོ་ལྕམ་སྐུ་ནེན་སི་པེ་ལོ་སི་མཆོག་དང་། གྲོས་ཚོགས་འོག་མའི་འཐུས་མི་སྐུ་ཞབས་ཨི་ལོ་ཡི་ཊི་ཨེན་ཇེལ་ Eliot Engel མཆོག གྲོས་ཚོགས་འོག་མའི་འཐུས་མི་སྐུ་ཞབས་ཇིམ་སེན་སེན་བྷེར་ནར་ Jim Sensenbrenner མཆོག གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ Jim McGovern མཆོག གྲོས་ཚོགས་འོག་མའི་འཐུས་མི་ལྕམ་སྐུ་བྷེ་ཊི་མེག་ཀ་ལམ་ Betty McCollum མཆོག གྲོས་ཚོགས་འོག་མའི་འཐུས་མི་ལྕམ་སྐུ་ཇོ་སི་བྷི་ཊི་ Joyce Beatty མཆོག གྲོས་ཚོགས་འོག་མའི་འཐུས་མི་ལྕམ་སྐུ་པར་མི་ལཇ་ཡ་པཱལ་ Pramila Jayapal མཆོག གྲོས་ཚོགས་འོག་མའི་འཐུས་མི་སྐུ་ཞབས་ཇུ་ཌི་ཅུ་ Judy Chu མཆོག་བཅས་ཡིན་འདུག
གོང་འཁོད་གྲོས་ཚོགས་འཐུས་མི་བརྒྱད་ནས་བཞི་སྟེ། མང་གཙོ་ཚོགས་པའི་ཚོགས་གཙོ་ལྕམ་སྐུ་ནེན་སི་པེ་ལོ་སི་མཆོག་དང་། ཇིམ་མེག་གྷོ་ཝན་མཆོག བྷེ་ཊི་མེག་ཀ་ལམ་མཆོག ལྕམ་སྐུ་ཇོ་སི་བྷི་ཊི་མཆོག་བཅས་དེ་སྔ་ཕྱི་ལོ་ ༢༠༡༥ ཕྱི་ཟླ་ ༡༡ ནང་བོད་དུ་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་གི་ངོ་བོའི་ཐོག་ནས་གཟིགས་སྐོར་དུ་ཕེབས་ཡོད།
དེ་ཡང་སྲིད་སྐྱོང་བློ་བཟང་སེངྒེ་མཆོག་གིས་གསུང་དོན། ཨ་རིའི་གྲོས་ཚོགས་ཀྱི་མང་གཙོ་ Democrats དང་སྤྱི་མཐུན་ཚོགས་པ་ Republic ཐུན་མོང་ལས་གྲུབ་པའི་ཆེས་མཐོའི་སྐུ་ཚབ་ཚོགས་ཆུང་ཞིག་བཞུགས་སྒར་དུ་ལོ་དགུའི་རྗེས་འཚམས་གཟིགས་ཐེངས་གཉིས་པ་ཕེབས་རྒྱུ་ཡིན་སྟབས། བོད་མིའི་སྒྲིག་འཛུགས་ཀྱིས་དགའ་སྤོབས་ཆེན་པོའི་ཐོག་ནས་ཁོང་རྣམ་པར་ཕེབས་བསུ་ཞུ་རྒྱུ་ཡིན། ཞེས་གསུངས།
ཕྱི་ལོ་ ༢༠༠༨ ལོར་བོད་ས་ཁྱོན་ཡོངས་སུ་ས་བྱི་ཞི་རྒོལ་ཆེན་མོ་བྱུང་རྗེས་རྒྱ་ནག་གཞུང་གིས་བོད་མིའི་ཐོག་དམ་བསྒྲགས་བྱེད་ཤུགས་ཆེ་རུ་བཏང་བར་བརྟེན། ལོ་དེར་ལྕམ་སྐུ་ནེན་སི་པི་ལོ་སི་མཆོག་བཞུགས་སྒར་རྡ་རམ་ས་ལར་ཕེབས་ནས་རྒྱ་ནག་གཞུང་གིས་བྱ་སྤྱོད་ལ་ཐད་ཀར་སྐྱོན་བརྗོད་དང་བོད་མི་རྣམས་ལ་གདུང་སེམས་མཉམ་སྐྱེའི་རྒྱབ་སྐྱོར་ཤུགས་ཆེ་གནང་ཡོད།
བོད་མིའི་སྒྲིག་འཛུགས་ཀྱིས་ཐེངས་འདིར་ཨ་རིའི་གྲོས་ཚོགས་ཀྱི་ཆེས་མཐོའི་སྐུ་ཚབ་ཚོགས་ཆུང་ལ་ཆེ་བསྟོད་ཞུ་ཆེད་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག ཕྱི་ཟླ་ ༥ ཚེས་ ༡༠ ཉིན་གྱི་སྔ་དྲོ་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བར་གཞུང་འབྲེལ་མཛད་སྒོ་ཞིག་གོ་སྒྲིག་ཞུ་རྒྱུ་དང་། མཛད་སྒོ་དེ་ཕྱི་དྲིལ་དྲ་བརྙན་ཚན་པས་སྔ་དྲོ་ཆུ་ཚོད་ ༩ ནས་ཐད་ཀར་རྒྱང་སྲིང་ཞུ་རྒྱུ་ཡིན་འདུག །
