༢༠༡༧ ཟླ་ ༤ ཚེས་ ༢༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༧ ཟླ་ ༤ ཚེས་ ༢༣ ཉིན་འཇར་མན་ཡུལ་དུ་བོད་ཀྱི་སྲོལ་རྒྱུན་དངོས་རྫས་འགྲེམས་སྟོན་ Tibet: Textile treasures from the land of Snow Lions ཞེས་པ་དབུ་འབྱེད་གནང་འདུག འགྲེམས་སྟོན་དེ་འཇར་མན་ཡུལ་མི་ལྕམ་སྐུ་ནོ་ར་ཀིར་ཅར་ Mrs. Nora Kircher ལགས་དང་སྐུ་ཞབས་ཊི་མུར་བྷི་ཀི་ཅར་ Mr. Timur B. Kircher ལགས་རྣམ་གཉིས་ཀྱིས་བཙུགས་པ་ཞིག་ཡིན་ཞིང་། འགྲེམས་སྟོན་དེ་ཕྱི་ལོ་ ༢༠༡༧ ཕྱི་ཟླ་ ༤ ནས་ཕྱི་ལོ་ ༢༠༡༨ ཕྱི་ཟླ་ ༡༠ བར་གནང་རྒྱུ་དང་། གཙོ་བོ་ས་གནས་ཡུལ་མི་ཚོར་བོད་ཀྱི་རིག་གཞུང་གཏིང་ཟབ་ཡོད་པ་དེ་དག་གོ་རྟོགས་རྒྱ་ཆེ་སྤེལ་སླད་དམིགས་པ་ཞིག་ཡིན་འདུག
དེ་ཡང་སྒེར་གྱིས་གཉེར་བའི་འགྲེམས་སྟོན་ཁང་དེའི་ནང་མི་རབས་གཉིས་རིང་གསོག་འཇོག་བྱས་པའི་བོད་བརྒྱུད་ནང་བསྟན་དང་འབྲེལ་བའི་ཆོས་རྫས་རིགས་དང་། བོད་མིའི་ཡུལ་སྲོལ་གོམས་གཤིས་ལ་བརྟེན་པའི་ཉིན་རེའི་འཚོ་བའི་ཁྲོད་དགོས་ངེས་དངོས་རྫས་རིགས་མང་དག་གཅིག་བཤམས་འདུག
འགྲེམས་སྟོན་དབུ་འབྱེད་ཀྱི་མཛད་སྒོར་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་ད་ལྟའི་བོད་ནང་གི་ཛ་དྲག་གནས་སྟངས་དང་། རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་སྡུག་རྩུབ་ཅན་གྱི་སྲིད་བྱུས་འོག་བོད་མིའི་ཐུན་མིན་ཆོས་དང་རིག་གཞུང་། སྐད་ཡིག་སོགས་རྩ་བརླག་ཏུ་འགྲོ་བཞིན་ཡོད་སྐོར་དང་། དེ་བཞིན་ཕྱི་ལོ་ ༡༩༦༠ ནང་བོད་མི་ཚོས་རིག་གནས་གསར་བརྗེའི་གནས་སྟངས་འོག་དཀའསྡུག་ཚད་མེད་མྱངས་པ་དང་། སྐབས་དེར་རྒྱ་ནག་དམར་སྲུང་དམག་མིས་བོད་ནང་གི་དགོན་པ་དང་ལྷ་ཁང་སོགས་ཁྱོན་ ༦༠༠༠ ལྷག་གཏོར་བཤིག་བཏང་ཡོད་ཀྱང་། བོད་མི་རྣམས་བཙན་བྱོལ་དུ་འབྱོར་རྗེས་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་འོག་དགོན་སྡེ་དེ་དག་སླར་གསོ་ཐོག་རྒྱ་གར་ཙམ་མ་ཟད། འཛམ་གླིང་ཁྱོན་དུ་བསྟན་འགྲོའི་བྱ་བ་སྔར་ལྷག་དར་སྤེལ་གནང་བཞིན་ཡོད་སྐོར་དང་།
རྒྱ་ནག་གཞུང་གིས་བོད་ས་བཙན་བཟུང་བྱས་ནས་བོད་མིའི་ཁྲོད་ཆབ་སྲིད་ཀྱི་དམ་བསྒྲགས་དང་། ཁོར་ཡུག་གཏོར་བཤིག མི་རིགས་གཞི་རྩར་བཟུང་ནས་སྤྱི་ཚོགས་དང་དཔལ་འབྱོར་དབྱེ་འབྱེད། བོད་ཀྱི་ཆོས་ཙམ་མ་ཟད། ཐུན་མིན་སྐད་ཡིག་ཟུར་གསལ་ཡོད་པ་དེ་དག་ཐོག་དམ་བསྒྲགས་བྱེད་བཞིན་པ། བོད་མི་འབྲོག་པ་རྣམས་བཙན་དབང་འོག་ནས་འབྲོག་པའི་རྩ་ཐང་ནས་གཞིས་ཆགས་ཁག་ཏུ་གནས་སྤོ་བྱེད་བཅུག་པ། དེ་བཞིན་བོད་ནང་རྒྱ་རིགས་མི་འབོར་ཧ་ཅང་མང་པོ་གནས་སྤོ་བྱེད་བཅུག་པ། ནུབ་རྒྱུད་གསར་སྤེལ་ཆེན་མོའི་ལས་གཞི་ལ་ཁ་གཡར་ནས་བོད་མིར་དངོས་ཤུགས་བརྒྱུད་གསུམ་ནས་དམ་བསྒྲགས་སུན་གཙེར་ཧ་ཅང་བཟོ་བཞིན་ཡོད་སྟབས། གཞིས་ལུས་བོད་མི་རྣམས་འ་ཆད་འུ་ཐུག་གིས་ཕྱི་ལོ་ ༢༠༠༩ ནས་ད་བར་རང་ལུས་མེར་སྲེག་བཏང་བའི་ཛ་དྲག་གནས་སྟངས་བྱུང་ཡོད་སྐོར་གསུངས།
མཐའ་དོན་སྐུ་ཚབ་དོན་གཅོད་ཀྱིས་ཀིར་ཅར་ནང་མི་རྣམས་ཀྱིས་བོད་དོན་རྒྱབ་སྐྱོར་གྱི་ལས་གཞི་དེ་ལྟ་བུ་སྤེལ་བར་ཡི་རངས་བསྔགས་བརྗོད་དང་སྦྲགས་ཐུགས་རྗེ་ཆེ་ཞུའི་མཇལ་དར་ཕུལ་བ་མ་ཟད། འབྱུང་འགྱུར་བོད་དོན་ཐོག་རྒྱབ་སྐྱོར་མུ་མཐུད་གནང་རྒྱུའི་འབོད་སྐུལ་ཡང་ཞུས་འདུག
སྐབས་དེར་གེ་སེལ་ཝ་ཌར་ Gieselwerder གྱི་གྲོང་སྡེའི་སྤྱི་ཁྱབ་པ་ Mayor སྐུ་ཞབས་ཀོར་ནེ་ལིའོ་སི་ཏར་རེ་ Mayor Cornelius Turrey མཆོག་ཀྱང་ཕེབས་པ་མ་ཟད། ཁོང་གི་ས་གནས་སུ་ལས་གཞི་དེ་ལྟ་བུ་སྤེལ་བར་དགའ་སྤོབས་ཧ་ཅང་བྱུང་སྐོར་དང་། ལྷག་པར་བོད་ཀྱི་གནད་དོན་དང་འབྲེལ་བའི་ལས་གཞི་དེ་ལྟར་གོ་སྒྲིག་གནང་ཐུབ་པར་དམིགས་བསལ་དགའ་བསུའི་འཚམས་འདྲི་ཡོད་སྐོར་གསུངས། སྐུ་མགྲོན་གཞན་ཁག་གཅིག་ནི། ཀ་སེལ་ Kassel རྫོང་གི་རྫོང་དཔོན་གཞོན་པ་ལྕམ་སྐུ་སུ་སེན་སེལ་བྷར་ཊི་ Ms. Susanne Selbert མཆོག་དང་། གྲོང་ཁྱེར་བྱང་ཧེ་སེའི་ North-Hesse འགན་འཛིན་འབུམ་རམ་པ་ལྕམ་སྐུ་ཨུར་ལི་ཀེ་ Ms. Dr. Urlike Admek མཆོག་བཅས་དང་། ས་གནས་ཡུལ་མི་ ༡༠༠ ཙམ་མཉམ་ཞུགས་གནང་འདུག སྐབས་དེར་འཇར་མན་དུ་གནས་སྡོད་བོད་མི་རྣམས་ནས་བོད་ཀྱི་གཞས་སྣ་ཁྲབ་སྟོན་ཞུས་ཡོད་པ་བཅས།།
