༢༠༡༠ ཟླ་ ༡༠ ཚེས་ ༡༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༡༠ ཚེས་ ༡༦ ཉིན་བོད་གཞུང་ཟློས་གར་ཚོགས་ཁང་དུ་སྐད་ཡིག་རྒྱུན་འཛིན་ཚོགས་པས་གོ་སྒྲིག་ཐོག་བཙན་བྱོལ་དུ་བོད་ཀྱི་སྐད་ཡིག་སྲུང་སྐྱོབ་སྐོར་གྱི་རིག་རྩལ་སྤྲོ་ཚོགས་ཐེངས་དང་པོ་ཚོགས་ཡོད། དེ་ཡང་གོང་ཚེས་ཉིན་གྱི་ཕྱི་དྲོ་ཚུ་ཚོད་ ༥།༣༠ ཐོག་སྐུ་མགྲོན་གཙོ་བོ་བོད་གཞུང་ཤེས་རིག་ལས་ཁུངས་ཀྱི་བཀའ་བློན་ཐུབ་བསྟན་ལུང་རིགས་མཆོག་དང་ཆོས་རིག་བཀའ་བློན་ཚེ་རིང་ཕུན་ཚོགས་རྣམ་གཉིས་གཙོས་གཞུང་འབྲེལ་མིན་པའི་ཚོགས་པ་ཁག་གི་འགན་འཛིན་དང་སྐུ་ཚབ། ས་གནས་མི་མང་བཅས་འདུ་འཛོམས་བྱུང་བའི་དབུས་སུ་ཤེས་རིག་བཀའ་བློན་མཆོག་གིས་གསུང་བཤད་གནང་དོན། ད་ལྟའི་དུས་ཚོད་ལ་ང་ཚོའི་སྐད་ཡིག་ཉམས་ཆག་འགྲོ་བའི་སྐབས་ཤིག་དང་བོད་ནང་དུ་རྒྱ་མིས་ཆེད་མངགས་ཉམས་ཆག་གཏོང་གི་ཡོད།
བཙན་བྱོལ་ནང་ང་ཚོ་རང་དབང་ལུང་པར་བསླེབས་ཡོད་པ་རྣམས་ནས་སོ་སོའི་སྐད་ཡིག་ལ་བདག་པོ་མ་བརྒྱབ་ན་ཕལ་ཆེར་རྒྱ་མི་ལས་སྡུག་པ་ཆགས་ཀྱི་རེད་སྙམ་གྱི་འདུག གང་ཡིན་ཟེར་ན་རྒྱ་མིས་བོད་ཀྱི་སྐད་ཡིག་རྩ་མེད་གཏོང་དགོས་པའི་དམིགས་ཡུལ་ཞིག་འཛིན་ཡོད། ང་ཚོས་སོ་སོའི་སྐད་ཡིག་རྒྱུན་འཛིན་བྱེད་རྒྱུ་དེ་ང་ཚོའི་ལས་འགན་ཡིན་པ་ནི་ཚང་མས་ཤེས་གསལ་ཡིན། ངོ་ཚོ་བཙན་བྱོལ་དུ་ཡོང་དགོས་དོན་ཡང་བོད་ནང་ང་ཚོའི་ཆོས་དང་རིག་གཞུང་སྐད་ཡིག་དེ་དག་སྦྱོང་རྒྱུ་སོགས་ལ་རང་དབང་མེད་པར་བརྟེན་བྱུང་བ་ཞིག་ཡིན། ང་ཚོ་བཙན་བྱོལ་ནང་བསླེབས་ཏེ་སོ་སོའི་སྐད་ཡིག་ཐོག་ལ་དོ་སྣང་མ་བྱས་ན་ཧ་ལས་པའི་ཐབས་སྐྱོ་པོ་རེད། ལྷག་པར་ང་ཚོ་བོད་པའི་སྐད་ཡིག་དེ་ང་རང་ཚོའི་མི་རིགས་ཀྱི་སྲོག་རྩ་ཡིན་པ་མ་ཟད། སྐད་ཡིག་དེ་འཛམ་གླིང་ཁྱོན་ཡོངས་ལ་མཁོ་གལ་ཆེན་པོ་ཞིག་ཡིན་པའི་ཆ་ནས་ང་ཚོས་བདག་པོ་རྒྱག་དགོས་རྒྱུ་དེ་ཤིན་ཏུ་ནས་གལ་འགངས་ཆེན་པོ་ཡིན། དཔེར་ན། ང་ཚོའི་སྐད་ཡིག་དེ་ཕ་མེས་སྐད་ཡིག་ཡིན་པའི་ཆ་ནས་རྒྱུན་འཛིན་དང་བདག་པོ་རྒྱག་དགོས་རྒྱུ་དེ་ང་ཚོ་བོད་མི་རིགས་ཙམ་མ་ཡིན་པར་རྒྱ་གར་ནང་སྟོད་ལ་དྭགས་ནས་བྱང་ཨ་སམ་བར་བོད་པའི་སྐད་ཡིག་དེ་ཕ་མེས་ཀྱི་སྐད་ཡིག་ཡིན་པ་ཤུགས་ཆེ་བ་ཡོད། དེ་བཞིན་བོད་ཀྱི་སྐད་ཡིག་དེ་བདག་པོ་དང་རྒྱུན་འཛིན་བྱེད་མཁན་དེ་སོག་པོས་མཚོན་པའི་ཕ་མེས་ནས་ཆོས་ལུགས་གཅིག་གྱུར་ཡིན་པ་ཚོས་རྒྱུན་འཛིན་བྱེད་རྒྱུ་ཡང་གལ་ཆེན་པོ་ཆགས་ཡོད། ད་ལྟའི་དུས་ལ་འཛམ་གླིང་ཁྱོན་ལ་ཉམས་ཞིབ་དང་རིག་གནས་རྙིང་པའི་ཐོག་སློབ་སྦྱོང་བྱེད་རྒྱུ་དང་རྒྱ་གར་ནང་མཐོ་རིམ་སློབ་གྲྭ་ཁག་གཅིག་ནང་བོད་པའི་སྐད་ཡིག་ཡོད་ལ་ཕྱི་རྒྱལ་དུ་མཐོ་རིམ་སློབ་གྲྭ་མང་པོ་ཞིག་ནང་ཆེད་དུ་བོད་པའི་སྐད་ཡིག་ཉམས་ཞིབ་དང་སློབ་སྦྱོང་བྱེད་རྒྱུའི་དོན་དུ་བཙུགས་ཡོད། དེར་བརྟེན་བོད་མི་རིགས་ཀྱི་སྐད་ཡིག་དེ་འཛམ་གླིང་ཁྱོན་ཡོངས་ལ་དགོས་གལ་ཆེན་པོ་ཞིག་ཐོག་ནས་སྲུང་སྐྱོབ་བྱེད་དགོས་རྒྱུ་དེ་གལ་ཆེན་པོ་རེད། ད་ལྟ་མདུན་དུ་བྲིས་པའི་ནང་སྐད་ཡིག་དེ་ང་ཚོ་མི་རིགས་ཤིག་བླ་སྲོག་ཡིན་གསུངས་པ་བཞིན་མི་རིགས་བླ་སྲོག་ཙམ་མ་ཟད་མི་རིགས་དེའི་རིག་གཞུང་གི་བླ་སྲོག་ཀྱང་ཆགས་ཀྱི་ཡོད། དེ་བཞིན་འདིར་གོ་སྒྲིག་གནང་མཁན་ཡོངས་དང་འབྲེལ་ཡོད་རྣམ་པར་བོད་གཞུང་ཤེས་རིག་ལས་ཁུངས་དང་ཐད་ཀར་འབྲེལ་བ་ཡོད་པའི་ཆ་ནས་ཚང་མར་ཐུགས་རྗེ་ཆེ་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་རྗེས་རྡ་ས་ཡོངས་གླིང་སྔོན་འགྲོའི་སློབ་གྲྭའི་སློབ་ཕྲུག་རྣམས་ནས་སྐད་ཡིག་དང་འབྲེལ་བའི་གླུ་གཞས་བཏང་རྗེས་སྐད་ཡིག་རྒྱུན་འཛིན་ཚོགས་པའི་ཚོགས་གཙོ་ཆོས་གྲགས་ལགས་ནས་ཐུགས་རྗེ་ཞུས་ཡོད་པ་བཅས་སོ།
