༢༠༡༧ ཟླ་ ༤ ཚེས་ ༣ རེས་གཟའ་ཟླ་བ།

༄༅། །འདི་གར་ཨ་རི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཨ་རིའི་མངའ་སྡེ་མི་ནི་སུད་ཌར་ཡོད་པའི་དབུ་མའི་ལམ་གྱི་གཞོན་ནུའི་མཐུན་ཚོགས་ནས་གྲ་སྒྲིག་དང་། བྱང་ཨ་རིའི་སྐུ་ཚབ་དོན་གཅོད་ཁང་ནས་གཞོགས་འདེགས་གནང་བའི་འོག རྒྱ་རིགས་རྩོམ་པ་པོ་ལི་ཅང་ལིན་གྱིས་མི་ནི་སུད་ཌ་སློབ་གྲྭ་ཆེན་མོའི་ University of Minnesota རྒྱ་རིགས་སློབ་ཕྲུག་དང་། མི་ནི་སུད་ཌ་ས་གནས་བོད་མི་དང་མཉམ་དུ་བོད་དོན་སྐོར་གསུང་བཤད་དང་བསམ་ཚུལ་བརྗེ་ལེན་གནང་ཡོད།

དེ་ཡང་རྒྱ་རིགས་རྩོམ་པ་པོ་ལི་ཅང་ལིན་ལགས་ཀྱིས་ཕྱི་ལོ་ ༢༠༡༧  ཟླ་ ༣ ཚེས་ ༣༡ ཉིན། མི་ནི་སུད་ཌ་སློབ་གྲྭ་ཆེན་མོའི་རྒྱ་རིགས་སློབ་ཕྲུག་དང་དང་བོད་རིགས་སློབ་མ་ཁག་གཅིག་ལ་ ༼བོད་ཀྱི་གནད་དོན་གང་འདྲ་བྱས་ནས་བྱུང་བ་རེད་དམ།༽ ཞེས་པའི་བརྗོད་གཞིའི་འོག བོད་དོན་སྐོར་གསུང་བཤད་དང་། སློབ་ཕྲུག་ཚོས་བཏོན་པའི་དྲི་བར་ལན་འདེབས་གནང་ཞིང་། དེ་ནི་རྒྱ་རིགས་རྩོམ་པ་པོས་རྒྱ་རིགས་ལ་ཁ་སློག་ནས་བོད་དོན་སྐོར་དཔྱད་བརྗོད་བྱེད་པའི་ཚོགས་འདུ་དམིགས་བསལ་ཞིག་རེད།

ལི་ཅང་ལིན་ལགས་ཀྱིས་གསུང་བཤད་གནང་སྐབས། བོད་ཀྱི་གནད་དོན་གང་འདྲ་བྱས་ནས་བྱུང་བ་ཤེས་དགོས་ན། ཐོག་མར་བོད་ཀྱི་ལོ་རྒྱུས་ཀྱི་དངོས་དོན་ཤེས་རྒྱུ་གལ་ཆེན་པོ་ཡིན་པའི་སྐོར་དང་། ལྷག་པར་ཕྱི་ལོ་ ༡༩༤༩ ནས་ད་བར་བོད་ནང་ཡང་སྙིང་གནས་ཚུལ་ག་རེ་བྱུང་ཡོད་པའི་སྐོར་ཤེས་རྒྱུ་དེ་བས་གལ་ཆེན་པོ་ཡིན་པའི་སྐོར། བོད་ཀྱི་རིག་གཞུང་དང་། བོད་མི་རིགས་ཀྱི་ངོ་བོ་སྲུང་སྐྱོབ་བྱེད་རྒྱུ་ནི་དེང་སྐབས་བོད་ཀྱི་གནད་དོན་གལ་ཆེ་ཤོས་ཆགས་ཡོད་པའི་སྐོར་འགྲེལ་བརྗོད་གནང་། དུས་ཡུན་ཆུ་ཚོད་གཅིག་གི་འགྲེལ་བརྗོད་ཚར་རྗེས་རྒྱ་རིགས་སློབ་ཕྲུག་དང་། བོད་རིགས་སློབ་ཕྲུག་ཚོའི་དྲི་བར་ལན་འདེབས་གནང་ཡོད་པ་རེད།

ཟླ་བ་བཞི་པའི་ཚེས་གཅིག་ཉིན་རྩོམ་པ་པོ་ལི་ཅང་ལིན་ལགས་དང་། བྱང་ཨ་རིའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་དྲུང་འཕར་ཀུན་དགའ་བཀྲིས་ལགས་ཀྱིས་དབུ་མའི་ལམ་གྱི་གཞོན་ནུའི་མཐུན་ཚོགས་ནས་གདན་ཞུས་གྲ་སྒྲིག་གནང་བ་བཞིན་ས་གནས་བོད་རིགས་གཞོན་སྐྱེས་དང་། མང་ཚོགས་རྣམས་ལ་རྒྱ་རིགས་ལ་འབྲེལ་བ་བྱེད་རྒྱུའི་གལ་ཆེའི་རང་བཞིན་དང་། རྒྱ་རིགས་ཤིག་གིས་བོད་དོན་ལ་བལྟ་སྟངས་ཇི་ཡོད་སྐོར་གསུང་བཤད་གནང་སྐབས།

ལི་ཅང་ལིན་ལགས་ཀྱིས། ཁོང་རང་ཉིད་༧གོང་ས་མཆོག་གི་ཞལ་མཇལ་གསུང་ཐོས་བྱུང་རྗེས་དང་། བཙན་བྱོལ་བོད་མིའི་གཞིས་ཆགས་ཁག་ཏུ་བསྐྱོད་རྗེས་ཀྱི་བསམ་བློའི་འགྱུར་བ་ལས་འཕྲོས་ཏེ་ཁོང་གིས་བོད་དོན་ལ་བལྟ་སྟངས་ཇི་ཡོད་དང་། དབུ་མའི་ལམ་གྱིས་རྒྱ་རིགས་སྤྱི་ཚོགས་ནང་ཤུགས་རྐྱེན་ཇི་ཐེབས་སྐོར་གསུངས་ཤིང་། དྲུང་འཕར་ཀུན་དགའ་བཀྲིས་ལགས་ཀྱིས་བོད་མིའི་སྒྲིག་འཛུགས་ནས་དབུ་མའི་ལམ་གྱི་སྲིད་བྱུས་རྒྱུན་འཁྱོངས་གནང་བ་འདིས་ད་བར་དགེ་མཚན་དང་ཕན་ཐོགས་ཇི་བྱུང་དང་། བོད་མི་ཚང་མས་དུས་རྒྱུན་དུ་སྤྱི་པའི་དོན་དག་ཐོག་བསམ་བློ་གང་འདྲ་ཞིག་འཁྱེར་དགོོས་པའི་སྐོར། ངང་བརྒྱུད་རིང་པོའི་སྒོ་ནས་རྒྱ་རིགས་སྤྱི་དང་། ལྷག་པར་གཞོན་སྐྱེས་རྣམས་ལ་བོད་ཀྱི་དངོས་ཡོད་གནས་ཚུལ་འགྲེལ་བརྗོད་བྱེད་རྒྱུའི་གལ་ཆེའི་རང་བཞིན་དང་། དེ་ལྟར་འགྲེལ་བརྗོད་ཐུབ་པ་བྱེད་པ་ལ་གང་འདྲ་བྱས་ནས་ཐབས་ཤེས་འབད་བརྩོན་བྱེད་དགོས་པའི་སྐོར་གསུངས་པ་མ་ཟད། ཁོང་གཉིས་ཀས་མང་ཚོགས་ཀྱིས་བཏོན་པའི་དྲི་བ་རྣམས་ལ་ཡང་ལན་འདེབས་གནང་ཡོད།

ཚོགས་འདུ་ཚར་རྗེས་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་དང་རྒྱུན་ལས་ངོ་ཡོད་རྣམས་ཀྱིས་བྱང་ཨ་རིའི་སྐུ་ཚབ་དོན་གཅོད་ཁང་དང་། རྒྱ་རིགས་རྩོམ་པ་པོ་ལི་ཅང་ལིན་ལགས། དབུ་མའི་ལམ་གྱི་གཞོན་ནུའི་མཐུན་ཚོགས་བཅས་ལ་ཐུགས་རྗེ་ཆེ་ཞུའི་གསོལ་ཚིགས་འདེགས་འབུལ་དང་ཆབས་ཅིག་ཉིན་གཉིས་ཀྱི་བྱེད་སྒོ་ཁག་མཇུག་སྒྲིལ་ཡོད་པ་རེད།/>