༢༠༡༧ ཟླ་ ༤ ཚེས་ ༡ རེས་གཟའ་སྤེན་པ།
༄༅། འདི་གའི་ཆེད་གཉེར་གསར་འགོད་པ་ངག་དབང་ཐོགས་མེད་ལགས་ཀྱིས་ས་གནས་ནས་བཏང་འབྱོར་ནང་འཁོད་དོན། །ཨ་སམ་ཊི་བྷུན་ Assam Tribune གསར་ཤོག་འདོན་སྤེལ་གནང་ནས་ད་བར་ལོ་ ༧༥ ཕྱིན་པ་དང་། སྡེ་ནིག་ཨ་སམ་ Dainik Assam འདོན་སྤེལ་གནང་ནས་ད་བར་ལོ་ ༥༠ འཁོར་བའི་དུས་སྟོན་མཛད་སྒོ་གཉིས་འཛོམས་ཤིག་མངའ་སྡེའི་རྒྱལ་ས་གྷོ་ཧ་ཊིར་སྲུང་བརྩི་ཞུས་པ་མ་ཟད། ཉིན་མཐའ་མའི་མཇུག་སྡོམ་མཛད་སྒོའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གདན་ཞུའི་གསོལ་འདེབས་ཞུས་དོན་ལྟར།
ཕྱི་ལོ་ ༢༠༡༧ ཟླ་ ༤ ཚེས་ ༡ རེས་གཟའ་སྤེན་པའི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་སམ་མངའ་སྡེའི་རྒྱལ་ས་གྷོ་ཧ་ཊིའི་གནམ་ཐང་དུ་༸ཞབས་སོར་འཁོད་རྗེས།
ཉིན་གུང་ཆུ་ཚོད་ ༡ ཙམ་ལ་ཁུལ་དེར་རྟེན་གཞི་བྱས་པའི་ ITA Central for Performing Arts ཞེས་པའི་ཚོགས་ཁང་དུ་ཆིབས་སྒྱུར་བཀའ་དྲིན་བསྐྱངས་ནས་མཇུག་སྡོམ་མཛད་སྒོའི་ཐོག འགྲོ་བ་མིའི་རྣམ་དཔྱོད་གཞི་ལ་བཞག་ནས་འཛམ་གླིང་ནང་ཞི་བདེ་ཇི་ལྟར་སྐྲུན་ཐུབ་པའི་ཐབས་ལམ་ཐོག་མང་ཚོགས་ ༢༡༠༠ བརྒལ་བར་བླང་དོར་བཀའ་སློབ་སྩལ།
མངའ་སྡེའི་སྤྱི་ཁྱབ་བློན་ཆེན་མཆོག
སྐབས་དེར་ཨ་སམ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Sarbananda Sonowal མཆོག་དང་། མངའ་སྡེའི་སྲིད་སྐྱོང་སྐུ་ཞབས་ Banwarilala Purohit མཆོག དེ་བཞིན་ཨ་སམ་ནང་གི་གསར་ཤོག་རྙིང་ཤོས་གྲས་ཨ་སམ་ཊིར་སྦུན་གྱི་ Assam Tribune འགན་འཛིན་བྷ་བྷི་ཏ་རཱཇ་ཁོ་བ་ Babita Rajkhowa མཆོག་བཅས་སྡིངས་ཆའི་སྟེང་བཞུགས་གྲལ་དུ་འཁོད་མཚམས། ཐོག་མར་ཨ་སམ་སྲོལ་རྒྱུན་གྱི་ལམ་ནས་༸གོང་ས་མཆོག་གིས་དབུས་སྐུ་མགྲོན་རྣམ་པར་ཕེབས་བསུའི་སྣེ་ལེན་གཟབ་རྒྱས་ཞུས།
དེ་རྗེས་༸གོང་ས་མཆོག་གིས་དབུས་སྐུ་མགྲོན་རྣམ་པས་སྣང་གསལ་ཞལ་ཕྱེ་མཛད་རྗེས་ཨ་སམ་ཊིར་སྦུན་གྱི་ Assam Tribune འགན་འཛིན་བྷ་བྷི་ཏ་རཱཇ་ཁོ་བ་ Babita Rajkhowa མཆོག་གིས་ཕེབས་བསུའི་གསུང་བཤད་གནང་། སྐབས་དེར་འགན་འཛིན་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེའི་མཛད་རྣམ་སྙིང་བསྡུས་ཤིག་ངོ་སྤྲོད་ཞུས་པ་མ་ཟད།
ཕྱི་ལོ་ ༡༩༥༩ ལོར་༸གོང་ས་མཆོག་རྒྱ་གར་ནང་བཙན་བྱོལ་དུ་༸ཞབས་སོར་བདེ་བར་འཁོད་པའི་གནས་ཚུལ་སྤེལ་མཁན་གྱི་གསར་ཤོག་ཐོག་མ་ཡིན་སྟབས་དགའ་སྤོབས་ཡོང་བཞིན་ཡོད་སྐོར་དང་། ཨ་སམ་ཊིར་བྷུན་གསར་ཤོག་དེ་ཉིད་ཕྱི་ལོ་ ༡༩༣༩ ཕྱི་ཟླ་ ༨ ཚེས་ ༡ ཉིན་ཨ་སམ་མངའ་སྡེའི་དིབ་རུ་གར་གྲོང་ཁྱེར་ནས་ཐོག་མར་བདུན་རེའི་གསར་ཤོག་གི་ཚུལ་དུ་འདོན་སྤེལ་གནང་རྗེས། ཕྱི་ལོ་ ༡༩༤༦ ཟླ་ ༩ ཚེས་ ༣༠ ཉིན་གྷོ་ཧ་ཊིར་གནས་སྤོས་བྱས་ནས་ཉིན་རེའི་གསར་ཤོག་གི་ངོ་བོར་བསྒྱུར་འདུག
སྐབས་དེར་ཨ་སམ་མངའ་སྡེའི་ཨིན་ཡིག་གསར་ཤོག་ཆེད་ཐོག་མ་དེ་ཆགས་ཡོད་སྐོར་སོགས་ངོ་སྤྲོད་ཞུས་བསྟུན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དཔེ་དེབ་གཉིས་དབུ་འབྱེད་མཛད།
དེ་ཡང་དེབ་གཅིག་ནི་སྡེ་ནིག་ཨ་སོམ་ལོ་ལྔ་བཅུ་འཁོར་བའི་ཉིན་མོ། ཞེས་པ་ཡིན་འདུག་ཅིང་། གཞན་དེ་ཨ་སམ་ཊིར་བྷུན་གསར་ཤོག་གི་རྩོམ་སྒྲིག་པ་ཆེད་ཐོག་མ་སྐུ་ཞབས་ཨེལ་ལན་ཕུ་ཀན་མཆོག་གི་སྐོར་ཡིན་འདུག
ཨ་སམ་ཊིར་བྷུན་གྱི་རྩོམ་སྒྲིག་པ་ཐོག་མ་སྐུ་ཞབས་པི་ཇི་བྷ་རུ་ཝ་མཆོག PG Baruah
དེ་རྗེས་མངའ་སྡེའི་སྤྱི་ཁྱབ་བློན་ཆེན་མཆོག་གིས་གསུང་བཤད་གནང་དོན། དེ་རིང་༸གོང་ས་༸སྐྱབས་མགོན་ཆེན་པོ་མཆོག་འདིར་ཆིབས་སྒྱུར་བཀའ་དྲིན་བསྐྱངས་པ་དེས་ང་ཚོ་ཚང་མའི་སེམས་ནང་དགའ་ཚོར་ཧ་ཅང་སྐྱེས་ཐུབ་པ་བྱུང་ཡོད། དེ་ནི་གཙོ་བོ་༸གོང་ས་ཏཱ་ལའི་བླ་མ་མཆོག་གི་༸སྐུའི་ཆེ་བའི་ཡོན་ཏན་ཡིན། ང་རང་སྒེར་ལ་མཚོན་ན་དེ་རིང་གི་མཛད་སྒོར་བཅར་དགོས་པའི་རྒྱུ་མཚན་གཙོ་བོ་ནི་༸གོང་ས་ཏཱ་ལའི་བླ་མ་མཆོག་གི་སྐུ་དྲུང་ནས་མཇལ་ཁ་ཞུ་རྒྱུ་དང་། ༸གོང་ས་ཏཱ་ལའི་བླ་མ་མཆོག་གིས་བཟང་སྤྱོད་དང་འབྲེལ་བའི་བཀའ་སློབ་དེ་དག་གཞི་རྩར་བཟུང་ནས་ཨ་སམ་མངའ་སྡེའི་འཛིན་སྐྱོང་ལས་དོན་གཙོ་བོར་གྱུར་བའི་སྤྱི་ཚོགས་ཀྱི་གནས་སྟངས་ཡར་རྒྱས་གཏོང་རྒྱུའི་སླད་ང་ཚོས་འབད་བརྩོན་གང་ཡོང་ཞུ་དགོས་པ་ཆགས་ཡོད། གང་ཡིན་བརྗོད་ན་ང་ཚོའི་མངའ་སྡེའི་ནང་གཙོ་བོ་མི་བཟང་སྤྱོད་ལྡན་པ་དགོས་རྒྱུ་དེ་ཧ་ཅང་གལ་ཆེན་པོ་ཞིག་ལ་ངོས་འཛིན་བྱེད་བཞིན་ཡོད། གལ་ཏེ་དེ་ལྟར་བྱུང་ཐུབ་ཚེ་མངའ་སྡེའི་ནང་བདེ་སྐྱིད་ཕུན་སུམ་ཚོགས་པ་ཡོང་ངེས་རེད། ༸གོང་ས་ཏཱ་ལའི་བླ་མ་མཆོག་ནི་འཛམ་གླིང་ཀུན་ལ་ཞི་བདེའི་དེད་དཔོན་ཞིག་ཡིན་པ་ཡོངས་སུ་གྲགས་ཡོད། ཅེས་སོགས་ཀྱི་གསུང་བཤད་གནང་།
དེ་ནས་མངའ་སྡེའི་སྲིད་སྐྱོང་མཆོག་གིས་གསུང་བཤད་གནང་རྗེས་༸གོང་ས་མཆོག་གིས་བཀའ་སློབ་སྩལ་དོན། ངོས་ཀྱིས་རྒྱུན་དུ་གཏམ་བཤད་བྱེད་སྐབས་སྤུན་མཆེད་ཕོ་མོ་ཚོ། ཞེས་འགོ་འཛུགས་བཞིན་ཡོད། གང་ཡིན་བརྗོད་ན་ངོས་ཀྱི་དམ་བཅའ་གསུམ་ནས་གཅིག ང་ཚོ་འགྲོ་བ་མི་རིགས་ཐེར་འབུམ་བདུན་ཡོད་པ་ཚང་མ་འགྲོ་བ་མི་རིགས་གཅིག་གྱུར་ཡིན་བསམ་པའི་འདུ་ཤེས་གོང་མཐོར་གཏོང་རྒྱུ་འདི་ཡིན། འདི་ནི་ངོས་ཀྱིས་ཧ་ཅང་གལ་ཆེན་པོ་ཞིག་ཡིན་པར་ངོས་འཛིན་བྱེད་བཞིན་ཡོད། དེང་སྐབས་འཛམ་གླིང་ནང་གི་དཀའ་ངལ་ཧ་ཅང་མང་པོ་ཞིག་ཡོད་པ་དེ་དག་གཙོ་བོ་མཐར་གཏུགས་ན་མི་རང་གིས་བཟོས་པའི་དཀའ་ངལ་ཞིག་ཆགས་ཡོད། དཔེར་ན། ཕན་ཚུན་དམག་འཁྲུག་བརྒྱབ་ནས་མི་གསོད་ཁྲག་སྦྱོར་གྱི་རིགས་ལ་བརྟེན་ནས་མི་ཉམ་ཆུང་ཉེས་མེད་མང་པོ་ཞིག་འཆི་རྐྱེན་རིགས་ཡོང་བཞིན་ཡོད།
ས་ཁུལ་ཁག་གཅིག་ནང་དུ་བྱིས་པ་མང་པོ་ལྟོགས་ཤི་ཐེབས་བཞིན་ཡོད། ཁོང་ཚོའང་ང་ཚོ་དང་མཚུངས་པར་འགྲོ་བ་མི་ཞིག་ཡིན་སྟབས། ང་ཚོས་སྣང་ཆུང་བྱེད་ནས་འཇོག་ཐབས་རྩ་བ་ནས་མེད། ཅེས་དང་། ཡང་༸གོང་ས་མཆོག་གིས་ཞལ་ཤོབ་དང་སྦྲགས་བཀའ་སློབ་སྩལ་དོན། གོང་དུ་ཁྱེད་ནས་ངོས་རང་༸རྒྱལ་དབང་སྐུ་ཕྲེང་ ༡༣ ཡང་སྲིད་ཡིན་སྐོར་དང་། ངོས་རང་འཕགས་པ་སྤྱན་རས་གཟིགས་ཀྱི་རྣམ་སྤྲུལ་ཡིན་ཚུལ་གསུང་པ་དེར་གང་འདྲ་ཡིན་ནམ་སྙམ་པའི་ཐེ་ཚོམ་ཡོད། འོན་ཀྱང་ངོས་རང་འགྲོ་བ་མི་ཞིག་ཡིན་པ་བརྒྱ་ཆ་བརྒྱ་ནས་བརྒྱ་ཡིད་ཆེས་ཡོད།
ངོས་རང་ལོ་ན་ཚོད་རྒས་ཡང་རིག་པ་གྲུང་པོ་ཡོད། དེ་ནི་གཙོ་བོ་ངོས་རང་གཅིག་གི་སྤྲུལ་པ་ཡིན་པའི་རྒྱུ་མཚན་ལ་བརྟེན་ནས་མིན། དེ་ནི་གཙོ་བོ་བོད་བརྒྱུད་ནང་བསྟན་ལ་སློབ་སྦྱོང་བྱེད་སྐབས་གསུང་ཚད་ཐམས་ཅད་ཡིན་པ་རེད། ཅེས་ཆ་མ་བཞག་པར་དེ་ལྟར་ཡིན་པའི་དགོས་པ་གང་ཡིན། རྒྱུ་མཚན་གང་ཡིན། ཞེས་བརྟག་དཔྱད་བྱས། རིག་པས་བརྡར་ཤ་བཅད་ནས་རྩོད་པ་བྱས་ནས་ཕྱིན་པ་དེའི་དྲིན་ལ་བརྟེན་ནས་རེད། ཅེས་དང་ཡང་ཨ་སམ་ཊིར་སྦུན་འགོ་བཙུགས་ནས་ལོ་ངོ་ ༧༥ འཁོར་བའི་དུས་དྲན་སྲུང་བརྩི་དང་སྦྲགས་ནས་བཀའ་སློབ་སྩལ་དོན།
དེ་རིང་གཙོ་བོ་གསར་ཤོག་འདི་དབུ་བརྙེས་ནས་མི་ལོ་ ༧༥ འཁོར་བ་རེད། དེ་རིང་གི་གསར་ཤོག་འདི་རེད། འདིའི་ནང་དུ་ངོས་རང་ཐོག་མར་རྒྱ་གར་ནང་བཙན་བྱོལ་ལ་འབྱོར་སྐབས་ངོས་ཀྱི་ཨ་མ་ལགས་དང་གཅེན་མོའི་པར་འདུག
ཕྱི་ལོ་ ༡༩༥༩ ཕྱི་ཟླ་ ༣ ཚེས་ ༡༠ ཉིན་བོད་ཀྱི་རྒྱལ་ས་ལྷ་སའི་ནང་རྔམ་སྟོན་ཧ་ཅང་ཤུགས་ཆེན་པོ་ཞིག་བྱུང་བ་རེད། ངོས་ནས་ཟིང་འཁྲུག་ཞི་འཇམ་ཡོང་ཐབས་སླད་འབད་བརྩོན་གང་ཡོང་བྱས་པ་ཡིན། འོན་ཀྱང་མཐར་གླགས་མ་ཁེལ་བ་རེད།
སྐབས་དེར་རྒྱ་མིའི་དྲག་པོའི་དམག་དཔུང་ཉིན་རེ་བཞིན་ལྷ་སའི་ནང་ཇེ་མང་དུ་འགྲོ་བཞིན་ཡོད། དེར་བརྟེན་མཐར་བྲོས་བྱོལ་ཡོང་རྒྱུ་ཁོ་ན་མ་གཏོགས་ཐབས་ལམ་གཞན་མ་རྙེད་པ་རེད། ང་ཚོ་ལྷ་ས་ནས་བྲོས་བྱོལ་དུ་ཡོང་བའི་ཉིན་ཏེ། ཕྱི་ལོ་ ༡༩༥༩ ཕྱི་ཟླ་ ༣ ཚེས་ ༡༧ ཉིན་ངོས་ནས་རང་སྲོག་ལ་མ་འཛེམས་པར་བྲོས་བྱོལ་དུ་ཡོང་བ་ཡིན། སྐབས་དེར་ང་ཚོའི་བསམ་བློའི་ནང་ང་ཚོ་བོད་ཀྱི་ལྷོ་ཕྱོགས་ས་ཁུལ་དུ་འབྱོར་མཚམས་རྒྱ་ནག་དང་ལྷན་སྐད་ཆ་བཤད་ནས་འགྲིག་འཇག་ཡོང་རྒྱུའི་རེ་བ་བྱས་པ་རེད། ངོས་རང་ལྷ་ས་ནས་ཕྱི་ཚེས་ ༡༧ དགོང་མོ་བྲོས་པ་ཡིན། ཕྱི་ཚེས་ ༢༠ སྔ་དྲོར་རྒྱ་ནག་གཞུང་གིས་ལྷ་སར་འབར་རྫས་ཀྱིས་གཏོར་རྒོལ་བཏང་བ་རེད། དེར་བརྟེན་སྐད་ཆ་བཤད་ནས་འགྲིག་འཇག་ཡོང་རྒྱུའི་རེ་བ་སྟོང་ཟད་ཕྱིན་པ་རེད། དེ་རྗེས་ངོས་རང་རྒྱ་གར་ས་མཚམས་སུ་འབྱོར་སྐབས་རྒྱ་གར་གཞུང་གིས་ས་མཚམས་ནང་འཛུལ་བཅུག་ཨེ་ཡོང་བསམས་པའི་དོགས་པ་བསྐྱེད་བྱུང་། དེར་བརྟེན་ངོས་ཀྱི་ལས་བྱེད་གཉིས་རྒྱ་གར་ས་མཚམས་སུ་བཏང་བ་ཡིན། ལས་བྱེད་ཁག་གཅིག་འབྲུག་ས་མཚམས་སུ་བཏང་བ་ཡིན། རྒྱ་གར་ཕྱོགས་སུ་བཏང་བའི་ལས་བྱེད་ཚོ་ཕྱིར་ལོག་ནས་རྒྱ་གར་གཞུང་གིས་ངོས་རང་རྒྱ་གར་ནང་ཡོང་རྒྱུར་ཆོག་མཆན་ཡོད་སྐོར་བརྗོད་བྱུང་།
དེར་བརྟེན་རྒྱ་གར་ས་ཐོག་ཏུ་འཛུལ་ནས་ཀེན་ཛ་མ་ནིར་འབྱོར་སྐབས་ངོས་ཀྱི་གྲོགས་པོ་རྙིང་པ་སྐུ་ཞབས་མེ་ནོན་ Menon དམ་པ་ཁོང་དང་ཨ་ཊུག་བྷ་བྷུ། ཡ་ཝ་ཀ་ཛི་བཅས་ཕེབས་འདུག ཁོང་ཚོ་དང་མཇལ་སྐབས་ཁོང་ཚོའི་སེམས་ནང་ལྷོད་ཤིག་ཤིག་ཆགས་སོང་བའི་རྣམ་པ་མངོན་བྱུང་། རྒྱ་གར་བྱང་ཤར་ས་ཁུལ་དུ་འབྱོར་སྐབས་ངོས་ལ་རང་དབང་ཐོབ་པའི་སེམས་ཚོར་ཞིག་བསྐྱེད་བྱུང་། སྐབས་དེར་ས་མཚམས་ས་ཁུལ་ཁག་གི་གཞུང་འབྲེལ་སྣེ་ལེན་གནང་སྐབས་ཁོང་ཚོས་ལྷག་བསམ་རྣམ་དག་ཐོག་ནས་ངོས་ལ་སྣེ་ལེན་གནང་བྱུང་། སྐབས་དེ་ནས་ངོས་ཀྱི་མི་ཚེའི་ནང་གི་ལིའུ་གསར་པ་ཞིག་འགོ་བཙུགས་པ་རེད།
སྐབས་དེར་ང་ཚོ་སྲོག་འགོ་ཐོན་ཐུབ་ན་བསམ་པ་ལས་གཞན་བསམ་བློ་དེ་ཙམ་མེད། འོན་ཀྱང་རིམ་བཞིན་བོད་མི་ཧ་ཅང་མང་པོ་རྒྱ་གར་དུ་བྲོས་བྱོལ་དུ་འབྱོར་སྐབས་ཐོག་མར་བོད་མི་ཁག་གཅིག་མེ་ས་མ་རིར་འབྱོར་བ་རེད། སྐབས་དེར་ངོས་ཀྱི་རྗེས་འབྲང་ནས་རྒྱ་གར་དུ་བཙན་བྱོལ་ལ་ཐོག་མར་འབྱོར་མཁན་བོད་མི་ཁྲི་བདུན་བརྒྱད་ཙམ་རེད། སྐབས་དེར་མེ་ས་མ་རིར་བོད་མི་དེ་དག་ལ་སྡོད་སྒར་བརྒྱབ་པ་རེད། ཕལ་ཆེར་ཕྱི་ཟླ་ ༤ ནང་ཡིན་པ་ཡོད། ཧ་ཅང་ཚ་བ་ཆེན་པོ་འདུག དེར་བརྟེན་སྐབས་དེར་ཛ་དྲག་ཆེ་བ་དེ་བོད་མི་དེ་དག་ས་བསིལ་ས་ཞིག་ལ་གཏོང་ཐུབ་ན་བསམ་པ་དེ་རེད། དེ་ནས་རིམ་བཞིན་གཞིས་ཆགས་དེ་དག་ཚུགས་པ་རེད།
ཐོག་མའི་སྐབས་ང་ཚོ་རྒྱ་གར་དུ་བཙན་བྱོལ་བ་བྱེད་ནས་སྡོད་རྒྱུའི་དམིགས་ཡུལ་གཙོ་བོ་དེ་བོད་ཀྱི་ཐུན་མིན་རིག་གནས་སྤྱི་དང་། ལྷག་པར་རྒྱ་གར་གྱི་དཔལ་ནཱ་ལེནྡྲའི་གཙུག་ལག་སློབ་གྲྭའི་ལེགས་བཤད་སྨད་དུ་བྱུང་བ་དེ་དག་དང་། བོད་ཀྱི་སྐད་ཡིག་སོགས་གཅེས་འཛིན་དང་མི་ཉམས་རྒྱུན་འཛིན་བྱ་རྒྱུ་དེ་རེད། དེ་ནས་སྲིད་བློན་ནེ་རུས་ཕྱག་རོགས་གནང་བར་བརྟེན་རྒྱ་གར་གྱི་ས་ཁུལ་འདྲ་མིན་ནང་བོད་མིའི་གཞིས་ཆགས་ཚུགས་པ་རེད། ཅེས་སོགས་ཀྱི་བཀའ་སློབ་སྩལ་ནས་མཇུག་སྡོམ་མཛད་སྒོ་རྒྱལ་ཁའི་ངང་གྲོལ་ཡོད་པ་བཅས།།
