ཕྱི་ལོ་ ༢༠༡༧ ཟླ་ ༣ ཚེས་ ༢༩ རེས་གཟའ་ལྷག་པ།
༄༅། །ཕྱི་ལོ་ ༢༠༡༧ ཟླ་ ༣ ཚེས་ ༢༩ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་སྔོན་ནས་གསོལ་འདེབས་ཞུས་པ་བཞིན་བཀའ་བཞེས་བཟང་པོ་ཐོབ་སྟེ། ༧རྒྱལ་བའི་ཕོ་བྲང་དུ་རྡ་ས་ཁུལ་གྱི་རྒྱ་གར་གསར་འགོད་པ་ཁྱོན་མི་གྲངས་ ༣༧ ལ་དམིགས་བསལ་མཇལ་ཁ་དང་བཀའ་སློབ་སྩལ་འདུག
སྐབས་དེར་༸གོང་ས་མཆོག་གིས་གསར་འགོད་པ་རྣམས་ལ་གསར་འགོད་པ་ཚོས་གནས་ཚུལ་གང་སྤེལ་ཡང་རྒྱབ་མདུན་ངོ་ལྐོག་མེད་པ་དྲང་བདེན་དང་དོན་སྙིང་ལྡན་པ་ཞིག་བཏོན་དགོས་རྒྱུ་ཧ་ཅང་གལ་ཆེན་པོ་ཡིན་སྐོར་བཀའ་སློབ་སྩལ་ཡོད། ལྷག་པར་དེང་སྐབས་ས་ཕྱོགས་གང་སར་མི་རྣམས་དཀའ་ངལ་མང་དག་ཅིག་འཕྲད་བཞིན་པའི་དུས་སྐབས་འདིར་གསར་འགྱུར་བརྒྱུད་ལམ་ཁག་ལ་འགྲོ་བ་མིའི་རིན་ཐང་གོང་མཐོར་དང་ཆོས་ལུགས་མཐུན་སྒྲིལ་གོང་སྤེལ་གཏོང་རྒྱུའི་འགན་འཁྲི་ཆེན་པོ་ཞིག་ཡོད་པ་དང་། མང་གཙོའོ་སྤྱི་ཚོགས་ནང་མི་དམངས་ཚོར་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཡོད་སྟབས། གསར་འགོད་པ་རྣམ་པས་མི་དམངས་ཚོར་ཕྱོགས་ལྷུང་མེད་པའི་དངོས་ཡོད་གནས་ཚུལ་མཁོ་སྤྲོད་བྱེད་དགོས་སྐོར་བཀའ་སློབ་སྩལ་འདུག
དེ་བཞིན་༸གོང་ས་མཆོག་གིས་རྒྱ་གར་གྱི་གསར་འགོད་པ་ཚོས་རྒྱལ་སྤྱིའི་སྟེང་འགྲོ་བ་མིའི་རིན་ཐང་དང་། ཆོས་ལུགས་མཐུན་སྒྲིལ་གོང་མཐོར་གཏོང་རྒྱུ་སོགས་རྒྱ་གར་གྱི་གནའ་བོའི་རིག་གཞུང་བཟང་པོ་དེ་དག་གོང་སྤེལ་གཏོང་རྒྱུའི་ཐད་འབད་བརྩོན་མང་ཙམ་གནང་དགོས་པ་དང་། དེ་བཞིན་རྒྱ་གར་ལ་དེང་དུས་ཚན་རིག་གི་ཤེས་བྱ་དང་གནའ་བོའི་ལེགས་བྱང་གཉིས་ཟུང་འབྲེལ་ཐོག་ནས་སྤྱི་ཚོགས་ཞི་བདེ་དང་དྲང་བདེན་ལྡན་པ་ཞིག་བཟོ་རྒྱུའི་ནུས་པ་དང་གོ་སྐབས་གཉིས་ཀ་ཡོད་ཅེས་བཀའ་སློབ་སྩལ་འདུག
ཐེངས་འདིའི་མཇལ་ཁ་དེ་བཞིན་འདི་ལོའི་ཕྱི་ཟླ་ ༢ ཚེས་ ༢༤ ཉིན་ཕྱི་དྲིལ་ལས་ཁུངས་ཀྱིས་གསར་འགོད་པ་ཚོར་ལོ་འཁོར་གསོལ་སྟོན་གོ་སྒྲིག་ཞུ་སྐབས་རྒྱ་གར་གསར་འགོད་པ་རྣམ་པས་དཔལ་ལྡན་སྲིད་སྐྱོང་མཆོག་ལ་དམིགས་བསལ་འབོད་སྐུལ་ཞུས་པ་ཞིག་ཡིན་འདུག །
