༢༠༡༧ ཟླ་ ༣ ཚེས་ ༡༦ རེས་གཟའ་ཕུར་བུ།

༄༅། །ཕྱི་ལོ་ ༢༠༡༧ ཟླ་ ༣ ཚེས་ ༡༦ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་བྷི་ཧཱར་མངའ་སྡེའི་རཱཇ་གིར་ Rajgir  ནང་རྟེན་གཞི་བྱས་པའི།  རྒྱལ་སྤྱིའི་ཚོགས་ཁང་། ཞེས་པའི་ནང་དུ། དུས་རབས་ཉེར་གཅིག་པའི་ནང་པ། ཞེས་པའི་རྒྱལ་སྤྱིའི་ནང་པའི་ལྷན་ཚོགས་ཐོག་དབུ་བཞུགས་ཆེད་ཕྱོགས་ཕེབས་གནང་ཡོད། 

དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྷན་ཚོགས་དབུ་བཞུགས་མཛད་རྒྱུ་མ་ཟད།  རྒྱ་གར་གཞུང་གི་རིག་གཞུང་བློན་ཆེན་འབུམ་རམས་པ་སྐུ་ཞབས་མ་ཧེ་ཤི་ཤརྨ་ Dr. Mahesh Sharma མཆོག་དང་ལྷན་རྒྱལ་སྤྱིའི་ནང་པའི་ལྷན་ཚོགས་དབུ་འབྱེད་ཀྱང་མཛད་རྒྱུ་ཡིན་འདུག 

ལྷན་ཚོགས་ཀྱི་དམིགས་ཡུལ་ནི།  འཛམ་གླིང་ནང་ཞི་བདེ་དང་འཆམ་མཐུན། ཁོར་ཡུག་གི་ཐོག་དེ་སྔ་བྱུང་མྱོང་མེད་པའི་གཏོར་བཤིག་གིས་གཙོས་དཀའ་ངལ་མང་དག་ཅིག་འཕྲད་བཞིན་པ་རྣམས་སེལ་ཆེད།  ནང་པའི་ལྟ་གྲུབ་གཞི་རྩར་བཟུང་བའི་ཐབས་ལམ་ཞིག་འཚོལ་ཐབས་མཛད་རྒྱུ་དང་། ཐབས་ལམ་དེ་བརྒྱུད་ནས་འཛམ་གླིང་ནང་ཞི་བདེ་དང་འཆམ་མཐུན་གྱི་ནུས་པ་གོང་སྤེལ་གཏོང་ཐབས་ཆེད་ཡིན་འདུག

ཐེངས་འདིའི་ལྷན་ཚོགས་དེ་བཞིན་ཕྱི་ལོ་ ༢༠༡༧ ཟླ་ ༣ ཚེས་ ༡༧ ནས་ ༡༩ བར་འཚོགས་རྒྱུ་དང་། ལྷན་ཚོགས་གོ་སྒྲིག་གནང་མཁན་རྒྱ་གར་དབུས་གཞུང་གི་རིག་གཞུང་བློན་ཆེན་ལས་ཁུངས་དང་། དཔལ་ནཱ་ལེནྡྲ་གཙུག་ལག་ཁང་ཆེན་གསར་པ། Nava Nalanda Mahavihara བཅས་ཡིན་འདུག །