༢༠༡༧ ཟླ་ ༣ ཚེས་ ༡༡ རེས་གཟའ་སྤེན་པ།
༄༅། །ཕྱི་ལོ་ ༡༩༥༩ ལོར་རྒྱ་ནག་དམར་པོའི་སྲིད་གཞུང་གིས་བོད་ས་ཡོངས་རྫོགས་དབང་སྒྱུར་འོག་བོད་མིའི་ཁྲོད་འབུ་ཆེས་ཆུང་བཟོས་ཀྱི་དཔེ་ལྟར། རང་སྣང་གང་དྲན་གྱིས་མི་སེར་སྤེལ་བའི་སྲིད་བྱུས་ལག་བསྟར་བྱས་པ་དེར་མཐའ་གཅིག་ཏུ་ཞི་རྒོལ་རྔམ་སྟོན་ཆེད་ལོ་དེའི་ཟླ་ ༣ ཚེས་ ༡༢ ཉིན་བོད་ཀྱི་རྒྱལ་ས་ལྷ་སར་བོད་པའི་བུད་མེད་རྣམས་ཀྱིས་མ་གྲོས་བསམ་པ་གཅིག་མཐུན་གྱིས་ངོ་རྒོལ་རྔམ་སྟོན་བྱས་ནས་ད་བར་མི་ལོ་ ༥༨ འགྲོ་བཞིན་ཡོད།
དེ་ཡང་ཉེ་ལམ་བཀའ་ཤག་ནས་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་རྒྱལ་སྤྱིའི་གནས་བབ་དང་དུས་ཀྱི་འགྱུར་འགྲོས་སོགས་ལ་བསྟུན་ནས་བཙན་བྱོལ་བོད་མིའི་སྤྱི་ཚོགས་ཁྲོད་བུད་མེད་ཀྱི་ནུས་པ་གོང་འཕེལ་གཏོང་ཆེད། ཕྱི་ལོ་ ༢༠༡༧ ཟླ་ ༢ ཚེས་ ༢༡ ནས་ ༢༣ བར་ཉིན་གྲངས་གསུམ་རིང་རྡ་ས་གངས་སྐྱིད་དབུས་སྨན་རྩིས་ཁང་གི་ཚོགས་ཁང་དུ་བུད་མེད་ནུས་སྟོབས་གོང་འཕེལ་གྱི་ལྷན་ཚོགས་ཐེངས་དང་པོ་གོ་སྒྲིག་གནང་བ་དང་སྦྲགས། བུད་མེད་ནུས་སྟོབས་གོང་འཕེལ་གྱི་སྲིད་བྱུས་དང་འབྲེལ་བའི་ལམ་སྟོན་ཡིག་ཆ་ཞིག་ལྷན་ཚོགས་ཐོག་གཏན་འབེབས་གནང་ཐུབ་པ་བྱུང་ཡོད།
སྤྱིར་བཀའ་ཤག་གོང་རིམ་ནས་བུད་མེད་ནུས་སྟོབས་སྤེལ་བའི་སྲིད་བྱུས་ཤིག་གཏན་འབེབས་གནང་རྒྱུ་དགོངས་བཞེས་གནང་ཡོད་ཀྱང་ད་བར་སྲིད་བྱུས་ཁ་གསལ་ཞིག་གཏན་འབེབས་གནང་བ་བྱུང་མེད།
ཐེངས་འདིར་བཀའ་ཤག་སྐབས་ ༡༥ པས་ལོ་ལྟར་ཕྱི་ཟླ་ ༣ ཚེས་ ༡༢ ཉིན་བུད་མེད་ཀྱི་ཉིན་མོར་སྲུང་བརྩི་ཞུ་རྒྱུ་གཏན་འབེབས་གནང་བར་བརྟེན། འདི་ལོའི་ཕྱི་ཟླ་ ༣ ཚེས་ ༡༢ ཉིན་བུད་མེད་ཉིན་མོ་ཐེངས་དང་པོ་སྲུང་བརྩི་ཞུ་རྒྱུའི་མཛད་སྒོར། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་མགྲོན་གཙོ་བོར་ཇི་ལྟར་གདན་ཞུའི་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་གྱིས། གོང་ཚེས་ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་གསུང་རའི་ནང་འཚོགས་རྒྱུའི་མཛད་སྒོ་ཡོངས་རྫོགས་ཕྱི་དྲིལ་བོད་ཀྱི་བརྙན་འཕྲིན་ཚན་པས་བརྙན་འཕྲིན་བརྒྱུད་ཐད་གཏོང་ཞུ་རྒྱུ་ལགས་ན་དོན་གཉེར་བ་རྣམས་ཀྱིས་ཡིད་འཇགས་འཚལ།།
