༢༠༡༧ ཟླ་ ༣ ཚེས་ ༩ རེས་གཟའ་ཕུར་བུ།
༄༅། །ཕྱི་ལོ་ ༢༠༡༧ ཟླ་ ༣ ཚེས་ ༩ ཉིན་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དབུ་བརྙེས་ནས་ལོ་ངོ་ཉི་ཤུ་རྩ་གཅིག་འཁོར་བ་དང་། ནོར་གླིང་ནས་བཞེངས་བསྐྲུན་ཞུས་པའི་༸རྒྱལ་བའི་འཁྲུངས་རབས་ཞལ་ཐང་རྣམས་༸གོང་ས་༸སྐྱབས་མགོན་ཆེན་པོར་ལེགས་འབུལ་ཞུ་རྒྱུ། དེ་བཞིན་གངས་ཅན་ཤེས་རིག་བང་མཛོད་དཔར་བསྐྲུན་ཐོག་མ་ཞུས་པའི་དབུ་འབྱེད་སོགས་ཀྱི་མཛད་སྒོ་གཟབ་རྒྱས་ཤིག་ཚོགས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨།༤༥ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནོར་གླིང་བདེ་ལྡན་གཙུག་ལག་ཁང་དུ་ཆིབས་སྒྱུར་བསྐྱངས་ཏེ་འཁྲུངས་རབས་ཞལ་ཐང་རྣམས་ལ་ཐུགས་ཞིབ་མཛད་པ་དང་འབྲེལ་བཞུགས་ཁྲིར་༸ཞབས་སོར་འཁོད་གྲུབ་མཚམས་དཔལ་ལྡན་སྟོད་རྒྱུད་གྲྭ་ཚང་གི་དགེ་འདུན་པ་རྣམས་ནས་ཤིས་བརྗོད་དང་༸རྒྱལ་བའི་ཞབས་བརྟན་གསུང་འདོན་གནང་།
དེ་ནས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ངེས་སྟོན་པ་བཀའ་བློན་ཁྲི་ཟུར་སྐལ་བཟང་ཡེ་ཤེས་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་མཎྜལ་རྟེན་གསུམ་འདེགས་འབུལ་ཞུས་རྗེས་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་ནས་དཔར་བསྐྲུན་ཞུས་པའི་གངས་ཅན་ཤེས་རིག་བང་མཛོད་དེབ་ཕྲེངས་བཅུ་གཅིག་ཅན་དབུ་འབྱེད་གནང་རྗེས་ནོར་གླིང་སྤྱི་ཁྱབ་འགན་འཛིན་བདེ་ཆེན་རྣམ་རྒྱལ་ལགས་ཀྱིས་ལས་བསྡོམས་སྙན་སྒྲོན་ཞུས།
དེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གིས་ནོར་གླིང་འགན་འཛིན་ལྷན་ཚོགས་དེབ་སྐྱེལ་བྱས་ནས་མི་ལོ་ཉི་ཤུའི་རིང་ཚོགས་མི་གནང་བ་དང་། ཀེམ་ཡེ་ཤེས་ལགས་གིས་ཕྱི་ལོ་ ༢༠༠༨ བར་སྤྱི་ཁྱབ་འཛིན་སྐྱོང་འགན་འཛིན་གནང་བ་མ་ཟད། འགན་འཛིན་ལྷན་ཚོགས་ཀྱི་ཚོགས་མི་གནང་མུས་བཅས་སོ་སོར་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་ནས་ཐུགས་རྗེ་ལེགས་འབུལ་ཕྱག་རྟགས་དང་། ནོར་གླིང་བོད་ཀྱི་རིག་གནས་ཆེས་མཐོའི་སློབ་གྲྭའི་སྐབས་དང་པོ་ནས་དྲུག་པ་བར་གྱི་སློབ་ཟུར་ཐུན་མོང་ནས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ངེས་སྟོན་པ་བཀའ་བློན་ཁྲི་ཟུར་སྐལ་བཟང་ཡེ་ཤེས་མཆོག་ལ་ཁོང་གིས་བོད་གཞུང་མང་གཉིས་ལ་ཞབས་འདེགས་རླབས་ཆེན་ཞུས་པ་དང་།
དེ་བཞིན་ཀེམ་ཡེ་ཤེས་ལགས་ཀྱིས་ངེས་སྟོན་པ་བཀའ་བློན་ཁྲི་ཟུར་སྐལ་བཟང་ཡེ་ཤེས་མཆོག་དང་ཕྱར་གྲུ་མཉམ་འདེགས་ཀྱིས་ནོར་གླིང་མཐོ་སློབ་དབུ་འཛུགས་ནས་ད་བར་སློབ་ཕྲུག་སྐྱེད་སྲིང་ཐེངས་དྲུག་གནང་བ་དང་། ཐེངས་བདུན་པ་འཚོགས་བཞིན་པ་བཅས་ལ་ཐུགས་རྗེ་ཆེ་ཞུའི་གཟེངས་རྟགས་སྩལ།
དེ་རྗེས་དཔལ་ལྡན་ཁྲིམས་ཞིབ་པ་ཆེ་བ་བཀའ་བརྒྱུད་དོན་གྲུབ་མཆོག་གིས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ངེས་སྟོན་པ་བཀའ་བློན་ཁྲི་ཟུར་སྐལ་བཟང་ཡེ་ཤེས་མཆོག་ལ་བོད་ཀྱི་རིག་གཞུང་འཛིན་སྐྱོང་སྤེལ་གསུམ་ཐད་ཞབས་འདེགས་རླབས་ཆེན་བསྒྲུབས་པ་དང་། ནོར་གླིང་མི་མང་ཡོངས་ལ་གཟིགས་སྐྱོང་རླབས་ཆེ་གནང་དང་གནང་མུས་ལ་ཐུགས་རྗེ་ཆེ་ཞུའི་གཟེངས་རྟགས། ནོར་གླིང་མི་མང་ནས་འབུལ་བའི་ཕྱག་རྟགས་དང་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ལོ་ངོ་ཉི་ཤུའི་རིང་ཞབས་འདེགས་བསྒྲུབ་མཁན་ནོར་གླིང་ལས་བྱེད་རྣམས་ལ་ནོར་གླིང་ནས་གནང་བའི་གཟེངས་རྟགས་གནང་།
དཔལ་ལྡན་བོད་མི་མང་སྤྱི་འཐུས་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་མཆོག་གིས། ལོ་ངོ་བཅུའི་རིང་ཞབས་འདེགས་བསྒྲུབ་མཁན་ནོར་གླིང་ལས་བྱེད་རྣམས་ལ་ནོར་གླིང་ནས་གནང་བའི་གཟེངས་རྟགས་ཕུལ། ཆོས་རིག་ཟུང་དྲུང་ཐུབ་བསྟན་ཚེ་རིང་ལགས་ཀྱིས་སྐབས་དྲུག་པའི་ནོར་གླིང་མཐོ་རིམ་སློབ་ཕྲུག་རྣམས་ལ་ནོར་གླིང་ནས་བསླབ་པ་མཐར་སོན་པའི་ཕྱག་འཁྱེར་བཅས་གནང་གྲུབ་བསྟུན། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ངེས་སྟོན་པ་མཆོག་གིས་གསུང་བཤད་གནང་དོན།
དུས་གསུམ་རྒྱལ་བ་ཀུན་གྱི་དམིགས་མེད་ཐུགས་རྗེའི་རང་གཟུགས། བོད་ཁ་བ་གངས་ལྗོངས་ཀྱི་སྣོད་བཅུད་ཡོངས་ཀྱི་སྲོག་རྩ། བྱམས་དང་སྙིང་རྗེས་ཐུགས་རྒྱུད་བརླན་པའི་འཕྲིན་ལས་དུས་ཀྱི་ཁོར་མོ་ཡུག་ཏུ་ཏང་མར་བརྡལ་བའི་གཏན་ཚིགས་ཀྱི་རང་བཞིན་ལ་སུས་ཀྱང་འགོག་པ་མེད་པའི་གནས་ས་གསུམ་ན་མངོན་པར་གསལ་བ་ལ་བརྟེན་ནས་འཛམ་གླིང་གོང་བུ་འདི་ཡི་དབང་དུ་བྱས་ཀྱང་། ཆོས་རིག་དང་གོམས་སྲོལ། ཆས་གོས། མི་རིགས་སོགས་ཀྱིས་རིས་སུ་མ་བཅད་པར་སྒོ་གསུམ་ལན་བརྒྱར་བཏུད་པའི་ཞི་བསིལ་གྱི་དེད་དཔོན་ཆེན་པོར་དབང་བསྐུར་བའི་ལྷར་བཅས་སྲིད་ཞིའི་གཅུག་རྒྱན། ༸གོང་ས་ལྷ་མིའི་རྣམ་འདྲེན་༸སྐྱབས་མགོན་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་མངོན་པར་དགེ་བའི་དཔལ་ཡོན་འབར་བའི་སེང་གེས་བཏེགས་པའི་གསེར་གྱི་ཁྲི་འཕང་མཐོན་པོར་ཞབས་ཟུང་འཁོར་ལོ་རྩིབས་སྟོང་བརྗིད་ཆགས་པར། གུས་པ་ནོར་གླིང་ངེས་སྟོན་པ་བཀའ་བློན་ཁྲི་ཟུར་མིང་འཛིན་སྐལ་བཟང་ཡེ་ཤེས་ཀྱིས་སོར་བཅུའི་འདབ་མ་སྤྱི་བོར་བཀོད་དེ་ལྷ་ཕྱག་གྲངས་མེད་སྔོན་དུ་བཏང་བའི་སྒོ་ནས། བོད་མིའི་སྒྲིག་འདུགས་ཀྱི་མཛད་གཅོ་ཁྲིམས་ཞིབ་པ་དང་། སྲིད་སྐྱོང་། འཕྱིང་སང་རྣམ་པ། མང་པོས་བཀུར་བའི་སྤྱི་འཐུས་རྣམ་པ། སྐུ་མགྲོན་རྣམ་པ་བཅས་ལ་དགའ་སྤྲོའི་པད་མོ་རྒོད་པའི་དྲི་བསུར་ཅིར་ཡང་འཐུལ་བའི་གུས་འཚམས་ཞུ་གི་ཡོད།
འདི་གའི་ལས་བསྡོམས་ཀྱི་སྙིང་དོན་འཛིན་སྐྱོང་འགན་འདིན་ནས་སྙན་སྒྲོན་ཞུས་ཟིན་པའི་དོན་ལ་དཔྱད་ཞིབ་མཛད་ན་ལྟེ་གནས་འདིའི་ངོ་བོའམ། རང་བཞིན། བྱེད་ལས་སོགས་ལ་ལམ་རོབ་གཟིགས་པ་དགེ་བའི་ཚུལ་ལ་བརྟེན་བསྐྱར་ཟློས་ཞུ་དགོས་མ་མཆིས་ཤིང་། འོན་ཀྱང་སྐབས་བབ་གནས་སྟངས་ཅུང་ཞིག་སྙན་དུ་གསོལ་རྒྱུར། ད་ལམ་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དབུ་བརྙེས་ནས་ལོ་གྲངས་ཉེར་གཅིག་འཁོར་བའི་དགའ་སྟོན་རྟེན་འབྲེལ་གྱི་དུས་བཟང་འདིར་༧གོང་ས་མཆོག་གི་འཁྲུངས་རབས་ཞལ་ཐང་ཉེར་ལྔ་འབུལ་ལམ་ཞུས་པ་དང་ཆབས་ཅིག་དངོས་འབུལ་པད་རྩ་ལྟར་ཕྲ་ཡང་བདག་ཅག་བསོད་ནམས་ཀྱི་རྟེན་དུ་དགྱེས་བཞེས་ཡོད་པ་ནས། སྐུ་ཡི་གསང་གསུམ་གྱི་མཛད་པ་རྣམས་འཁྲུངས་རབས་རིམ་བརྒྱུད་ཀྱི་ནང་དོན་ལྟར་ཐང་མར་བརྡལ་བའི་ཐུགས་བསྐྱེད་རླབས་ཕྲེང་གཡོ་བ་ནས་ནམ་ཡང་མི་འདོར་བ་མཁྱེན་ཞེས་ཞུ་རྒྱུ་དང་།
ལྷག་པར་བོད་དང་བོད་མིའི་བདེ་སྐྱིད་རང་དབང་གི་དོན་ལ་གཞན་གྱི་བཙན་སྟོབས་ཀྱིས་དབང་སྒྱུར་དང་འབྲེལ་འགྲོ་བ་མི་སྤྱོད་ཀྱི་ཐོབ་ཐང་ཙམ་ཡང་བྲལ་བའི་བརླང་སྤྱོད་ཀྱི་གནས་སྟངས་དུས་སུ་བདོ་བའི་སྐབས་འདིར། ཆོས་བཅུ་པའི་མདོ་ལས། བྱང་ཆུབ་སེམས་དཔའ་བློ་ལྡན་གྱིས། །རིགས་ནི་མཚན་མ་དག་ལས་ཤེས། །ཞེས་དང་། དེའི་ཕྱིར་ན་དཔལ་ཆོས་ཀྱི་གྲགས་པས་ཀྱང་། འདི་ཡིས་སྲིན་བུའི་གྲངས་མཁྱེན་པ། །ངེད་ལ་འགར་ཡང་ཉེར་མཁོ་མེད། །ཐབས་དང་བཅས་པ་རིག་མཛད་པ། །གང་དེ་ཚད་མ་ཉིད་འདོད་ཀྱི། །ཐམས་ཅད་རིག་མཛད་མ་ཡིན་ནོ། །ཞེས་གསུངས་པ་ལྟར། འཕགས་མཆོག་ཕྱག་ན་པདྨོའི་རྣམ་རོལ་བོད་གངས་ཅན་གྱི་ཐུན་མོང་མིན་པའི་ལྷ་སྐལ་ལ་བསམ་བཞིན་དུས་དང་འཚམས་པར་གངས་ལྗོངས་ཀྱི་བླ་སྲོག་ཏུ་བྱོན་པ་ལོ་རྒྱུས་དང་། མཛད་པའི་ཆ་ཕྲ་མོ་ཚུན་ནས་ཚུལ་གསུམ་རྟགས་ཀྱིས་ལརགས་པར་གྲུབ་ཅིང་། དོན་འདིས་དེང་རྒྱ་གར་འཕགས་པའི་ཡུལ་དུ་མཚན་དཔེའི་ཆ་ཤས་རྫོགས་པའི་དོན་འབྲེལ་འཛམ་གླིང་སྤྱི་དང་། བྱེ་བྲག་ཁ་བ་རི་པའི་རང་དབང་སླར་གསོའི་དོན་དུ་འཕྲིན་ལས་ཐང་མར་བརྡལ་བཞིན་པའི་བཀའ་དྲིན་གྱི་ཚུལ་འདི་ལས་དེང་བོད་ཀྱི་ཆོས་དང་རིག་གཞུང་འཛམ་གླིང་ས་ཡི་གོ་ལ་འདིའི་སྟེང་སྔོན་མེད་ཕྲ་ཚུགས་སྲ་བརྟན་དུ་གནས་བཞིན་པ་ནི་དངོས་སྟོབས་ཀྱི་རང་བཞིན་ལས་གྲུབ་པའི་དོན་ཞིག་ཡིན་སྟབས། འདིས་མགོན་པོ་གང་ཉིད་ཚད་མའི་སྐྱེས་བུར་གྲུབ་པ་རྣམ་དཔྱོད་དང་ལྡན་པ་སུས་ཀྱང་བསྙོན་དུ་ག་ལ་ཡོད།
དེང་རང་རིགས་བཅོལ་ཆུང་འགས་མགོན་པོ་གང་གི་ཐུགས་བསྐྱེད་དང་འགལ་བའི་བསོད་དམན་གྱི་གླེང་སྒྲ་སྒྲོག་བཞིན་པའང་ཡོད་པ་ཀུན་གསལ་དང་། དེ་ལ་འདིར་རྩལ་འདོན་གྱིས་བརྗོད་རྒྱུ་ཞིག་ལ། ཚུལ་མིན་ལོག་སྒྲུབ་བྱེད་པོ་དག་གིས་གླེང་གཏམ་བསྒྲགས་ཐུབ་པའི་གོ་སྐབས་ཐོབ་པ་འདི་སུའི་དྲིན་ལས་བྱུང་བ་ཤེས་ཚོར་དགོས་པ་གལ་ཆེའི་ཁར་བོད་ཀྱི་སྤྱི་ཚོགས་ནང་ཀླད་མེད་ཀྱིས་གཏམ་འཆལ་སྤེལ་བར་སྤྱི་ལ་སྨན་པའི་དགོས་གལ་མེད་པའི་ཚུལ་ལ་བསམ་ཤེས་བྱེད་ཤེས་པ་ཞིག་དགོས། སྐབས་སུ་བབ་པའི་དོན་ལ། རང་རེ་འགོ་དམངས་ཡོངས་ཀྱིས་བོད་ཀྱི་ཆོས་དང་རིག་གཞུང་ཞེས་གལ་ཆེ་ཡིན་པ་མགྲིན་ལམ་ནས་སྙན་སྒྲ་འབྱིན་ཤེས་པ་ཙམ་མིན་པར། འདི་ཉིད་ཉམས་ན་བོད་ཀྱི་བླ་སྲོག་དང་བྲལ་བའི་ཚུལ་ལ་བསམ་ཞིབ་ཀྱིས་གཅེས་སྲུང་བྱེད་དགོས་པ་ཞིག་ལོས་ཡིན།
རང་རེའི་སྡེ་ཚན་ཆུང་ཚེགས་འདི་ནས་ཀྱང་བོད་དང་། བོད་མིའི་དམིགས་ཡུལ་ལ་སྨན་ངེས་པའི་དོན་དེ་རིག་གཞུང་གཅེས་སྐྱོང་བྱ་རྒྱུ་ཉིད་ཡིན་པར་བསམ་སྟེ། འགོ་ལས་ཡོངས་ནས་སེམས་ཁུར་བརྟས་ཏེ་ངལ་བ་མང་པོར་གདོང་ལེན་བྱས་ནས་ལྟེ་གནས་འདི་ཐོག་མར་འགོ་འཛུགས་སྐབས་ནས་བཟུང་ད་བར་འཆར་དོན་འདི་རང་ལ་དམིགས་པའི་མཐུན་རྐྱེན་རྩོལ་སྒྲུབ་ཞུས་པ་ལས་གཞུང་དངུལ་གྲོན་གཏོང་གཞན་ནས་ཁ་བྲི་བ་གཏན་ནས་མེད་ཅེས་ད་ལམ་གོ་སྐབས་འདི་བརྒྱུད་ནས་ཞུ་གི་ཡོད།
བོད་ཀྱི་རིག་པའི་གཞུང་ལུགས་དང་འབྲེལ་བའི་སྒྱུ་རྩལ་གྱི་རྣམ་གྲངས་མང་པོ་ཚོགས་སྡེའི་གནས་སྟངས་ལ་གཞིགས་པའི་འདོན་སྤེལ་ཟུས་ཡོད་པ་གོང་དུ་འགན་འཛིན་གྱིས་ལས་བསྡོམས་སུ་སྙན་སེང་ཞུས་པ་ལྟར་ཡང་། ད་དུང་གོམ་བགྲོད་མདུན་སྤོས་བྱ་རྒྱུ་རང་རེའི་མདུན་དུ་ལྷག་ཡོད་སྟབས། མཛད་གཙོ་ཚང་མས་ཐུགས་སྣང་དང་འབྲེལ་བའི་དུས་བསྟུན་དགོངས་བཞེས་ཡོང་ཐབས་ངོས། འདི་གའི་འཛིན་སྐྱོང་གི་ལས་དོན་རྒྱུན་བསྟུད་འགྲོ་ཏབས་སུ་དེང་གི་འཛམ་གླིངན་དཔལ་འབྱོར་འདུ་འགོད་འགྲོ་སྟངས་དང་བསྟུན་པའི་ལས་གནས་འགན་འཁུར་ཅན་དང་། ལས་བྱེད་ལས་མི་དང་བཅས་པར་གླ་འབབ་དང་མཐུན་རྐྱེན་སྦྱོར་རྒྱུ་ཇེ་མཐོར་གཏོང་ཐབས་མ་བྱུང་ན་འདི་མུར་འཚོ་ཐབས་ག་ལ་ཡོད། ད་ལྟའི་ཆར་འདི་གའི་གླ་ཕོགས་མཐོ་ཤོས་ལ་ཟླ་རེར་སྒོར་ ༤༩༢༠༠ དང་། དམའ་ཤོས་ལ་སྒོར་ ༩༠༠༠ སྤྲོད་བཞིན་ཡོད། འོན་ཀྱང་འདི་གའི་ལྟེ་གནས་ཀྱི་གནས་སྟངས་དབང་གིས་བསམ་ཐོག་དོན་འཀེལ་མི་ཡོང་བ་བློ་ཕམ་རང་བཞིན་གྱི་བརྟུལ་ཞུགས་ཙམ་འཆང་བཞིན་པ་ཡིན། སྐབས་རེ་མཛད་གཙོ་རྣམ་པ་འགས་འདི་གའི་འཛིན་སྐྱོང་གི་གནས་སྟངས་ལ་རང་རེའི་ཁ་དཔེར་བོང་བུ་བསླངས་པར་ལེགས་བརྗོད་མེད་པར་མཇུག་མ་བཀོག་པའི་ཉེས་པའི་གཟིགས་ཚུལ་འདྲ་ཡོང་སྙམ་པས། དེ་ལྟར་ཡོང་ན་བློ་ཕམ་དང་ཞེ་བགད་བྱ་རྒྱུ་ཙམ་ལས་གཞན་མ་འདས།
སྐབས་དོན་ལ་འདི་གའི་བྱིས་བཅོལ་ཁང་ལ་མཚོན་ན་མ་མ་དགེ་ལས་ཉི་ཤུས་ཐབས་བརྩོན་ཐོག་མཐུན་རྐྱེན་སྦྱོར་མུས་ཡིན་པ་འདི་རང་རེའི་སྤྱི་ཚོགས་ནང་དྲག་གྲས་སུ་སོན་ཡོད། དེ་བཞིན་ལས་བྱེད་དང་ལས་མིའི་ཕྲུ་གུ་སློབ་སོན་རིགས་རྡ་ཤོད་བོད་ཁྱིམ་སློབ་གྲྭར་འགྲུལ་འཁོར་ཆེད་འཛུགས་ཀྱིས་སྔ་དགོང་བསུ་སྐྱེལ་ཙམ་མ་ཟད། འདི་ནས་སློབ་ཡོན་འབུལ་མུས་ཡིན། དབྱར་དགུན་གུང་གསེང་དང་། རྒྱུན་ལྡན་སློབ་གྲྭ་གྲོལ་མཚམས་ཕྲུ་གུ་ཚོ་གྲོང་ཉུལ་སོགས་ཀྱིས་དུས་ཚོད་ཆུད་ཟོས་སུ་འགྲོ་གཞི་མི་ཡོང་ཆེད་སློབ་དགེ་ཆེད་འཛུགས་ཀྱིས་འཛིན་གྲྭ་ཚོགས་བཞིན་པ་ཡིན།
དེ་བཞིན་འདི་གའི་བོད་ཀྱི་རིག་གནས་མཐོ་སློབ་ཀྱི་མཐུན་རྐྱེན་ལ་ཡང་སློབ་གཉེར་བ་གཉིས་རེར་ཉལ་ཁང་དང་། སྔ་དགོང་གུང་གསུམ་གྱི་འཚོ་བ་སྦྱོར་མུས་ཐོག་ཟླ་རེར་སློབ་གཉེར་བ་རེར་ཙག་ཙིག་གྲོན་གཏོང་ཆེད་སྒོར་ལྔ་བརྒྱ་རེ་མཐུན་རྐྱེན་སྦྱོར་མུས་དང་། དེའི་ཐོག་བོད་མིའི་སྒྲིག་འཛུགས་སེས་རིག་ལས་ཁུངས་ནས་སློབ་གཉེར་བ་གྲངས་བཅུ་ལ་སློབ་ཡོན་གནང་བཞིན་པར་མཚམས་འདིར་ཐུགས་རྗེ་ཆེ་ཞུ་གི་ཡོད། མཐོ་རིམ་སློབ་གཉེར་བའི་སྦྱང་བརྩོན་གྱི་གནས་སྟངས་ཀྱང་མངོན་མཐོར་སོན་ཏེ། རྩོམ་ཡིག་སོགས་རྒྱུགས་འགྲན་སྐབས་ཨང་རིམ་དང་པོ་དང་གཉིས་པ་སོན་པ་ཡོང་བཞིན་པ་ཡིན།
ད་ལམ་འཁྲུངས་རབས་ཞལ་ཐང་བཞེངས་བསྐྲུན་ཟིན་པའི་ཐད། ༸གོང་ས་༸སྐྱབས་མགོན་ཆེན་པོ་མཆོག་འཛམ་གླིང་སྤྱི་དང་། བྱེ་བྲག་བོད་ཁ་བ་ཅན་པའི་༸སྐྱབས་དང་མགོན་དཔུང་དམ་པར་སྐུ་ཚེ་ཞབས་པད་བརྟན་པར་གཡོ་བ་མེད་པའི་ཀུན་སློང་ཤུགས་དྲག་གིས་དྲངས་ཏེ་བགྱིད་ཁུར་ཞུས་པ་ཞིག་ཡིན་ཅིང་། འོན་ཀྱང་འདི་འབྲེལ་ལས་ཀྱི་བྱེད་པོ་རྣམས་མྱོང་བྱང་གི་ཚུལ་ཞན་པས་འབྲི་ཚུགས་དང་། འཁྲུངས་རབས་ཀྱི་མཛད་པ་ཟུར་འདོན་བྱ་རྒྱུ། གུང་སྒྲིག་སྟངས་སོགས་ལ་སྐྱོན་ཆ་ཡོད་པ་གདོན་མི་ཟ་ནའང་། ད་ལྟའི་ཆར་སྒྱུ་རྩལ་གྱི་མངོན་པར་ཕྱུག་པའི་ཞལ་ཐང་འདི་ལྟ་བུ་ཞིག་བོད་ཕྱི་ནང་གཉིས་ལ་མེད་ཅེས་ཞུས་ན་ཞུ་ཧམ་དུ་ག་ལ་འགྲོ་སྙམ་སྟེ། འདི་ལྟར་ཞུས་ཐལ་སོང་བས་ཧམ་ཤེད་ཀྱིས་རང་བསྟོད་ཞུས་པ་མིན་པ་དགོངས་པར་མངའ་བ་འཚལ།
ལྷག་པར་ལྟར་གནས་འདི་ནས་སྒོར་ས་ཡ་མང་པོ་དང་འབྲེལ་བའི་ལས་དོན་ཞུ་མུས་ཀྱང་། དེ་དག་གི་ཁྲོད་ནས་འདི་གའི་འགོ་དམངས་ཡོངས་ཀྱི་སྙིང་གི་དུམ་བུ་ལྟར་ཤིན་ཏུ་གཙིགས་སུ་བྱེད་པ་ནི་༸རྒྱལ་བའི་འཁྲུངས་རབས་བཞེངས་བསྐྲུན་ཞུ་རྒྱུ་དང་མཛད་རྣམ་གཉིས་ཡིན་ན། ད་ལམ་གཙོ་བོའི་དམིགས་ཡུལ་ལམ། དགོས་འདུན་ཆ་ཤས་ཙམ་གྲུབ་པར་ཚང་མ་དགྱེས་པ་སྐྱེ་བའི་རེ་སྨོན་ཞུ་གི་ཡོད། ཅེས་སོགས་ཀྱི་གསུང་བཤད་གནང་།།
