༢༠༡༧ ཟླ་ ༣ ཚེས་ ༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༧ ཟླ་ ༣ ཚེས་ ༡ ཉིན་རྒྱལ་སྤྱིའི་བོད་དོན་ལས་འགུལ་ཁང་གི་འཛིན་སྐྱོང་འགན་འཛིན་ཨ་རིའི་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་རི་ཆ་ཌི་སྒེར་ Richard Gere མཆོག་དང་། ཚོགས་གཙོ་སྐུ་ཞབས་མེ་ཐིའུ་མེ་ཁ་ཅི་ Matteo Mecacci མཆོག བྱང་ཨ་རིའི་སྐུ་ཚབ་དོན་གཅོད་སྤེན་པ་ཚེ་རིང་མཆོག་བཅས་ཀྱིས་ཨ་རིའི་སྲིད་གཞུང་འཕོ་འགྱུར་ཕྱིན་པའི་ཆབ་སྲིད་ཀྱི་ཁོར་ཡུག་གསར་པའི་བགྲོས་དང་བསྟུན། ཨ་རིའི་སྲིད་གཞུང་གིས་བོད་དོན་ཐོག་རྒྱབ་སྐྱོར་སྔར་བཞིན་སྲ་བརྟན་རྒྱུན་སྐྱོང་ཡོང་རྒྱུར་གཙོ་བོར་དམིགས་ནས་གྲོས་ཚོགས་གོང་འོག་ཀྱི་འབྲེལ་ཡོད་འཐུས་མི་རྣམས་དང་མཇལ་འཕྲད་ཞུས་ཏེ་ཞུ་གཏུག་གི་ལས་འགུལ་སྤེལ་འདུག
དེ་ཡང་ཁོང་རྣམ་པས་གོང་ཚེས་ཉིན་ཨ་རིའི་གྲོས་ཚོགས་ཀྱི་འབྲེལ་ཡོད་ལས་ཁུངས་སུ་བཅར་ནས་གྲོས་ཚོགས་གོང་མའི་འཐུས་མི་སྐུ་ཞབས་བྷོབ་ཀོར་ཀར་ Bob Corker མཆོག་དང་། བྷེན་ཀར་ཌིན་ Ben Cardin མཆོག མར་ཀོ་རུ་བྷི་ཡོ་ Marco Rubio མཆོག ཇོན་མེ་ཀེན་ John McCain མཆོག དེ་བཞིན་གྲོས་ཚོགས་འོག་མའི་ཕྱོགས་འགལ་ཚོགས་པའི་ཚོགས་གཙོ་ལྕམ་སྐུ་ནེན་སི་པི་ལོ་སི་ Nancy Pelosi མཆོག་དང་གྲོས་ཚོགས་འོག་མའི་འཐུས་མི་སྐུ་ཞབས་ཨེ་ལོ་ཡི་ཊི་ཨེན་ཇེལ་ Eliot Engel མཆོག སྐུ་ཞབས་ཇིམ་མེ་གྷོ་ཝན་ Jim McGovern མཆོག་སོགས་དང་མཇལ་འཕྲད་ཞུས་འདུག
གཞན་ཡང་ཕྱི་ཚེས་ ༢ ཉིན་ཨ་རིའི་ཕྱི་སྲིད་ལྷན་ཁང་གི་ཚོགས་ཁང་ཞིག་ཏུ་ཨ་རིའི་ཕྱི་སྲིད་ལས་ཁུངས་ལས་བྱེད་ཀྱིས་གཙོས་གནད་ཡོད་མི་སྣ་ཁྱོན་མི་གྲངས་ ༧༠ བརྒལ་བ་ཚང་འཛོམས་ཐོག་བོད་ཀྱི་ལོ་གསར་སྲུང་བརྩི་གཟབ་རྒྱས་ཞུས་འདུག སྐབས་དེར་སྐུ་ཚབ་དོན་གཅོད་སྤེན་པ་ཚེ་རིང་མཆོག་དང་རྒྱལ་སྤྱིའི་བོད་དོན་ལས་
འགུལ་ཁང་གི་ཚོགས་མི་རྣམ་པ། བོད་རིགས་ཚོགས་པའི་འཛིན་སྐྱོང་ཚོགས་མི་བཅས་ལྷན་འཛོམས་གནང་འདུག སྐབས་དེར་ཨ་རིའི་ཕྱི་སྲིད་ལྷན་ཁང་གི་ཤར་ཨེ་ཤི་ཡ་དང་དཔལ་འབྱོར་ལས་དོན་ཚན་པའི་འགན་འཛིན་ལྕམ་སྐུ་ལོ་ར་སི་ཊོན་ Ms. Laura Stone མཆོག་གིས་དུས་སྟོན་སྐབས་ལྷན་འཛོམས་བྱུང་བའི་ཕྱི་ནང་སྐུ་མགྲོན་ཡོངས་ལ་བོད་ཀྱི་ལོ་གསར་གྱི་འཚམས་འདྲི་གནང་བ་དང་སྦྲགས། འཚེ་མེད་ཞི་བའི་ལྟ་གྲུབ་ལ་གཞི་བཅོལ་བའི་བོད་མིའི་ཆོས་དང་རིག་གཞུང་གི་རིན་ཐང་ལ་ཨ་རིའི་གཞུང་གིས་རྒྱབ་སྐྱོར་དང་ཆེ་མཐོང་ཧ་ཅང་ཞུ་བཞིན་ཡོད་སྐོར་སོགས་གསུངས།
ཕྱོགས་མཚུངས་ཨ་རིའི་བོད་སྐད་རླུང་འཕྲིན་ཁང་གི་འཛན་འཛིན་བློ་བཟང་རྒྱ་མཚོ་ལགས་ཀྱིས་བོད་མི་ཚོས་ལོ་གསར་སྲུང་བརྩི་ཞུ་རྒྱུའི་སྲོལ་རྒྱུན་གྱི་ལམ་ལུགས་རྣམས་ཞིབ་ཕྲ་ངོ་སྤྲོད་གནང་བ་མ་ཟད། བྱང་ཨ་རིའི་ས་གནས་བོད་རིགས་སྤྱི་མཐུན་ཚོགས་པའི་ཚོགས་གཙོ་ནམ་མཁའ་བསྟན་འཛིན་ལགས་ཀྱིས་སྐུ་མགྲོན་ཡོངས་ལ་འཚམས་འདྲི་དང་སྦྲགས་ཨ་རིའི་ཕྱི་སྲིད་ལས་ཁུངས་ལ་བོད་ཀྱི་ལོ་གསར་སྲུང་བརྩི་གནང་བར་ཐུགས་རྗེ་ཆེ་ཞུའི་གསུང་བཤད་གནང་།
དེ་ཡང་ཨ་རིའི་ཕྱི་སྲིད་ལས་ཁུངས་ཀྱི་གཞུང་འབྲེལ་ཐོག་ནས་བོད་ཀྱི་ལོ་གསར་སྲུང་བརྩི་ཞུ་བ་ཐེངས་གསུམ་པ་ཆགས་ཡོད། མཛད་སྒོ་སྲུང་བརྩི་ཞུ་སྐབས་བོད་ཀྱི་སྲོལ་རྒྱུན་གྱི་གཞས་སྣ་འཁྲབ་སྟོན་དང་། ཕྱེ་མར་ཆང་ཕུད། གསོལ་ཇ་འབྲས་སིལ་སོགས་འདེགས་འབུལ་ཞུས་ཡོད་པ་བཅས།།
