༢༠༡༧ ཟླ་ ༣ ཚེས་ ༤ རེས་གཟའ་སྤེན་པ།

སྲིད་སྐྱོང་མཆོག་དང་བོད་རྒྱལ་ཡོངས་རྩེད་རིགས་ཚོགས་པའི་ཁོངས་སུ་གཏོགས་པའི་བུད་མེད་རྐང་རྩེད་སྤོ་ལོའི་རུ་ཁག

༄༅། །ཉེ་ལམ་བོད་པའི་བུད་མེད་རྐང་རྩེད་སྤོ་ལོའི་རུ་ཁག  ཅེས་པ་དེར་ཨ་རིའི་ནང་བསྐྱོད་རྒྱུའི་མཐོང་མཆན་མ་སྤྲད་པ་རེད། དེ་ཡང་བོད་པའི་བུད་མེད་རྐང་རྩེད་སྤོ་ལོའི་རུ་ཁག་  Tibetan Women’s Soccer Team ཅེས་པའི་རྩེད་འགྲན་པ་རྣམས་ཨ་རིའི་ཊེག་ས་སི་ Texas  མངའ་སྡེའི་གྲོང་ཁྱེར་ཌལ་ལ་སིའི་ Dallas  ནང་རྩེད་འགྲན་ཆེད་བསྐྱོད་རྒྱུར། ལྡི་ལིར་རྟེན་གཞི་བྱས་པའི་ཨ་རིའི་གཞུང་ཚབ་ཁང་ནས་མཐོང་མཆན་ཞུས་ཀྱང་མཐོང་མཆན་མ་སྤྲད་པའི་གནས་ཚུལ་བྱུང་སྟབས།  བོད་རྒྱལ་ཡོངས་རྩེད་རིགས་ཚོགས་པའི་  Tibetan National Sports Association འཛིན་སྐྱོང་དྲུང་ཆེའི་མཚན་ཐོག་ནས་གསལ་བཤད་སྤེལ་བའི་ནང་འཁོད་དོན།

བོད་རྒྱལ་ཡོངས་རྩེད་རིགས་ཚོགས་པ་ནི་རྒྱ་གར་གཞུང་ལ་དེབ་སྐྱེལ་བྱས་པའི་ Indian Societies Act XXI, 1860 གཞུང་འབྲེལ་མིན་པའི་ཁེ་མེད་ཚོགས་པ་ཞིག་ཡིན་ཞིང་།  ཚོགས་པ་དེས་བཙན་བྱོལ་བོད་མིའི་གཞོན་སྐྱེས་ཁྲོད་རྩེད་རིགས་ཀྱི་ནུས་པ་གོང་སྤེལ་གཏོང་རྒྱུ་དང་།  རྒྱལ་ནང་དང་རྒྱལ་སྤྱིའི་ཁྱོན་དུ་བོད་མིའི་ངོ་བོ་མཚོན་ཐབས་བྱེད་བཞིན་ཡོད་པ་མ་ཟད། བོད་མིའི་སྒྲིག་འཛུགས་ཀྱིས་ངོས་འཛིན་གནང་བཞིན་པའི་བོད་པའི་རྩེད་རིགས་ཚོགས་པ་ཁོ་ན་དེ་ཡིན་པ་མ་ཟད།  བོད་རྒྱལ་ཡོངས་རྩེད་རིགས་ཚོགས་པ་ནི། འགན་འཛིན་ལྷན་ཚོགས་དང་འཛིན་སྐྱོང་གི་ཚོགས་མི་ཆེད་མངགས་ཟུར་འཛུགས་ཡོད་པའི་སྒྲིག་འཛུགས་ཤིག་ཆགས་ཡོད།

འོན་ཀྱང་ཀེ་སི་ཅེལ་ཌེ་སིས་ Cassie Childres  གསར་འཛུགས་བྱས་པའི།  བོད་པའི་བུད་མེད་རྐང་རྩེད་སྤོ་ལོའི་རུ་ཁག   Tibetan Women’s Soccer Team ཟེར་བ་དེ་ནི་བོད་རྒྱལ་ཡོངས་རྩེད་རིགས་ཚོགས་པའི་ཁོངས་སུ་གཏོགས་མེད་ཅིང་།  བོད་རྒྱལ་ཡོངས་རྩེད་རིགས་ཚོགས་པའི་ནང་བུད་མེད་རྐང་རྩེད་སྤོ་ལོའི་རུ་ཁག་ཅིག་ཟུར་དུ་ཡོད།  ཅེས་སོགས་འཁོད་འདུག །