༢༠༡༧ ཟླ་ ༢ ཚེས་ ༢༤ རེས་གཟའ་པ་སངས།

༄༅། །ཕྱི་ལོ་ ༢༠༡༧ ཟླ་ ༢ ཚེས་ ༢༤ རེས་གཟའ་པ་སངས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བོད་རྒྱལ་ལོ་ ༢༡༤༤ རབ་གནས་མེ་བྱ་ལོའི་གནམ་ལོ་གསར་དུ་བཞད་པའི་མཚམས་འདིར།  གཞིས་བྱེས་བོད་མི་གཙོ་བོར་གྱུར་བའི་རྒྱ་གར་གཞུང་མང་གཉིས་དང་བོད་དོན་རྒྱབ་སྐྱོར་བ་སོགས་ལ་འཚམས་འདྲི་གནང་དོན།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བོད་ཀྱི་ཆོས་བརྒྱུད་ཆེན་པོ་བཞི་གཡུང་དྲུང་བོན་དང་བཅས་པའི་བསྟན་བདག་བླ་ཆེན་རྣམ་པ། གཞིས་བྱེས་གཉིས་སུ་གནས་པའི་བོད་རིགས་སྤུན་ཟླ་རྣམ་པ། རྒྱ་གར་གཞུང་མང་གཉིས་དང་ཕྱི་རྒྱལ་ཡུལ་གྲུ་ཁག་ལ་ཡོད་པའི་བོད་རིགས་གྲོགས་པོ་གྲོགས་མོ་བཅས་ལ་བཀའ་ཤག་དང་སྲིད་སྐྱོང་སྒེར་གྱི་ངོས་ནས།  བོད་རྒྱལ་ལོ་ ༢༡༤༤ རབ་གནས་མེ་བྱ་ལོའི་གནམ་ལོ་གསར་དུ་བཞད་པའི་དགའ་སྟོན་ལ་འཚམས་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན།

ལོ་གསར་པ་འདི་ཡག་པོ་ཞིག་ཡོང་བའི་རྟེན་འབྲེལ་ཆེད་ལོ་གསར་སྐབས་ཚང་མས་དགའ་དགའ་དགའ་སྤྲོ་སྤྲོ་གནང་དགོས་པ་གལ་ཆེན་པོ་ཡིན་ཞིང་།    ཕྱོགས་མཚུངས་ལོ་གསར་པ་འདིའི་ནང་ང་ཚོས་རེ་བ་དང་ཡིད་ཆེས་གསར་པ་ཞིག་གི་ཐོག་ནས་གོམ་པ་མདུན་སྤོ་བྱེད་དགོས་རྒྱུའང་ཧ་ཅང་གལ་ཆེ།

བོད་མིའི་ཆོས་དང་རིག་གཞུང་ལ་གཞི་འཛིན་པའི་བོད་མིའི་ཡ་རབས་བཟང་སྤྱོད་ཀྱི་གོམས་གཤིས་བཟང་པོ་འདི་ཉིད་མི་ཉམས་གོང་འཕེལ་ཡོང་བ་བྱ་རྒྱུ་ནི་དེ་བས་གལ་ཆེ། ཞེས་ཞུ་རྒྱུ་དང་།   དེ་བཞིན་བོད་ནང་གི་གནས་སྟངས་ཛ་དྲག་ཆགས་ཡོད་པ་འདི་ཚང་མས་ཡིད་ལ་བཅང་ཞིང་སྙིང་སྟོབས་གོང་ནས་གོང་དུ་འཕེལ་ཏེ།  བོད་མིའི་བདེན་པའི་འཐབ་རྩོད་ལ་མུ་མཐུད་སྐུ་ལས་བསྐྱོན་རྒྱུ་ཡིན།  ཞེས་སེམས་ནང་ཆོད་སེམས་བརྟན་པོ་བཟུང་དགོས་རྒྱུ་ཤིན་ཏུ་གལ་ཆེ།

འདི་ལོར་བོད་མིའི་སྒྲིག་འཛུགས་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ བཀའ་དབང་སྩལ་བ་ལྟར་ང་ཚོས་དུས་འཁོར་དབང་ཆེན་ཞུ་རྒྱུ་བྱུང་བ་མ་ཟད།  དུས་འཁོར་དབང་ཆེན་སྐབས་ལས་དོན་ཆ་ཚང་གྲ་སྒྲིག་པོ་བྱུང་བ་དང་།  

ལྷག་པར་མགོན་པོ་གང་ཉིད་མཆོག་དགུང་ལོ་བརྒྱ་ལྷག་༸སྐུ་འཚོ་བཞུགས་མཛད་རྒྱུའི་བཀའ་བཞེས་བཟང་པོ་ཐོབ་པ་ནི་ཧ་ཅང་སྐལ་བ་བཟང་པོ་ཞིག་དང་རྩ་ཆེན་པོ་ཞིག་ཡིན་པ་མ་ཟད།   ང་ཚོས་༸གོང་ས་མཆོག་གིས་ད་བར་བཀའ་སློབ་ལམ་སྟོན་ཕེབས་པ་དེ་དག་ཡིད་ལ་བཅང་ནས་ལག་བསྟར་དོན་འཁོལ་ཐུབ་པ་ཞིག་བྱུང་བ་ཡིན་ན།  བོད་སྤྱི་མཐུན་གྱི་བསོད་ནམས་གསོག་རྒྱུ་དང་།  སྤྱི་མཐུན་བསོད་ནམས་གོང་འཕེལ་བྱུང་ན་བོད་མིའི་སྤྱི་ཚོགས་ཙམ་མ་ཟད།  བོད་མིའི་བདེན་པའི་འཐབ་རྩོད་ལའང་ཕན་རྒྱུ་ཡིན་པ་ཚང་མས་མཁྱེན་པ་གནང་རོགས་ཞེས་ཞུ་རྒྱུ་དང་། 

  མཐའ་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེ་ཡུན་རིང་བརྟན་ཅིང་གཞིས་བྱེས་བོད་མི་རྣམས་མཉམ་འཛོམས་ཀྱི་སྐལ་བཟང་གི་ཉིན་མོ་དེ་ཡང་མགྱོགས་ནས་མྱུར་དུ་འཆར་བའི་སྨོན་མདུན་ཞུ་བ་དང་སྦྲགས།  སླར་ཡང་ཚང་མར་ལོ་གསར་པ་འདིའི་ནང་བྱ་བ་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན། ཞེས་གསུངས།།