༢༠༡༧ ཟླ་ ༢ ཚེས་ ༢༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༧ ཟླ་ ༢ ཚེས་ ༢༣ རེས་གཟའ་ཕུར་བུ་ཉིན་གྱི་ཕྱེད་ཡོལ་ཆུ་ཚོད་ ༣ ཡོལ་ཙམ་ལ་རྡ་ས་གངས་སྐྱིད་དུ་རྟེན་གཞི་བྱས་པའི་བོད་ཀྱི་དཔེ་མཛོད་ཁང་གི་ཚོགས་ཁང་དུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྡོར་གླིང་དུ་བཅའ་བཞུགས་སྨན་པ་ཚེ་དབང་ཡེ་ཤེས་སྤེན་པ་ལགས་དམ་པས་ཨིན་སྐད་ཐོག་བརྩམས་པའི། བྱ་དེ་ཁྲུང་ཁྲུང་དཀར་མོ། ཤོག་རྩལ་ང་ལ་གཡར་དང་། White Crane,Lend me your wings ཞེས་པའི་དཔེ་དབུ་འབྱེད་གནང་ཡོད།
དེ་ཡང་སྐབས་དེར་དམ་པ་ཁོང་གི་བུ་མོ་ལྷ་མོ་སྤེན་པ་ལགས་དང་། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས། རྒྱ་གར་གྱི་སྙན་ངག་པ་དང་ཤེས་ཡོན་ཁེ་ལས་པ་ཤེ་ལི་བྷོ་ཡེལ་ Shelly Bhoil ལགས། བོད་མི་རྩོམ་པ་པོ་བུ་ཆུང་ལྡུམ་རྭ་ལགས་ཀྱིས་གཙོས་དོན་གཉེར་ཅན་ཁག་གཅིག་ལྷན་འཛོམས་གནང་འདུག ཐོག་མར་སྣང་གསལ་ཞལ་ཕྱེ་གནང་བསྟུན་སྲིད་སྐྱོང་མཆོག་གིས་སྨན་པ་དམ་པ་ཁོང་དེ་སྔ་རྒྱ་གར་རྡོར་གླིང་ཁུལ་དུ་བོད་མི་གཙོ་བོར་གྱུར་བའི་ས་གནས་ཡུལ་མི་སོགས་ལ་སྨན་བཅོས་ཐོག་ཞབས་འདེགས་རྒྱ་ཆེ་ཞུས་མྱོང་ཡོད་པ་ཙམ་དུ་མ་ཟད། ཕྱི་ནང་ཡུལ་མི་ཀུན་གྱིས་ཁོང་གི་སྤྱོད་ཚུལ་ཞི་དུལ་བག་དང་ལྡན་ཞིང་། བྱམས་བརྩེ་ཆེན་པོ་སྐྱེ་བོ་མཆོག་དམན་ཀུན་ལ་གཟིགས་རྟོག་གཅིག་མཚུངས་གནང་བར་བརྟེན་ཀུན་གྱིས་དགའ་མོས་དང་བརྩི་བཀུར་ཧ་ཅང་ཞུ་ཡུལ་ཞིག་ཡིན་སྐོར་སོགས་ངོ་སྤྲོད་གནང་བསྟུན་དཔེ་དེབ་དབུ་འབྱེད་གནང་འདུག
དེ་ཡང་སྨན་པ་ཚེ་དབང་ཡེ་ཤེས་སྤེན་པ་ལགས་ནི་ཕྱི་ལོ་ ༡༩༣༢ ལོར་རྒྱང་རྩེར་འཁྲུངས་ཤིང་། ཕྱི་ལོ་ ༢༠༡༡ ཕྱི་ཟླ་ ༡༡ ཚེས་ ༢༦ ཉིན་སྐུ་གྲོངས་འདུག ཁོང་གིས་ཐོག་མར་རྒྱ་གར་ནང་དུ་སློབ་གཉེར་གནང་རྗེས་ཨིན་ཡུལ་རྒྱལ་ས་ལོན་ཌོན་གཙུག་ལག་སློབ་ཆེན་དུ་ཕེབས་ནས་ཕྱི་ལུགས་གཤག་བཅོས་རབ་འབྱམས་པ་ MBBS ཞེས་པའི་བསླབ་པ་མཐར་སོན་གནང་བ་མ་ཟད། ལོན་ཌོན་གཙུག་ལག་སློབ་ཆེན་གྱི་གཤག་བཅོས་ཚན་པས་ཁོང་ལ་ Hallet Prize ཞེས་པའི་གཟེངས་རྟགས་ཤིག་ཀྱང་ཐོབ་མྱོང་ཡོད་འདུག
ཚེ་དབང་ཡེ་ཤེས་སྤེན་པ་ལགས་དམ་པ་ཁོང་གིས་དེ་སྔ་ཨིན་ཡིག་ནང་ཕྱག་དེབ་གཉིས་བྲིས་གནང་འདུག་ཅིང་། ཕྱི་ལོ་ ༡༩༥༧ ལོར་ཁོང་གི་མི་ཚེའི་ལོ་རྒྱུས་ཀྱི་དཔེ་དེབ་ Young Days in Tibet ཞེས་པ་དང་། ༡༩༦༦ ལོར་སྒྲུང་དེབ་ Idols on the Path ཞེས་པ་བྲིས་ཡོད་འདུག་པ་བཅས།།
