༢༠༡༧ ཟླ་ ༢ ཚེས་ ༢༣ རེས་གཟའ་ཕུར་བུ།

༄༅། །ཕྱི་ལོ་ ༢༠༡༧ ཟླ་ ༢ ཚེས་ ༡༨ ཉིན་ལྷོ་ཨ་ཕི་རི་ཀའི་སྐུ་ཚབ་དོན་གཅོད་ཁང་དང་སྲང་ལམ་སློབ་གྲྭ་ Streetschool ཞེས་པ་གཉིས་ཐུན་མོང་ཐོག  ཡུལ་དེའི་གྲོང་ཁྱེར་ཇོ་ཧ་ན་སི་བྷག་ Johannesburg ཏུ་རྟེན་གཞི་བྱས་པའི་པྲོ་ཊི་ཝན་ཌ་རར་ Protea Wanderer Hotel ཞེས་པའི་གསོལ་མགྲོན་ཁང་དུ་སློབ་ཕྲུག་དང་ཕ་མ། དེ་བཞིན་དོན་གཉེར་ཅན་ཁག་གཅིག་བཅས་ཁྱོན་མི་གྲངས་ ༥༠ བརྒལ་བར།  ངོ་སྤྲོད་ཀྱི་ལས་རིམ། ཞེས་པའི་མཛད་སྒོ་ཞིག་གོ་སྒྲིག་གནང་འདུག

སྐབས་དེར་ཐོག་མར་ཤེས་ཡོན་བརྗེ་ལེན་ལས་འཆར་བཀོད་སྒྲིག་པ་དང་།  སྤྱི་ཚོགས་ཡར་རྒྱས་ལས་གཞིའི་ཁེ་ལས་པ་སྐུ་ཞབས་ཀ་ལ་སི་ཝེ་སེལ་སི་ Mr. Klasie Wessels ལགས་ཀྱིས་ཚོགས་བཅར་བ་རྣམས་ལ་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ངོ་སྤྲོད་གནང་བ་དང་སྦྲགས།  སྤྱིར་འཛམ་གླིང་ནང་ཚོགས་སྡེ་ཁག་མང་པོ་ཞིག་དཀའ་ངལ་ཧ་ཅང་ཆེ་བའི་གནས་སྟངས་འོག་གནས་བཞིན་ཡོད་སྟབས།  དེ་དག་ལ་ང་ཚོས་ངེས་པར་དུ་དོ་སྣང་བྱེད་དགོས་པ་ཞིག་ཆགས་ཡོད་ཀྱང་།  ང་ཚོས་ཆེད་མངགས་བོད་མི་ཚོར་རྒྱབ་སྐྱོར་བྱེད་དགོས་པའི་རྒྱུ་མཚན་ནི།

བོད་མི་རྣམས་ཀྱིས་རྒྱ་ནག་དམར་པོའི་དབང་སྒྱུར་འོག  དམ་བསྒྲགས་དང་མནར་གཅོད་སོགས་དཀའ་སྡུག་བཟོད་ཐབས་བྲལ་བ་ཞིག་མྱངས་ཡོད་ཀྱང་།  ཁོང་ཚོས་རྒྱ་མི་རིགས་ལ་ཞེ་འཁོན་དང་སྡང་ཟུག་མེད་པའི་ཐོག  མི་ལོ་ ༦༠  ཙམ་གྱི་རིང་འཚེ་མེད་ཞི་བའི་ཐབས་ལམ་ལ་གཞི་བཅོལ་ནས་རང་གི་མངོན་འདོད་བསྒྲུབ་ཐབས་བྱེད་བཞིན་ཡོད་སྟབས།  ང་ཚོའི་བློ་གསལ་གཞོན་སྐྱེས་ཚོས་བོད་མིའི་ཉམས་མྱོང་ནས་བློ་སྐྱེད་མང་པོ་ཞིག་བླང་ཐུབ་རྒྱུ་རེད།

ཅེས་ངོ་སྤྲོད་གྲུབ་མཚམས་སྐུ་ཚབ་དོན་གཅོད་དངོས་གྲུབ་རྡོ་རྗེས། བཙན་བྱོལ་བོད་མིའི་སྤྱི་ཚོགས་དང་།  ད་ལྟའི་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཚེའི་རླབས་ཆེན་གྱི་མཛད་ཁུར་གཙོ་བོ་གསུམ་དང་།   མགོན་པོ་གང་ཉིད་མཆོག་གི་ཐུགས་བསྐྱེད་དམ་བཅའ་གསུམ་དེས་འགྲོ་བ་མི་རིགས་སྤྱི་ཡོངས་ལ་གལ་གནད་ཇི་ཙམ་ཆེ་མིན་སྐོར་སོགས་བརྗོད་གཞི་གསུམ་གྱི་ཐོག་གསུང་བཤད་གནང་།

སྐབས་དེར་གཞོན་སྐྱེས་བཞིས་ཤེས་ཡོན་བརྗེ་ལེན་ལས་གཞིའི་ཁོངས་དེ་སྔ་རྡ་སར་བསྐྱོད་པའི་ཉམས་མྱོང་སྐོར་རང་གི་ཚོར་བ་དང་སྦྱར་ནས་གསུང་སྐབས།  ཁོང་ཚོ་རྡ་སར་ཕྱིན་ནས་བོད་མིའི་གནས་སྟངས་དངོས་སུ་མཐོང་ཐོས་མྱོང་གསུམ་ལ་བརྟེན་ནས་བོད་མི་ཚོར་དཀའ་ངལ་ཅན་གྱི་གནས་སྟངས་ཧ་ཅང་ཡོད་བཞིན་དུ།  རེ་ཐག་མ་ཆད་པར་སྔ་ཕྱི་མ་གཏོགས་རང་ཡུལ་དུ་བདེན་པའི་ཉི་མ་འཆར་རྒྱུའི་རེ་བ་དང་མངོན་འདོད་དེ་དག་ཤེས་རྟོགས་ཐུབ་པ་སོགས་ཕན་ཡོན་རྒྱ་ཆེ་བྱུང་སྐོར་གསུངས།།