༢༠༡༧ ཟླ་ ༢ ཚེས་ ༢༢ རེས་གཟའ་ལྷག་པ།

༄༅། །ཕྱི་ལོ་ ༢༠༡༧ ཟླ་ ༢ ཚེས་ ༢༢ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཆབ་སྲིད་བཙོན་ཟུར་རྣམས་ཀྱི་སྡོད་ཁང་དཀའ་སེལ་སླད་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས་འགན་ཁུར་རྐང་བཞེས་ཀྱིས་ཨི་ཊ་ལི་ཝི་མ་ལ་རོགས་ཚོགས་ནས་དཔལ་འབྱོར་གྱི་མཐུན་འགྱུར་རོགས་རམ་འོག་རྡ་ས་མེག་གྷན་དུ་གྲུ་འཛིན་དགའ་ཚལ་གླིང་ཞེས་ཆབ་སྲིད་བཙོན་ཟུར་རྣམས་ཀྱི་ཆེད་སྡོད་ཁང་གྲངས་ ༡༡ དང་། དེ་བཞིན་རྡ་ས་བོད་མིའི་ས་གནས་འགོ་འཛིན་ལས་ཁུངས་ཀྱི་ལས་བྱེད་ཆེད་ལས་ཤག་གྲངས་ ༥ བཅས་ཁྱོན་སྡོད་ཁང་གྲངས་ ༡༦ གསར་རྒྱག་གི་ལས་གཞི་ལེགས་གྲུབ་ཀྱིས་དབུ་འབྱེད་གནང་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༣༠ ཐོག་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་དང་།   ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག དཔལ་འབྱོར་བཀའ་བློན་ཀརྨ་ཡེ་ཤེས་མཆོག   བདེ་སྲུང་བཀའ་བློན་བླ་བྲང་འཕགས་པ་ཚེ་རིང་མཆོག ལྷན་ཁང་ཁག་གི་དྲུང་ཆེ་དང་དྲུང་ཚབ་རྣམ་པ། རྡ་ས་ས་གནས་འགོ་འཛིན་ལས་ཁུངས་ཀྱི་ལས་བྱེད་རྣམ་པ།  ས་གནས་འཐུས་ཚོགས་དང་རང་བདེན་ཚོགས་ཆུང་གི་ཚོགས་གཙོ།   སྡོད་ཁང་ནང་བཞུགས་ཆབ་སྲིད་བཙོན་ཟུར་རྣམ་པ།   ཕྱི་ནང་གི་གསར་འགོད་པ་སོགས་ལྷན་འཛོམས་ཀྱིས་ཐོག་མར། སྐུ་མགྲོན་གཅོ་བོ་དཔལ་ལྡན་སྲིད་སྐྱོང་མཆོག་གིས་གྲུ་བཞིན་དགའ་ཚལ་སྡོད་ཁང་དབུ་འབྱེད་གནང་རྗེས་སྡོད་ཁང་ཁག་ལ་གཟིགས་ཞིབ་གནང་།

དེ་ནས་སྐུ་མགྲོན་གཙོ་བོ་མཆོག་དང་ཝི་མ་ལ་རོགས་ཚོགས་ཀྱི་གཙོ་འཛིན་རྣམ་གཉིས་ནས་སྣང་གསལ་ཞལ་ཕྱེ་དང་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་ཞུས། དེ་རྗེས་སྐུ་མགྲོན་རྣམ་པ་དང་མང་ཚོགས་ལ་རྟེན་འབྲེལ་མཚོན་ཆེད་གསོལ་ཇ་འབྲས་སིལ་ཕུལ་གྲུབ་བསྟུན། ནང་སྲིད་དྲུང་ཚབ་ཀྱིས་ཚབ་སྲིད་བཙོན་ཟུར་རྣམ་པའི་སྡོད་ཁང་གསར་རྒྱག་གི་ལས་གཞི་དང་འབྲེལ་བའི་ངོ་སྤྲོད་གསུང་བཤད་གནང་དོན།

རྡ་ས་བོད་ཁྱིམ་གྱི་བདག་དབང་དུ་ཡོད་པའི་ས་ཆ་རྒྱ་ཁྱོན་ཕི་ཀྲི་གྲུ་བཞི་མ་  ༨༠༨༥ ཐོག་རང་རིགས་བྱིས་གཞོན་རྣམས་ཀྱི་ཆེད་བྱིས་པའི་རྩེད་བྱས་ཆ་རྐྱེན་དང་སིལ་སྤོལ་རྩེད་ཐང་བཅས་ཆེད་བསྐྲུན་གྱིས་སྒྲོམ་གཞི་དེ་དག་བོད་ཁྱིམ་ནས་རྡ་ས་ས་གནས་འགོ་འཛིན་ལས་ཁུངས་ལ་འགན་དབང་རྩིས་སྤྲོད་གནང་ཡོད། ཕྱིས་སུ་ཐོག་མའི་དམིགས་ཡུལ་ཇི་བཞིན་རྩེད་བྱས་དང་སིལ་སྤོལ་རྩེད་ཐང་བེད་སྤྱོད་བྱེད་མཁན་ཧ་ལམ་མེད་པའི་གནས་སྟངས་འོག་ས་ཆ་དེར་ན་གཞོན་བར་ལྡིང་འཁྱམ་ཉུལ་བ་རྣམས་འདུ་འཛོམས་ཀྱིས་ཆང་འཐུང་བག་མེད་སྐད་ཅོར་གྱིས་ཉེ་འཁོར་ཁྱིམ་མཚེས་དང་།

ལྷག་པར་བཙུན་དགོན་ལ་སུན་གཙེར་ཡོང་བཞིན་ཡོད་པར་བརྟེན། ནང་སྲིད་ལས་ཁུངས་ནས་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བཞེད་ལྟར་བོད་ནང་རྒྱ་ནག་གཞུང་གི་སྡུག་རྩུབ་དབང་བསྒྱུར་འོག་བོད་མི་རིགས་ཀྱི་དོན་དུ་རང་སྲོག་ཚུན་བློས་བཏང་སྟེ་རྩ་དོན་ལས་འགུལ་ནང་བྱས་རྗེས་ཅན་གྱི་ཆབ་སྲིད་བཙོན་ཟུར་བཙན་བྱོལ་དུ་འབྱོར་རིགས་རྣམས་ལ་བོད་མིའི་སྒྲིག་འཛུགས་ནས་ཨོ་སི་ཊོ་ལི་ཡར་གཞིས་སྤོ་བྱ་རྒྱུའི་ལས་གཞི་ལག་བསྟར་གནང་མུས་ཁོངས་སུ་རྒྱན་ཐོན་མ་བྱུང་བར་སྡོད་ཁྱིམ་མཁོ་སྦྱོར་ཇི་བཞིན་མ་ཐུབ་པའི་རིགས་དང་། ཕྱི་རྒྱལ་དུ་གཞིས་སྤོས་བྱེད་འདོད་མེད་པ། དེ་བཞིན་རྡ་ས་ས་གནས་འགོ་འཛིན་དང་ལས་བྱེད་རྣམས་ལའང་ལས་ཤག་མེད་པའི་དཀའ་ངལ་འཕྲད་མུས་དེ་དག་སེལ་ཐབས་སུ་བོད་ཁྱིམ་སྤྱི་ཁྱབ་ཡིག་ཚང་དང་བཀའ་བསྡུར་སྔ་རྗེས་བྱུང་བ་ལྟར་རྡ་ས་ས་གནས་འགོ་འཛིན་ལས་ཁུངས་ལ་འགན་དབང་གསོལ་རས་གནང་བའི་ས་ཆ་དེ་བཞིན་གོང་ཞུས་ལས་གཞིའི་ཆེད་བེད་སྤྱོད་ཆོག་རྒྱུར་བཀའ་འཁྲོལ་ཞུས་པ་ལྟར་བྱུང་ཡོད། 

འབྲེལ་ཡོད་གྲོང་སྡེ་ལས་ཁུངས་ནས་ཨར་ལས་ཆོག་མཆན་ཐོབ་མ་ཐག་ཕྱི་ལོ་ ༢༠༡༤ ཟླ་ ༡༠ ནང་ཨར་ལས་འགོ་འཛུགས་ཞུས་ཏེ་ཕྱི་ལོ་ ༢༠༡༦ ཟླ་ ༡ ནང་ལས་གཞི་མཇུག་སྒྲིལ་ཐུབ་པ་བྱུང་ཡོད། བཀའ་ཤག་ནས་ཆབ་སྲིད་བཙོན་ཟུར་རྣམས་ལ་སྡོད་ཁང་བགོ་སྤྲོད་དང་བེད་སྤྱོད་བྱ་ཕྱོགས་ཀྱི་རྩ་འཛིན་ལམ་སྟོན་ཡིག་ཆ་གཏན་འབེབས་གནང་བ་ལྟར་བདེ་སྲུང་ལས་ཁུངས་ནས་ཁྱབ་ཁོངས་སོ་སོར་གསལ་བསྒྲགས་གནང་བར་ཆབ་སྲིད་བཙོན་ཟུར་མི་གྲངས་ ༣༠ ནས་ཞུ་སྙན་ཕུལ་འབྱོར་བྱུང་ཡོད་རུང་། སྡོད་ཁང་བགོ་སྤྲོད་དང་བེད་སྤྱོད་བྱ་ཕྱོགས་ཀྱི་རྩ་འཛིན་ལམ་སྟོན་ཡིག་ཆ་གཏན་འབེབས་དགོངས་དོན་འོད་ཆོས་ལྡན་པ་མི་གྲངས་ ༡༡ ཐོན་པ་བཞིན་སྡོད་ཁང་གྲངས་ ༡༦ གསར་རྒྱག་ཞུས་པ་ནས་གོང་འཁོད་མི་གྲངས་ ༡༡ ལ་རྒྱན་རྒྱག་ལམ་ནས་ཕྱི་ལོ་ ༢༠༡༦ ཟླ་ ༩ ཚེས་ ༣ ཉིན་ཁུངས་སོ་སོར་བགོ་འགྲེམས་ཞུས་ཡོད།  འཕྲོས་སྡོད་ཁང་གྲངས་  ༥  རྡ་ས་བོད་མིའི་ས་གནས་འགོ་འཛིན་གྱི་ལས་བྱེད་རྣམས་ཀྱི་ལས་ཤག་ཆེད་རྩིས་སྤྲོད་ཞུས་ཡོད།  

སྤྱིར་སྡོད་ཁང་འདིའི་ཐོག་ཁང་པ་ཐོག་རྩེག་  ༤ འཁྱོགས་ནུས་པའི་རྩིག་རྨང་རྒྱབ་ཡོད་སྟབས། མ་འོངས་པར་དགོས་གལ་བྱུང་མཚམས་ད་ཡོད་སྡོད་ཁང་སྟེང་ཁང་པ་འཕར་མ་རྒྱག་རྒྱུའི་ཆ་རྐྱེན་ཡང་ཡོད།

ལས་གཞིའི་ཆེད་བོད་མིའི་སྒྲིག་འཛུགས་ཀྱི་དམིགས་བསལ་སྔོན་རྩིས་ནས་དགོས་དངུལ་སྒོར་འབུམ་ ༥༠ དང་ཨི་ཊ་ལི་ཝི་མ་ལ་རོགས་ཚོགས་ནས་རོགས་དངུལ་སྒོར་འབུམ་ ༡༢༦ མཐུན་འགྱུར་འོག་ནང་སྲིད་ལས་ཁུངས་ནས་འཛུགས་སྐྲུན་ཞུས་ཐུབ་པ་བྱུང་བར་རོགས་ཚོགས་ཀྱི་སྐུ་ཚབ་རྣམ་གཉིས་ལ་ནང་སྲིད་ལས་ཁུངས་ནས་སྙིང་ཐག་པ་ནས་བཀའ་དྲིན་བླ་མེད་དུ་ཆེ་ཞུ་རྒྱུ་ཡིན།   ཞེས་གསུང་བཤད་གནང་།    དེ་ནས་སྐུ་མགྲོན་གཙོ་བོ་མཆོག་གིས་གསུང་བཤད་དང་ཝི་མ་ལ་རོགས་ཚོགས་ཀྱི་སྐུ་ཚབ་རྣམ་གཉིས་ལ་ཐུགས་རྗེ་ལེགས་འབུལ་གྱི་ཕྱག་རྟགས་གནང་ཡོད་པ་བཅས།།