༢༠༡༧ ཟླ་ ༢ ཚེས་ ༢༢ རེས་གཟའ་ལྷག་པ།

འཇར་མན་འགྲོ་བ་མིའི་ཐོབ་ཐང་གི་ཆེས་མཐོའི་སྐུ་ཚབ་ཚོགས་ཆུང་གི་ཚོགས་གཙོ་སྐུ་ཞབས་བྷར་སྦེལ་ཀོབ་ལར་མཆོག་དང་ལྷན།

༄༅། །སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་དམ་པ་ཁོང་གི་ཚ་མོ་ཉི་མ་ལྷ་མོ་ལགས་དེང་སྐབས་ཡུ་རོབ་རྒྱལ་ཁབ་འཇར་མན་དང་ཅེག་སྤྱི་མཐུན་རྒྱལ་ཁབ། སུ་ཝི་ཌེན། ཌེན་མག  སི་པེན་བཅས་ཀྱི་ཕྱི་སྲིད་ལས་ཁུངས་ཀྱི་འབྲེལ་ཡོད་ལས་བྱེད་དང་གྲོས་ཚོགས་འཐུས་མི།  རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ། གསར་འགོད་པ། དེ་བཞིན་བོད་དོན་རྒྱབ་སྐྱོར་བ་བཅས་དང་ཐུག་འཕྲད་གནང་ནས། རིན་པོ་ཆེ་མཆོག་དོགས་གཞི་ཧ་ཅང་ཆེ་བའི་གནས་སྟངས་འོག་རྒྱའི་བཙོན་ཁང་དུ་གློ་བུར་དུ་སྐུ་གྲོངས་པ་དེར་ངེས་པར་དུ་དྲང་བདེན་ཐོག་ནས་རྒྱལ་སྤྱིའི་སྤྱི་ཚོགས་ཀྱིས་རྟོག་ཞིབ་གནང་ཆེད་འབོད་སྐུལ་ཞུ་གཏུག་གི་ལས་འགུལ་ཤུགས་ཆེ་སྤེལ་བཞིན་འདུག

ཀེ་ཏ་ལོ་ནི་ཡའི་ཕྱི་འབྲེལ་ལས་དོན་ལྷན་ཁང་གི་གཙོ་འཛིན་མཆོག་དང་ལྷན།

དེ་ཡང་འཇར་མན་འགྲོ་བ་མིའི་ཐོབ་ཐང་གི་ཆེས་མཐོའི་སྐུ་ཚབ་ཚོགས་ཆུང་གི་ཚོགས་གཙོ་སྐུ་ཞབས་བྷར་སྦེལ་ཀོབ་ལར་ Dr Barbel Kofler མཆོག་གིས་གསུང་དོན། ཉི་མ་ལྷ་མོ་ལགས་ཀྱི་སྙིང་སྟོབས་ལ་བསྔགས་བརྗོད་ཞུ་རྒྱུ་ཡིན། ཁོ་མོས་བོད་ནང་གི་བོད་མིའི་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པ་མིག་མཐོང་ལག་ཟིན་གྱི་དཔང་རྟགས་ར་སྤྲོད་གནང་ཐུབ་པ་འདི་ནི་ཧ་ཅང་གནད་འགག་ཆེན་པོ་ཞིག་ཡིན།

འཇར་མན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་ལྷན།

དེར་བརྟེན་དེ་རིང་ཉི་མ་ལྷ་མོ་ལགས་ཀྱི་གནས་ཚུལ་ལ་ཉན་རྒྱུའི་གོ་སྐབས་ཐོབ་པ་འདི་ང་རང་ལ་མཚོན་ན་ཆེ་མཐོང་ཐོབ་པའི་ཚོར་བ་ཞིག་བྱུང་།   ཞེས་གསུངས།

ཌེན་མག་རྒྱལ་སྤྱིའི་ཉེས་ཡངས་ཚོགས་པའི་སྤྱི་ཁྱབ་དྲུང་ཆེ་མཆོག་དང་ལྷན།

ཕྱོགས་མཚུངས་ཅེག་སྤྱི་མཐུན་རྒྱལ་ཁབ་ཀྱི་ཕྱི་སྲིད་ལས་ཁུངས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ཚན་པའི་འགན་འཛིན་སྐུ་ཞབས་ཌེ་ཝི་ཌི་ཀར་ཝེན་ཀ་ Mr David Cervenka མཆོག་གིས། འབྱུང་འགྱུར་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༣༤ འཚོགས་སྐབས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྤྱི་དང་ལྷག་པར་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞེན་ཇེ་སྡུག་ཏུ་འགྲོ་བཞིན་པའི་གནས་སྟངས་སྐོར་གླེང་སློང་བྱ་རྒྱུ་ཡིན། ཞེས་ཁས་ལེན་ཡང་གནང་འདུག

ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་འཐུས་མི་རྣམས་དང་ལྷན།

དེ་བཞིན་ཌེན་མག་གྲོས་ཚོགས་ཀྱི་ཕྱི་འབྲེལ་ལས་དོན་ལྷན་ཁང་གི་མགྲིན་ཚབ་པ་གུ་ཡངས་ཚོགས་པའི་ཚོགས་མི་སྐུ་ཞབས་མེ་ཁལ་ཨས་ཊབ་ཇེན་སེན་ Mr Michael Aastrup Jensen མཆོག་གིས་གསུང་དོན། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་ལ་གོད་ཆག་ཕོག་པ་དེ་ང་ཚོས་ནམ་ཡང་རྗེད་ཐབས་མེད། ད་རེས་རིན་པོ་ཆེ་མཆོག་གི་ཚ་མོའི་སྐད་ཆར་ཉན་སྐབས་བོད་ནང་གི་གནས་སྟངས་ཇི་འདྲ་ཞིག་ཡིན་པ་དྲན་གསོ་སློང་བ་ལྟ་བུ་བྱུང་། ཞེས་གསུངས།།