༄༅། །ཕྱི་ལོ་ ༢༠༡༧ ཟླ་ ༢ ཚེས་ ༡༠ ཉིན་གྱི་སྔ་དྲོ་ཆུ་ཚོད་ ༡༡ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ཨནྡྲ་པར་དེ་ཤི་ Andhra Pradesh མངའ་སྡེའི་གྲོང་ཁྱེར་ཨམྲ་ཝ་ཏི་ Amravati ཞེས་སྟོན་པ་བཅོམ་ལྡན་འདས་ཀྱིས་རིགས་ལྡན་རྒྱལ་པོ་ཆོས་རྒྱལ་ཟླ་བ་བཟང་པོས་གཙོས་འདུལ་བྱ་ཁག་གཅིག་ལ་དཔལ་དུས་ཀྱི་འཁོར་ལོའི་དབང་ཆེན་ཐོག་མར་སྩལ་ཡུལ་དུ་གྲགས་པ་དཔལ་ལྡན་འབྲས་སྤུངས་ཉེ་འགྲམ་དུ།  ཨནྡྲ་པར་དེ་ཤི་མངའ་སྡེའི་སྲིད་གཞུང་དང་གྲོས་ཚོགས་བཅས་ཀྱི་གོ་སྒྲིག་འོག་རྒྱ་གར་རྒྱལ་ཡོངས་བུད་མེད་ཀྱི་གྲོས་ཚོགས་ཕྱི་ལོ་ ༢༠༡༧ National Women’s Parliament 2017 ཞེས་ལོ་རྒྱུས་རང་བཞིན་ལྡན་པའི་ལྷན་ཚོགས་དབུ་འབྱེད་མཛད་འདུག

སྐབས་དེར་རྒྱ་གར་རྒྱལ་ཡོངས་ནས་མཉམ་ཞུགས་གནང་མཁན་བུད་མེད་ཁྲི་ཕྲག་བརྒལ་བ་བྱུང་འདུག་པ་དང་།  དེ་ཡང་སྐུ་མགྲོན་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་རྒྱ་གར་དབུས་གཞུང་གི་དྲིལ་བསྒྲགས་དང་གྲོང་སྡེ་ཡར་རྒྱས་ལྷན་ཁང་གི་བློན་ཆེན་སྐུ་ཞབས་ཝེན་ཀ་ཡ་ནེ་དུ་ M Venkaiah Naidu མཆོག  ཨནྡྲ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཅནྡྲ་བྷ་པུ་ནེ་རུ་ Chandrababu Naidu མཆོག  བྷང་ལ་དེ་ཤིའི་ Bangladesh གྲོས་ཚོགས་ཀྱི་ཚོགས་གཙོ་ལྕམ་སྐུ་ཤར་མིན་ཅོ་དེ་རི་ S Sharmin Chaudhury མཆོག་སོགས་ཕྱི་ནང་གི་གཞུང་འབྲེལ་དཔོན་རིགས་དང་གློག་བརྙན་འཁྲབ་སྟོན་པ་སོགས་ཕེབས་ཡོད། 

སྐབས་དེར་༸གོང་ས་མཆོག་གིས་བཀའ་སློབ་སྩལ་དོན། བུད་མེད་ནི་ཕུང་པོའི་གྲུབ་ཆའི་ཆ་ནས་བྱམས་བརྩེ་གོང་སྤེལ་གཏོང་རྒྱུའི་ནུས་པ་སྐྱེས་པ་ལས་ཤུགས་ཆེ་བ་ཡོད།  དེ་ནི་རང་བཞིན་ལྷན་སྐྱེད་ཡིན།   དེར་བརྟེན་དུས་རབས་ ༢༡ འགོ་སྟོད་འདིར་བུད་མེད་ཚོས་འགྲོ་བ་མིའི་གཞི་རྩའི་རིན་ཐང་བྱམས་པ་དང་བརྩེ་བ་སོགས་གོང་སྤེལ་གཏོང་རྒྱུའི་འགན་ཁུར་ཆེ་ཙམ་ལེན་དགོས།   ངོས་ཀྱི་མ་དམ་པར་མཚོན་ན། ཁོང་ཁྲོའི་རྣམ་འགྱུར་རྩ་བ་ནས་བསྟན་མྱོང་མེད།  དེར་བརྟེན་ངོས་ལ་བྱམས་བརྩེའི་ཉམས་ལེན་གྱི་ལམ་སྟོན་པ་ཐོག་མ་ངོས་ཀྱི་མ་དམ་པ་ཁོང་ཡིན།  ཞེས་སོགས་བཀའ་སློབ་སྩལ་བ་མ་ཟད།  མགོན་པོ་གང་ཉིད་མཆོག་གི་ཐུགས་སྐྱེད་དམ་བཅའ་གསུམ་གྱི་སྐོར་བཀའ་སློབ་སྩལ་དོན།

 འཛམ་གླིང་འདིའི་ནང་གི་མི་དུང་ཕྱུར་ ༧༠ ཡོད་པ་ཚང་མ་འགྲོ་བ་མི་ཡིན་པ་གཅིག་གྱུར་ཡིན་སྟབས།  ང་སྐྱོ་བོ་ཡིན། ངས་གང་ཡང་འཇོན་རྒྱུ་མ་རེད་བསམས་ནས་ནམ་ཡང་ཡིད་ཞུམ་མི་རུང་།   ཁྱེད་ཚོར་བྱམས་བརྩེ་གོང་སྤེལ་གཏོང་རྒྱུའི་ནུས་པ་ཁྱད་པར་བ་ཞིག་ཡོད་སྟབས་རང་ཉིད་ལ་ལྷན་སྐྱེས་སུ་ཡོན་ཏན་དེ་དག་ལྡན་པ་རྣམས་དྲན་གསོ་བཏང་ནས་རྒྱུད་བསྐུལ་ཐོག་ལས་རིགས་འདྲ་མིན་ནང་ཡོད་པ་རྣམས་ཀྱིས་ཧུར་བརྩོན་གནང་དགོས་རྒྱུ་ཧ་ཅང་གལ་ཆེན་པོ་རེད། ཅེས་སོགས་ཀྱི་བཀའ་སློབ་སྩལ།

དེ་ཡང་ཉིན་གསུམ་རིང་གི་བུད་མེད་ལྷན་ཚོགས་ཀྱི་ཚོགས་ ཆེན་སྐབས་བརྗོད་གཞི་གཙོ་བོ། བུད་མེད་ནུས་སྟོབས་གོང་སྤེལ་བཏང་བ་བརྒྱུད་མང་གཙོ་སྲ་བརྟན་ཡོང་ཐབས། ཞེས་པ་ཡིན་འདུག