༢༠༡༧ ཟླ་ ༢ ཚེས་ ༡༠ རེས་གཟའ་པ་སངས།
༄༅། །སྦར་སེལ་སྐུ་ཚབ་དོན་ཁང་གིས་གོ་སྒྲིག་འོག་ཡུ་རོབ་གྲོས་ཚོགས་ European Parliament སུ་ཆུད་ཚོད་གཉིས་ལྷག་རིང་༸རྒྱལ་བའི་ཡང་སྲིད་སྐོར་དང་འབྲེལ་བའི་གནད་དོན་ཁག་གཅིག་ཐོག་བགྲོ་གླེང་གནང་ཐུབ་པ་བྱུང་འདུག དེ་ཡང་ཏཱ་ལའི་བླ་མའི་༸སྐུའི་ཡང་སྲིད་ཀྱི་གནད་དོན་སྐོར་དེ་རྒྱ་ནག་ལ་གནད་འགག་ཆགས་དགོས་དོན་གང་ཡིན། ཞེས་པའི་བརྗོད་གཞིའི་ཐོག་བགྲོ་གླེང་ལྷན་ཚོགས་དེ་ཐོག་མར་སྐུ་ཞབས་ཐོ་མ་སི་མན་ Thomas Mann མཆོག་གིས་དབུ་འཛུགས་གནང་བ་དང་། གྲོས་ཚོགས་འཐུས་མི་སྐུ་ཞབས་པྲེ་ད་ Preda མཆོག་གིས་ལས་རིམ་གཙོ་སྐྱོང་གནང་འདུག་ཅིང་། གྲོས་ཚོགས་འཐུས་མི་ལྕམ་སྐུ་མོལ་ལི་སི་ཀོ་ཊི་ཀེ་ཏོ་ Molly Scott-Cato མཆོག་དང་། སྐུ་ཞབས་ལ་ཛ་ལོ་ཏོ་ཀ་སི་མཆོག་ Laszlo Tokes བཅས་ཀྱིས་བགྲོ་གླེང་ཐོག་མར་དབུ་འབྱེད་ཀྱི་གསུང་བཤད་གནང་སྐབས། ཚོར་ཤུགས་ཆེན་པོའི་ཐོག་ནས་བོད་དོན་རྒྱབ་སྐྱོར་གནང་བ་མ་ཟད། རྒྱ་ནག་གཞུང་གིས་ཆབ་སྲིད་ཀྱི་དགོས་མཁོར་དམིགས་ནས་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་རྩད་གཅོད་བྱེད་སྟངས་ཀྱི་ལམ་ལུགས་ལ་བརྩི་མེད་རྡོག་རོལ་བཏང་ནས་རང་སྣང་གང་དྲན་གྱི་བྱ་སྤྱོད་སྤེལ་བཞིན་པ་དེར་སྐྱོན་བརྗོད་ཤུགས་ཆེ་གནང་འདུག
ལྷག་པར་སྐུ་ཞབས་ས་བྷ་སོ་གོར་མཆོག་ Csaba Sogor གིས་རང་གི་རྒྱལ་ཁབ་ནང་དམར་པོའི་དབང་སྒྱུར་འོག་དཀའ་སྡུག་ཇི་ལྟར་མྱངས་ཚུལ་སྐོར་གསུངས་པ་དང་སྦྲགས། དམར་པོའི་རིང་ལུགས་ཀྱིས་བཙན་དབང་ཐོག་ནས་སློབ་གསོ་བརྒྱབ་པ་སོགས་ཆོས་ལ་སྡང་ཟུག་ཇི་ཙམ་བྱས་ཀྱང་ཆོས་ཉམ་དམས་སུ་གཏོང་ཐུབ་ཐབས་མེད་སྐོར་སོགས་གསུངས།
སྐབས་དེར་དྭགས་པོ་རིན་པོ་ཆེས་ཡང་སྲིད་ཀྱི་ལམ་ལུགས་ཐོག་མར་བོད་དུ་བྱུང་ཚུལ་དང་། ལམ་ལུགས་དེའི་འོག་སྐབས་རེ་སྐྱོན་གྱི་ཆ་ཡོད་ཀྱང་སྤྱི་ཡོངས་ནས་གཟིགས་ཚེ་དེས་སྤྱི་ཚོགས་ནང་ཕན་ཐོགས་ཆེན་པོ་བྱུང་ཡོད་སྐོར། བླ་སྤྲུལ་བྱེ་བྲག་པ་ཞིག་གི་ཡང་སྲིད་ཐག་གཅོད་བྱ་རྒྱུའི་དབང་ཚད་སུ་ལ་ལྡན་མིན། ལྷག་པར་ཏཱ་ལའི་བླ་མའི་ཡང་སྲིད་རྩད་གཅོད་ཞུ་སྟངས་ཀྱི་ལམ་ལུགས་དང་། ༸རྒྱལ་བའི་ཡང་སྲིད་ཀྱི་འོས་སྤྲུལ་ནང་བདམས་ཐོན་བྱུང་བ་རྣམས་ལ་ཡང་སྲིད་འཁྲུལ་བྲལ་གཏན་འབེབས་ཐག་གཅོད་བྱ་རྒྱུའི་ལམ་ལུགས་ཇི་ལྟར་ཡིན་པ་བཅས་ཀྱི་ཐོག་གསུང་བཤད་གནང་།
སྤྱིར་དྭགས་པོ་རིན་པོ་ཆེ་མཆོག་ནི་ཕྱི་ལོ་ ༡༩༦༠ ནང་རོག་ཕེལ་ལར་ཐེབས་རྩའི་སློབ་ཡོན་ Rockefeller Foundation ཐོག་ཕ་རན་སིར་ཕེབས་པ་དང་། དེ་རྗེས་པེ་རི་སི་ཌོ་ཕེན་མཐོ་སློབ་ Paris-Dauphine University ཏུ་བོད་ཀྱི་སྐད་ཡིག་དང་ལྟ་གྲུབ་སྐོར་ལོ་ངོ་ ༣༠ ཙམ་རིང་སློབ་ཁྲིད་གནང་མྱོང་ཡོད་འདུག
དེ་རྗེས་དེང་རབས་རྒྱ་ནག་སྤྱི་ཚོགས་སྐོར་གྱི་མཁས་པ་ལྕམ་མ་རི་ཡ་ཧོལ་ཛི་མན་ Ms Marie Holzman ལགས་ཀྱིས། རྒྱ་ནག་དམར་པོའི་ལམ་ལུགས་ནི་ཆོས་ལ་ཡིད་ཆེས་རྩ་བ་ནས་མི་བྱེད་མཁན་ཞིག་ཡིན་ཡང་བླ་སྤྲུལ་གྱི་ཡང་སྲིད་ཐོག་ཐེ་ཇུས་བྱེད་བཞིན་པ་ནི་ནང་འགལ་གྱི་སྤྱོད་ཚུལ་ཞིག་ཡིན་སྐོར་དང་། དེང་སྐབས་རྒྱ་ནག་ནང་དུ་ཡེ་ཤུའི་ཆོས་ལུགས་རྗེས་འབྲང་པ་ས་ཡ་ ༡༠ ཙམ་ཡོད་པ་དང་། ཁ་ཆེ་ས་ཡ་ ༢༠ ནས་ ༣༠ བར་ཡོད་པ། ནང་པ་ས་ཡ་ ༣༠༠ ཙམ་ཡོད་སྐོར་དང་། དཔལ་འབྱོར་གྱི་གནས་ཚད་ཧ་ཅང་ཚད་མཐོན་པོར་སོན་པ་གང་ཞིག་སྤྱི་ཚོགས་ནང་སྲིད་གཞུང་གི་དམ་བསྒྲགས་ཤུགས་ཆེན་པོ་བྱེད་སྐབས་མང་ཚོགས་རྣམས་ཀྱིས་སྲིད་གཞུང་ལ་སུན་སྣང་སྐྱེད་ནས་བློ་ཁ་ཆོས་ཕྱོགས་སུ་འགྱུར་བཞིན་ཡོད་སྐོར་དང་། རྒྱ་ནག་གཞུང་གིས་ཏཱ་ལའི་བླ་མའི་༸སྐུའི་ཡང་སྲིད་ཀྱི་གནད་དོན་ཐོག་ཚོར་ཤུགས་ཆེན་པོས་ཐེ་ཇུས་བྱེད་བཞིན་པའི་ཕུགས་འདུན་གཙོ་བོ་ནི་བོད་དབང་སྒྱུར་བྱ་རྒྱུ་དེ་ཡིན་སྐོར་སོགས་གསུངས།
ལྕམ་སྐུ་མ་རི་ཡ་ཧོལ་ཛི་མན་ལགས་ནི། དེང་རབས་རྒྱ་ནག་སྤྱི་ཚོགས་ཐོག་གི་མཁས་པ་ཡིན་ཞིང་། ཁོང་གིས་Paris 7 University ཞེས་པའི་མཐོ་སློབ་ཏུ་ལོ་ངོ་ཉི་ཤུའི་རིང་སློབ་ཁྲིད་གནང་མྱོང་ཡོད་པ་མ་ཟད། དུས་དེབ་ཁག་མང་པོའི་ནང་རྩོམ་ཡིག་སྤེལ་མཁན་ཞིག་ཡིན་པ་དང་། ལྷག་པར་རྒྱལ་སྤྱིའི་ཆབ་སྲིད་ཀྱི་དུས་དེབ་གྲགས་ཅན་ Politique Internationale ཞེས་པའི་ནང་ཁོང་གིས་རྩོམ་ཡིག་ཡང་ཡང་སྤེལ་བཞིན་ཡོད།
བགྲོ་གླེང་ལྷན་ཚོགས་ཀྱི་མཇུག་སྡོམ་གསུང་བཤད་སྦར་སེལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་གནང་། སྐབས་དེར་ཁོང་གིས་བླ་སྤྲུལ་ཡང་སྲིད་རྩད་འཚོལ་ལམ་ལུགས་འདི་ནི་བོད་བརྒྱུད་ནང་བསྟན་གྱི་ཐུན་མིན་རིག་གཞུང་ཞིག་ཡིན་པ་ལས་རྒྱ་ནག་གི་ལམ་སྲོལ་ཞིག་རྩ་བ་ནས་མིན་པ་དང་། ཕྱི་ལོ་ ༡༩༦༩ སྐབས་ནས་སྤྱི་ནོར་༸གོང་ས་ཏཱ་ལའི་བླ་མ་སྐུ་ཕྲེང་ ༡༤ ཆེན་པོ་མཆོག་གིས་འབྱུང་འགྱུར་ཏཱ་ལའི་བླ་མའི་བླ་བྲང་རྒྱུན་མཐུད་ནས་གནས་དང་མ་གནས་ཀྱི་མཐའ་མའི་ཐག་གཅོད་དེ་བོད་མི་མང་གིས་བྱེད་དགོས་པའི་བཀའ་སློབ་སྩལ་བ་མ་ཟད། ཉེ་ལམ་མགོན་པོ་གང་ཉིད་མཆོག་གིས་རྒྱ་གར་རྒྱལ་ས་ལྡི་ལིར་བཀའ་སློབ་དེ་སླར་ཡང་སྐྱར་ལྡབ་མཛད་པ་རྣམས་ལུང་འདྲེན་ཞུས།
ལྷག་པར་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས་སྐབས་དེར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༡ ཟླ་ ༩ ཚེས་ ༢༤ ཉིན་བོད་བརྒྱུད་ནང་བསྟན་གྱི་ཆོས་ལུགས་ཚོགས་ཆེན་ཐེངས་ ༡༡ ཐོག་འབྱུང་འགྱུར་མགོན་པོ་གང་ཉིད་མཆོག་དགུང་གྲངས་ ༩༠ གོ་གྲངས་སམ་༸རྒྱལ་བ་དགེ་འདུན་གྲུབ་ཀྱི་དགུང་གྲངས་ཙམ་དུ་ཕེབས་པའི་སྐབས་ཆོས་བརྒྱུད་ཀྱི་བླ་ཆེན་ཁག་དང༌། བོད་མིས་མཚོན་འབྲེལ་ཡོད་དད་ལྡན་མང་ཚོགས་ལ་གོ་བསྡུར་གྱིས་༸རྒྱལ་བ་སྐུ་ཕྲེང་རྒྱུན་མཐུད་དགོས་མིན་བསྐྱར་ཞིབ་དང༌། ཐག་གཅོད་མཛད་རྒྱུའི་འཆར་གཞི་ཡོད་ཅིང༌། གལ་ཏེ་༸རྒྱལ་བའི་ཡང་སྲིད་རྒྱུན་མཐུད་གནས་དགོས་ཀྱི་ཡོད་པ་དང༌། ༸སྐུ་ཕྲེང་༡༥ པའི་ཡང་སྲིད་ངོས་འཛིན་བྱ་དགོས་པའི་དུས་སྐབས་ཤིག་འཆར་ཚེ་དེའི་འགན་འཁུར་གཙོ་བོ་༸རྒྱལ་བའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་དང༌། ཁོང་ཚོས་བོད་བརྒྱུད་ནང་བསྟན་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང༌། ༸རྒྱལ་བ་སྐུ་ཕྲེང་ན་རིམ་དང་ལུས་དང་གྲིབ་མ་བཞིན་འགྲོགས་པའི་དམ་ལྡན་ཆོས་སྐྱོང་སྲུང་མ་ཁག་ལ་སྐབས་བསྟུན་ལམ་སྟོན་ཞུས་ཏེ། ཡང་སྲིད་རྩད་འཚོལ་སྔར་གྱི་ལམ་སྲོལ་ལྟར་བྱ་རྒྱུ་དང༌།
༸རྒྱལ་བ་རིན་པོ་ཆེའི་མཆོག་ནས་ཀྱང༌ལམ་སྲོལ་བྱེད་ཕྱོགས་དེ་དག་ལམ་སྟོན་ཁ་གསལ་བཀོད་པའི་ཡིག་ཆ་འཇོག་གནང་མཛད་དེ། དེ་ལྟར་ཚུལ་མཐུན་རྩད་གཅོད་ངོས་འཛིན་ཞུས་པའི་ཡང་སྲིད་ཞིག་ལས། སྲིད་དོན་གྱི་དགོས་མཁོ་ལ་བརྟེན་ནས་རྒྱ་ནག་གི་དབང་འཛིན་པས་མཚོན། སྲིད་དབང་འཛིན་པ་སུ་ཞིག་གིས་ཡང་སྲིད་འདེམས་སྒྲུག་བྱས་པ་བྱུང་ཚེ། དེ་ལ་སུས་ཀྱང་༸རྒྱལ་བའི་ཡང་སྲིད་དུ་ངོས་འཛིན་དང་དད་མོས་བྱེད་མི་དགོས་པའི་བཀའ་ཡིག་ཕེབས་པ་རྣམས་ལུང་འདྲེན་ཞུས།
ཐེངས་འདིར་བགྲོ་གླེང་ལྷན་ཚོགས་སྐབས་གྲོས་ཚོགས་འཐུས་མི་ ༧ ཕེབས་པ་དང་གྲོས་ཚོགས་འཐུས་མིའི་ཕྱག་རོགས་ཞུ་མཁན་མི་གྲངས་ ༡༥ དེ་བཞིན་གསར་འགོད་པ་དང་། ཆབ་སྲིད་མི་སྣ། གཞུང་འབྲེལ་མིན་པའི་ཚོགས་པ། བོད་དོན་རྒྱབ་སྐྱོར་བ། དེ་བཞིན་སྐུ་ཚབ་དོན་ཁང་གི་འབྲེལ་ཡོད་ལས་བྱེད་བཅས་ཕེབས་ཞུགས་གནང་འདུག
དེ་ཡང་བགྲོ་གླེང་གོ་སྒྲིག་ཆེད་མཉམ་རུབ་གནང་མཁན་ཡུ་རོབ་གྲོས་ཚོགས་ཀྱི་མི་མང་ ཚོགས་པ་ European Peoples Party དང་། སྤྱི་ཚོགས་རིང་ལུགས་དང་མང་གཙོ་ཚོགས་པ། Socialists and Democrats གུ་ཡངས་དང་མག་གཙོ་མནའ་འབྲེལ་ཚོགས་པ། Alliance of Liberals and Democrats for Europe དེ་བཞིན་ལྗང་ཁུ་ཚོགས་པ་ Greens/European Free Alliance བཅས་ཡིན་འདུག
