༢༠༡༠ ཟླ་ ༡༠ ཚེས་ ༡ རེས་གཟའ་པ་སངས།
༄༅། །ཕྱི་ལོ་ ༢༠༡༠ ཟླ་ ༩ ཚེས་ ༢༣ ནས་བདུན་གཅིག་རིང་ཉི་ཧོང་རྒྱལ་ས་ཊོཀ་ཁྱོའི་ནང་རྒྱལ་སྤྱིའི་པེན་ (PEN) རྩོམ་པ་པོའི་མཐུན་ཚོགས་ཀྱི་ལྷན་ཚོགས་སྐབས་རྒྱལ་ཁབ་ ༡༢༨ ནས་རྩོམ་པ་པོ་མི་གྲངས་ ༦༠༠ ཙམ་ཕེབས་འདུག སྐབས་དེར་རྡ་སར་རྟེན་གཞི་བྱས་པའི་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཞོན་རྩོམ་པ་པོ་སྐུ་ཞབས་ཀུན་མཐར་ལགས་ཀྱང་ཕེབས་ཏེ་ལྷན་ཚོགས་སྐབས་ཁོང་གིས་གཏམ་བཤད་གནང་དོན། བོད་ནང་ཕྱི་ལོ་ ༢༠༠༨ ལོའི་དོན་རྐྱེན་བྱུང་རྗེས་རྒྱ་གཞུང་ནས་དྲག་གནོན་ཤུགས་ཆེ་བྱས་པར་བོད་མི་རྩོམ་པ་པོ་མང་པོས་གནད་དོན་དེ་དག་དྲག་པོའི་ཐབས་ལམ་ཐོག་ནས་མིན་པར་ཕན་ཚུན་གྲོས་མོལ་གྱི་ལམ་ནས་སེལ་ཐབས་དགོས་སྐོར་རྒྱ་ནག་གཞུང་ལ་འབོད་སྐུལ་གྱི་ཞུ་ཡིག་དང་རྩོམ་ཡིག་སོགས་སྤེལ་ཡོད་ཀྱང་། རྒྱ་ནག་གཞུང་གིས་བོད་མི་རྩོམ་པ་པོ་དེ་དག་ཁ་བྲལ་བ་དང་ངོ་ལོག་པ་ཡིན་པའི་སྐྱོན་བརྗོད་ཀྱིས་ད་བར་བོད་མི་རྩོམ་པ་པོ་ ༤༠ འཛིན་བཟུང་བྱས་ཏེ་མནར་གཅོད་བཏང་ཡོད། དོན་དངོས་ཐོག་བོད་མི་རྩོམ་པ་པོ་དེ་དག་གིས་རྒྱ་ནག་གི་རྩ་ཁྲིམས་ནང་འཁོད་པའི་སྨྲ་བརྗོད་རང་དབང་དེ་ལོངས་སུ་སྤྱད་པ་ཞིག་རེད། རྒྱ་ནག་གུང་ཁྲན་སྲིད་གཞུང་དེས་རྒྱལ་ཁབ་ཀྱི་རྩ་ཁྲིམས་ལ་མ་རྩིས་པར་བརྟེན་དམར་པོའི་སྲིད་གཞུང་དེས་རྒྱ་ནག་མཚོན་མི་ཐུབ། རྒྱ་ནག་གུང་ཁྲན་སྲིད་གཞུང་གིས་བོད་མི་རྩོམ་པ་པོ་དེ་དག་ལ་སྨྲ་བརྗོད་ཀྱི་རང་དབང་མ་སྤྲད་པར་འཛིན་བཟུང་བཀག་ཉར་འོག་སྡུག་སྦྱོང་བཏང་བ་དེས་རྒྱལ་ཁབ་ཀྱི་རྩ་ཁྲིམས་ལས་བརྒལ་ཡོད། ད་ལྟའི་ཆར་བོད་ནང་བོད་ཀྱི་སྐད་ཡིག་གི་གནས་སྟངས་ཡ་ང་བ་ཞིག་ཆགས་ཡོད། རྒྱ་ནག་གཞུང་གིས་བོད་ཡུལ་དེ་རྒྱ་ཡུལ་དུ་བསྒྱུར་རྒྱུའི་འབད་བརྩོན་འོག་བོད་ཀྱི་སྐད་ཡིག་དེ་བོད་ནང་གྲལ་རིམ་གཉིས་པའི་གནས་སྟངས་ཤིག་བཟོས་ཡོད། བོད་ནང་གི་གཞུང་ལམ་ཕལ་ཆེ་བ་དང་། དེ་བཞིན་བོད་ཀྱི་རི་ཆེན་དང་རྒྱུག་ཆུ་མང་པོ་ཞིག་ལ་བོད་མིང་སྔར་ཡོད་དེ་དག་རྩིས་མེད་ཐོག་རྒྱ་མིང་བཏགས་ཡོད། རྒྱ་ནག་གཞུང་གིས་བཙན་དབང་ཐོག་བོད་ནང་རྒྱ་ཡིག་དང་རྒྱ་སྐད་བེད་སྤྱོད་བྱེད་བཅུག་པ་དེས་བོད་ཀྱི་སྐད་ཡིག་གཏོར་བཤིག་གཏོང་བཞིན་ཡོད་ཅེས་སོགས་ཀྱི་གཏམ་བཤད་བྱས་འདུག སྐབས་དེར་ཀུན་མཐར་ལགས་ཀྱི་གཏམ་བཤད་དེར་ཚོགས་བཅར་བ་རྒྱ་རིགས་རྩོམ་པ་པོ་མང་པོས་ཁས་ལེན་བྱས་འདུག འོན་ཀྱང་སྨྲ་བརྗོད་རང་དབང་དེ་བོད་ཙམ་མིན་པར་རྒྱ་ནག་ཁྱོན་ཡོངས་སུ་དམ་བསྒྲགས་བྱེད་ཀྱི་ཡོད་སྐོར་བརྗོད་ཡོད། ཕྱོགས་མཚུངས་རྒྱ་རིགས་རྩོམ་པ་པོ་མང་པོས་སྐབས་དེར་རྒྱ་ནག་སྐམ་ས་ཆེན་མོའི་ནང་གནས་སྡོད་རྒྱ་རིགས་མང་པོ་ཞིག་གིས་བོད་ཀྱི་༸སྐྱབས་མགོན་ཏཱ་ལའི་བླ་མའི་བཀའ་སློབ་དང་ཁོང་གི་རང་སྲིད་རང་སྐྱོང་གི་དགོངས་བཞེད་དེ་དག་སྐོར་ཤེས་ཀྱི་མེད། དེའི་རྒྱུ་མཚན་གཙོ་བོ་ནི་རྒྱ་ནག་གཞུང་གིས་དམ་བསྒྲགས་ཤུགས་ཆེ་བྱས་པ་དང་། གཉིས་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་བཀའ་སློབ་དེ་དག་རྒྱ་ཡིག་ནང་དེ་ཙམ་བསྒྱུར་མེད་པ་དེས་ཡིན། དེར་བརྟེན་བོད་ཀྱི་༸སྐྱབས་མགོན་ཏཱ་ལའི་བླ་མའི་བཀའ་སློབ་དེ་དག་རྒྱ་ཡིག་ནང་གང་མང་བསྒྱུར་རྒྱུའི་འབད་བརྩོན་དགོས་སྐོར་བརྗོད་ཡོད། རྒྱལ་སྤྱིའི་པེན་རྩོམ་པ་པོའི་མཐུན་ཚོགས་ཀྱི་ལྷན་ཚོགས་སྐབས་གྲོས་ཆོད་གང་བྱུང་བ་དེ་དག་ཕྱོགས་བསྡོམས་ཀྱིས་ཉི་ཧོང་རྒྱལ་ས་ཊོཀ་ཁྱོར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་ལ་ཕུལ་ཡོད། གྲོས་ཆོད་དེའི་ནང་རྒྱ་ནག་དང་བོད་ནང་སྨྲ་བརྗོད་རང་དབང་སྤྲོད་དགོས་པ་མ་ཟད། རྒྱ་ནག་དང་བོད་ནང་འཛིན་བཟུང་བྱས་པའི་རྩོམ་པ་པོ་ཡོངས་རྫོགས་འཕྲལ་དུ་གློད་བཀྲོལ་དགོས་པའི་རེ་འདུན་ཡང་བཏོན་འདུག་པ་བཅས།།