ཕྱི་ལོ་ ༢༠༡༧ ཟླ་ ༡ ཚེས་ ༢༠ རེས་གཟའ་པ་སངས།
༄༅། །ཕྱི་ལོ་ ༢༠༡༧ ཟླ་ ༡ ཚེས་ ༡༨ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྒྱ་གར་མཧཱ་རཱཤཀྲ་མངའ་སྡེའི་ Maharashtra གྲོང་ཁྱེར་པུ་ནེའི་ Pune ནང་རྟེན་གཞི་བྱས་པའི་རྒྱ་གར་སློབ་ཕྲུག་ཚོགས་པ་ Bharatiya Chhatra Sansad Foundation ཞེས་པའི་ལོ་འཁོར་ཚོགས་ཆེན་ཐེངས་བདུན་པའི་སྐུ་མགྲོན་དུ་མགྲོན་འབོད་ལྟར་ཆེད་ཕེབས་ཀྱིས་དགེ་ལས་སློབ་ཕྲུག་བཅས་ལ་གསུང་བཤད་གཟབ་རྒྱས་གནང་ཡོད།
དེ་ཡང་དཔལ་ལྡན་སྲིད་སྐྱོང་མཆོག་རྒྱ་གར་སློབ་ཕྲུག་ཚོགས་པའི་ཚོགས་མི་ཡིན་སྟབས། ཕྱི་ཚེས་ ༡༩ ཉིན་རྒྱ་གར་གྱི་རྩ་རླུང་སྒོམ་སྒྲུབ་སློབ་སྟོན་པ་སྭ་མི་རཱམ་དེབ་ Swami Ramdev མཆོག་གིས་གཙོས་གནད་ཡོད་མི་སྣ་ཁག་གཅིག་ལ་རྒྱ་གར་སློབ་ཕྲུག་ཚོགས་པའི་ལེགས་ སྐྱེས་ཕྱག་རྟགས་ཕུལ་བ་མ་ཟད། ན་ག་ལེན་ Nagaland མངའ་སྡེའི་གྲོས་ཚོགས་ཀྱི་ཚོགས་གཙོ་སྐུ་ཞབས་ཅོ་ཊི་སུ་ས་ཛོ་ Shri.Chotisuh Sazo མཆོག་དང་། རྒྱ་གར་གྲོས་ཚོགས་གོང་མའི་མཐུས་མི་སྐུ་ཞབས་ནརནྡྲེ་ཡ་དབ་ Dr.Narendra Jadhav མཆོག དེ་བཞིན་ཀར་ན་ཊ་ཀ་མངའ་སྡེའི་གྲོས་ཚོགས་གོང་མའི་ཚོགས་གཙོ་སྐུ་ཞབས་ཌི་ཨེ་ཆི་ ཤང་ཀར་མུར་ཐི་ D.H.Shankaramurthy མཆོག་དང་ཧར་ཡ་ན་མངའ་སྡེའི་བློན་ཆེན་ལྕམ་སྐུ་ཀ་ཝི་ཏ་ཇེན་ Smt.Kavita Jain མཆོག་སོགས་དང་མཇལ་འཕྲད་གནང་འདུག །
