༢༠༡༧ ཟླ་ ༡ ཚེས་ ༡༤ རེས་གཟའ་སྤེན་པ།
༄༅། །འདི་གའི་ཆེད་གཉེར་གསར་འགོད་པ་བསོད་ནམས་མཚོ་མོ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༧ ཟླ་ ༡ ཚེས་ ༡༤ ཉིན་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ པ་ལེགས་གྲུབ་ཀྱི་མཛད་སྒོར་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་༸གོང་ས་མཆོག་གིས་དབུས་སྐུ་མགྲོན་གཙོ་བོ་མངའ་སྡེའི་སྤྱི་ཁྱབ་བློན་ཆེན་མཆོག་དང་། ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ། སེར་སྐྱ་མི་མང་ཡོངས་ལ་བཀའ་ཤག་གི་ཚབ་ཞུས་སྟེ་འཚམས་འདྲི་ཞུ་བ་དང་སྦྲགས། གསུང་བཤད་གནང་དོན།
བོད་མིའི་སྒྲིག་འཛུགས་ནས་དུས་འཁོར་དབང་ཆེན་ཐེངས་སོ་བཞི་པ་འདི་གོ་སྒྲིག་ཞུ་རྒྱུའི་བསྐལ་པ་བཟང་པོ་ཐོབ་བྱུང་། ཁ་སང་ཞུ་བ་བཞིན་བོད་མིའི་སྒྲིག་འཛུགས་ནས་གསོལ་བ་བཏབ་པ་ལྟར་༧གོང་ས་མཆོག་གིས་བཀའ་བཞེས་སྨིན་སྩལ་མཛད་ཡོད། ད་ལན་བདུན་ཕྲག་གཉིས་རིང་སྔོན་འགྲོའི་གསུང་ཆོས་དང་དེ་ནས་དུས་འཁོར་དབང་ཆེན་སྩལ་བ་འདི་དམིགས་བསལ་ནང་པ་སངས་རྒྱས་པའི་ཆོས་ལ་དད་པ་བྱེད་མཁན་ཡིན་ན་གནས་མཆོག་རྡོར་གདན་དུ་དུས་དབང་ཞུ་བ་ལས་རྩ་ཆེ་བ་མེད། འདི་ཧ་ལས་པའི་བསོད་ནམས་ཆེན་པོར་ངོས་འཛིན་ཞུ་བཞིན་ཡོད། ང་ཚོར་དུས་དབང་ཐོབ་པ་གཞིར་བཟུང་ང་ཚོའི་ངོས་ནས་གཙོ་ཆེ་ཤོས་བླ་མ་དང་སློབ་མ་གཉིས་དབར་དམ་ཚིག་གཙང་མ་དགོས་རྒྱུ། དེ་བཞིན་ཚང་མས་ཐུགས་སྨོན་གནང་སྟེ་ང་ཚོའི་སྤྱི་བའི་བསོད་ནམས་གོང་མཐོར་གཏོང་དགོས། བསོད་ནམས་གོང་མཐོར་ཕྱིན་ཚེ་བོད་སྤྱི་བའི་རྩ་དོན་ལ་ཕན་ངེས་ཡིན་ལ། ༸གོང་ས་མཆོག་གི་སྐུ་ཁམས་ཡིན་ཡང་དྭངས་གསལ་ཡོང་རྒྱུ། ༸གོང་ས་མཆོག་གིས་བཀའ་གནང་བ་དེ་དག་ཡིད་ལ་བཅངས་པའི་ཐོག་ནས་ཐུགས་སྨོན་གནང་རོགས་གནང་ཞུ་རྒྱུ་ཡིན།
གཙོ་བོ་༸གོང་ས་མཆོག་གི་བཀའ་དྲིན་དང་། དེ་བཞིན་བླ་ཆེན་རྣམ་པའི་བྱིན་རླབས་ལ་བརྟེན་ནས་དུས་དབང་སོ་བཞི་པ་འདི་ལེགས་གྲུབ་དང་ཚགས་ཚུད་པོ་བྱུང་སོང་། གནམ་གཤིས་ཡང་ཡག་ཐག་ཆོད་བསྟན་སོང་། འདི་ནི་བླ་མ་དང་སློབ་མའི་དབར་དམ་ཚིག་གཙང་མ་དང་། སྤྱི་པའི་བསོད་ནམས་ཡིན་བསམ་པའི་ཚོར་སྣང་བྱུང་། མི་མང་ཚོ་ཕྱོགས་གང་ས་ནས་ཕེབས་ཡོད་སྟབས་ཏན་ཏན་སྐུ་ངལ་བྱུང་ཡོད་ངེས་རེད། བོད་མིའི་སྒྲིག་འཛུགས་ངོས་ནས་གྲ་སྒྲིག་ལས་དོན་ཐོག་མཐུད་སྒོ་མ་ཚང་བ་དེ་འདྲ་བྱུང་ཡོད་ན་དེ་དག་ལ་དགོངས་སེལ་ཞུ་རྒྱུ་ཡིན། ད་ལན་དམིགས་བསལ་བྷི་ཧཱར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནི་ཏི་ཤི་ཀུ་མཱར་ མཆོག་ཕྱི་ཟླ་ ༡༢ ཚེས་ ༢༣ ཉིན་དངོས་སུ་ས་གནས་ལ་ཕེབས་སྟེ་གསུང་ཆོས་ར་བས་གཙོས་གང་ཅིའི་ཐད་ནས་གྲ་སྒྲིག་གང་འདྲ་འགྲོ་བཞིན་ཡོད་མེད་གཟིགས་ཞིབ་གནང་བ་མ་ཟད། མངའ་སྡེའི་རྒྱལ་ས་པ་ཊི་ནར་ཆེད་མངགས་ལས་བྱེད་ཆེད་འཛུགས་ཀྱིས་དུས་དབང་གྲ་སྒྲིག་ལས་དོན་སྐོར་ཉིན་རེ་བཞིན་གཟིགས་རྟོག་གནང་བ་དེར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་གྷ་ཡ་གྲོང་ཁྱེར་གྱི་རྫོང་དཔོན་དང་ཨེ་སི་སི་པི།
དེ་བཞིན་ཕྱག་ལས་གནང་མཁན་ཚང་མས་ང་ཚོ་ལས་ལྷག་པ་འཁུར་བླངས་ནས་གློག་དང་ཆུ་སོགས་གང་ཅིའི་ཐད་ནས་མཐུན་རྐྱེན་ཇི་དགོས་སྔར་ལྷག་གནང་བ་དེར་སྙིང་ཐག་པ་ནས་ཐུགས་རྗེ་ཆེ་ཞེས་ཞུ་རྒྱུ་ཡིན། ཉེ་ཆར་རྒྱ་གར་གཞུང་ནས་དངུལ་ལོར་གསར་བརྗེའི་སྲིད་བྱུས་དང་འབྲེལ་ནས་མང་ཚོགས་ལ་དདུལ་རྐྱང་དཀའ་ངལ་མི་ཡོང་ཆེད་བོད་མིའི་སྒྲིག་འཛུགས་ནས་རྒྱ་གར་དབུས་གཞུང་ལ་ཞུས་ནས་དབུས་ནས་དངུལ་ཁང་ཨ་མ་ ཨར་བྷི་ཨའི་བརྒྱུད་ནས་གྷ་ཡ་ཁུལ་ལ་དངུལ་འདོན་སའི་འཕྲུལ་ཆས་ཨེ་ཊི་ཨེམ་ ATM བཙུགས་ནས་དངུལ་འདོན་རྒྱུའི་མཐུན་རྐྱེན་གང་གཟབ་གནང་བར་ཐུགས་རྗེ་ཆེ་གནང་ཞུ་རྒྱུ་ཡིན། བོད་ཀྱི་བརྙན་འཕྲིན་གྱི་དྲ་ལམ་བརྒྱུད་ནས་མི་མང་པོ་ཞིག་གིས་དུས་དབང་ཞུས་ཐུབ་པ་བྱུང་ཡོད། ལྷག་པར་དུ་བོད་ལ་ཡོད་པའི་ཤ་ཁྲག་གཅིག་པའི་བོད་རིགས་སྤུན་ཟླ་ཚོར་ཡང་དེང་དུས་འཁྲུལ་འཁོར་བརྒྱུད་དུས་འཁོར་དབང་ཆེན་ཞུ་ཐུབ་པ་ནི་བསྐལ་པ་བཟང་པོ་ཞིག་ཡིན།
༸གོང་ས་མཆོག་གིས་བཀའ་སྩལ་བ་ལྟར་ཆང་རག་ཚད་ལས་བརྒལ་བ་བཏུང་ནས་ནང་མི་ཕན་ཚུན་རྙོག་གྲ་དང་ཤོ་སྦག་སོགས་རྒྱན་རྩེད་རིགས་ཀྱིས་ནང་མིའི་དཔལ་འབྱོར་ལའང་དོ་ཕོགས་འགྲོ་རྒྱུ་ཡིན། དེ་ལྟར་ཆང་རག་ཚད་མེད་འཐུང་བ་དང་། ཤོ་སྦག་བརྒྱབ་པ། སྤྱི་ཚོགས་ནང་ཐ་མག་ཉེས་ཐག་སོགས་སྤང་རོགས་ཞེས་ཞུ་རྒྱུ་ཡིན། བོད་ཕྱི་ནང་གཉིས་ཀའི་ངོས་ནས་༸གོང་ས་མཆོག་གི་བཀའ་དགོངས་བཞིན་ཤེས་ཡོན་ཐོག་ཤུགས་རྒྱག་རྒྱུ་དེ་གལ་ཆེན་པོ་ཡིན། དེ་བཞིན་བཀའ་ཤག་སྐབས་ ༡༤ དང་ ༡༥ གཉིས་ཀས་ཤེས་ཡོན་དེ་གལ་ཆེ་ཤོས་སུ་ངོས་འཛིན་ཞུ་བཞིན་ཡོད་ཅེས་ཞུ་བཞིན་ཡོད་ལ། བོད་མི་དཔལ་འབྱོར་ཡོད་མཁན་ཚོས་གལ་ཆེ་ཤོས་སོ་སོའི་ནང་མི་སྤུན་མཆེད་དང་། ཁྱིམ་འཚེས། གཙོ་བོ་ཉམ་ཐག་ཚོར་ཤེས་ཡོན་སྤྲོད་རྒྱུར་མཐུན་འགྱུར་གནང་དགོས།
བོད་མི་ཡོངས་ནས་ཤེས་ཡོན་ཐོག་ནུས་པ་མཉམ་སྤུང་དགོས་རྒྱུ་ཤིན་ཏུ་གལ་ཆེན་པོ་ཡིན།འདིའི་ཐོག་ལ་ངེས་པར་འབད་བརྩོན་གནང་རོགས་ཞེས་འབོད་སྐུལ་ཞུ་རྒྱུ་ཡིན། གཙོ་བོ་ང་ཚོའི་བོད་མིའི་རྩ་དོན་བསྒྲུབ་པར་མི་རིགས་ཀྱི་ངོ་བོ་དེ་གལ་ཆེ་ཤོས་ཡིན། དེར་བརྟེན་ཆོས་དང་། རིག་གཞུང་སྐད་ཡིག་དེ་ཚོ་ང་ཚོས་གཞི་རྟེན་རྩིས་པའི་ཐོག་ནས་དེ་དག་མི་ཉམས་རྒྱུན་འཛིན་བྱེད་དགོས། ཕྱི་ལོ་ ༢༠༡༢ ལོར་གནས་མཆོག་རྡོར་གདན་འདིར་དུས་དབང་ཞུ་སྐབས་བཀའ་ཤག་ངོས་ནས་དུས་འཁོར་དབང་ཆེན་གོ་སྒྲིག་ཞུ་ཐུབ་ཚེ་ཡག་པོ་ཞིག་ཡོང་བ་འདུག་སྙམ་བྱུང་། དེ་ལྟར་༸གོང་ས་མཆོག་ལ་གསོལ་འདེབས་ཞུས་པ་བཞིན། ཐེངས་འདིར་ང་རང་སྒེར་ལ་མཚོན་ན་དུས་དབང་ཐེངས་དགུ་པ་ཞུ་རྒུ་བྱུང་བར་བསོད་ནམས་ཆེན་པོ་ཡིན་དྲན་གྱི་འདུག་ལ། ང་རང་སྒེར་ངོས་ནས་མ་འོངས་པར་དུས་འཁོར་དབང་ཆེན་ཐེངས་བཅུ་པ་དེ་བོད་ཀྱི་རྒྱལ་ས་ལྷ་སར་ཞུ་རྒྱུ་བྱུང་བར་ཤོག་ཅེས་སྨོན་ལམ་རྒྱག་རྒྱུ་ཡིན། མཐའ་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བརྟན་ཅིང་ཐུགས་ཀྱི་བཞེད་དགོངས་མཐའ་དག་ལྷུན་གྱི་འགྲུབ་པའི་སྨོན་འདུན་ཞུ་རྒྱུ་ཡིན། ཞེས་གསུང་བཤད་གནང་ཡོད།
སྐབས་དེར་ཨ་རིའི་གློག་བརྙན་འཁྲབ་སྟོན་པ་གྲགས་ཅན་དང་༸གོང་ས་མཆོག་གིས་སློབ་མ་སྐུ་ཞབས་རི་ཆ་ཌི་གྷེར་ལགས་ཀྱིས་གསུང་དོན། ཐེངས་འདིར་ང་ཚོས་བྱམས་བརྩེའི་དམིགས་པ་གཏད་ས་གཙོ་བོ་ནི་གཞིས་ལུས་བོད་མི་རྣམས་ཡིན། ཁོང་ཚོའི་ཁྲོད་དུས་འཁོར་དབང་ཆེན་ཞུ་འདོད་ཡོད་མཁན་མང་པོ་ཞིག་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་བརྟེན་ནས་དཀའ་ངལ་འཕྲད་ཡོད་པ་མ་ཟད། དུས་དབང་བཀའ་ཆོས་ཞུ་མ་ཐུབ་པར་ཕྱིར་རང་ཡུལ་དུ་ལོག་དགོས་ཐུག་པ་རེད། གནས་མཆོག་རྡོ་རྗེ་གདན་དུ་ཕེབས་ཐུབ་མཁན་ཚོ་ཡང་ཕྱིར་ལོག་རྗེས་རང་གི་ཤེས་ཡོན་དང་ལས་ཀའི་གོ་སྐབས་ཤོར་རྒྱུ་དང་། ངོ་སྤྲོད་ལག་འཁྱེར། སྤྱི་ཚོགས་བདེ་འཇགས་སོགས་ཀྱི་ཐོག་རྒྱ་ནག་གཞུང་གིས་སུན་གཙེར་བཟོ་རྒྱུའི་རྣམ་འགྱུར་བསྟན་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་དབང་བཀའ་དྲིན་སྩལ་བར་བརྟེན། འཛམ་གླིང་ནང་ཞི་བདེ་དང་བརྟན་ལྷིང་གོང་མཐོར་འགྲོ་རྒྱུའི་རེ་བ་ཡོད་ཅེས་གསུངས་ཡོད།
