༢༠༡༧ ཟླ་ ༡་ཚེས་ ༡༤ རེས་གཟའ་སྤེན་པ།
༄༅། །འདི་གའི་ཆེད་གཉེར་གསར་འགོད་པ་བསོད་ནམས་མཚོ་མོ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༧ ཟླ་ ༡ ཚེས་ ༡༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྤྱན་རས་གཟིགས་ངན་སོང་ཀུན་གྲོལ་གྱི་སྒྲུབ་ཆོག་བསྐྱངས་ཏེ་རྗེས་གནང་བཀའ་དྲིན་སྩལ་བ་དང་འབྲེལ་བཀའ་སློབ་སྩལ་དོན། དེ་རིང་འདིར་དབང་ཞུ་བར་ཡོང་མཁན་ཚོ་དང་། བརྙན་འཕྲིན་བརྒྱུད་དེ་གསན་གཟིགས་གནང་མཁན་ཡོངས་ནས་ཆང་སོགས་འཐུང་བ་དང་རྒྱན་པོ་འགྱེད་གྱི་རྩེད་མོ་དེ་རིགས་བྱེད་རྒྱུ་མེད། འདིར་ཉིན་ཤས་རིང་རྒྱག་རེས་ཤོར་བ་དེ་འདྲ་གཅིག་ཀྱང་གོ་མ་བྱུང་ཧ་ཅང་ཡག་པོ་རེད། ཚང་མའི་བསམ་བློ་ཞི་ཞིང་དུལ་བ་རེད་འདུག དེ་དང་མཚུངས་པར་བོད་དང་རྒྱ་ནག་ནང་། དེ་བཞིན་འཛམ་གླིང་གི་ས་ཕྱོགས་གང་ས་ནས་དུས་འཁོར་དབང་ཆེན་ཞུ་མཁན་རྣམས་ས་ཆ་གཅིག་ལ་འཛོམས་མེད་ཀྱང་འདུན་པ་གཅིག་གྱུར་གྱི་ཐོག་ནས་རྡོ་རྗེ་སྤུན་གྲོགས་ཆགས་ཡོད། དེར་བརྟེན་བོད་ནང་ནས་དུས་འཁོར་དབང་ཆེན་ཞུ་མཁན་ཁྱེད་རང་ཚོ་མཐུན་པོ་བྱོས།
ཁྱེད་རང་ཚོས་རྐྱེན་ཆུང་རྩག་དེ་འདྲའི་ཐོག་ནས་ང་ཚོ་དང་ཁོ་པ་ཚོ་ཞེས་བཤད་རྒྱུ་བསམ་བློ་འཁོར་སྐབས། ང་ཚོ་དུས་འཁོར་དབང་ཆེན་ཞུ་མཁན་རྡོ་རྗེ་སྤུན་གྲོགས་གཅིག་པ་ཡིན་བསམ་སྟེ་སེམས་ནང་གི་ང་རྒྱལ་དང་ཕྲག་དོག་སོགས་གང་ཐུབ་མར་བཅག་སྟེ་ཐུགས་མཐུན་ཁྲིམས་གཙང་དགོས་རྒྱུ་གལ་ཆེན་པོ་རེད། བོད་ནང་ཡོད་མཁན་ཚོས་དགོངས་པ་འདི་བཞེས་རོགས་ཞུ་རྒྱུ་ཡིན། ང་ཚོ་བོད་པར་ཆ་བཞག་ན་མི་འབོར་ཉུང་ཉུང་རེད། ད་ལྟ་ང་ཚོ་དཀའ་ངལ་གྱི་གནས་སུ་ལྷག་ཡོད་ཀྱང་རིམ་པས་འགྱུར་བ་འགྲོ་རྒྱུ་རེད། འདས་པའི་ལོ་ངོ་དྲུག་ཅུའི་ནང་རྒྱ་ནག་ནང་འགྱུར་བ་ཕྱིན་ཡོད་པ་མ་ཟད་མུ་མཐུད་འགྱུར་བ་འགྲོ་བཞིན་ཡོད། དེར་བརྟེན་ང་ཚོའི་བོད་ནང་ལའང་འགྱུར་བ་ཏན་ཏན་འགྲོ་གི་རེད། འགྱུར་བ་འགྲོ་རྒྱུ་དེ་ཡང་གཞན་གཅེས་པར་འཛིན་ནས་འགྱུར་བ་འགྲོ་རྒྱུ་ཁག་པོ་རེད།
དངོས་ཡོད་གནས་ཚུལ་གྱི་ཐོག་བསམ་བློ་གཏོང་ན་ད་ལྟ་མིར་བཙན་དབང་དང་དབང་ཡོད་བྱས། དཔེར་ན། དུས་འཁོར་དབང་ཆེན་ཞུ་བར་ཡོང་མཁན་ཚོར་ཧ་ཅང་གནོན་ཤུགས་སྤྲད་ཡོད། ས་ཁུལ་ཁག་གཅིག་གི་དཔོན་རིགས་ཚོས་དུས་དབང་ཞུ་རྒྱུ་དེ་ཁྲིམས་འགལ་རེད་ཅེས་བཤད་འདུག ཁྲིམས་དང་འགལ་ཞེས་བརྗོད་སྐབས་ཁྲིམས་གང་ཞིག་ལ་རྩིས་དགོས་ཡོད་མེད་བཤད་དཀའ་བ་རེད། དེ་ལྟ་བུའི་གནོན་ཤུགས་སྤྲད་ཡོད། ཉེ་ལམ་བོད་ནས་ཡོང་མཁན་ཚོས་ཧ་ཅང་སེམས་ཁྲལ་བྱེད་བཞིན་འདུག སྐབས་དེར་ངོས་ཀྱིས་ཁོང་ཚོར་སེམས་ཁྲལ་བྱེད་མི་དགོས། ངོས་ཀྱིས་འདི་ནས་དུས་དབང་སྐབས་ཁྱེད་རང་ཚོ་དམིགས་འོག་ཏུ་བཅུག་ནས་སྨོན་ལམ་བརྒྱབ་ཀྱི་ཡིན། དབང་ཐོབ་ཀྱི་རེད། དེ་ལས་ཁྱེད་རང་ཚོའི་ནང་ལ་དཀའ་ངལ་འཕྲད་ན་ཡག་པོ་མེད་ཅེས་བརྗོད་པ་ཡིན། འདི་ལྟར་གནོན་ཤུགས་སྤྲད་ན་སུ་ཞིག་ལའང་ཕན་ཐོགས་མེད། ཕྱོགས་གཅིག་ནས་འཆམ་མཐུན་དགོས་ཡོད་ཟེར་བཞིན་ཡོད། འོན་ཀྱང་བརྟན་ལྷིང་དང་འཆམ་མཐུན་མི་ཡོང་བའི་ལས་ཀ་བྱེད་བཞིན་ཡོད། འདི་དངོས་ཡོད་གནས་ཚུལ་རེད། བོད་ལ་ཡོད་མཁན་ཚོས་ང་རང་ཚོའི་གནས་སྟངས་འདི་ལྟ་བུ་ཞིག་ཡོད་པའི་སྐབས་ཚང་མ་ཐུགས་མཐུན་ཁྲིམས་གཙང་དགོས་རྒྱུ་ཧ་ཅང་གལ་ཆེན་པོ་ཡིན།
དཔེར་ན། ང་ཚོ་ཁམས་པ་དང་། ཨ་མདོ། དབུས་གཙང་། མངའ་རིས་ཞེས་སོགས་ཀྱི་སྐད་ཆ་ནི་ཆུང་རྩག་ཅིག་ཆགས་ཡོད། དེ་བཞིན་རྒྱ་དང་བོད་ཅེས་མི་རིགས་ཀྱི་འགལ་ཟླའི་སྐད་ཆ་དེ་ཡང་མི་དགོས་པ་ཞིག་རེད། བར་སྐབས་ནས་མི་རིགས་ཀྱི་སྐད་ཆ་ཞིག་སླེབས་བཞིན་འདུག དེ་ཡང་ཁག་མི་འདུག རྒྱ་ནག་ནང་བོད་པ་གཅིག་ཟ་ཁང་ལ་ཕྱིན་ན་གནས་ཚང་མི་གཡར་རྒྱུ་ལྟ་བུ་མི་རིགས་དབྱེ་འབྱེད་བྱེད་དུས་ཁག་མི་འདུག དེ་ལྟ་བུའི་མི་རིགས་ཀྱི་འགལ་ཟླ་ཡོང་རྒྱུའི་རྒྱུ་རྐྱེན་མང་པོ་ཞིག་ཡོང་བཞིན་ཡོད། མ་གཞི་བོད་ནང་ཡོད་པའི་རྒྱ་ཆེའི་མི་མང་ཚོ་ཧ་ཅང་ཡག་པོ་རེད་འདུག བོད་ནང་ནས་ཡོང་མཁན་མང་པོ་ཞིག་གིས་རྒྱ་མི་རིགས་མང་པོ་ཞིག་ཡུལ་སྐོར་སྤྲོ་འཆམ་དུ་སྐྱོད་སྐབས་བོད་པ་ཚོ་མི་འདྲ་བ་ཞིག་ཡོད་སྐོར་བཤད་ཀྱི་འདུག བསྔགས་བརྗོད་བྱེད་ས་ཞིག་ཆགས་ཡོད། དེ་བཞིན་བོད་ཀྱི་ཕྱིར་ཡོད་མཁན་བོད་པ་ཚོར་ཡང་བསྔགས་བརྗོད་བྱེད་ཀྱི་འདུག ད་དུང་ཡིན་ནའང་ང་རང་ཚོར་ངོམས་སུ་ཆོག་པ་ཡོད་པ་ནི་སེམས་པ་བཟང་པོ་དང་དྲང་པོ་བྱེད་རྒྱུ་དེ་ཧ་ཅང་གལ་ཆེན་པོ་རེད། དེར་བརྟེན་གཅིག་གིས་གཅིག་ལ་འཆམ་པོ་བྱོས། དེ་བཞིན་ཆོས་ལུགས་ཀྱི་འཐེན་ཁྱེར་བྱེད་རྒྱུ་དེ་ཀླད་པ་ཆུང་དྲགས་པས་རེད། དེ་ལྟ་བུའི་འཐེན་འཁྱེར་བྱེད་ན་རན་པོ་མེད། དོན་དངོས་ཐོག་བསམ་བློ་གཏང་ན་བོད་གངས་ཅན་ལྗོངས་ཀྱི་ཆོས་ལུགས་ཚང་མ་སྟོན་པ་བཀའ་དྲིན་ཅན་གྱི་རྗེས་འབྲང་པ་རེད། ཅེས་སོགས་ཀྱི་བཀའ་སློབ་སྩལ་ཡོད།།
