༢༠༡༠ ཟླ་ ༩ ཚེས་ ༢༣ རེས་གཟའ་ཕུར་བུ།
༄༅། ཕྱི་ལོ་ ༢༠༡༠ ཟླ་ ༩ ཚེས་ ༡༩ མཚན་མོར་རྡ་ཤོད་སློབ་གྲྭའི་སློབ་ཕྲུག་ཁག་གཅིག་དང་དེ་རྗེས་མང་པོ་ཞིག་ལ་བཤལ་ནད་ཕོག་སྟེ་དཀའ་ངལ་མང་དག་འཕྲད་ཡོད་ཀྱང་ད་ཆ་ཛ་དྲག་གི་ཉེན་ཁ་ལས་གྲོལ་ཡོད་སྐོར་འདི་གའི་གསར་འགོད་པར་རྡ་ཤོད་སློབ་གྲྭའི་སློབ་སྤྱིས་འགྲེལ་བརྗོད་གནང་བྱུང་བས་ཐག་རིང་དུ་གནས་པའི་ཕ་མ་རྣམས་ཐུགས་ཁྲལ་མི་དགོས་པ་ཞུ་རྒྱུ་ཡིན། སྐབས་དེར་ནད་མནར་གྱུར་བའི་སློབ་ཕྲུག་རྣམས་ལ་གཟིགས་རྟོགས་སླད་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས། འཕྲོད་བསྟེན་དྲུང་ཆེ་དབང་ཕྱུག་ཕ་ཟུར་ལགས། བོད་ཁྱིམ་སྤྱི་ཁྱབ་འགན་འཛིན་ཚེ་དབང་ཡེ་ཤེས་ལགས། བདེ་ལེགས་སྨན་ཁང་གི་འགན་འཛིན་དང་བོད་མི་མང་སྤྱི་འཐུས་ཟླ་བ་ཕུན་སྐྱིད་ལགས། སྐུའི་སྨན་ཞབས་པ་རྟ་མགྲིན་ལགས། ཕྱི་ལུགས་ཀྱི་སྐུའི་བླ་སྨན་པ་ཚེ་བརྟན་ལགས། མངའ་སྡེའི་སྨན་པའི་འགན་འཛིན་ Dr. Kaushik ལགས་བཅས་ནས་རིམ་པས་རྡ་ཤོད་བོད་ཁྱིམ་སློབ་ཕྲུག་མང་པོ་ཞིག་གློ་བུར་ནད་མནར་གྱུར་བ་རྣམས་ལ་སློབ་གྲྭའི་སྨན་ཁང་དང་བདེ་ལེགས་སྨན་ཁང་བཅས་སུ་ཆེད་བསྐྱོད་ཀྱིས་གཟིགས་རྟོགས་གནང་ཡོད། དེ་ཡང་ཕྱི་ཚེས་ ༡༩ མཚན་མོ་ཆུ་ཚོད་ ༣ ཙམ་ལ་ཐོག་མར་སློབ་ཕྲུག་གྲངས་ ༣༠ ཙམ་ལ་ཚ་བ་རྒྱས་པ་དང་བཤལ་བ་སོགས་བྱུང་བ་རེད། ཕྱི་ཚེས་ ༢༠ སྔ་དྲོ་སློབ་ཕྲུག ༡༦༠ ཙམ་དེ་འདྲའི་ནད་མནར་བྱུང་རྐྱེན་ཟས་དུག་གི་ནད་གཞིར་དོགས་གཞི་བྱས་ཏེ་དབུས་སྨན་རྩིས་ཁང་ནས་སྨན་པ་ལྔ་དང་སྐུའི་སྨན་ཞབས་པ་རྟ་མགྲིན་ལགས་བཅས་རིམ་བཞིན་གདན་ཞུས་བྱས་པ་བརྒྱུད་ཁོང་རྣམས་ནས་སློབ་གྲྭའི་ཁྱིམ་ཚང་རེ་རེར་བརྟག་དཔྱད་གནང་སྟེ་དེའི་ནང་ནས་ཚབས་ཆེ་བའི་སློབ་ཕྲུག་གྲངས་ ༡༢ ལ་སྨན་ཆུ་བླུགས་དགོས་གསུངས་པ་ལྟར་སློབ་གྲྭའི་སྨན་ཁང་དུ་བོད་ཁྱིམ་ཕྱི་ལུགས་སྨན་པ་ཆུང་བདག་ལགས་གདན་ཞུས་ཀྱིས་སྨན་ཆུ་བླུགས་པ་རེད། དེའི་ནང་ནས་སློབ་ཕྲུག་གཅིག་ཚ་བ་ཤུགས་ཆེ་རྒྱས་ཏེ་དགོང་དྲོའི་ཆུ་ཚོད་ ༡ ཙམ་ལ་བདེ་ལེགས་སྨན་ཁང་དང་ཀང་རའི་ཉེ་འགྲམ་ཊན་ཊན་སྨན་ཁང་དུ་ཛ་དྲག་གི་བསྟེན་གཏུགས་བྱས་ཀྱང་མ་ཕན་པར་བློ་ཕམ་པ་ཞིག་ལ་ཕྱི་ཚེས་ ༢༡ སྔ་དྲོ་འདས་གྲོངས་སུ་གྱུར་འདུག ཐོག་མར་ནད་གཞི་དེ་སློབ་ཕྲུག་ཆེ་བ་རྣམས་ལ་མ་གཏོགས་ཕོག་མེད་ནའང་རྗེས་སུ་སློབ་ཕྲུག་ཆུང་བ་འགའ་ཤས་ལའང་ཕོག་འདུག སློབ་གྲྭ་ནས་བདེ་ལེགས་སྨན་ཁང་དུ་སློབ་ཕྲུག་གྲངས་ ༤༠ ཙམ་འཁྲིད་ནས་བསྟེན་གཏུགས་བྱས་པ་དང་ཕ་མ་དང་སྒེར་ངོས་ནས་བསྟེན་མཁན་ ༤༠ ཙམ་བྱུང་འདུག དེ་ཉིན་ཕྱི་ཚེས་ ༢༣ ཉིན་བདེ་ལེགས་སྨན་ཁང་དུ་སློབ་ཕྲུག་གཅིག་དང་སློབ་གྲྭའི་སྨན་ཁང་དུ་དེ་ཙམ་གྱི་ཚབས་ཆེན་མེད་ནའང་སློབ་ཕྲུག་གྲངས་ ༡༡ ཉར་ཡོད། ཁྱོན་བསྡོམས་སློབ་ཕྲུག་གྲངས་ ༢༠༠ ཙམ་ལ་ཚབས་ཆེན་ཡིན་མིན་ལ་མ་ལྟོས་པའི་ནད་གཞི་དེ་ཕོག་ཡོད་སྟབས་རྡ་ཤོད་བོད་ཁྱིམ་དུ་ཁྱོན་བསྡོམས་སློབ་ཕྲུག ༧༧༨ ཡོད་པ་རྣམས་ཕྱི་ཚེས་ ༢༥ བར་ཉིན་གྲངས་ལྔའི་རིང་འཕྲོད་བསྟེན་སློབ་སེང་བཞག་པ་རེད།
ཕྱི་ཚེས་ ༢༡ ཉིན་ཤེས་རིག་དྲུང་ཆེ་ཀརྨ་དགེ་ལེགས་ལགས་ཀྱིས་ནད་རྟགས་གསལ་པོ་ངོ་འཕྲོད་པ་དང་སྨན་བཅོས་ཀྱིས་དྲག་སྐྱེད་ཡོང་གི་ཡོད་ན་ཉེན་ཁ་ལས་གྲོལ་བའི་ལན་བརྡ་ཞིག་སློབ་ཕྲུག་ཚོའི་ཕ་མ་ཚོར་གནང་གལ་ཆེ་ལུགས་སློབ་སྤྱིར་བརྗོད་ཡོད་འདུག དེ་བཞིན་ཕྱི་ལུགས་སྐུའི་བླ་སྨན་ཚེ་བརྟན་ལགས་སོགས་ཀྱིས་སློབ་གྲྭའི་ཐབ་ཚང་དང་གཉེར་ཚང་ནང་ལྟ་སྐོར་སྐབས་ལམ་སྟོན་ཡང་གནང་འདུག་ལ་མངའ་སྡེའི་སྨན་པའི་འགན་འཛིན་སོགས་འབྲེལ་ཡོད་གོང་འཁོད་མཛད་གཙོ་རྣམ་པས་རོགས་རམ་ཇི་དགོས་འབྲེལ་བ་གནང་དགོས་པའི་བཀའ་མངགས་ཀྱང་གནང་འདུག ཐག་རིང་དུ་བཞུགས་པའི་ཕྲུ་གུའི་ཕ་མ་སུ་ཞིག་ནས་འདི་གར་རང་གི་ཕྲུ་གུའི་ཆེད་བཀའ་དྲི་གནང་འདོད་ཡོད་ཚེ་གཤམ་གསལ་ཁ་པར་ཨང་གྲངས་ཐོག་གནང་ན་འཐུས།
༩༨༡༦༦༢༩༠༦༤
Tel: 9816629064
