༢༠༡༧ ཟླ་ ༡ ཚེས་ ༡༠ རེས་གཟའ་མིག་དམར།
༄༅། །ཕྱི་ལོ་ ༢༠༡༧ ཟླ་ ༢ ཚེས་ ༢༡ ནས་ ༢༣ བར་ཉིན་གྲངས་གསུམ་རིང་རྡ་སར་རྟེན་གཞི་བྱས་པའི་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་བུད་མེད་ནུས་སྟོབས་གོང་སྤེལ་ཚན་པའི་ Women’s Empowerment Desk གོ་སྒྲིག་འོག་བུད་མེད་ནུས་སྟོབས་གོང་སྤེལ་གྱི་ཚོགས་ཆེན་ཐེངས་དང་པོ་གོ་སྒྲིག་ཞུ་གཏན་འཁེལ་འདུག
དེ་ཡང་ལྷན་ཚོགས་སྐབས་ལས་རིགས་འདྲ་མིན་གཉེར་བཞིན་པའི་བུད་མེད་དང་སྐྱེས་པ་བཅས་ཁྱོན་མི་གྲངས་ ༢༥༠ མཉམ་ཞུགས་གནང་རྒྱུ་ཡིན་འདུག་པ་དང་། སྐབས་དེར་བོད་མིའི་སྒྲིག་འཛུགས་ཀྱིས་བུད་མེད་ནུས་ཤུགས་གོང་མཐོར་གཏོང་རྒྱུའི་སྲིད་བྱུས་ཐད་བསྐྱར་ཞིབ་གནང་བའི་ཡིག་ཆ་ཞིག་ངོ་སྤྲོད་གནང་རྒྱུ་མ་ཟད། སྲིད་བྱུས་དེའི་ཐོག་མཁས་པ་དང་མང་ཚོགས་ཁྲོད་ལེགས་སྤེལ་ཉེས་འགོག་གི་བསམ་ཚུལ་བསྡུ་རུབ་ཞུ་རྒྱུ་དང་། སྲིད་བྱུས་ཀྱི་འབྲུ་དོན་རེ་རེ་བཞིན་ལག་བསྟར་ཚགས་ཚུད་ཇི་ལྟར་གནང་དགོས་མིན་ཐད་བསམ་ཚུལ་བསྡུ་རུབ་དང་། བསམ་ཚུལ་གང་བྱུང་བའི་ཐོག་ཚོགས་ཞུགས་པ་རྣམས་ཀྱིས་ཕན་ཚུན་གོ་བསྡུར་སྦྱང་བཤད་གནང་རྒྱུ་ཡིན་འདུག
ཕྱོགས་མཚུངས་ལྷན་ཚོགས་སྐབས་འཛིན་སྐྱོང་འགན་ཁུར་གནང་ཕྱོགས་དང་། འགོ་ཁྲིད། ཕོ་མོ་འདྲ་མཉམ་གྱི་ཐོག་ནས་སྤྱི་ཚོགས་ཡར་རྒྱས་ཀྱི་ཕྱོགས་སུ་གོམ་པ་མདུན་སྤོ་བྱེད་སྟངས། བཟའ་ཚང་ནང་ཁུལ་བུད་མེད་ལ་ཉེས་རྡུང་དང་བརྙས་བཅོས་བཏང་བའི་གནས་སྟངས་བཅས་བརྗོད་གཞི་དེ་དག་ཐོག་ལའང་བགྲོ་གླེང་གནང་བ་བརྒྱུད་བོད་མིའི་སྤྱི་ཚོགས་ཁྲོད་ཕོ་མོ་འདྲ་མཉམ་དང་བུད་མེད་ཀྱི་ནུས་ཤུགས་གོང་མཐོར་གཏོང་རྒྱུའི་ཐད་མང་ཚོགས་སྤྱི་བྱིངས་ཀྱི་བསམ་བློའི་གོ་རྟོགས་མཐོ་རུ་བཏང་ནས་སྤྱི་སྒེར་གཉིས་ཀྱི་སྤྱི་ཚོགས་ཀྱི་རྨང་གཞི་སྲ་བརྟན་གཏོང་ཐབས་ཞུ་རྒྱུ་ཡིན་འདུག །
