༢༠༡༧ ཟླ་ ༡ ཚེས་ ༤ རེས་གཟའ་ལྷག་པ།
༄༅། །འདི་གའི་ཆེད་གཉེར་གསར་འགོད་པ་བསོད་ནམས་མཚོ་མོ་ལགས་ནས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༧ ཟླ་ ༡ ཚེས་ ༤ ཉིན་གནས་མཆོག་རྡོ་རྗེ་གདན་གྱི་དུས་དབང་གསུང་ཆོས་ར་བའི་ནང་དུས་དབང་གོ་སྒྲིག་ཚོགས་ཆུང་གིས་གསར་འགོད་ལྷན་ཚོགས་ཤིག་སྐོང་ཚོགས་གནང་སོང་།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༣།༣༠ ཐོག་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ གོ་སྒྲིག་ཚོགས་ཆུང་གི་ཚོགས་གཙོ་དང་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་ཚོགས་གཞོན་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གཉིས་དབུ་བཞུགས་ཐོག གཞུང་དང་གཞུང་འབྲེལ་མིན་པའི་ཕྱི་ནང་གི་གསར་འགོད་པ་འདུ་འཛོམས་སུ་དུས་དབང་གོ་སྒྲིག་ཚོགས་ཆུང་གི་ཚོགས་གཙོ་མཆོག་གིས་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་དབུ་འཛུགས་མཛད་ནས་སློབ་མ་རྗེས་འཛིན་དང་ས་ཆོག ས་གར་སོགས་གྲུབ་ཟིན་པ་དང་། སང་ཉིན་ཕྱེད་ཡོལ་ནས་སྔོན་འགྲོའི་གསུང་ཆོས་ལ་སྤྱོད་འཇུག་ཆེན་མོ་དང་། སྒོམ་རིམ་བར་པའི་གསུང་ཆོས་བསྩལ་རྒྱུ། དེ་རྗེས་དུས་འཁོར་དབང་ཆེན་གྱི་སྟ་གོན་སོགས་དབང་ཆེན་བང་སྒྲིག་ཏེ་འགྲོ་རྒྱུ་རེད། ངས་རྒྱས་པ་ཞུས་མ་དགོས་པར་ང་ཚོའི་མཛད་རིམ་དེ་དག་བོད་མིའི་སྒྲིག་འཛུགས་ཀྱི་དྲ་རྒྱའི་ཐོག་གཟིགས་ཐུབ་རྒྱུ་ཡོད་པ་མ་ཟད་ཕྱོགས་གང་སར་ཡོད།
དེ་རིང་འདིར་དམིགས་བསལ་ཞུ་རྒྱུར། ཐེངས་འདིའི་དུས་དབང་འདི་བཞིན་བོད་མིའི་སྒྲིག་འཛུགས་དང་ཡོན་བདགཉི་ཤུ་རྩ་གྲངས་ཤིག་མཉམ་རུབ་ཞུས་ཡོད་པ་དང་དེའི་ཆེད་ཚོགས་ཆུང་ཟུར་འཛུགས་ཞུས་ཡོད། ད་བར་གྲ་སྒྲིག་ཆ་ཚང་ཐོག་མའི་འཆར་གཞི་ལྟར་ཡག་ཐག་ཆོད་དཀའ་ངལ་མེད་པའི་ཐོག་ཕྱིན་ཡོད། ཐེངས་འདིའི་གྲ་སྒྲིག་ཐོག་ཕྱོགས་གང་ས་ནས་གྲ་སྒྲིག་པོ་ཡོང་དགོས་དོན་ནི་རྒྱ་གར་གྱི་མངའ་སྡེ་གཞུང་དང་ས་གནས་རྫོང་ལས་ཁུངས་ནས་མི་ཆའི་མཐུན་རྒྱུར་ཙམ་མིན་པར་འགྲོ་གྲོན་ཕོན་ཆེ་བཏང་སྟེ་མཉམ་རུབ་ཞུས་ཡོད། དེར་བརྟེན་ངས་བོད་མིའི་སྒྲིག་འཛུགས་དང་དུས་དབང་གོ་སྒྲིག་ཚོགས་ཆུང་གི་ངོས་ནས་ཐུགས་རྗེ་ཆེ་ཞུ་རྒྱུ་དང་སྦྲགས། བསྔགས་བརྗོད་ཀྱང་ཞུ་རྒྱུ་ཡིན། ཐེངས་འདིའི་དུས་དབང་ཐོག་བོད་ནས་ཆོས་ཞུ་བ་མང་པོ་ཞིག་ཕེབས་འདོད་ཡོད་ཀྱང་ཕེབས་ཐུབ་མེད་པ་དང་། ཁག་གཅིག་ཕེབས་ཐུབ་ཡོད་ཀྱང་དུས་བཀག་གཅིག་གི་ནང་ཕྱིར་ལོག་བྱེད་དགོས་པའི་གནས་སྟངས་ཆགས་ཡོད། རྒྱ་ནག་གཞུང་གིས་བོད་ནང་ཆོས་དད་རང་དབང་ཡོད་ལུགས་བཤད་ཀྱི་ཡོད་ཀྱང་། སོ་སོའི་དད་པ་ཡོད་སའི་བླ་མའི་དྲུང་ནས་ཆོས་ཞུས་མ་བཅུག་པ་དང་ཁོང་གི་སྐུ་པར་ཉར་མི་ཆོག་སྟབས། ཆོས་དད་རང་དབང་ཡོད་ལུགས་ཤོད་བཞིན་པ་དེ་དྲི་རྟགས་ཀྱི་རང་བཞིན་ཞིག་ཆགས་ཡོད། བོད་མིར་དམ་བསྒྲགས་དང་བཀག་སྡོམ་བྱེད་རྒྱུ་དེ་དག་རྒྱ་ནག་དབུས་གཞུང་དང་ས་གནས་གཞུང་རང་གི་སྲིད་བྱུས་ཡིན་མིན་ཞིབ་ཕྲ་ཞུ་དཀའ་ཡང་། གང་ལྟར་འདི་ལྟར་བྱེད་རྒྱུ་ནི་ཧ་ཅང་ཐབས་སྐྱོ་པོ་རེད། དེར་ང་ཚོར་ཧ་ཅང་བློ་ཕམ་ཡོད་ཅེས་ཞུ་རྒྱུ་ཡིན།
གནད་དོན་གཞན་ཞིག་ནི་རྒྱ་གར་གཞུང་ནས་དངུལ་ལོར་གྱི་ཐོག་དམ་བསྒྲགས་བྱེད་རྒྱུ་སྟབས་འཁེལ་བར་བརྟེན། མང་པོ་ཞིག་གིས་དེ་རྐྱེན་པས་དུས་དབང་ཚུགས་ཐུབ་མིན་དང་གྲ་མ་སྒྲིག་པ་ཡོང་རྒྱུའི་ཐོག་དྲི་བ་འདྲི་མཁན་དང་དགོངས་ཚུལ་ཡོད་མཁན་བྱུང་ཡོད། དེ་རིང་འདིར་གསལ་པོར་ཞུ་རྒྱུ་ཞིག་ལ་དུས་དབང་འཚོགས་རྒྱུ་དང་གྲ་སྒྲིག་ཞུ་རྒྱུར་དངུལ་ལོར་གྱི་རྐྱེན་པས་དཀའ་ངལ་ཆེ་བ་རིགས་གང་ཡང་བྱུང་མེད། ལས་དོན་ཆ་ཚང་འཆར་གཞིའི་ཐོག་འགྲོ་ཐུབ་པ་བྱུང་སོང་། གཉིས་ནས་མངའ་སྡེའི་གཞུང་ནས་ཆོས་ཞུ་བ་ཚོར་དངུལ་འདོན་རྒྱུའི་མཐུན་རྐྱེན་སྦྱར་ཆེད་དངུལ་འདོན་འཕྲུལ་ཆས་ཉི་ཤུ་ཐམ་པ་ཟུར་འཛུགས་གནང་བ་ཙམ་མ་ཟད། འཕྲུལ་ཆས་དེ་དག་གི་ནང་དངུལ་ལོར་འབོལ་པོ་ཡང་འདུག དེར་བརྟེན་དམིགས་བསལ་དཀའ་ངལ་ཆེ་བ་བྱུང་མེད། མི་མང་ངོས་ནས་ཀྱང་དེའི་ཐོག་དཀའ་ངལ་ཡོད་པའི་རྣམ་འགྱུར་ཆེ་བ་ཡོང་གི་མི་འདུག ཅེས་ཞུ་འདོད་བྱུང་།
དེ་རིང་འདིར་གསར་འགྱུར་བརྒྱུད་ལམ་གྱི་མི་སྣ་མང་པོ་ཞིག་ཕེབས་ཡོད་པར་བརྟེན། གསར་འགྱུར་ཙམ་མིན་པར་མང་ཚོགས་ལ་བརྒྱུད་ལམ་འདིའི་བརྒྱུད་དམིགས་བསལ་འབོད་སྐུལ་དོན་ཚན་གསུམ་ཞུ་འདོད་བྱུང་།
༡༽ ང་ཚོས་གང་ས་ཅི་ཐད་ནས་གྲ་སྒྲིག་རྒྱ་ཆེ་ཞུས་ཡོད། གུར་དང་ཤིང་ཁང་སོགས་མང་པོ་གྲ་སྒྲིག་ཞུས་ཡོད་པ་མ་ཟད། དེ་ཚོའི་ནང་གློག་དེ་དག་གྲ་རྒྱས་པོ་བཙུགས་ཡོད་སྟབས་མེ་སྐྱོན་གྱི་ཉེན་ཁ་ཡོད། དེ་བཞིན་བྷི་ཧཱར་མངའ་སྡེའི་གཞུང་ནས་ཀྱང་འདས་པའི་ཉམས་མྱོང་ལ་གཟིགས་ཏེ་ཉེན་ཁ་ཡོད་ལུགས་བཀའ་གསལ་ཕེབས་པ་ལྟར། ང་ཚོའི་ངོས་ནས་མཐུན་རྐྱེན་གང་ཐུབ་སྦྱར་ཡོད་ཀྱང་མི་མང་མི་རེ་ངོ་རེ་ནས་དེ་དོན་དོགས་ཟོན་དང་སྤྱང་གྲུང་གནང་རྒྱུ་གལ་ཆེན་པོ་ཡིན།
༢༽མང་ཚོགས་ཁྲོད་གཏམ་འཆལ་དང་དཀྲོག་གཏམ། དཀྲུག་ཤིང་བྱེད་མཁན་ཡོང་སྲིད་སྟབས། མི་མང་རྣམས་དབུ་མ་འཁོར་བར་ལམ་སེང་ཡིད་ཆེས་མ་གནང་བར་བརྟག་དཔྱད་གནང་རྒྱུ་གལ་ཆེན་པོ་རེད། ལྷག་པར་ཆེད་དུ་གཉེར་ནས་དཀྲོག་གཏམ་རིགས་བཟོ་མཁན་དོགས་གཞི་ཡོད་ན་འབྲེལ་ཡོད་ལས་ཁུངས་སོ་སོའི་ལས་བྱེད་ལ་སྙན་སེང་ཞུ་རྒྱུ་གལ་ཆེན་པོ་རེད། གང་ལ་ཞེ་ན། སྐུ་ཕྱྭའི་སྲུང་སྐྱོབ་དང་མི་མང་གི་བདེ་འཇགས་ཀྱི་འགན་ནི་ང་ཚོ་ཚང་མར་འཁྲི་ཡོད་སྟབས་ཚང་མས་སྐུ་སྲུང་གི་འགན་འཁུར་ཐུབ་ན་ཡག་པོ་འདུག ཅེས་འབོད་སྐུལ་འཕར་མ་ཞིག་ཞུ་རྒྱུ་ཡིན།
༣༽ དུས་འཁོར་དབང་ཆེན་གྱི་རིང་༸སྐུ་མདུན་གྱི་ཚེ་སྒྲུབ་དང་ཆོས་ཞུ་བ་རང་ཉིད་ཀྱི་ཚོགས་བསོད་ནམས་གསོག་ཆེད་སོ་སོའི་ངོས་ནས་དཀར་སྐྱོང་གནང་རོགས། ཞེས་ཞུ་རྒྱུ་ཡིན། ཞེས་གསུངས་གྲུབ་མཚམས། དུས་དབང་གོ་སྒྲིག་ཚོགས་ཆུང་གི་ཚོགས་གཙོ་སྦྲེལ་པོ་མཆོག་གིས་ཧིན་སྐད་དང་ཨིན་སྐད་ཐོག་གོང་གི་གནད་དོན་ཁག་གསུངས་གྲུབ་བསྟུན། གསར་འགོད་པ་རྣམས་ཀྱི་དྲི་བར་ལན་འདེབས་གནང་ཡོད་པ་བཅས།།
