༢༠༡༧ ཟླ་ ༡ ཚེས་ ༡ རེས་གཟའ་ཉི་མ།
༄༅། །འདི་གའི་ཆེད་གཉེར་གསར་འགོད་པ་བསོད་ནམས་མཚོ་མོ་ལགས་ནས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༧ ཟླ་ ༡ ཚེས་ ༡ ཉིན་གྱི་ཕྱི་དྲོ་ཆུ་ཚོད་ ༤ ཡོལ་ཙམ་ལ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་རྒྱ་གར་བྱང་ཕྱོགས་བྷི་ཧཱར་མངའ་སྡེའི་རྒྱལ་པ་ཊི་ན་བརྒྱུད་ནང་པ་སངས་རྒྱས་པའི་གནས་མཆོག་རྡོ་རྗེ་གདན་དུ་ཕེབས་འབྱོར་བྱུང་ཡོད།
དེ་རྗེས་ཐོག་མར་སྲིད་སྐྱོང་མཆོག་གིས་དུས་འཁོར་དབང་ཆེན་གྱི་ཆོས་རར་གཟིགས་སྐོར་གནང་གྲུབ་བསྟུན། མ་ཧ་ཡ་ན་གསོལ་མགྲོན་ཁང་དུ་དཔལ་ལྡན་སྲིད་སྐྱོང་མཆོག་དབུ་བཞུགས་ཐོག་དཔལ་དུས་ཀྱི་འཁོར་ལོའི་དབང་ཆེན་གྱི་ཡོན་བདག་རྣམས་དང་ལྷན་དུས་དབང་དང་འབྲེལ་བའི་ཐོག་ཚོགས་འདུ་ཚོགས་ཡོད།
སང་ཉིན་ཕྱི་ཚེས་ ༢ ཉིན་ནས་སྤྱི་ནོར་༸གོང་ས་༸སྐྱབས་མགོན་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ པ་དབུ་འཛུགས་བསྐྱངས་ཏེ་ཕྱི་ཚེས་ ༤ བར་དུས་འཁོར་དབང་ཆེན་གྱི་ས་ཆོག་ཆོ་ག་དང་སློབ་མ་རྗེས་འཛིན། ཕྱི་ཚེས་ ༥ ནས་ ༨ བར་སྔོན་འགྲོའི་གསུང་ཆོས་སུ་སྤྱོད་འཇུག་དང་སྒོམ་རིམ་བར་པ་བཀའ་དྲིན་བསྩལ་རྒྱུ། དེ་རྗེས་ཕྱི་ཚེས་ ༩ ཉིན་དཀྱིལ་འཁོར་བརྒྱན་ཅིང་མཆོད་པ། ཕྱི་ཚེས་ ༡༠ ཉིན་བཀའ་དབང་སྔོན་འགྲོ་སློབ་མ་སྟ་གོན། ཕྱི་ཚེས་ ༡༡ ནས་ ༡༣ བར་བཀའ་དབང་དངོས་གཞི། ཕྱི་ཚེས་ ༡༤ ཉིན་༸གོང་ས་མཆོག་གིས་སྤྱན་རས་གཟིགས་ངན་སོང་ཀུན་ གྲོལ་གྱི་རྗེས་སྣང་བསྩལ་རྒྱུ་དང་། དེ་བཞིན་༸གོང་ས་མཆོག་ལ་སྒྲོལ་དཀར་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག་པ་བཅས།།
