༢༠༡༦ ཟླ་ ༡༢ ཚེས་ ༢༩ རེས་གཟའ་ཕུར་བུ།
༄༅། །འདི་གར་ཤེས་རིག་ལས་ཁུངས་ནས་བཏང་གནས་ནང་འཁོད་དོན། མོན་གྷོ་གཞིས་ཆགས་ཀྱི་བོད་མིའི་གཏན་སློབ་དབུ་བརྙེས་ནས་མི་ལོ་ ༥༠ འཁོར་བའི་དུས་ཆེན་མཛད་སྒོའི་ཐོག་ཤེས་རིག་ལས་ཁུངས་ནས་འདོན་སྤེལ་ཞུས་པའི་བོད་མིའི་ངོ་བོ། ཞེས་པའི་དཔེ་དེབ་ཞིག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་དཔལ་ལྡན་སྲིད་སྐྱོང་མཆོག་ནས་དབུ་འབྱེད་གནང་ཡོད།
དེ་ཡང་ཨ་རིར་བཅའ་བཞུགས་ཉི་ཧོང་པ་རི་མ་ཕུ་ཇི་ཏ་ལགས་ནས་བོད་མིའི་ངོ་བོ་ངོས་འཛིན་དང་དྲན་སྐུལ་གྱི་ལས་རིམ་ཞིག་སྤེལ་འཆར་ཡོད་པ་༸གོང་ས་མཆོག་ལ་སྙན་འབུལ་ཞུས་ཤིང་། རྗེས་སོར་འདི་ག་ཤེས་རིག་ལས་ཁུངས་སུའང་འབྲེལ་བ་བྱུང་དོན་ལྟར། གནད་དོན་འདི་ཉིད་གལ་ཆེར་ངོས་འཛིན་དང་སྦྲགས་བོད་མིའི་ངོ་བོ་ངོས་འཛིན་དང་། དེའི་དགོས་དོན། བདག་ཉར་གཅེས་འཛིན་དགོས་པའི་རྒྱུ་མཚན། ཐི་གུ་སྣེ་ཤོར་མི་འགྲོ་བའི་ཐབས་ཤེས། མི་རིགས་གཞན་ལ་ཕན་པ་སྒྲུབ་ཐུབ་པའི་ནུས་པ་སོགས་ནང་དོན་སྣ་ཚོགས་ཐད་རང་ལོ་ ༡༦ ནས་ ༣༥ བར་གྱི་བོད་མི་གཞོན་སྐྱེས་ཚོའི་གོ་རྟོགས་དང་བསམ་ཚུལ་ཤོད་སའི་གླེང་སྟེགས་ཙམ་མ་ཟད། བྱ་དགའ་ལེགས་གསོལ་ཡང་ཡོད་པའི་རྒྱ་ཁྱབ་གསལ་བསྒྲགས་བྱས་པར། རང་རིགས་དོན་གཉེར་ཅན་ ༤༧ ནས་འབྲི་རྩོམ་ཕུལ་འབྱོར་ཁོངས། བོད་ཡིག་ནང་གྲངས་ ༡༩ དང་། ཨིན་ཡིག་ནང་ ༢༨ བྱུང་བར།
སྐད་ཡིག་སྡེ་ཚན་སོ་སོར་དཔྱད་ཞིབ་པ་གསུམ་རེའི་ཨང་ཐོབ་ཁོ་ནར་གཞི་བཅོལ་ཏེ་མཐར་འདེམས་ཐོན་བྱུང་བའི་འབྲི་རྩོམ་གྲངས་ ༢༤ ཕྱོགས་བསྒྲིགས་ཀྱིས་བོད་མིའི་ངོ་བོ་ཞེས་པའི་དཔེ་དེབ་དེ་བཞིན་པར་བསྐྲུན་དང་སློབ་ཁག་ཚང་མར་རིན་མེད་འགྲེམས་སྤེལ་ཞུ་རྒྱུ་དང་འབྲེལ། མ་འོངས་པར་དཔེ་དེབ་འདི་བརྒྱུད་རང་རེའི་སྤྱི་ཚོགས་ནང་གནད་དོན་འདིའི་ཐོག་དོ་སྣང་དང་གོ་རྟོཌ་འཕེལ་བའི་རེ་བ་དང་ཆབས་ཅིག དཔེ་དེབ་འདི་ཉིད་འགྲེམས་སྤེལ་ཟིན་པའི་རྗེས་སུའང་སློབ་གྲྭ་ཁག་དང་རང་རེའི་སྤྱི་ཚོགས་ནང་བགྲོ་གླེང་དང་། གོ་བསྡུར། གཏམ་བཤད་སོགས་གང་ལ་ཅི་འོས་ཀྱི་ལས་འགུལ་སྤེལ་གནང་ཡོང་བའི་འབོད་སྐུལ་ཞུ་རྒྱུ་ཡིན།
