༢༠༡༦ ཟླ་ ༡༢ ཚེས་ ༢༧ རེས་གཟའ་མིག་དམར།

༄༅། །ཕྱི་ལོ་ ༢༠༡༦ ཟླ་ ༡༢ ཚེས་ ༢༡ ཉིན་རྗེ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་ཆེན་པོས་ཕྱག་བཏབ་མཛད་པའི་གདན་ས་ཆེན་པོ་དཔལ་ལྡན་འབྲས་དཀར་སྤུངས་པ་དབུ་བརྙེས་ནས་མི་ལོ་ཧྲིལ་པོ་དྲུག་བརྒྱ་འཁོར་བའི་བཀའ་དྲིན་རྗེས་དྲན་གྱི་མཛད་སྒོར་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་གསུང་བཤད་གནང་དོན།

དེ་རིང་གི་དུས་སྟོན་འདི་དང་དམིགས་བསལ་འབྲེལ་བ་ཆགས་པ་གཞིས་དང་བྱེས་ཀྱི་གདན་ས་དཔལ་ལྡན་འབྲས་སྤུངས་ཀྱི་གདན་ས་ཆེན་པོ་གཉིས་ཀྱི་ནང་ད་ལྟ་བཞུགས་བཞིན་པའི་བླ་སྤྲུལ་མཁན་སློབ་འདུས་མང་ཡོངས་ལ་བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་ངོས་ནས་དམིགས་བསལ་འཚམས་འདྲི་ཡང་བསྐྱར་ཞུ་རྒྱུ་ཡིན། དེ་དང་ཆབས་ཅིག་དུས་སྟོན་ཁྱད་པར་ཅན་འདི་སྲུང་བརྩི་ཞུ་རྒྱུའི་ཐོག་མའི་འཆར་འགོད་དང་། གྲ་སྒྲིག་གནང་མཁན་འབྲས་སྤུངས་བླ་སྤྱི་དབུས་པའི་འབྲེལ་ཡོད་ཚང་མས་གྲ་སྒྲིག་ལས་དོན་ཐོག་མཐུན་འགྱུར་གནང་མཁན་ཡོངས་ལ་ལེགས་གསོལ་བསྔགས་བརྗོད་ཞུ་རྒྱུ་ཡིན། 

གདན་ས་ཆེན་པོ་དཔལ་ལྡན་འབྲས་དཀར་སྤུངས་པས་འདས་པའི་མི་ལོ་བརྒྱ་ཕྲག་དྲུག་རིང་སྟོན་པ་མཉམ་མེད་ཤཱཀྱ་ཐུབ་པའི་མདོ་སྔགས་ཀྱི་བསྟན་པ་སྤྱི་དང་། བྱེ་བྲག་འཕགས་ཡུལ་ནཱ་ལེནྡྲའི་ཆོས་བརྒྱུད་དྲི་མ་མེད་པ། ཡང་སྒོས་འཇམ་མགོན་རྒྱལ་བ་གཉིས་པ་མཉམ་མེད་ཙོང་ཁ་པ་ཆེན་པོ་ནས་ཉེ་བར་བརྒྱུད་པའི་རི་བོ་དགེ་ལྡན་པའི་བསྟན་པ་བཅས་ལ་ཤེས་སྒྲུབ་གཉིས་ཀྱི་སྒོ་ནས་འཛིན་སྐྱོང་སྤེལ་གསུམ་ཇི་ལྟར་མཛད་པའི་ཚུལ་དང་། དེ་དག་ལ་བརྟེན་ནས་བསྟན་པ་དང་སེམས་ཅན་ལ་ཕན་ཐོགས་རྒྱ་ཆེན་པོ་ཇི་ལྟར་བྱུང་ཡོད་པའི་ཚུལ་རྣམས་ཡིད་ལ་དྲན་པའི་སྒོ་ནས་དེ་རིང་གི་དུས་སྐབས་འདིའི་ཐོག་གདན་ས་ཆེན་པོ་འདིའི་ཁྱོན་ཡོངས་ཀྱི་མཛད་རྗེས་ལ་རྗེས་སུ་ཡི་རངས་དང་བདག་ཅག་འདིར་འདུས་ཚང་མས་སྙིང་ནས་རྗེས་སུ་ཡི་རངས་དང་བཀའ་དྲིན་རྗེས་དྲན་ཞུ་འོས་པ་ཞིག་ཏུ་མཐོང་གི་ཡོད།

དེ་བཞིན་མི་ལོ་དྲུག་བརྒྱ་ཐམ་པའི་རིང་དཔལ་ལྡན་འབྲས་སྤུངས་གདན་ས་ཆེན་པོ་འདི་ཉིད་ཐོག་མར་ཕྱག་བཏབ་མཁན་རྗེ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་མཆོག་གིས་དབུས་པའི་མཁས་གྲུབ་གཉིས་ལྡན་གྱི་སྐྱེས་བུ་དམ་པ་ནམ་མཁའི་སྐར་ཚོགས་ལྟར་ཤིན་ཏུ་མང་པོ་བྱོན་ཏེ་བསྟན་པ་ལ་བྱ་བ་རླབས་པོ་ཆེ་མཛད་ཡོད་པའང་དུས་སྟོན་འདིའི་ཐོག་ནས་རྗེས་དྲན་ཞུ་འོས་པ་ཞིག་ཏུ་མཐོང་ལགས།

ལྷག་པར་ཕྱི་ལོ་ ༡༩༥༩ ལོ་ནས་བོད་དུ་དུས་འགྱུར་མི་ཟད་པ་བྱུང་འབྲས་གདན་ས་ཆེན་པོ་འདིའི་འཚོ་བཞུགས་གཉིས་ཀར་དགོན་སྡེ་གཞན་ཕོན་ཆེ་དང་གཅིག་མཚུངས་མིང་གི་ལྷག་མ་ཙམ་དུ་གྱུར་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་གཅིག་ལ་བརྟེན་ནས་བཙན་བྱོལ་དུ་འབྱོར་བའི་དགེ་འདུན་པ་རྣམས་ལ་ཐོག་མར་འཕྲལ་སེལ་ཆོས་སྒར་རིམ་བཙུགས་བརྒྱུད་མཐར་ཕྱི་ལོ་ ༡༩༧༩ ལོར་རྒྱ་གར་ལྷོ་ཕྱོགས་ཀར་ཎ་ཊ་ཀའི་མངའ་ཁོངས་ཀྱི་གདན་ས་འདི་ཉིད་དུ་དགེ་འདུན་ཞལ་གྲངས་སུམ་བརྒྱ་ཡས་མས་གཞིས་སྤོས་ཀྱིས་དགོན་པའི་རྟེན་གཞི་ས་བོན་འཚོ་རྟེན་ས་ཞིང་འདེབས་ལས། སྔར་སྲོལ་གཞུང་ཆེན་སློབ་གཉེར་སླར་གསོ། ས་ཆུ་མ་འཕྲོད་པ་དང་། ཟས་བཅུད་མ་འདང་པ་སོགས་སྐུ་ངལ་བརྒྱ་ཕྲག་ལྷུར་བཞེད་ཀྱིས་གདན་སའི་རྟེན་གཞི་གྲྭ་རྒྱུན་སློབ་འཇུག་སོགས་སྒོ་གང་ས་ནས་རིམ་པས་ཡར་རྒྱས་སུ་ཕྱིན་ཏེ་ཕྱི་ལོ་ ༢༠༠༠ ལོར་གཏན་བཞུགས་དགེ་འདུན་ཞལ་གྲངས་ ༣༦༠༠ སྐོར་དང་། ཕྱི་ལོ་ ༢༠༡༠ ལོར་གཏན་བཞུགས་དགེ་འདུན་ཞལ་གྲངས་ ༥༦༠༠ ལྷག་ཙམ་བར་འཕེལ་རྒྱས་ཕྱིན་ཡོད་པ་མ་ཟད། ཚོགས་ཆེན་དང་གྲྭ་ཚང་། ཁང་ཚན་བཅས་ཀྱི་ཚོགས་ཁང་སོགས་སྤྱིའི་རྟེན་ཁང་གསར་སྐྲུན་རྒྱ་སྐྱེད་ཐོག་ཡར་རྒྱས་ཧ་ཅང་ཆེན་པོ་ཕྱིན་ཡོད། བཙན་བྱོལ་དུ་གདན་སའི་སྣོད་བཅུད་གཉིས་དང་སློབ་གཉེར་ཐོག་བསམ་ཡུལ་ལས་འདས་པའི་ཡར་རྒྱས་གོང་འཕེལ་དེ་ལྟར་བྱུང་ཡོད་པ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བྱིན་མཐུ་གཙོ་བོ་དང་། དེའི་ཐོག་མཁན་པོ་དང་ཕྱག་མཛོད་ལས་གནས་རིམ་པ་མང་པོས་བསྟན་དོན་ལྷག་བསམ་དང་དཀའ་སྤྱད་སྙིང་རུས་ཟམ་མ་ཆད་པ་བཅངས་པའི་གྲུབ་འབྲས་ཡིན་པ་གདོན་མི་ཟ་བས་ཚང་མས་བཀའ་དྲིན་རྗེས་དྲན་དང་ལས་བྱེད་ལ་རྗེས་སུ་ཡི་རངས་གནང་འོས་སུ་མཐོང་། 

དེ་ནས་དེ་རིང་དཔལ་ལྡན་འབྲས་སྤུངས་ཕྱག་བཏབ་ནས་ལོ་དྲུག་བརྒྱ་འཁོར་བའི་དུས་སྟོན་ཁྱད་པར་ཅན་དང་ལྷན་གཅིག་ཏུ་མ་སྒྲིག་ལྷུན་གྲུབ་ལྟ་བུར་ཕལ་ཆེར་འདས་པའི་ལོ་གསུམ་བཞིའི་ནང་ཐོན་པའི་གདན་ས་ཆེན་པོ་སེ་འབྲས་དགའ་གསུམ་གྱི་དགེ་བཤེས་ལྷ་རམས་པ་དང་། སློབ་དཔོན། བཀའ་རམས་པ་བཅས་ཁྱོན་ ༧༠༠ ཡས་མས་ཤིག་ལ་དེ་རིང་ཕྱག་འཁྱེར་འབུལ་བཞེས་གནང་རྒྱུའི་དུས་སྐབས་འཁེལ་ཡོད། དེར་བརྟེན་ཕྱག་འཁྱེར་བཞེས་མཁན་ཡོངས་ལ་ངས་ཆོས་རིག་ལས་ཁུངས་ཀྱི་ཚབ་ཞུས་ཏེ་སྙིང་ཐག་པ་ནས་འཚམས་འདྲིའི་བཀྲ་ཤིས་བདེ་ལེགས་ཞུ་བཞིན་ཡོད། ཅེས་སོགས་ཀྱི་གསུང་བཤད་གནང་།།