༢༠༡༦ ཟླ་ ༡༢ ཚེས་ ༢༧ རེས་གཟའ་མིག་དམར།

༄༅། །ཕྱི་ལོ་ ༢༠༡༦ ཟླ་ ༡༢ ཚེས་ ༢༡ ཉིན་རྗེ་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན་པ་ཆེན་པོས་གདན་ས་ཆེན་པོ་དཔལ་ལྡན་འབྲས་དཀར་སྤུངས་པ་ཕྱག་བཏབ་ནས་མི་ལོ་ཧྲིལ་པོ་དྲུག་བརྒྱ་འཁོར་བའི་མཛད་སྒོར་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གསུང་བཤད་གནང་དོན།

 ༸གོང་ས་མཆོག་གིས་བཀའ་འབྲེལ་ལྟར་ས་གནས་རྫོང་དཔོན་དང་མོན་གྷོ་འདོད་རྒུ་གླིང་བོད་མིའི་ས་གནས་འགོ་འཛིན་ནས་མཚན་རྟགས་བཀོད་པའི་ཡིག་ཆ་འདི་མོན་གྷོ་འདོད་རྒུ་གླིང་གཞིས་ཆགས་ཡོངས་རྫོགས་ས་ཐིག་བརྒྱབ་སྟེ་ཡིག་ཐོག་ཕབ་ནས་དེ་རིང་ནས་བཟུང་ཁྲིམས་མཐུན་ཐོག་མོན་གྷོ་འདོད་རྒུ་གླིང་བོད་མིའི་ཆགས་འདི་ཉིད་བོད་མིའི་ངལ་སེལ་ཚོགས་པ་ Central  Tibetan Relief Committee  བརྒྱུད་བོད་མི་རྣམས་ནས་བེད་སྤྱོད་གཏོང་ཆོག་པའི་རྫོང་དཔོན་ལས་ཁུངས་ནས་བཀའ་འཁྲོལ་ཐོབ་པ་ཞིག་ཆགས་ཡོད། མོན་གྷོ་འདོད་རྒུ་གླིང་གི་ས་ཞིང་རྣམས་ཁྲིམས་མཐུན་ཆགས་ཡོད་སྟབས་གཏམ་བཟང་ཞིག་ཀྱང་ཆགས་ཀྱི་ཡོད། ད་ནས་བཟུང་ཀར་ཎ་ཊ་ཀ་མངའ་སྡེའི་བརྒྱུད་ནས་ Insurance གཙོས་པའི་ཞིང་འབྲོག་ཁག་གིས་མཐུན་འགྱུར་རོགས་རམ་ཞུ་རྒྱུ་ཡོད་པའི་མཐུན་རྐྱེན་སྦྱར་ཡོད་པར་བརྟེན། ངས་ཀར་ཎ་ཊ་ཀ་མངའ་སྡེ་གཞུང་དང་རྫོང་དཔོན་ལས་ཁུངས་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།

སྤྱིེར་དེ་རིང་གི་དུས་སྟོན་ཐོག་ལོ་རྒྱུས་ཐོག་ནས་ངས་བསམ་བློ་གཏང་སྐབས།  དུས་རབས་བཞི་པ་ནས་ཕལ་ཆེར་དུས་རབས་བཅུ་གསུམ་བར་ལོ་ཧ་ལམ་སྟོང་ཕྲག་གཅིག་རིང་དཔལ་ནཱ་ལེནྡྲ་ཆེན་པོར་སངས་རྒྱས་ཀྱི་བསྟན་པ་དར་འདུག   ཉེ་བའི་ཆར་རྒྱ་གར་མཁས་པ་ཚོས་རྒྱ་གར་གྱི་དཔལ་ཡོན་དང་། ཆོས་ཕྱོགས། དཔལ་འབྱོར་བཅས་ཀྱི་ཐོག་ནས་འཛམ་གླིང་ནང་དར་འཕེལ་ཆེ་ཤོས་ནི་དཔལ་ནཱ་ལེནྡྲ་ཆེན་པོ་དར་རྒྱས་ཀྱི་དུས་སྐབས་དེ་ཆགས་ཡོད་སྐོར་གསུང་བཞིན་འདུག དེ་ནི་གཙོ་བོ་དཔལ་ནཱ་ལེནྡྲའི་པཎྜི་ཏ་སོགས་མཁས་པ་ཚོ་ལ་བརྟེན་ནས་བྱུང་བ་ཞིག་རེད་འདུག

དེ་ནས་དུས་རབས་བཅུ་གསུམ་ནང་དཔལ་ནཱ་ལེནྡྲའི་གཙུག་ལག་ཁང་གཏོར་བཤིག་བཏང་ཡོད། འོན་ཀྱང་དུས་རབས་བདུན་པ་བརྒྱད་པའི་སྐབས་སུ་བོད་པའི་ལོ་ཙཱ་བ་ཚོས་བོད་ནས་རྒྱ་གར་འཕགས་པའི་ཡུལ་དུ་ཕེབས། ལེགས་སྦྱར་གྱི་སྐད་ཡིག་སྦྱང་རྗེས་སངས་རྒྱས་བཅོམ་ལྡན་འདས་ཀྱིས་གསུང་པའི་ནང་ཆོས་ཕྱག་དཔེ་ཚང་མ་བོད་ཡིག་ནང་བསྒྱུར་ནས་དཔལ་ནཱ་ལེནྡྲའི་ལྟ་གྲུབ་བོད་ནང་དར་འཕེལ་ཐུབ་པ་བྱུང་ཡོད། སྐབས་དེ་དུས་འཛམ་གླིང་སྤྱི་ཡོངས་ལ་གཟིགས་པ་ཡིན་ནའང་བོད་ནང་བཞིན་ནཱ་ལེནྡྲའི་ལྟ་གྲུབ་ཐོག་ལ་མཆོག་ཏུ་གྱུར་བའི་མཁས་པ་དང་། སློབ་དཔོན་བྱུང་བ་མེད། འོན་ཀྱང་ཀུན་གཟིགས་པཎ་ཆེན་རིན་པོ་ཆེ་མཆོག་གིས་གསུང་གསལ་ལྟར་ན། རྒྱ་ནག་གིས་བོད་བཙན་བཟུང་བྱེད་པའི་སྐབས་དང་། བོད་བཙན་བཟུང་བྱས་རྗེས་ཆོས་བརྒྱུད་ཁག་གི་གདན་ས་ཁག་གཙོས་པའི་དགོན་སྡེ་བརྒྱ་ ༩༨ རྩ་མེད་བཏང་ཡོད།

དགེ་བཙུན་ཡང་བརྒྱ་ཆ་ ༩༩ ལྷག་ཆོས་ཉམས་ལེན་བྱས་མ་བཅུག་པའི་དུས་ཚོད་ཧ་ཅང་ཉག་ཕྲ་བོ་ཞིག་ཆགས་པ་རེད། ཡིན་ནའང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་གཅིག་དང་། བཙན་བྱོལ་དུ་འབྱོར་འཕྲལ་སྦག་ས་ཆོས་སྒར་གྱི་དགེ་འདུན་པ་སོགས་ཀྱིས་སྐུ་ལས་བསྐྱོན་པ་ལ་བཅས་བརྟེན་ནས་ཐོག་མར་གདན་ས་ཆེན་པོ་འབྲས་སྤུངས་ཀྱིས་གཙོས་གདན་ས་ཁག་ཡོངས་རྫོགས་རྩ་ཁང་དང་ཤིང་ཁང་སོགས་ནས་སྒོ་བཙུགས་ཏེ་ད་ཆ་བཙན་བྱོལ་བ་འདྲ་འདྲའི་ནང་ནས་མི་འདྲ་ཙམ་གྱི་གནས་སྟངས་འདིའི་འོག་གདན་ས་ཆེན་པོ་འབྲས་སྤུངས་ཕྱག་བཏབ་ནས་ལོ་ངོ་ཧྲིལ་པོ་དྲུག་བརྒྱ་འཁོར་བའི་དུས་སྟོན་སྲུང་བརྩི་ཞུ་ཐུབ་པ་འདི་འདྲ་རེད།  དེར་བརྟེན་༸གོང་ས་༸སྐྱབས་མགོན་ཆེན་པོ་མཆོག་དང་སྦག་ཆོས་སྒར་གྱི་དགེ་འདུན་རྣམས་ཀྱི་བཀའ་དྲིན་ནམ་ཡང་མ་བརྗེད་པར་ཐུགས་ལ་བཞག་རོགས། ཞེས་ཞུ་རྒྱུ་ཡིན། 

དེ་བཞིན་ཟླ་འདིའི་ཕྱི་ཚེས་ ༡༨ ནས་ ༢༠ བར་ཉིན་གྲངས་གསུམ་རིང་དཔལ་ལྡན་འབྲས་སྤུངས་མཁས་མང་བློ་གསལ་བྱེ་བའི་གླིང་གི་གཙུག་ལག་ཁང་དུ་ནང་ཆོས་མཁས་དབང་དང་ཚན་རིག་མཁས་པའི་དབར་བགྲོ་གླེང་བྱུང་བ་རེད། ཉིན་གྲངས་གཉིས་རིང་བཅར་རྒྱུ་བྱུང་། དེ་སྔ་ཡིན་ནའང་བཅར་མྱོང་ཡོད། སྤྱིར་ཆོས་དང་ཚན་རིག་ཟེར་དུས་ཆོས་ཉམས་ལེན་བྱེད་མཁན་ཡེ་ཤུ་དང་ཁ་ཆེ་དེ་འདྲ་ཡིན་པ་ཡིན་ན། ལྟ་བ་མཁྲེགས་པོ་འཁྱེར་མཁན་ཚོས་ཆོས་དང་ཚན་རིག་ཟེར་དུས་འགལ་ཟླ་ཡོད་པར་རྩི་བཞིན་ཡོད། ཚན་རིག་པ་ཟེར་དུས་ཆོས་དད་མེད་མཁན། ཆོས་ལ་ཡིད་ཆེས་མེད་མཁན་རྩི་གི་ཡོད། འོན་ཀྱང་༸གོང་ས་མཆོག་གིས་དབུ་ཁྲིད་དང་ལམ་སྟོན་འོག་གདན་ས་ཁག་གི་དགེ་བཤེས་རྣམ་པས་ཚན་རིག་སྦྱངས། སྔོན་མའི་ལོ་ཙཱ་བ་ནང་བཞིན་ཨིན་ཡིག་སྦྱངས་གནང་སྟེ། ཚན་རིག་མཁས་པ་དང་ནང་ཆོས་མཁས་པའི་དབར་བགྲོ་གླེང་བྱུང་ཡོང་དུས་རང་བཞིན་གྱིས་སེམས་ཁམས་རིག་པའི་ཐོག་ནས་ནང་ཆོས་གཏིང་ཟབ་པོ་ཇི་འདྲ་ཡོད་མེད་གསལ་པོ་འགྲེམས་སྤེལ་བྱེད་ཐུབ་ཀྱི་འདུག  ཅེས་སོགས་ཀྱི་གསུང་བཤད་གནང་།།