༄༅། །ཕྱི་ལོ་ ༢༠༡༦ ཟླ་ ༡༢ ཚེས་ ༡༦ ཉིན་གློ་སྨོན་ཐང་གི་དཔལ་ལྡན་མི་རྗེ་འཇིགས་མེད་རྡོ་རྗེ་དཔལ་འབར་མཆོག་དགུང་གྲངས་ ༨༦ ཐོག་བལ་ཡུལ་གྱི་རྒྱལ་སར་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་བོད་མི་མང་སྤྱི་འཐུས་ལྷན་ཚོགས་ཀྱིས་བཙུན་མོ་སྐུ་འཁོར་དང་བཅས་པར་ཐུགས་གསོའི་འཕྲིན་ཡིག་ཅིག་སྤེལ་བའི་ནང་འཁོད་དོན།   ཉེ་སྔོན་ཕྱི་ལོ་ ༢༠༡༦ ཟླ་ ༡༢ ཚེས་ ༡༦ ཉིན་གློ་སྨོན་ཐང་གི་དཔལ་ལྡན་མི་རྗེ་འཇིགས་མེད་རྡོ་རྗེ་དཔལ་འབར་མཆོག་དགུང་གྲངས་ ༨༦ ཐོག་བལ་ཡུལ་གྱི་རྒྱལ་སར་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་པར་བོད་མི་མང་སྤྱི་འཐུས་རྣམས་ཤིན་ཏུ་བློ་ཕམ་དང་ཡིད་སྐྱོའི་གནས་སུ་གྱུར།

རྒྱལ་པོ་དམ་པ་དེ་ཉིད་ཀྱིས་བལ་ཡུལ་གྱི་མཐའ་མཚམས་ས་ཁུལ་དེ་ལྟ་བུའི་ནང་སངས་རྒྱས་ཀྱི་བསྟན་པ་རིན་པོ་ཆེ་རྒྱུན་གནས་ཐུབ་པའི་ཐུགས་འཁུར་ཆེ་བཞེས་མཛད་ཡོད་པ་དང་། རྒྱུན་དུ་རང་གི་འབངས་མི་སེར་རྣམས་ལ་བྱམས་སྐྱོང་གི་གཟིགས་པ་རྒྱ་ཆེ་གནང་ཡོད་པ། ལྷག་པར་གློ་ཁུལ་བོད་མི་སྐྱབས་བཅོལ་དུ་འབྱོར་སྡོད་རྣམས་ལའང་སྔ་ཕྱི་བར་གསུམ་དུ་ཐུགས་བརྩེ་བྱམས་གཟིགས་ཆེན་པོས་གང་ཅིའི་མཐུན་འགྱུར་རོགས་སྐྱོར་བཀའ་དྲིན་བསྐྱངས་ཡོད་པ་བཅས་ལ་བཀའ་དྲིན་རྗེས་དྲན་ཞུ་བ་དང་སྦྲགས།  ད་རེས་བཙུན་མོ་མཆོག་སྐུ་འཁོར་དང་མངའ་ཁོངས་མི་མང་བཅས་པར་བོད་མི་མང་སྤྱི་འཐུས་ལྷན་ཚོགས་ནས་གདུང་སེམས་མཉམ་སྐྱེད་དང་འབྲེལ་ཐུགས་གསོ་ཞུ་རྒྱུ་དང་། དམ་པ་གང་ཉིད་ཀྱི་ཚེ་རབས་ཕྲེང་བ་ནས་བསགས་པའི་སྡིག་ལྟུང་མ་ལུས་པ་བྱང་ཞིང་དག་སྟེ་རྣམ་མཁྱེན་རྒྱལ་བའི་གོ་འཕང་མྱུར་དུ་ཐོབ་པའི་སྨོན་འདུན་ཞུ་རྒྱུ་བཅས།  བོད་མི་མང་སྤྱི་འཐུས་ལྷན་ཁང་ནས་ཕྱི་ལོ་ ༢༠༡༦ ཟླ་ ༡༢ ཚེས་ ༢༣ ལ་ཕུལ།  ཞེས་འཁོད་འདུག །